ჩაატარე ნაყოფიერი ბიბლიის შესწავლები
ნაწილი 10: მოამზადე შემსწავლელები კარდაკარ მსახურებისთვის
1 როდესაც უხუცესები ჩათვლიან, რომ ბიბლიის შემსწავლელი შეესაბამება მოუნათლავი მაუწყებლისთვის საჭირო მოთხოვნებს, მას შეუძლია კრებასთან ერთად დაიწყოს საჯაროდ ქადაგება (იხილე წიგნი „ორგანიზებულნი ვართ ჩვენი მსახურებისთვის“, გვ. 97—99). რისი გაკეთება შეგვიძლია შემსწავლელის დასახმარებლად, რომ მან შეძლოს კარდაკარ ქადაგება?
2 ერთად მომზადება: კარგი მომზადება აუცილებელია. აჩვენე შემსწავლელს, სად შეუძლია შეთავაზებების ნახვა „ჩვენს სამეფო მსახურებაში“ და ბროშურაში „როგორ დავიწყოთ და გავაგრძელოთ ბიბლიურ თემაზე საუბარი“. დაეხმარე მას, შეარჩიოს მარტივი შეთავაზება, რომელიც პრაქტიკულია ადგილობრივ ტერიტორიაზე. თავიდანვე წაახალისე, რომ მსახურების დროს გამოიყენოს ბიბლია (2 ტიმ. 4:2).
3 ახალი მაუწყებლისთვის დამხმარე იქნება სიტუაციის წინასწარ გათამაშება. ამ დროს აჩვენე მას, თუ რისი თქმა შეუძლია ტაქტიანად, როდესაც მობინადრისგან შეხვდება ისეთ რეაქციას, რომელიც ჩვეულებრივია თქვენს ტერიტორიაზე (კოლ. 4:6). უთხარი, რომ აუცილებელი არაა, ქრისტიანმა მქადაგებელმა ყველა კითხვაზე იცოდეს პასუხი, რაც კი შეიძლება მობინადრეს გაუჩნდეს. ასეთ შემთხვევებში ხშირად საუკეთესო გამოსავალია, მობინადრეს ვუთხრათ, რომ ამ საკითხს გამოვიკვლევთ და შემდეგი მისვლისას განვიხილავთ (იგავ. 15:28).
4 ერთად ქადაგება: როდესაც შემსწავლელი პირველად მიიღებს მონაწილეობას კარდაკარ მსახურებაში, მაგალითის საჩვენებლად ჯერ შენ თვითონ გააკეთე თქვენ მიერ ერთად მომზადებული შეთავაზება. შემდეგ მას მიეცი მონაწილეობის მიღების შესაძლებლობა. ზოგჯერ შეიძლება უკეთესი იყოს, რომ ახალმა მაუწყებელმა შეთავაზების მხოლოდ ნაწილი თქვას — მაგალითად მუხლი წაიკითხოს ან მას კომენტარი გაუკეთოს. გაითვალისწინე შემსწავლელის პიროვნული თავისებურებები და შესაძლებლობები (ფილ. 4:5). ხშირად შეაქე, როდესაც სამქადაგებლო მსახურების სხვადასხვა სფეროსთვის თანდათანობით ამზადებ.
5 მნიშვნელოვანია დაეხმარო ახალ მაუწყებელს, რომ რეგულარულად — თუ შესაძლებელია, ყოველკვირეულად — დაგეგმოს მსახურება (ფილ. 3:16). დაგეგმეთ ერთად მსახურება და ასევე წაახალისე, სხვა გულმოდგინე მაუწყებლებთანაც ითანამშრომლოს. მათი მაგალითი და მათთან ურთიერთობა დაეხმარება, ჩამოყალიბდეს ეფექტურ მქადაგებლად და სიხარულით მიიღოს მონაწილეობა კარდაკარ მსახურებაში.