მანდილოსნებმა დიდი წვლილი შეიტანეს
ზიმბაბვეში იეჰოვას მოწმეების ფილიალის მშენებლობაში ქრისტიანი ქალების მიერ შეტანილი დიდი წვლილის შესახებ 1998 წლის 12 დეკემბერს ფილიალის მიძღვნასთან დაკავშირებული პროგრამის მსვლელობის დროს აღინიშნა. ეს მშენებლობა ოთხი წლის მანძილზე გრძელდებოდა. ამ მშვენიერი შენობათა კომპლექსის აშენებას უამრავი ქვეყნიდან ჩამოსულმა მოხალისეებმა, მათ შორის ზიმბაბვეს ასობით მკვიდრმა, შესწირეს თავიანთი დრო, ენერგია, უნარი და სახსრები; ამ კომპლექსის ნახვა შეგიძლიათ ფოტოსურათზე.
უკანა ფონზე შენიშნავთ ექვს ერთი და იმავე სიდიდის საცხოვრებელ სახლს. მათ ახლოს მდგარი ერთი დიდი შენობა სასადილოს, სამზარეულოსა და სამრეცხაოს ეთმობა. საცხოვრებელ სახლებში 61 საძინებელი ოთახია, ხოლო სასადილო დაახლოებით 200 კაცზეა გათვლილი. წინა მხარეს, მარცხნივ, ადმინისტრაციული შენობაა. ცენტრში აშენებულია მისაღები, მის მარჯვნივ კი საწყობი, სადაც მიძღვნასთან დაკავშირებული პროგრამა ჩატარდა.
1985 წლის ნოემბრიდან მოყოლებული იეჰოვას მოწმეები საერთაშორისო სამშენებლო პროგრამას მიჰყვებიან. ამ დროიდან უამრავი რამ აშენდა, მათ შორის ზიმბაბვეს (სამხრეთი აფრიკა) ეს მშვენიერი და კეთილმოწყობილი ფილიალიც. ამ პროგრამის შესახებ მოთხრობილია 1991 წლის 22 აგვისტოს ჟურნალის „გამოიღვიძეთ!“ სტატიაში „სიახლე საერთაშორისო მშენებლობაში“.
ამ პროგრამაში მანდილოსნების მიერ შეტანილი წვლილის შესახებ ჟურნალი „გამოიღვიძეთ!“ აღნიშნავს: „ბევრმა ისწავლა მავთულებით არმატურის შეკვრა, მეტლახის დაგება, კაფელის გაკვრა, გალესვა და შეღებვა. სხვები აუცილებელი ყოველდღიური საქმეებით იყვნენ დაკავებული. თითოეულმა მათგანმა დიდი წვლილი შეიტანა მშენებლობებში მთელი მსოფლიოს მასშტაბით“.
ზიმბაბვეში ახლახან ჩატარებულ მიძღვნის პროგრამაზე მშენებლობის ზედამხედველებმა, ჯორჯ ევანსმა და ჯეიმზ პოლსონმა, ფილიალის მშენებლობაში მანდილოსნების მიერ შეტანილი წვლილი შეადარეს ძველ ისრაელში კარვის მშენებლობაში იმდროინდელი ქალების მიერ შეტანილ წვლილს. ბიბლიაში ისრაელიანების შესახებ ნათქვამია: „მივიდნენ სათითაოდ, ვისაც კი გულმა გაუწია. . . მიდიოდნენ მამაკაცები და დედაკაცები“ (გამოსვლა 35:21, 22).
ამ ბიბლიურ ცნობებზე დაყრდნობით, ძმებმა ევანსმა და პოლსონმა ხაზგასმით აღნიშნეს, რომ ქალების მიერ შეტანილი წვლილი განსაკუთრებულია. მაგალითისთვის მოიყვანეს ბიბლიური შემთხვევა: ‘ყველა მარჯვე დედაკაცს, ვისაც კი გული უწევდა და გაწაფული იყო, ნართის რთვა შეეძლო თავისი ხელით’. იმ დროს ქალებიც სიამოვნებით ასრულებდნენ სამუშაოს. „კაცსა თუ ქალს. . . თავისი გულუხვობით სურდა მოეტანა ძღვენი ყოველი საქმისთვის, რისი გაკეთებაც ბრძანა უფალმა მოსეს პირით“ (გამოსვლა 35:25, 26, 29).
ზიმბაბვეს ფილიალის პროექტთან დაკავშირებით მშენებლობის ზედამხედველებმა აღნიშნეს: „ქალებმა შეასრულეს ყველა ის სამუშაო, რასაც კაცები აკეთებენ“. მაგალითად, კრავდნენ არმატურას და მართავდნენ მძიმე ტექნიკას. ძმა პოლსონმა შენიშნა, რომ ქალების ბეტონსარევი და სხვა სახის მანქანები ყოველთვის სუფთად გამოიყურებოდა, რასაც მამაკაცები, ჩვეულებრივ, არ აქცევენ ხოლმე ყურადღებას.
ჩვენ მადლიერი ვართ ათასობით მანდილოსნის, რომლებსაც მამაკაცებთან ერთად იეჰოვას მოწმეების მსოფლიო მასშტაბით ფილიალის ოფისებისა და სამეფო დარბაზების მშენებლობაში დიდი წვლილი შეაქვთ!
[სურათი 26 გვერდზე]
ზიმბაბვეს ფილიალი.