„შეიყვარეთ უფალი, ერთგულებო“.
იესოს სიკვდილის გახსენების საღამო აღინიშნება 4 აპრილს
1 წლების წინათ, როდესაც უკრაინაში კომუნისტური რეჟიმი იყო, ხელისუფლების წარმომადგენლები უთვალთვალებდნენ მოწმეებს, განსაკუთრებით კი უფლის გახსენების საღამოს მოახლოებისას იმ იმედით, რომ აღმოეჩინათ მათი თავშეყრის ადგილი. ეს ყოველთვის პრობლემას წარმოადგენდა, ვინაიდან ხელისუფლებამ იცოდა გახსენების საღამოს აღნიშვნის დაახლოებითი თარიღი. რისი გაკეთება შეეძლოთ ძმებს? ერთი დის სახლის სარდაფში წყალი ჩადგა. ამ სარდაფში ძმებმა მუხლებამდე მომდგარი წყლის ზემოთ ხის იატაკი გააკეთეს, რადგან ხელისუფლებას აზრადაც არ მოუვიდოდა, რომ ამ ადგილას ხალხი შეიკრიბებოდა. თუმცა ისინი ჩაცუცქულები იჯდნენ იატაკზე დაბალი ჭერის ქვეშ, ხელისუფლების მხრიდან არავის შეუმჩნევია, თუ როგორ ხალისით ჩატარდა გახსენების საღამო.
2 ჩვენი უკრაინელი ძმების გადაწყვეტილება, რომ დამორჩილებოდნენ იესოს სიკვდილის დღის აღნიშვნის მითითებას, მათი მხრიდან ღვთისადმი უდიდესი სიყვარულის გამოვლენა იყო (ლუკ. 22:19; 1 იოან. 5:3). როდესაც ცხოვრებაში სირთულეებს ვხვდებით, დაე ასეთი მაგალითებით გამხნევებულებმა, მტკიცედ გადავწყვიტოთ, 4 აპრილს დავესწროთ უფლის გახსენების საღამოს. ამით ვაჩვენებთ, რომ ვიზიარებთ ფსალმუნმომღერლის გრძნობებს; ის მღეროდა: «შეიყვარეთ უფალი, მისნო წმიდანო [„ერთგულებო“, აქ]» (ფსალმ. 30:24).
3 დაეხმარე სხვებს, გაიზარდონ ღვთისადმი სიყვარულში. ღვთისადმი სიყვარული აღგვძრავს, რომ მოვიწვიოთ სხვები იესოს სიკვდილის გახსენების საღამოზე. თებერვლის „ჩვენი სამეფო მსახურების“ დანართი თითოეულ ჩვენგანს მოგვიწოდებს, რომ შევადგინოთ მათი სია, ვისი მოწვევაც გვაქვს დაგეგმილი. გულმოდგინედ ეკიდები იმას, რომ შენს სიაში ჩამოთვლილი თითოეული პიროვნება მოიწვიო? გამოყავი დრო, რომ ესაუბრო მათ ამ დღის მნიშვნელობაზე. ტაქტიანად შეახსენე გახსენების საღამოს ზუსტი დღე და დრო; თუ შესაძლებელია, შესთავაზე შეხვედრაზე ერთად წასვლა. ამით წაახალისებ, რომ დაესწრონ შეხვედრას.
4 დღესასწაულის დროს განსაკუთრებული ძალისხმევა მოახმარე, რომ მიესალმო მათ, ვინც გამოეხმაურა მოწვევას და თავისუფლად აგრძნობინე თავი. როგორ დაეხმარები მათ, რომ გაიზარდონ ღვთისადმი სიყვარულში? მზად იყავი, უპასუხო მათ კითხვებს. შესთავაზე ბიბლიის შესწავლა. დაპატიჟე ისინი ყოველკვირეულ შეხვედრებზე. უხუცესებმა განსაკუთრებული ყურადღება უნდა მიაქციონ არააქტიურ ქრისტიანებს, რომლებიც დაესწრებიან ამ საღამოს. უხუცესებს შეუძლიათ დაგეგმონ არააქტიურებთან შეხვედრა და მათი გამხნევება, რათა კვლავ განაახლონ კრებასთან ერთად მსახურება. საამისოდ მათ შეუძლიათ გამოიყენონ საღამოზე წარმოთქმული აზრები (რომ. 5:6—8).
5 გაიღრმავე იეჰოვასადმი სიყვარული. გამომსყიდველურ მსხვერპლზე დაფიქრება გაგვიღრმავებს სიყვარულს იეჰოვასა და მისი ძისადმი (2 კორ. 5:14, 15). ერთმა დამ, რომელიც უკვე მრავალი წელია ესწრება გახსენების საღამოს, თქვა: „მოუთმენლად ველოდებით გახსენების საღამოს. ყოველ წელს ის ჩვენთვის უფრო და უფრო განსაკუთრებული ხდება. მახსოვს, 20 წლის წინათ, საყვარელი მამის დაკრძალვის დროს, როგორ ვუყურებდი მის ცხედარს და როგორი მადლიერების გრძნობა დამეუფლა გამომსყიდველური მსხვერპლის მიმართ. მანამდე გამოსყიდვა ჩემთვის იყო მხოლოდ თეორია. ამ თემაზე ყველა ბიბლიური მუხლი ვიცოდი და შემეძლო მათი ახსნა, მაგრამ მხოლოდ მას შემდეგ ამევსო გული უდიდესი მადლიერებით, როცა შევიგრძენი სიკვდილის საშინელება და თვალნათლივ დავინახე, რა მიიღწევა ძვირფასი გამოსასყიდის წყალობით“ (იოან. 5:28, 29).
6 ახლოვდება გახსენების საღამოს თარიღი. გამოყავი დრო, რომ მოამზადო გული ამ მოვლენისთვის (2 ნეშტ. 19:3). იფიქრე გახსენების საღამოსთან დაკავშირებული ბიბლიის კითხვის პროგრამით გათვალისწინებულ მუხლებზე, რომლებიც მოცემულია ბროშურაში „საღვთო წერილის ყოველდღიური განხილვა — 2004“ და ამავე წლის კალენდარში. ამ დროს ზოგი ოჯახური შესწავლაზე კიდევ ერთხელ სიამოვნებით განიხილავს 112—116-ე თავებს წიგნიდან „ყველაზე დიდებული ადამიანი“. სხვები დამატებით მასალას იკვლევენ ერთგული და გონიერი მონის მიერ მოწოდებული სხვა დამხმარე საშუალებებით (მათ. 24:45—47). თითოეულს შეგვიძლია გულწრფელი მადლიერება გამოვხატოთ ჩვენს ლოცვებში (ფსალმ. 49:14, 23). დიახ, გახსენების საღამოს პერიოდში კვლავაც ვიფიქროთ იეჰოვას სიყვარულზე და ვეძებოთ საშუალებები მისდამი ჩვენი სიყვარულის გამოსავლენად (მარ. 12:30; 1 იოან. 4:10).