მზარდი ინტერესი ანგელოზებისადმი
„ყველას გვყავს მფარველი ანგელოზები, რომლებიც ცხოვრების გზაზე გვიძღვებიან. . . თუკი არ შევაწუხებთ მათ და ბავშვებივით, სრული რწმენით, სიყვარულით, მოკრძალებითა და მადლიერებით გადავცემთ საკუთარ თავს, ისინი განუზომლად გვაკურთხებენ. ისინი გვეთამაშებიან და ზრუნავენ ჩვენზე. უხილავი თბილი ხელებით გვკურნავენ, გვეხებიან, გვანუგეშებენ და ყოველთვის ცდილობენ მოგვცენ ის, რაც გვსურს“, — ამბობს წიგნი „ანგელოზის წერილები“ (Angel Letters).
დაგვეთანხმებით, რომ ანგელოზების შესახებ ეს გავრცელებული აზრი მიმზიდველია. იმ თვალსაზრისის თანახმად, რასაც ზოგიერთები „ახალ სულიერობას“ უწოდებენ, ყოველ ჩვენგანს ჰყავს სულ მცირე ერთი ანგელოზი მაინც, რომლის მოვალეობაც არის ჩვენი ნუგეშისცემა და უბედური შემთხვევებისგან დაცვა. არაერთხელ მოისმენდით, რომ თქვენი ანგელოზი ძლიერი და მოსიყვარულეა. ის არ მოითხოვს მორჩილებას ან თაყვანისცემას და არასოდეს განგსჯით, არც გისაყვედურებთ. ის ყოველთვის თქვენს გვერდით არის, ზრუნავს თქვენს კეთილდღეობაზე და თქვენი ყოველი სურვილის შესრულება სწადია. დღეს მრავალს გულწრფელად სწამს ეს.
ანგელოზებისადმი რწმენა, რასაკვირველია, ახალი არ არის. ისინი ძველი დროიდანვე უდიდეს როლს თამაშობენ ხალხის რელიგიურ შეხედულებებში. ეს სახვით ხელოვნებაშიც კი აირეკლა. ანგელოზების კლასის წარმომადგენლების, ქერუბიმების, გამოსახულებები ძველ ისრაელთა კარავსა და ტაძარს ამშვენებდა. ანგელოზები ამკობენ მთელი ქრისტიანული სამყაროს ეკლესიებსა და ტაძრებს. მუზეუმები სავსეა ფერწერულ ტილოებზე გამოხატული ანგელოზებითა და მათი ქანდაკებებით.
ანგელოზების პოპულარობა
ბოლო დროს ზოგ ქვეყანაში ანგელოზების პოპულარობამ იმატა. კინოფილმებში ხშირად ანგელოზებად ჰყავთ გამოყვანილი გარდაცვლილი ადამიანები, რომლებიც კეთილი საქმეების შესასრულებლად დედამიწაზე ბრუნდებიან. ერთ ფილმში ანგელოზები ბეისბოლის გუნდს ეხმარებიან, რომელიც თამაშს აგებდა. სხვაში მფარველი ანგელოზი ყმაწვილს, რომელსაც შეყვარებული მოუკლეს, შურისძიებაში ეხმარება. დამხმარე ანგელოზის თემა შეერთებული შტატების პოპულარულ სატელევიზიო გადაცემაშიც ჩნდება.
მრავლად არის სიმღერები ანგელოზების შესახებ. უკანასკნელი ათწლეულების მანძილზე შეერთებულ შტატებში 10-დან ერთ პოპულარულ სიმღერაში ანგელოზი იყო ნახსენები. 90-იანი წლების მეორე ნახევრისთვის ამერიკაში 120-ზე მეტი სპეციალური მაღაზია გაიხსნა, სადაც ყიდიან ანგელოზების სტატუეტებს, ანგელოზების გამოსახულებებით მოხატულ სამკაულებსა და საკანცელარიო ნივთებს — ჩვილი ბავშვის ჩხარუნასაც კი, რომელზეც ანგელოზია გამოსახული. გაზეთებში და სემინარებზე ხალხს ასწავლიან, თუ როგორ დაუკავშირდნენ ამ ზეციურ არსებებს. ჟურნალებში, გაზეთებსა და „ტოკ-შოუებში“ ანგელოზებთან შეხვედრის ამბებს ყვებიან.
ასობით წიგნი
გარდა ამისა, არსებობს უამრავი წიგნი. ნიუ-იორკში წიგნების ერთი დიდი მაღაზია მყიდველებს სთავაზობს 500-ზე მეტ სხვადასხვა წიგნს, რომლებშიც ანგელოზებზეა საუბარი, განსაკუთრებით კი — მფარველ ანგელოზებზე. ასეთი წიგნები მკითხველს ჰპირდება იმის ახსნას, თუ როგორ დაუკავშირდნენ მფარველ ანგელოზებს, ისწავლონ მათი სახელები, ესაუბრონ და დახმარება სთხოვონ. ამ წიგნებში მოთხრობილია მრავალი ამბავი ანგელოზების საჭირო დროს გამოჩენის შესახებ; ავტოკატასტროფის საფრთხის დროს ადამიანების ატაცების, სასიკვდილო დაავადებებისგან განკურნების, მწუხარების ჟამს დამშვიდებისა და ბრძოლის ველზე ჯარისკაცების დაცვის შესახებ. ეს ანგელოზები ადამიანებს ემსახურებიან და არ მოითხოვენ მათგან ცოდვების მონანიებას, რწმენაზე მოქცევას ან რომელიმე აღმსარებლობის მიღებას. მაგრამ ასეთი დღევანდელი „შეხვედრები“ ადამიანებს იშვიათად აღძრავს თავიანთ ცხოვრებაში ცვლილებების მოსახდენად. მათ, ვინც აცხადებს, რომ ანგელოზს შეხვედრია, ჩვეულებრივ, სასიამოვნო გრძნობის მეტი არაფერი რჩებათ.
ამ გაჭირვებისა და კრიზისის ეპოქაში ასეთი ამბები ხალხისთვის არაჩვეულებრივად სასიამოვნო მოსასმენია. მაგრამ სარწმუნოა ისინი? აქვს ამას მნიშვნელობა?
[ჩანართი 4 გვერდზე]
ბევრი თვლის, რომ პირადად შეხვედრიან ანგელოზებს.