მიიღებ მონაწილეობას მსახურებაში კვირაობით?
1. რას ვსწავლობთ პავლესა და მისი თანამსახურების მაგალითიდან?
1 პავლე და მისი თანამსახურები თავიანთი მისიონერული მოგზაურობის დროს ფილიპეში ჩავიდნენ. შაბათ დღეს ფილიპეში მცხოვრებ იუდეველთა უმეტესობა ისვენებდა. ასე რომ, პავლეს და მის თანამსახურებს არავინ დაადანაშაულებდა იმაში, რომ მათაც დაესვენათ ამ დღეს. მაგრამ მათ იცოდნენ, რომ შაბათობით იუდეველები ქალაქგარეთ იკრიბებოდნენ სალოცავად და გადაწყვიტეს, ექადაგათ მათთვის. წარმოიდგინე, როგორ გაუხარდებოდათ პავლესა და მის თანამსახურებს, რომ ლიდიამ მოუსმინა მათ და ის და მთელი მისი ოჯახი მოინათლა! (საქ. 16:13—15). კარგი იქნებოდა, თუ კვირაობით ჩვენც ვიქადაგებდით, რადგან ამ დღეს ბევრი ისვენებს.
2. რა სირთულეები გადალახა იეჰოვას ხალხმა, რომ კვირაობით ექადაგა?
2 ბრძოლა კვირას ქადაგებისთვის. 1927 წელს, მთელი წლის მანძილზე, იეჰოვას ხალხს მოუწოდებდნენ, რომ ყოველ კვირას მონაწილეობა მიეღოთ ქადაგებაში. წინააღმდეგობამაც არ დააყოვნა. შეერთებულ შტატებში მრავალი დააპატიმრეს. მათ ადანაშაულებდნენ ულიცენზიოდ ვაჭრობაში, მოსახლეობისთვის სიმშვიდისა და კვირა დღეს „შაბათის კანონის“ დარღვევაში. მაგრამ იეჰოვას ხალხს ფარ-ხმალი არ დაუყრია. ამიტომ 1930-იან წლებში ორგანიზება გაეწია „ჯგუფურ კამპანიებს“, რომლებშიც ერთიანდებოდნენ ახლომდებარე კრებების წევრები, რათა მთელ ტერიტორიაზე საფუძვლიანად დაემოწმებინათ. როდესაც მაუწყებლებს აპატიმრებდნენ, მათ ნაცვლად იქ სხვები ჩადიოდნენ, და ეს ჯგუფები იმდენად ბევრი იყო, რომ ხელისუფლების წარმომადგენლები ვერაფერს ხდებოდნენ. ამ ძმების მიერ გაღებული მსხვერპლი მართლაც დასაფასებელია! განა არ აღგძრავს მათი მაგალითი, რომ კვირაობით იმსახურო?
3. რატომ არის კვირა დღე ძალიან კარგი ქადაგებისთვის?
3 ძალიან კარგი დღე ქადაგებისთვის. კვირა დღეს მრავალი ისვენებს და სახლშია. ჩვეულებრივ, ამ დღეს ისინი ნაკლებად დაძაბულები არიან. ზოგი მორწმუნე, შესაძლოა, ამ დღეს უფრო მეტად იყოს განწყობილი ღმერთზე სასაუბროდ. თუ კრების შეხვედრა კვირა დღეს გვაქვს, ჩვენ უკვე შესაფერისად გამოვიყურებით და შეგვიძლია მსახურებაში მივიღოთ მონაწილეობა კრებამდე ან მის მერე. თუ საჭიროა, შეგვიძლია თან წავიღოთ რაიმე წასახემსებლად.
4. რა სიხარულს მოგვანიჭებს კვირაობით მსახურებისთვის გარკვეული დროის დათმობა?
4 დასვენება ყველას გვჭირდება, მაგრამ თუ კვირას მსახურებას გარკვეულ დროს დავუთმობთ, დრო დასვენებისთვისაც დაგვრჩება. ასე რომ, დასვენებასთან ერთად იმ კმაყოფილებასაც ვიგრძნობთ, რაც წმინდა მსახურებაში მონაწილეობას მოაქვს (იგავ. 19:23). შესაძლოა, ჩვენც ვიპოვოთ ვინმე ლიდიას მსგავსი და ჩვენც გავიხაროთ!