მადლიერება გამოხატე იეჰოვას სიკეთისთვის
ქრისტეს სიკვდილის გახსენების საღამო აღინიშნება 24 მარტს
1. როგორ გამოავლინა იეჰოვამ სიკეთე ჩვენ მიმართ?
1 ფსალმუნმომღერალმა აღტაცებით თქვა: „დაე მადლობა უთხრას ხალხმა იეჰოვას მისი სიკეთისთვის და ადამიანის ძეებისთვის გაკეთებული საოცარი საქმეებისთვის“ (ფსალმ. 107:8, აქ [106:8]). ღვთის სიკეთე უფრო მეტს გულისხმობს, ვიდრე მხოლოდ იმას, რომ ღმერთს სათუთი გრძნობები აქვს ადამიანების მიმართ. ეს კარგად ჩანს ღვთის შთაგონებით წარმოთქმულ ქება-დიდების სიტყვებში: „შენი წყალობა [„შენი სიკეთე“, აქ], უფალო, გამამაგრებს“ (ფსალმ. 93:18). იეჰოვამ მართლაც უდიდესი სიკეთე გამოავლინა, როდესაც თავისი მხოლოდშობილი ძე შემოგვწირა! (1 იოან. 4:9, 10).
2. როგორ შეგვიძლია იეჰოვასადმი მადლიერების გამოვლენა?
2 რამდენადაც ქრისტეს სიკვდილის გახსენების საღამო ახლოვდება, როგორ შეგვიძლია მადლიერება გამოვავლინოთ „სიკეთის ღმერთის“ მიმართ? (ფსალმ. 59:17, აქ [58:18]). თითოეულს გვსურს, რომ დრო გამოვყოთ დედამიწაზე იესოს ცხოვრების ბოლო პერიოდზე დასაფიქრებლად (ფსალმ. 142:5). აგრეთვე სასარგებლო იქნება, მივყვეთ გახსენების საღამოსთან დაკავშირებულ ბიბლიის კითხვის გეგმას, რომელიც მოცემულია 2005 წლის ბროშურაში „საღვთო წერილის ყოველდღიური განხილვა“. თუ შესაძლებელია, დამატებით წაიკითხე 112—116-ე თავები წიგნიდან „ყველაზე დიდებული ადამიანი“ და ბიბლიაზე დაფუძნებული სხვა პუბლიკაციები. გარკვეული მონაკვეთების წაკითხვის შემდეგ შეჩერდი და ღრმად ჩაუკვირდი წაკითხულს (1 ტიმ. 4:15). ღვთის სიტყვაზე ლოცვით დაფიქრება არა მხოლოდ კვებავს ჩვენს გულს, არამედ აღგვძრავს კიდეც იეჰოვასადმი სიყვარულის გამოსავლენად (მათ. 22:37).
3, 4. ა) როგორ შეგვიძლია მივბაძოთ ლიბერიელ ძმებს? ბ) ვის მოწვევას აპირებ გახსენების საღამოზე?
3 აღძარით სხვები ღვთისადმი მადლიერების გამოსავლენად. გასულ წელს გახსენების საღამოს 16 760 607 ადამიანი დაესწრო მთელ მსოფლიოში. ლიბერიის ერთ-ერთ სოფელში მცხოვრებმა ძმებმა იმ მხარის გამგებელს მისწერეს წერილი, რომელშიც ატყობინებდნენ, რომ განზრახული ჰქონდათ სოფელში უფლის გახსენების საღამოს ჩატარება. გამგებელმა ძმებს ადგილობრივი სტადიონის გამოყენების ნება დართო და იმაზეც იზრუნა, რომ მთელ იმ მხარეში საღამოს ჩატარების თაობაზე განცხადება გაკეთებულიყო და ხალხს დასწრების შესაძლებლობა ჰქონოდა. თუმცა იმ სოფელში მხოლოდ ხუთი მაუწყებელი იყო, გახსენების საღამოს 636 ადამიანი დაესწრო.
4 ჩვენც გვსურს, რაც შეიძლება მეტი ადამიანი დაესწროს გახსენების საღამოს. რატომ არ შეადგენდი მათ სიას, ვის მოწვევასაც აპირებ? გამოიყენე 8 მარტის „გამოიღვიძეთ!“ და 15 მარტის „საგუშაგო კოშკი“, რომელთა უკანა გვერდებზე მოცემულია შეთავაზებები. აგრეთვე შეგიძლია გამოიყენო უფლის საღამოზე მოსაწვევი სპეციალური ბარათები. მოსაწვევზე დაბეჭდე ან აკურატულად დაწერე გახსენების საღამოს ჩატარების ზუსტი დრო და ადგილი. ბარათი მიეცი ყველას, ვის მოწვევასაც აპირებ. 24 მარტის მოახლოებამდე კიდევ ერთხელ შეახსენე მოწვეულ სტუმრებს ამის თაობაზე და თავად გაუწიე ორგანიზება სამეფო დარბაზში მათ მიყვანას.
5. როგორ შეგვიძლია ბიბლიის შემსწავლელი აღვძრათ საღამოზე დასასწრებად?
5 როგორ შეგვიძლია დავეხმაროთ ბიბლიის შემსწავლელებს, რომლებიც არ ესწრებიან კრების შეხვედრებს, სრული სარგებლობა მიიღონ საღამოზე დასწრების შედეგად? ყოველი შესწავლის დროს რამდენიმე წუთი დაუთმე ამ დღესასწაულის შესახებ საუბარს და დაეხმარე შემსწავლელს მისი მნიშვნელობის გაგებაში. შესაბამისი მასალის მოძებნა შეგიძლია 2004 წლის 15 მარტის „საგუშაგო კოშკში“, გვერდები 3—7, და წიგნში „შემეცნება“, გვერდი 127.
6. რატომ არის მნიშვნელოვანი, გულთბილად შევხვდეთ გახსენების საღამოზე მოწვეულ სტუმრებს?
6 გულთბილად მიესალმე მოწვეულებს. გულთბილად მიესალმე გახსენების საღამოზე მოწვეულ სტუმრებს (რომ. 12:13). შენი სტუმრების გვერდით დაჯექი და იზრუნე, რომ მათ ბიბლია და სიმღერების წიგნი ჰქონდეთ. განსაკუთრებით არააქტიური და-ძმების მიმართ უნდა გამოვავლინოთ ყურადღება. ჩვენ უნდა გადავდგათ პირველი ნაბიჯი და გულთბილად მივესალმოთ მოსუსტებულებს, რომლებმაც დიდი ძალისხმევა მოახმარეს საღამოზე დასწრებას. ჩვენ მიერ გამოვლენილმა ყურადღებამ და სიყვარულმა შეიძლება აღძრას ისინი, რეგულარულად დაესწრონ კრებებს (ლუკ. 15:3—7). მოდი ამ უმნიშვნელოვანესი მოვლენის დროს შეძლებისდაგვარად ყველაფერი გავაკეთოთ იმისათვის, რომ სხვებმაც ჩვენთან ერთად გამოხატონ იეჰოვასადმი მადლიერება მისი „საოცარი სიკეთისთვის“ (ფსალმ. 31:21, აქ [30:22]).