მკითხველთა წერილები

საშინელებების საუკუნე.  დღეს ფოსტით მივიღე თქვენი ჟურნალის 1998 წლის 8 აგვისტოს ნომერი. როგორც კი გარეკანს შევავლე თვალი, ჩამოვჯექი და დაუყოვნებლივ წავიკითხე ყველა სტატია სერიიდან: „საშინელებების საუკუნე — დროა, რომ დავივიწყოთ?“ ადამიანების ბოროტი საქმეების ხილვა უაღრესად მამწუხრებს და მოუთმენლად მოველი იმ დროს, როდესაც კაცობრიობას ჭეშმარიტი მშვიდობა გააერთიანებს.

თ. დ. (აშშ)

ამ გამოცემამ ბევრ ისეთ კითხვაზე გამცა პასუხი, რომელიც დიდი ხნის განმავლობაში მაწუხებდა. ვხედავ, რომ თქვენი პუბლიკაციების მეშვეობით ღმერთი უწევს დახმარებას ჩემნაირ ადამიანებს.

თ. კ. (აშშ)

პოლემიკა შექსპირის პიროვნებაზე.  სტატიამ „საიდუმლოებით მოცული უილიამ შექსპირი“ (8 აგვისტო, 1998) მიბიძგა, უკეთესად გამომეკვლია ეს საკითხი. ერიკ სემსის წიგნში „ნამდვილი შექსპირი — ცხოვრების ადრეული წლების მიმოხილვა“ (The Real Shakespeare: Retrieving the Early Years) რამდენიმე საყურადღებო მხარე შევნიშნე. მაგალითად, თუ მხედველობაში მივიღებთ, რომ შექსპირი, შესაძლოა, კათოლიკე იყო პროტესტანტულ ინგლისში, ბევრი რამ უკვე ნათელი გახდება. რადგან რელიგიური მრწამსის გამო დევნილი იქნებოდა, ამით შეგვეძლო აგვეხსნა ეგრეთ წოდებული „დაკარგული წლების“ არსებობა მის ცხოვრებაში. გარდა ამისა, შექსპირის ის ნაწარმოებები, რომლებსაც ეჭვის თვალით უყურებენ, ბევრ ისეთ დეტალს შეიცავს, რაც მისი სიცოცხლის ადრეულ პერიოდს უკავშირდება. შექსპირის ზოგიერთი პერსონაჟი მისი ოჯახის წევრებისა და მეგობრების სახელს ატარებს; თვით ჰამლეტის ჩათვლითაც, რომელიც მისი ვაჟის სახელი იყო. შექსპირის პიესები სავსეა უამრავი ცხოვრებისეული წვრილმანით, რაც, ალბათ, ისეთ საქმეებში გამოცდილების მიღებით უნდა იყოს განპირობებული, როგორიც თუნდაც ყასბობაა.

ჯ. ა. (აშშ)

ვფიქრობთ, მგოსნის გარშემო გამართული პოლემიკის დასრულებას ახლო მომავალში არ უნდა მოველოდეთ. მიუხედავად ამისა, მადლიერებით ვღებულობთ თქვენს შენიშვნებს (რედ.).

ფრინველთა სამყაროში.  მადლობელი ვარ იეჰოვას გასაოცარი ქმნილების ასე ხატოვნად აღწერისთვის სტატიაში „კლდის მამალი — ამაზონის ჯუნგლების მშვენება“ (8 ოქტომბერი, 1998). თქვენმა სტატიამ წამიერად ამაზონის ტყეში გადამიყვანა.

ე. ლ. ვ. (ბრაზილია)

ამ სტატიამ ჩემი ყურადღება არსებითად სხვა კუთხით მიიპყრო. ინფორმაცია სახალისო წასაკითხი იყო და ხაზს უსვამდა, რომ იეჰოვამ ასეთი ქმნილებები ჩვენთვის სიამოვნების მოსანიჭებლად შექმნა!

ლ. ჰ. (ბარბადოსი)

უყურადღებობა.  როდესაც მასწავლებელი რაიმეს გვიხსნიდა, ყურადღების მოკრება მიჭირდა. თქვენი სტატია: „როგორ გავუმკლავდე უყურადღებობას?“, რუბრიკიდან „ახალგაზრდების შეკითხვები“ (8 ოქტომბერი, 1998), ამ ჩვევის გამოსწორებაში დამეხმარა. სტატიის წაკითხვის შემდეგ ზემოხსენებული პრობლემის დაძლევა შევძელი და ახლა უფრო ყურადღებიანი ვარ.

მ. ა. მ. (ბრაზილია)

ყურადღებით ყოფნა ჩემთვის პრობლემას წარმოადგენს. ვერ ვხვდებოდი, რომ ყურადღების მოსაკრებად მცირე წახალისება და თვითდისციპლინაც საკმარისი იქნებოდა. ეს, რა თქმა უნდა, დიდ ძალისხმევას მოითხოვს, მაგრამ მჯერა, რომ შედეგს მივაღწევ!

დ. რ. ა. (აშშ)

ჟურნალში „გამოიღვიძეთ!“ ბევრი ისეთი საკითხია განხილული, რაც ჩვენთვის, მოზარდებისთვის, მეტად საინტერესოა. ეს სტატია ნამდვილად დიდი სარგებლობის მომტანი იყო ჩემთვის, რადგან უყურადღებობა სწორედ ის პრობლემაა, მე რომ მახასიათებს. უღრმესი მადლობა.

მ. ნ. (იტალია)