თავი 18

რა გავაკეთო, ჩემი ფული რომ მქონდეს?

„ფული მანქანის საყიდლად მჭირდება“ (სერჟო).

„მიყვარს საყიდლებზე სიარული“ (ლორი-ენი).

„ბევრი რამე ძალიან მომწონს და მინდა, რომ მქონდეს, მაგრამ ჩემს მშობლებს ამდენის შესაძლებლობა არა აქვთ“ (მაიკი).

საკუთარი შემოსავალი შეიძლება შენც გინდოდეს ასეთი მიზეზების გამო ან სულაც იმიტომ, რომ შენებს დაეხმარო. ოჯახს დიდად რომც ვერ შეეშველო, შენთვის მაინც იყიდი ტანსაცმელს და სხვა ნივთებს, და ეს შეღავათი იქნება მშობლებისთვის.

მნიშვნელობა არა აქვს, შენთვის იყიდი რამეს თუ ოჯახისთვის — ფული ორივე შემთხვევაში გჭირდება. იესომ თქვა, რომ ღმერთი იზრუნებდა მათზე, ვისთვისაც უმთავრესი ღვთის სამეფო იქნებოდა. თუმცა ეს არ ნიშნავს იმას, რომ ქრისტიანები გულხელდაკრეფილები უნდა იყვნენ (მათე 6:33; საქმეები 18:1—3; 2 თესალონიკელები 3:10). რა უნდა გააკეთო იმისათვის, რომ გქონდეს შენი ფული? და რაც უფრო მნიშვნელოვანია, რა დაგეხმარება ფულზე გაწონასწორებული თვალსაზრისის შენარჩუნებაში?

„ვეძებ სამუშაოს“

თუ ნამდვილად გჭირდება ისეთი რამ, რის ყიდვასაც მშობლები ვერ შესწვდებიან, შეიძლება ღირდეს სამუშაოზე ფიქრი. ესაუბრე მშობლებს ამ საკითხზე. მათ შეიძლება მოეწონოთ შენი აზრი. თუ ისინი თანახმა იქნებიან და კანონითაც გაქვს ამის უფლება, ქვემოთ მოცემული ოთხი რჩევა დაგეხმარება სამუშაოს მოძებნაში.

უთხარი სხვებს. მაგალითად, მეზობლებს, ნათესავებს ან ნაცნობებს უთხარი, რომ სამუშაოს ეძებ. თუ გერიდება პირდაპირ ამის თქმა, შეგიძლია უბრალოდ ჰკითხო მათ, სად მუშაობდნენ შენს ასაკში. რაც უფრო მეტს ეცოდინება, რომ სამუშაოს დაწყება გინდა, მით მეტი იქნება იმის შანსი, რომ რამეს იპოვი.

მოსინჯე ყველა ვარიანტი. უყურადღებოდ ნუ დატოვებ განცხადებებს, რომლებსაც გაზეთში ან ინტერნეტში ნახავ, ან სადმე სხვაგან, მაგალითად მაღაზიაში, წაიკითხავ. დეივი იხსენებს: „გაზეთებში განცხადებებს ვკითხულობდი და შემდეგ ფაქსით ვაგზავნიდი ჩემს მონაცემებს ან ვრეკავდი. ასე ვიშოვე სამსახური“. თუ ამ გზით არაფერი გამოდის, შენ თვითონ შესთავაზე სხვებს რამე მომსახურება.

შეადგინე განცხადება და გაავრცელე. ფურცელზე დაწერე შენი კოორდინატები, რის გაკეთება შეგიძლია და გაქვს თუ არა სამუშაო გამოცდილება. თუ თვლი, რომ არანაირი გამოცდილება არა გაქვს, იმედს ნუ გადაიწურავ. დაუტოვებიათ შენთვის უმცროსი და ან ძმა მშობლებს? ან იქნებ სხვებს ჩაუბარებიათ შენთვის ბავშვები? ეს იმაზე მეტყველებს, რომ შენი ნდობა შეიძლება. დახმარებიხარ მამაშენს მანქანის შეკეთებაში? ეს შეიძლება იმის ნიშანი იყოს, რომ ტექნიკისკენ გაქვს მიდრეკილება. იცი კომპიუტერზე ბეჭდვა ან მუშაობა? ან იქნებ სკოლაში კარგ შეფასებებს იღებდი ისეთ დავალებებში, რომელთა შესასრულებლადაც რაიმე ახლის მოფიქრება იყო საჭირო? დამსაქმებლები შეიძლება ამითაც დაინტერესდნენ. ყველაფერი მოიხსენიე შენს განცხადებაში. შემდეგ გაავრცელე განცხადებები. მეგობრებსა და ნათესავებსაც სთხოვე ამაში დახმარება.

