„საფუძვლიანად დაამოწმეთ ღვთის სამეფოზე“
1. რას განვიხილავთ კრების ბიბლიის შესწავლაზე 14 მარტით დაწყებული კვირიდან?
1 კრების ბიბლიის შესწავლაზე 2011 წლის 14 მარტით დაწყებული კვირიდან განვიხილავთ წიგნს „საფუძვლიანად დაამოწმეთ ღვთის სამეფოზე“. ამ პუბლიკაციაში წიგნი „საქმეები“ ისეა განხილული, რომ მკითხველს შეუძლია წარმოიდგინოს, რამდენად სწრაფად ვითარდებოდა მასში ჩაწერილი მოვლენები. ამ წიგნში ყველა მუხლი სათითაოდ არ არის განხილული; მასში აღწერილია წიგნ „საქმეებში“ ჩაწერილი მოვლენები, რომლებიც გვეხმარება იმის დანახვაში, თუ როგორ გამოვიყენოთ ისინი ცხოვრებაში (რომ. 15:4).
2. რა თავისებურებები აქვს წიგნს „დაამოწმეთ“?
2 წიგნის თავისებურებები: წიგნის მეორე გვერდზე შესავალში მოცემულია ხელმძღვანელი საბჭოს გულთბილი წერილი, რომელშიც გამოხატულია მათი სურვილი, რომ ამ წიგნში ჩაწერილი რჩევები ცხოვრებაში გამოვიყენოთ. მეორე თავიდან დაწყებული ყველა თავს წამძღვარებული აქვს მოკლე ეპიგრაფი თითოეული თავის ძირითადი სათქმელის გამოსახატავად და „მოციქულთა საქმეებიდან“ განსახილველი მუხლები. ბევრი თავი შეიცავს ჩარჩოებს, რომლებიც ინფორმაციას გვაწვდის ამა თუ იმ ადამიანზე, ადგილსა თუ მოვლენაზე. გვერდებზე დატოვებულია მინდორი ჩანაწერებისთვის. წიგნში უხვად არის ბიბლიური სცენების დეტალური ილუსტრაციები, რომლებიც გვეხმარება მნიშვნელოვანი მოვლენების წარმოდგენაში. ბოლო გვერდზე არის სურათების საძიებელი, რომელშიც თითოეული სურათი იხსნება. ყდის ორივე შიდა მხარეს მოცემულია რუკები, რომელთა დახმარებითაც შეგვიძლია ნათლად წარმოვიდგინოთ პირველი საუკუნის ქრისტიანების მიერ სასიხარულო ცნობის გასავრცელებლად „დედამიწის კიდით კიდემდე“ განვლილი გზა (საქ. 1:8).
3. რომელ მნიშვნელოვან კითხვებს სცემს პასუხებს წიგნი „საქმეები“?
3 პასუხები მნიშვნელოვან კითხვებზე: წიგნ „საქმეების“ განხილვა დაგვეხმარება ქრისტიანულ მსახურებასთან დაკავშირებულ მნიშვნელოვან კითხვებზე პასუხების მიღებაში. მაგალითად, როგორ იქცევიან და რას ქადაგებენ იესო ქრისტეს ჭეშმარიტი მიმდევრები? ვინ ხელმძღვანელობს მსოფლიო მასშტაბის სამქადაგებლო საქმიანობას და როგორ? რის შესაძლებლობას აძლევს ღვთის მსახურებს დევნები და წინააღმდეგობები? რა როლს ასრულებს წმინდა სული ჩვენს მსახურებაში?
4. რის გაკეთება შეგვიძლია, რომ ამ წიგნმა სრული სარგებლობა მოგვიტანოს?
4 იმისთვის, რომ წიგნმა სრული სარგებლობა მოგიტანოს, წინასწარ განიხილე მასალა და მოემზადე კრების ბიბლიის შესწავლაზე მონაწილეობის მისაღებად. დაესწარი ყველა შეხვედრას და დაფიქრდი, როგორ შეგიძლია ნასწავლის მსახურებაში გამოყენება. დაე, ამ შესანიშნავი პუბლიკაციის განხილვამ აღგვძრას, საფუძვლიანად დავამოწმოთ ღვთის სამეფოს შესახებ! (საქ. 28:23).