რატომ აცხადებს ბევრი უარს სისხლზე

ონტარიოს სასამართლოს გადაწყვეტილებით, რომელსაც უმნიშვნელოვანესი ეწოდა, კანადის „წითელ ჯვარს“ პასუხისგება მოუწია აივ-ით ინფიცირებული ორი მამაკაცისთვის, რომლებსაც ერთი და იმავე დონორისგან გადაუსხეს ინფიცირებული სისხლი. „როდესაც ინფიცირებული სისხლის გადასხმის შედეგად რეციპიენტების სიცოცხლეს საფრთხე ემუქრება, საჭიროა სასწრაფო პასუხისგება“, — თქვა მოსამართლე სტივენ ბორინსმა.

80-იან წლებში დაახლოებით 1 200 კანადელი აივ-ით, ხოლო 12 000 ჰეპატიტ-C-თი იყო ინფიცირებული. ყველა მათგანი ინფიცირებული სისხლისა და სისხლის შემცველი მედიკამენტების მიღების შედეგად დაავადდა. ინფიცირებულთა რიცხვის შემცირების მიზნით, მიმდინარეობს დონორების უფრო გულდასმით შემოწმება. მაგრამ ყველა დონორი როდი აღიარებს თავისი სქესობრივი ურთიერთობების შესახებ. მაგალითად შეერთებულ შტატებში შემოწმების შედეგად აღმოჩნდა, რომ ყოველი 50 დონორიდან ერთმა არ აღიარა ისეთი სარისკო ფაქტორების შესახებ, როგორიცაა ჰომოსექსუალიზმი ან მეძავთან სქესობრივი კავშირი.

მდგომარეობას უფრო ართულებს ის ფაქტი, რომ სისხლის შემოწმება არ არის საიმედო. ერთი ჟურნალის თანახმად, „თუ აივ-ის ვირუსის მატარებელი პიროვნება ინფიცირებიდან სამ კვირაზე ადრე გასცემს სისხლს, მიმდინარე შემოწმებით ვირუსი არ გამოვლინდება. ჰეპატიტ-C-ს შემთხვევაში კი ეს პერიოდი შეიძლება ორ თვეზე მეტხანს გაგრძელდეს“ (New Scientist).

ამ უკანასკნელ წლებში მნიშვნელოვნად შემცირდა იმ კანადელთა რიცხვი, რომლებიც უარს აცხადებენ სისხლის მიღება-გაცემაზე. მიმომხილველი პოლ შრაცი წერს: „სისხლის გაცემისადმი ინტერესის შემცირებისა და იმ ადამიანთა რიცხვის ზრდის გამო, რომლებიც უარს აცხადებენ დონორობაზე, ვმადლობთ ღმერთს, რომ იეჰოვას მოწმეები ინიციატორები არიან სისხლის შემცვლელი საშუალებების კვლევაში“.

საინტერესოა, რომ, გაზეთ „ტორონტო სტარის“ თანახმად, შემოწმებისას ბოლო ერთი წლის განმავლობაში „კანადის საავადმყოფოებში დაახლოებით 40 ადამიანი ტყუილად აცხადებდა, რომ იეჰოვას მოწმე იყო, რადგან არ უნდოდათ სისხლის გადასხმა“. შემოწმებები აჩვენებს, რომ კანადელთა 90 პროცენტი სისხლის გადასხმასთან დაკავშირებით უპირატესობას რაიმე ალტერნატიულ საშუალებას ანიჭებს. აქედან გამომდინარე, სისხლის გამოყენება მეტად აღარ წარმოადგენს მხოლოდ რელიგიურ საკითხს.