შენით წამოიწყე რამე. ისეთ რამეს ხომ ვერ მოიფიქრებ, რასაც თქვენს უბანში ჯერჯერობით არავინ აკეთებს? მაგალითად, თუ ცხოველები გიყვარს, შეგეძლო მცირეოდენ გასამრჯელოდ მათი დაბანა ან გაკრეჭა შეგეთავაზებინა პატრონისთვის. თუ რომელიმე ინსტრუმენტზე უკრავ, შეგიძლია მოსწავლეები აიყვანო. შეგეძლო ისეთ საქმეზე გეფიქრა, რაც ბევრს არ ეხალისება, მაგალითად სახლის დალაგებაზე ან ფანჯრების გაწმენდაზე. ქრისტიანები არ თაკილობენ ფიზიკურად მუშაობას (ეფესოელები 4:28). შენით რომ წამოიწყო რამე, საჭიროა მონდომება, ორგანიზებულობა და ინიციატივის საკუთარ თავზე აღება.

თუმცა სიფრთხილეს თავი არ სტკივა. ნუ აჩქარდები და ყველაფერი კარგად აწონ-დაწონე, ვიდრე რამეს ხელს მოჰკიდებ (ლუკა 14:28—30). პირველ რიგში, მშობლებს ესაუბრე ამის შესახებ. შეგიძლია გაესაუბრო მათაც, ვისაც აქვს გამოცდილება მსგავს საქმეში. იქნება თუ არა საჭირო გადასახადების გადახდა? დაგჭირდება ლიცენზიის ან ნებართვის აღება? დააზუსტე, რა მოითხოვება ადგილობრივი კანონებით (რომაელები 13:1).

არ დაკარგო წონასწორობა

წარმოიდგინე, რომ ველოსიპედით მიდიხარ და თან მიგაქვს სკოლის ჩანთა, ბურთი და პროდუქტებით სავსე რამდენიმე პარკი. რაც უფრო ბევრი რამ გექნება თან, მით უფრო რთული იქნება წონასწორობის შენარჩუნება. დაახლოებით ასეთ მდგომარეობაში აღმოჩნდები, თუ არ გაითვალისწინებ შენს შესაძლებლობებს და ისეთ რამეს მოჰკიდებ ხელს, რაც ტვირთად დაგაწვება. სამუშაო შენს ჯანმრთელობაზე და აკადემიურ მოსწრებაზე უარყოფითად იმოქმედებს, თუ ის დიდ დროსა და ენერგიას წაგართმევს ან ძილი დაგაკლდება. გარდა ამისა, დამქანცველი სამუშაოს შემდეგ შეიძლება ძალიან რთული იყოს ქრისტიანულ შეხვედრებზე დასწრება, ბიბლიის შესწავლა და მსახურებაში მონაწილეობა. „შეხვედრებზე წასვლის თავი აღარ მქონდა, სკოლისა და სამუშაოს შემდეგ გადაღლილი ვიყავი“, — ამბობს მიშელი.

ნუ გადაჰყვები სამუშაოს მხოლოდ და მხოლოდ იმის გამო, რომ უფრო მეტი ფული გქონდეს. იესოს თქმით, ნამდვილად ბედნიერი ის არის, ვინც სულიერსაა მოწყურებული (მათე 5:3). მან აგრეთვე თქვა: „ადამიანს უხვადაც რომ ჰქონდეს ყველაფერი, მისი სიცოცხლე მის ქონებაზე არ არის დამოკიდებული“ (ლუკა 12:15). მორინმა გაითვალისწინა ეს სიტყვები. ის ამბობს: „არ მინდა მატერიალისტურ მიზნებს გადავყვე. ვიცი, რომ ამას ჩემი სულიერობა შეეწირება“.

