ახალგაზრდები იძლევიან შეკითხვას. . .

როგორ გამოვიმუშაო ფული?

„ისეთი სამუშაო მინდა, სადაც მეტ ფულს მომცემენ“ (ტანია).

ბევრი ახალგაზრდაა ტანიას აზრის. „ფული ავტომანქანისა და ტანსაცმლის საყიდლად მინდა, — ამბობს ახალგაზრდა სერჟო. —არ მინდა, რომ ყველაფერში მშობლებზე ვიყო დამოკიდებული“. ახალგაზრდა ლორი-ენიც ამ მიზეზით დაიწყებდა მუშაობას: „ქალი ვარ და საყიდლებზე სიარული მიყვარს“, — ამბობს ის.

მაშ, გასაკვირი არ არის, რომ ჟურნალის „აშშ-ს ახალი ამბები და მსოფლიო უწყებები“ თანახმად, „[აშშ-ს] საშუალო სკოლის უფროსი კლასების მოსწავლეებიდან ყოველი ოთხიდან სამი გაკვეთილების შემდეგ და შაბათ-კვირას სამუშაოდ მიდის“. გარკვეულწილად ეს ირეკლავს გაუწონასწორებელ ‘ვერცხლისმოყვარეობას’, რომელიც ასე გავრცელებულია მატერიალური ინტერესებით გატაცებულ დღევანდელ წუთისოფელში (1 ტიმოთე 6:10). მაგრამ ახალგაზრდებიდან, რომლებიც შემოსავალს ეძებენ, ყველა არაა მატერიალური ინტერესებით გატაცებული.

‘ფული დამფარველია’, — ამბობს ბიბლია (ეკლესიასტე 7:12). შენ, ახალგაზრდა ქრისტიანს, ალბათ ფულის შოვნისთვის უამრავი გონივრული მიზეზი გაქვსa. მაგალითად, ეივიენმა თქვა, თუ რატომ მუშაობს კვირაში ორ დღეს: „ეს საშუალებას მაძლევს, გავაგრძელო სრული დროით პიონერად [სრული დროით მქადაგებლად] მსახურება“.

იქნებ შენც მსგავსი მიზეზების გამო გინდა ნახევარგანაკვეთიანი სამუშაოს შოვნა. შესაძლოა, კონგრესზე დასწრება გინდა. ან შეიძლება კრების შეხვედრებზე ჩასაცმელად სხვა შესაფერისი ტანსაცმელი გჭირდება. ნებისმიერ შემთხვევაში, ყოველივე ამას ფული სჭირდება. მართალია, იესომ პირობა მოგვცა, რომ ღმერთი იზრუნებდა მათზე, ვინც ‘უწინარეს ეძიებს ღვთის სასუფეველს’ (მათე 6:33). მაგრამ ეს შენი მხრიდან რაიმე ინიციატივის გამოვლენას არ გამორიცხავს (შეადარეთ საქმეები 18:1–3). მაშ, რა პრაქტიკული ნაბიჯების გადადგმა გჭირდება ფულის საშოვნელად?

რით უნდა დაიწყო

მას შემდეგ, რაც მშობლებს შეუთანხმდები, რომ მუშაობა დაიწყო, პირველ რიგში, მეზობლებს, მასწავლებლებსა და ნათესავებს შეატყობინე, რომ სამუშაოს ეძებ. თუ გერიდება, პირდაპირ უთხრა, შეგიძლია, უბრალოდ, ჰკითხო, თუ რას აკეთებდნენ სამუშაოს საშოვნელად, როდესაც მოზარდები იყვნენ. მათ შეიძლება სასარგებლო აზრები მოგაწოდონ. რაც უფრო მეტს ეცოდინება, რომ სამუშაოს ეძებ, მით უფრო მეტ სასარგებლო ინფორმაციას და სამუშაო ადგილს გაიგებ.

