ანგელოზები გვეხმარებიან
1 „აჰა, მე თქვენთანა ვარ ყოველდღე საუკუნის დასასრულამდე“ — რა გამამხნევებელი სიტყვებია მათთვის, ვინც იესოს მცნებას ასრულებს: „წადით და მოიმოწაფეთ“ (მათ. 28:18—20). იესო ანგელოზებს იყენებს, რათა ჭეშმარიტ ქრისტიანებთან იყოს (მათ. 13:36—43). რამდენად ამაღელვებელია „მარადიული სასიხარულო ცნობის“ (აქ) გაცხადება ამ ერთგულ სულიერ ქმნილებებთან ერთად! (გამოცხ. 14:6, 7).
2 მსახურებაში. ბიბლია გვიმჟღავნებს, რომ ანგელოზები წარმოგზავნილნი არიან ‘მათდა სამსახურად, ვინც ხსნა უნდა დაიმკვიდროს’ (ებრ. 1:14). პირველ საუკუნეში ანგელოზები იესოს მიმდევრებს ეხმარებოდნენ ღირსეულების პოვნაში (საქ. 8:26). დღესაც, ღვთის მსახურებს აქვთ მტკიცება იმისა, თუ როგორ ხელმძღვანელობენ ანგელოზები. არაერთხელ უთქვამთ მობინადრეებს, რომ ისინი ლოცულობდნენ დახმარებისთვის, როდესაც მათ კართან იეჰოვას მოწმეები მივიდნენ. ჭეშმარიტად ვხარობთ ანგელოზებთან ერთად, როცა ასეთი ადამიანები ეხმაურებიან სამეფოს შესახებ ცნობას! (ლუკ. 15:10).
3 წინააღმდეგობის პირისპირ. დანიელმა, მისმა სამმა ახალგაზრდა ებრაელმა მეგობარმა, პეტრე მოციქულმა და მრავალმა სხვამ, რომლებმაც გადაიტანეს დიდი გამოცდა, საკუთარ თავზე გამოსცადეს იეჰოვას მფარველობა — „ძალით ძლიერთა“, ანგელოზთა, მეშვეობით (ფსალმ. 102:20; დან. 3:28; 6:21, 22; საქ. 12:11). დროდადრო თავს უძლურებად ვგრძნობთ, განსაკუთრებით მაშინ, როცა წინააღმდეგობას ვაწყდებით. მაგრამ ჩვენთვის გამამხნევებელი იქნება ელისეს მსახურის შემთხვევის გახსენება, როდესაც მან დაინახა, რომ ‘მათ მხარეს უფრო მეტი იყო, ვიდრე მტრის მხარეს’ (4 მეფ. 6:15—17). მაშინაც კი, როცა იძულებით გვაცალკევებენ ქრისტიანი ძმებისგან, გული არ უნდა გავიტეხოთ. ღვთის სიტყვა გვარწმუნებს, რომ „დაიბანაკებს ანგელოზი უფლისა მის მოშიშთა ირგვლივ და გადაარჩენს მათ“ (ფსალმ. 33:8).
4 მალე ანგელოზთა ჯარი ამხედრდება, რათა მოსპოს ქრისტეს სამეფოს ყველა მოწინააღმდეგე (გამოცხ. 19:11, 14, 15). ახლა კი, სანამ ამ დღეს ველოდებით, უშიშრად განვაგრძოთ იეჰოვას განდიდება; სრულად დარწმუნებულნი ვიყოთ ქრისტეს ხელმძღვანელობით ზეციური ჯარის დიდ მხარდაჭერაში (1 პეტ. 3:22).