ოჯახის დახმარება რომ შეძლონ, ზოგიერთ ქვეყანაში ახალგაზრდები იძულებულნი არიან, დიდხანს იმუშაონ. მათ სხვა გზა არა აქვთ. მაგრამ, თუ არა ხარ ასეთ სიტუაციაში, გიღირს „ველოსიპედზე“ ზედმეტი ტვირთის დადება?! სპეციალისტების უმეტესობა იმ აზრისაა, რომ სწავლის პარალელურად კვირაში 20 საათზე მეტხანს მუშაობა ახალგაზრდისთვის ზედმეტად დამტვირთველი და საზიანოა. ზოგი მათგანი თვლის, რომ კვირაში სამუშაო დროის ხანგრძლივობა არ უნდა აღემატებოდეს 8—10 საათს. მეფე სოლომონმა თქვა: „ერთი მუჭა დასვენება სჯობია ორ მუჭა გარჯასა და ქარის დევნას“ (ეკლესიასტე 4:6).

ყოველთვის გახსოვდეს, რომ „სიმდიდრის მაცდუნებელმა ძალამ“ შეიძლება ჩაგიკლას სულიერი მოთხოვნილება (მარკოზი 4:19). თუ გადაწყვეტ სწავლის პარალელურად მუშაობას იმ მიზნით, რომ შენი ფული გქონდეს, ყველაფერი კარგად დაგეგმე და შეხვედრებზე დასწრებას, ბიბლიის შესწავლასა თუ ქადაგებას უპირატესობა მიანიჭე. ილოცე და სთხოვე იეჰოვა ღმერთს დახმარება. ის დაგეხმარება იმაში, რომ გონივრული არჩევანი გააკეთო და სულიერი წონასწორობა არ დაკარგო.

წაიკითხე დამატებითი მასალა პირველი ტომის 21-ე თავში.

საკვანძო ბიბლიური მუხლი

„ზარმაცს სურს, მაგრამ არაფერი აქვს, მუყაითებს კი სიუხვე ექნებათ“ (იგავები 13:4).

რჩევა

ნუ დაელოდები განცხადებებს ვაკანსიებზე. შენ თვითონ გაავრცელე შენი მონაცემები განცხადების სახით.

იცოდი, რომ . . . ?

ზოგან თავისუფალი სამუშაო ადგილების თითქმის 85 პროცენტზე განცხადებები არ კეთდება.

როგორ ფიქრობ?

● რა ტომ გინდა, რომ შენი ფული გქონდეს?

● რა სირთულეები შეგექმნება, თუ მუშაობას დაიწყებ?

● რა არის საჭირო იმისათვის, რომ ფულზე გაწონასწორებული თვალსაზრისი გქონდეს?

რა უნდა გავაკეთო

სამუშაოს შოვნის უფრო მეტი შანსი რომ მქონდეს ․․․․․

კვირაში ․․․․․ საათზე მეტს არ ვიმუშავებ.

რა ვკითხო მშობლებს ამ საკითხზე? ․․․․․

[ჩანართი 153 გვერდზე]

„თუ შენი ბედნიერება სულ რაღაცის შეძენაზეა დამოკიდებული, ვერასდროს იქნები ბედნიერი. ყოველთვის გამოვა რაღაც ახალი, რაც გენდომება. იმით უნდა იყო ბედნიერი, რაც გაქვს“ (ჯონათანი).

[ჩარჩო 155 გვერდზე]

ფულის ყადრი მის სიყვარულში ნუ აგერევა

გამოცდილი მზარეულის ხელში ბასრი დანა საჭირო იარაღია. მაგრამ იმავე დანით გამოუცდელმა და დაუდევარმა ადამიანმა შეიძლება თავს სერიოზული ზიანი მიაყენოს. ფულიც ასეა. ის საჭიროა, მაგრამ უნდა იცოდე მისი სწორად გამოყენება. თუ არ იფრთხილებ, შეიძლება აუტკივარი თავი აიტკიო. მაგალითად, მოციქულმა პავლემ მოიხსენია ფულის სიყვარულის საშიშროება. გამდიდრებისკენ სწრაფვას ხშირად ეწირება კარგი ურთიერთობა მეგობრებთან, ოჯახის წევრებთან და ღმერთთან. ამას კი „მრავალი ტკივილი“ მოჰყვება (1 ტიმოთე 6:9, 10). ასე რომ, ისწავლე ფულის სწორად გამოყენება და ფულის ყადრი მის სიყვარულში ნუ აგერევა.

[სურათი 153 გვერდზე]

საკუთარ თავზე ძალიან ბევრი პასუხისმგებლობის აღებამ შეიძლება წონასწორობა დაგაკარგვინოს.