შემდეგ დაათვალიერე გაზეთში მოცემული განცხადებები და საინფორმაციო დაფები მაღაზიებში, შენს სკოლაში და სხვა საზოგადოებრივ ადგილებში. „აი როგორ ვიშოვე სამუშაო, — გვიყვება ახალგაზრდა დეივი. — გაზეთში ვნახე განცხადება, ფაქსით გავაგზავნე ჩემი მოკლე ბიოგრაფია და დავურეკე“. მაგრამ იცოდი, რომ ბევრი სამუშაოს შესახებ განცხადება არ კეთდება? ერთ-ერთი ჟურნალის თანახმად, ზოგი ვარაუდობს, რომ „ათი სამუშაოდან სამი არ ჩანს, სანამ შესაფერისი პიროვნება არ გამოჩნდება“. შესაძლებელია, უჩვენებ დამსაქმებელს, რომ შენი ხელობა გამოადგება.

მაგრამ როგორ? „გამოცდილება არა მაქვს“, — შეიძლება ფიქრობ. გაიხსენე: მოგივლია ოდესმე შენი და-ძმისთვის, როდესაც მშობლები სახლში არ ყოფილან, ან კიდევ სხვისი ბავშვებისთვის? ეს ამტკიცებს, რომ საიმედო ხარ. მიხმარებიხარ მამაშენს ავტომანქანის შეკეთებაში? ეს აჩვენებს, რომ შენ მექანიკისკენ გაქვს მიდრეკილება. იცი ბეჭდვა ან კომპიუტერზე მუშაობა? ან კარგი ნიშნები გაქვს მიღებული ზოგიერთ საგანში? ესენი კარგი დამაჯერებელი ფაქტებია დამსაქმებლებისთვის.

არ დაივიწყო შენი ჰობი და ის, რითაც დაინტერესებული ხარ. მაგალითად, თუ მუსიკალურ ინსტრუმენტზე უკრავ, იქნებ მუსიკალური ინსტრუმენტების მაღაზიაში იშოვო ადგილი. ალბათ გაინტერესებს მაღაზიის პროდუქცია და ნამდვილად კომპეტენტური იქნები მყიდველის კითხვებზე პასუხის გასაცემად.

მიმართვა სამუშაოსთვის

წარმოიდგინე, რომ დანიშნე შეხვედრა სამუშაოზე მისაღები გასაუბრებისთვის. ყურადღება მიაქციე შენს ჩაცმულობასა და გარეგნობას, ის შენზე მეტყველებს. მას შეუძლია გამოხატოს, რომ ხარ „სანდო, აკურატული, დისციპლინებული“ ან კიდევ პირიქით. ბიბლია პრაქტიკულ რჩევას აძლევს ქრისტიან ქალებს: „წესიერი სამოსლით, მორცხვობით და კდემამოსილებით შეიმკონ“ (1 ტიმოთე 2:9). ეს მამაკაცებსაც ეხება. რასთანაც არ უნდა იყოს დაკავშირებული სამუშაო, არასდროს ჩაიცვა სამუშაოზე მოსაწყობ გასაუბრებაზე უცნაური და უსუფთაო ტანსაცმელი.

შენი საქციელი და მანერებიც ბევრს ამბობს შენზე. მოიქეცი ოქროს წესის თანახმად: ისე მოექეცი სხვებს, როგორც გინდა, რომ შენ მოგექცნენ (მათე 7:12). ნუ დაიგვიანებ დანიშნულ შეხვედრაზე. ენთუზიაზმითა და სიცოცხლით სავსე იყავი. ზრდილობიანად მოიქეცი. ნუ იტრაბახებ და ნუ გააზვიადებ იმას, თუ რატომ ფიქრობ, რომ სამუშაოს შესრულებას შეძლებ. ილაპარაკე კონკრეტულად.

