მკითხველთა წერილები

ფლირტი.  მადლობას გიხდით სტატიისთვის „რა არის ცუდი ფლირტში?“, რომელიც მოცემული იყო რუბრიკაში „ბიბლიის თვალსაზრისი“ (8 ივლისი, 1998). ჩემი ოჯახი იშუშებს ჩემ მიერ ფლირტით მიყენებულ იარებს. თავს უფლებას ვაძლევდი, თვალი დამეხუჭა ტკივილზე, რომელსაც ჩემს ოჯახს, განსაკუთრებით კი მოსიყვარულე ცოლს, ვაყენებდი. დღეს ქრისტიან დებსა და ძმებს შემდეგ სიტყვებს ვეტყოდი: „გთხოვთ, მოუსმინეთ ჩვენს მამა იეჰოვას. ზურგი აქციეთ ფლირტს, მიიღეთ დახმარება, ილოცეთ იეჰოვასადმი და გაექეცით უზნეობას“.

დ. ბ. (აშშ)

ამ სტატიამ კიდევ ერთხელ დამარწმუნა, რომ ფლირტი უმნიშვნელო რამ არაა. ამ, ერთი შეხედვით, უწყინარმა თამაშმა ჩემი ოჯახის დანგრევაში მთავარი როლი შეასრულა. ვიმედოვნებ, რომ ეს დარიგება დაეხმარება მათ, ვისაც თვითონ არ შეუძლია განჭვრიტოს, როგორ გავლენას მოახდენს საპირისპირო სქესის წარმომადგენელზე მათი ქცევა, ლაპარაკი თუ ჟესტები.

ო. მ. (ჩეხეთის რესპუბლიკა)

სტატიამ ბალზამივით დაამშვიდა ბევრი დის ნატკენი გული. ამ სტატიით დავინახეთ, რომ იეჰოვა ამჩნევს ჩვენს დაფარულ გრძნობებს და მზრუნველობას იჩენს.

ა. მ. პ. (ესპანეთი)

ქვესათაური „რომანტიკული კავშირები“ ჩემთვის აღმოჩენა იყო. ჩემს მეუღლესა და კრებაში ერთ დას ერთმანეთი მოსწონდათ, რადგან მსგავსი წარსული ჰქონდათ. თუმცა 17 წელი ერთად ცხოვრების მანძილზე არასოდეს მოუცია ჩემთვის უნდობლობის საბაბი, მე ვეჭვიანობდი. მეუღლისთვის ამის თქმა ჩემთვის ადვილი არ იყო. ის თავდაპირველად მოულოდნელობისგან გაოცდა, მაგრამ შეეცადა გაეგო ჩემი აზრი. მითხრა, რომ არ სურდა ტკივილი მოეყენებინა ჩემთვის და ჩვენი სამი შვილისთვის და მაშინვე ყოველგვარი ურთიერთობა შეწყვიტა ამ დასთან. მისმა მოქმედებამ დიდი შვება მომგვარა.

დ. ტ. (კანადა)

ნაცისტური საფრთხე.  დიდი ინტერესით წავიკითხე სტატია „იეჰოვას მოწმეები — გამბედაობა ნაცისტური საფრთხის წინაშე“ (8 ივლისი, 1998). ქრისტიანულ მსახურებაში ხშირად შევხვედრივარ ადამიანებს, რომლებიც უცოდინრობით ან ბოროტი განზრახვით იეჰოვას მოწმეებს ბრალს სდებენ, რომ თითქოს ნაცისტური რეჟიმის დროს კომპრომისზე მიდიოდნენ. ამ სტატიაში მოცემული ინფორმაცია დამეხმარება, რომ გულწრფელ ადამიანებს გავაგებინო ისტორიული სინამდვილე იმის შესახებ, რაშიც ბრალს გვდებენ და რის შესახებაც ხშირად ლაპარაკობენ.

ა. ფ. (სლოვენია)

დიდი მადლობა მინდა გადაგიხადოთ ამ სტატიისთვის. რამდენიმე თვის წინათ ჩემმა ქმარმა, რომელიც ჩემს რწმენას არ იზიარებს, წაიკითხა განდგომილების მიერ გამოქვეყნებული უარყოფითი მასალა. დიდად მადლობელი ვარ ამ სტატიისთვის, რომელიც პასუხს სცემს ასეთ ტყუილებს.

კ. გ. (გერმანია)

რატომ მეფანტება ყურადღება?  სიხარულისგან ვიტირე, როცა რუბრიკაში „ახალგაზრდების შეკითხვები“ მოცემული სტატია „რატომ მეფანტება ყურადღება?“ წავიკითხე (8 აგვისტო, 1998). ვარ 18 წლის; ვმსახურობ სრული დროით. ვწუხდი, რადგან ყურადღება მეფანტებოდა, ის კი სამქადაგებლო მსახურებაში ადამიანების დასახმარებლად აუცილებელია. თავს დათრგუნულად ვგრძნობდი, ვინაიდან ზოგი რამის გახსენება და გაანალიზება არ შემეძლო. რასაც ბიბლია ამბობს, ჭეშმარიტებაა — იეჰოვა დროულად გვაწვდის საზრდოს.

ა. რ. კ. რ. (აშშ)