რწმენის გამო დაპატიმრებულები – ყირიმი
რუსეთის ხელისუფლების მხრიდან სასტიკი დევნის ობიექტები ამჯერად ყირიმში მცხოვრები იეჰოვას მოწმეები აღმოჩნდნენ. მთავრობამ არა მხოლოდ აკრძალა იეჰოვას მოწმეების იურიდიული პირების საქმიანობა, არამედ ის ყველაფერს აკეთებს საიმისოდ, რომ ბოლომდე აღკვეთოს მათი მშვიდობიანი თაყვანისმცემლობა. აკრძალვის შემდეგ, 2017 წლის აპრილიდან მოყოლებული, რუსეთში არაერთხელ დაარბიეს იეჰოვას მოწმეების მშვიდობიანი შეკრებები, რის შედეგადაც არაერთი იეჰოვას მოწმე დააკავეს და დააპატიმრეს. ახლა კი მსგავს წინააღმდეგობას ყირიმში მცხოვრები იეჰოვას მოწმეები ხვდებიან.
პირველი მასობრივი ჩხრეკა ყირიმში 2018 წლის 15 ნოემბერს ქალაქ ჯანკოიში ჩაატარეს, როდესაც 200-მდე სამართალდამცავი და სპეცრაზმელი იეჰოვას მოწმეთა 8 სახლში შეიჭრნენ. მოწმეები იქ პატარა ჯგუფებად იკრიბებოდნენ ბიბლიის განსახილველად. სულ მცირე 35 შეიარაღებული ჯარისკაცი ძალის გამოყენებით შეიჭრა სერგეი ფილატოვის სახლში, სადაც მოწმეთა 6-კაციანი ჯგუფი იყო შეკრებილი. ოფიცრებმა იარაღის მუქარით კედელთან მიაყენეს 78 წლის მამაკაცი, შემდეგ ძირს დააწვინეს, ხელბორკილები დაადეს და ისე სცემეს, რომ მისი სასწრაფოდ საავადმყოფოში გადაყვანა გახდა საჭირო. უკიდურესი სტრესის შედეგად გამოწვეული მაღალი არტერიული წნევის გამო საჭირო გახდა კიდევ ორი ხანდაზმული იეჰოვას მოწმის საავადმყოფოში გადაყვანა. ერთ ახალგაზრდა ფეხმძიმე ქალს, რომლის სახლშიც რეიდი მოაწყვეს, სამწუხაროდ, მუცელი მოეშალა.
რეიდის შემდგომ სერგეი ფილატოვს რუსეთის სისხლის სამართლის კოდექსის 282-ე მუხლის მეორე ნაწილის პირველი ქვეპუნქტის საფუძველზე ბრალად დასდეს „ექსტრემისტული ორგანიზაციის“ საქმიანობის ორგანიზება. 2020 წლის 5 მარტს ყირიმის საოლქო სასამართლომ სერგეის 6-წლიანი პატიმრობა შეუფარდა საერთო რეჟიმის დაწესებულებაში. განაჩენის გამოტანისთანავე ის ციხეში გადაიყვანეს.
2018 წელს ჯანკოიში ჩატარებული რეიდის შემდეგ სპეცრაზმი კვლავაც აგრძელებს რეიდების მოწყობას იმ იეჰოვას მოწმეთა სახლებში, რომლებიც ექსტრემიზმში არიან ეჭვმიტანილი. ბოლოს ამ ტერიტორიაზე 2024 წლის 7 აგვისტოს ჩატარდა რეიდი. შეიარაღებული და ნიღბიანი სამართალდამცავები 5 იეჰოვას მოწმის სახლში შეიჭრნენ, მათ შორის სოფელ რაზდოლნოიეში მცხოვრები 68 წლის თამარა ბრატცევას სახლში. მას ბრალი ექსტრემისტული საქმიანობის ორგანიზებაში დასდეს. მის საქმეზე დღემდე მიმდინარეობს სასამართლო პროცესი. 2024 წლის ოქტომბერში, ორ იეჰოვას მოწმეს, იური გერაშჩენკოს და სერგეი პარფენოვიჩს, პირობითი სასჯელი 6-წლიანი პატიმრობით შეუცვალეს. ისინი სასამართლო დარბაზიდან დაუყოვნებლივ გადაიყვანეს შრომა-გასწორების კოლონიაში.
რეიდებისა და სასამართლო გადაწყვეტილებების შედეგად 14 იეჰოვას მოწმე იხდის სასჯელს, რომელთა პატიმრობის ვადა ექვსწელიწად-ნახევარი ან ნაკლებია. ყველა მათგანს ბრალად დასდეს ექსტრემისტული ორგანიზაციის საქმიანობის ხელშეწყობა.
დროის დიაგრამა
2025 წლის 17 აპრილი
ყირიმში 14 იეჰოვას მოწმე იმყოფება პატიმრობაში.
2024 წლის 3 ოქტომბერი
იური გერაშჩენკოსა და სერგეი პარფენოვიჩს 6 წლის ვადით თავისუფლების აღკვეთა შეუფარდეს შრომა–გასწორების კოლონიაში.
2024 წლის 7 აგვისტო
სამართალდამცავებმა ალუშტაში, რაზდოლნოიესა და სენოკოსნოიეში 5 იეჰოვას მოწმის სახლი გაჩხრიკეს. სისხლის სამართლის საქმე აღიძრა თამარა ბრატცევას წინააღმდეგ.
2021 წლის 5 აგვისტო
ჩხრეკა ჩატარდა იეჰოვას მოწმეთა 8 სახლში. დააკავეს ალექსანდრე დუბოვენკო და ალექსანდრე ლიტვინიუკი.
2020 წლის 1 ოქტომბერი
ქალაქ სევასტოპოლში 9 სახლი გაჩხრიკეს, რის შემდეგაც დააკავეს იგორ შმიდტი და წინასწარი დაკავების იზოლატორში გადაიყვანეს.
2019 წლის 4 ივნისი
სევასტოპოლში სპეცრაზმელებმა 10 ბინაში ჩაატარეს რეიდი. მოგვიანებით ვიქტორ სტაშევსკის ბრალად წაუყენეს ექსტრემისტული საქმიანობის ორგანიზება.
2019 წლის 20 მარტი
სპეცრაზმელებმა ქალაქებში ალუპკსა და იალტაში იეჰოვას მოწმეთა 8 სახლში რეიდები მოაწყვეს. არტემ გერასიმოვი დაკითხეს და ბრალი დასდეს ექსტრემისტული საქმიანობის ორგანიზებაში.
2018 წლის 15 ნოემბერი
ყირიმში 200-ზე მეტმა სამართალდამცავმა და სპეცრაზმელმა ჩხრეკა ჩაატარეს იეჰოვას მოწმეთა 8 სახლში, მათ შორის სერგეი ფილატოვის საცხოვრებელში.