ზოგი მცოდნე გვირჩევს ნათელი, თანმიმდევრული დახასიათების მიტანას (ან წინასწარ გაგზავნას), რომელშიც მოცემული უნდა იყოს გვარი, სახელი, მისამართი, ტელეფონის ნომერი, რაზე გსურს მუშაობა, განათლება (სპეციალური კურსები), ძველი სამუშაო (ხელფასიანი სამსახური და მოხალისედ მსახურება), სპეციალური ხელობები, რა გაინტერესებს, ჰობი (ამან შეიძლება ნათელი მოჰფინოს შენს უნარიანობას) მოკლედ აღნიშნე, რომ საჭიროების შემთხვევაში სხვები რეკომენდაციას გაგიწევენ. აგრეთვე ცალკე ჩამოწერე მათი სია, მისამართები, ტელეფონის ნომრები, ვინც რეკომენდაციას გაგიწევს ამ სამუშაოსთვის. რა თქმა უნდა, წინასწარ სთხოვე ამისთვის მათ ნებართვა. ამ სიაში შეიძლება შედიოდნენ ყოფილი დამსაქმებლები, მასწავლებელი, უფროსი მეგობარი, ნებისმიერი, ვისაც კი შეუძლია დაადასტუროს შენი ხელობები, უნარიანობა ან განსაკუთრებული თვისებები.

დამოუკიდებლად მუშაობა

მაგრამ დიდი მცდელობის მიუხედავად თუ ვერ იშოვე სამუშაო? ეს მრავალ ქვეყანაში ასეა. მაგრამ გული არ გაიტეხო. საკუთარი საქმიანობის დაწყება ძალიან კარგი გამოსავალი იქნება. რა სარგებლობა აქვს ამას? შესაძლებლობა გექნება შეადგინო გრაფიკი და რამდენ ხანსაც გინდა იმუშაო. რა თქმა უნდა, მეწარმედ ყოფნა მოითხოვს ამ საქმისთვის საკუთარი თავის განწყობას, დისციპლინასა და ინიციატორობას.

მაგრამ რა საქმიანობა უნდა დაიწყო? დაფიქრდი მეზობლებზე. საჭიროებენ საყიდლებზე ვინმეს გაგზავნას ან მომსახურებებს, რასაც სხვა არავინ აკეთებს? ვთქვათ ცხოველები გიყვარს. შეგიძლია შესთავაზო მეზობლებს მათი საყვარელი შინაური ცხოველის დაბანვა ან გაპარსვა გასამრჯელოზე. ან იქნებ რომელიმე მუსიკალურ ინსტრუმენტზე უკრავ. შეგიძლია, სხვებს ასწავლო დაკვრა? ან იქნებ გააკეთო ისეთი საქმე, რომელიც სხვებს არ უყვარს, მაგალითად, ფანჯრების რეცხვა და წმენდა. ქრისტიანს არ უნდა რცხვენოდეს ხელით შრომა (ეფესელთა 4:28). შეიძლება ახალი ხელობის შესწავლაც კი სცადო. მოძებნე ბიბლიოთეკებში დამხმარე წიგნები ან სთხოვე მეგობარს გასწავლოს. მაგალითად, ახალგაზრდა ჯოშუამ ლამაზად წერა ისწავლა. შემდეგ დაიწყო მცირე საქმიანობა — ქორწილებსა და წვეულებებზე მოსაწვევების დამზადება. (იხილე ჩარჩო „რა საქმის დაწყება შეგიძლია“).

გაფრთხილება: არ აჩქარდე რაიმეს წამოწყებაში, სანამ არ გაიგებ რა დაგიჯდება და რა თავისებურებები ექნება ამა თუ იმ საქმეს (ლუკა 14:28–30). პირველ რიგში, მშობლებს გაესაუბრე ამის შესახებ. აგრეთვე ესაუბრე მათ, ვინც მსგავს საქმიანობას ეწევა. დაგჭირდება გადასახადის გადახდა? დაგჭირდება ლიცენზიის ანუ ნებართვის აღება? ამის შესახებ დაწვრილებით გაარკვიე ადგილობრივ ხელისუფლებასთან (რომაელთა 13:1–7).

