გაწონასწორებული შეხედულება გქონდეთ მუსიკაზე
მუსიკალური ინდუსტრიის ფონდი დღეს მილიარდობით დოლარს ითვლის. პოპულარულ მუსიკოსებსა და მათს სპონსორებს დიდი შემოსავალი აქვთ. მაგრამ ზოგიერთი წარმატებული მუსიკოსისთვის ამას ბედნიერება არ მოუტანია. ხშირად ნაადრევი სიკვდილი ან თვითმკვლელობა წყვეტს მათს სიცოცხლეს. ამასთანავე მრავალი ფაქტი ცხადყოფს, რომ გარკვეული სტილის მუსიკა მორალურად, ემოციურად და სულიერად გამხრწნელია და ძალადობისა და ანტისაზოგადოებრივი მოქმედების მიზეზი ხდება.
როგორც უნდა იყოს, მუსიკის შესახებ გაწონასწორებული შეხედულება უნდა ვიქონიოთ. მიუხედავად იმისა, რომ ხელოვნების ამ სფეროს საზიანო გავლენაც აქვს, ზოგი მუსიკა ამდიდრებს ადამიანის ცხოვრებას და სიხარული და კმაყოფილება მოაქვს. მას შეუძლია სულიერი სიმხნევე შეგვძინოს და ათასგვარი გრძნობა განგვაცდევინოს. განვიხილოთ მხოლოდ რამდენიმე მაგალითი.
ბიბლიის 150 ფსალმუნი ლიტერატურული შედევრია — ლირიკული ლექსები, საგალობლები და ლოცვები. დღეს მათ სიამოვნებით კითხულობენ ასობით ენაზე. მაგრამ ძველი დროის ებრაელები არა მხოლოდ კითხულობდნენ ფსალმუნებს, არამედ მღეროდნენ კიდეც, ხშირად ლამაზი მელოდიის თანხლებით. ამ სახით გამოცდილი მომღერლები საკუთარი გრძნობებით გადასცემდნენ მსმენელებს თავიანთი ღმერთის, იეჰოვას, სიტყვებში გამოხატულ სიბრძნეს. ხოლო ებრაული მუსიკა სულაც არ იყო მარტივი ან პრიმიტიული; ის აშკარად აღემატებოდა მათი თანამედროვე ერების მუსიკას.
მოგვიანებით, პირველი ქრისტიანებიც მღეროდნენ ღვთის განსადიდებლად ფსალმუნებსა და სხვა საგალობლებს, რაც მათ სიმშვიდეს ჰგვრიდა. ამგვარად, მუსიკა ალამაზებდა მათს ცხოვრებას. ბიბლიურ მუხლებზე დაფუძნებული სიმღერების ტექსტების წყალობით მათს გულებში უფრო ღრმად იბეჭდებოდა ღვთის შემეცნება, რომელიც ასე აუცილებელი იყო მათთვის ცხოვრებაში სახელმძღვანელოდ (მათე 26:30; საქმეები 16:25).
ძველ ბერძნებს სწამდათ, რომ მუსიკა ადამიანის პიროვნებას აყალიბებდა და მამაკაცსა თუ ქალს უფრო ასრულყოფილებდა. ჩვენს XX საუკუნეში, რომელიც განსაკუთრებით ამახვილებს ყურადღებას მეცნიერების, ეკონომიკისა და ლოგიკის სფეროში განათლების მიღებაზე, ხშირად ივიწყებენ ხელოვნების მეშვეობით პიროვნების ემოციური განვითარების შესაძლებლობას.
შეინარჩუნეთ გაწონასწორებული თვალსაზრისი
კარგი მუსიკალური ნაწარმოების მოსმენა შეიძლება სასარგებლო და სასიამოვნო იყოს, მაგრამ მუსიკალურ ინსტრუმენტზე დაკვრით ან მეგობრებთან ერთად მღერით ადამიანს გაცილებით დიდი სიამოვნების მიღება შეუძლია. მუსიკალურ განათლებას შეუძლია ახალი ელფერი შემატოს ადამიანის სიცოცხლეს.
რა თქმა უნდა, როგორც ცხოვრებაში სხვა მრავალი სასიამოვნო ფაქტორის მიმართ, ხელოვნების ამ სფეროშიც საჭიროა ზომიერების, საღი აზროვნებისა და გარჩევის უნარის გამოვლენა, რაც არა მხოლოდ გარკვეული ტიპის მუსიკის არჩევის დროს უნდა გამოვხატოთ, არამედ — მაშინაც, როცა დროს მის მოსმენასა თუ შესრულებას ვუთმობთ.
თუ მუსიკის გარკვეული სტილი თქვენს გრძნობებზე, მოქმედებებსა და ურთიერთობებზე უარყოფით გავლენას ახდენს, სხვა სტილი შეარჩიეთ. ყურადღებით იყავით მუსიკის შერჩევის დროს, რომ დაიცვათ თქვენი გრძნობები, გული და გონება!
ეს განსაკუთრებით გასათვალისწინებელია, როცა საქმე ტექსტს ეხება. მას თქვენი ფორმირება შეუძლია იმ ადამიანთა მისწრაფებების შესაბამისად, ვინც არათუ არ იზიარებს თქვენს შეხედულებას ცხოვრებისა და ზნეობის შესახებ, არამედ, პირიქით, უღვთო, უზნეო ცხოვრებას ეწევა. ზოგჯერ თავად სიმღერის სახელწოდებასაც კი შეუძლია უარყოფითი გრძნობების გამოწვევა.
ღვთის სიტყვა, ბიბლია, შეაგონებს მათ, ვისაც სურს, ასიამოვნოს ღმერთს, რომ ‘შესწირონ სხეული ცოცხალ, წმიდა, ღვთის სასურველ მსხვერპლად — [თავიანთი] სულიერი მსახურება’ (რომაელთა 12:1). ნათელია, რომ ჩვენი გრძნობებიც ამ ‘ცოცხალი მსხვერპლის’ ნაწილს წარმოადგენს. ამიტომ, როგორც კი ვამჩნევთ, რომ მუსიკა ხელს უწყობს საღი აზროვნებისა და მსჯელობის დაკარგვას და არასწორ მოქმედებას, შევწყვიტოთ მოსმენა. გახსოვდეთ, დადებითად თუ უარყოფითად — მუსიკა მოქმედებს ჩვენს გულსა და გონებაზე!
[ჩარჩო⁄სურათი 10 გვერდზე]
ის სწავლის უნარს ზრდის
„გამოკვლევებით მტკიცდება, რომ მელოდიური მუსიკის რეგულარულ მოსმენას ჩვილი ბავშვის სწავლის უნარის გაზრდა შეუძლია. მაგრამ მრავალ ოჯახში ეს ტრადიცია დამკვიდრებული არ არის“ (Audio, მარტი, 1999).