იყავი გაწონასწორებული!

რა თქმა უნდა, საშიშროება არსებობს, რომ სამუშაო უფრო მეტი იყოს, ვიდრე შენ შეგიძლია, თავი გაართვა. ლორი-ენმა ზოგ ასეთ ახალგაზრდაზე თქვა: „ბევრ საშინაო დავალებას არ ასრულებენ და ისეთი დაღლილები არიან, რომ გაკვეთილების მოსმენის თავიც არა აქვთ“. მართალია, მსოფლიოს ზოგ ნაწილში ახალგაზრდებს სხვა გზა არა აქვთ; მათ დიდხანს მუშაობა უწევთ ოჯახის გამოსაკვებად. მაგრამ, თუ შენ ამგვარი ვითარება არა გაქვს, რატომ უნდა მოიქცე ასე? სპეციალისტების უმეტესობის თანახმად, კვირის განმავლობაში გაკვეთილების შემდეგ 20 საათზე მეტის მუშაობა გადამეტებული და საზიანოა. ზოგის აზრით კი, კვირაში რვა-ათ საათზე მეტს არ უნდა მუშაობდნენ.

თუ ძალიან ბევრ დროს, ძალასა და ენერგიას დახარჯავ სკოლის შემდეგ სამუშაოზე, შენს ჯანმრთელობას, აკადემიურ მოსწრებასა და განსაკუთრებით სულიერობას ძირი გამოეთხრება. დიახ, მხოლოდ უფროსებს არ აშთობს „სიმდიდრის საცდური და სხვა გულისთქმანი“ (მარკოზი 4:19). ასე რომ, იყავი გაწონასწორებული. სოლომონმა უზომო მუშაობასთან დაკავშირებით გაფრთხილება მოგვცა: „ერთი პეშვი სიმშვიდე სჯობს მთელ კალთა გარჯას და ფუჭ საზრუნავს“ (ეკლესიასტე 4:6).

დიახ, ფულის გამომუშავება შეიძლება აუცილებელია. თუ შენი მისწრაფებები ჯანსაღია და ღვთისმოსაწონია, ზემოხსენებული ეივიენის მსგავსად, დარწმუნებული იყავი, რომ იეჰოვა აკურთხებს შენს მცდელობებს. მაგრამ ყურადღება მიაქციე, რომ ისე არასოდეს იყო დაკავებული სამუშაოთი, რომ დაივიწყო «უმჯობესი [„უფრო მნიშვნელოვანი“, აქ]», სახელდობრ: სულიერ ინტერესები (ფილიპელთა 1:10). თუმცა ფული ‘დამფარველია’, ნამდვილად წარმატებულს ღმერთთან ურთიერთობა გაგხდის (ეკლესიასტე 7:12; ფსალმუნი 90:14).

[სქოლიო]

[ჩარჩო 28 გვერდზე]

რა საქმის დაწყება შეგიძლია.

• ფანჯრების რეცხვა.

• გაზეთების გაყიდვა ან დატარება.

• ბაღში ან გაზონებზე მუშაობა.

• ბავშვების მოვლა.

• შინაური ცხოველების ჭმევა, გასეირნება და დაბანა.

• ფეხსაცმლის წმენდა.

• ტანსაცმლის დაკერება და უთოობა.

• რაიმეს გაზრდა და გაყიდვა.

• წიწილების გაზრდა ან კვერცხების გაყიდვა.

• ბეჭდვა ან საბუთების დამზადება.

• შიკრიკობა.

• ფოსტის დატარება.

• მუსიკის ან სხვა საგნების სწავლება.

[სურათი 27 გვერდზე]

უზომო მუშაობამ შეიძლება შენი აკადემიური მოსწრების დაცემა გამოიწვიოს.