გყავთ მფარველი ანგელოზი?

გჯერათ, რომ მფარველი ანგელოზი გყავთ? ბევრს ჰგონია, რომ ჰყავთ. ამ საკითხის თაობაზე ერთ დასავლეთ კანადელ ქალზე ამბობენ, რომ ანგელოზებთან დაკავშირების განსაკუთრებული უნარი აქვს. ის ამბობს, რომ, თუ ეტყვით სახელსა და გვარს და თან 200 კანადურ დოლარს მისცემთ, თქვენს მფარველ ანგელოზთან დაგაკავშირებთ. თავდაპირველად ქალი აშტერდება სანთლის ალს. შემდეგ ხედავს ხილვას, რომელშიც ანგელოზი თქვენთვის ინფორმაციას აძლევს. საჩუქრად ქალი ნახატსაც აკეთებს, თუ როგორ გამოიყურება თქვენი ანგელოზი.

ზოგისთვის ეს შეიძლება ფრანგი მეფის, ლუი IX-ს, ამბის მსგავსი იყოს. თითქოს მას ძალიან ძვირადღირებული ბუმბული შეუძენია, რომელიც მთავარანგელოზ მიქაელს ფრთებიდან ჩამოსცვივდაო. თუმცა ამ ამბავს დაუჯერებლად მიიჩნევდნენ, კანადელი ქალის ნათქვამში ბევრს წამითაც არ შეეპარებოდა ეჭვი.

ანგელოზებით დაინტერესება

ბოლო წლებში ანგელოზების მიმართ განსაკუთრებული დაინტერესება შეიმჩნევა. ტელევიზიით, ფილმებში, წიგნებში, ჟურნალებსა და საინფორმაციო ბიულეტენებში გადმოგვცემენ ანგელოზების შესახებ, რომ ისინი ანუგეშებენ მძიმე ავადმყოფებს, ქვრივებს, ადამიანებს მატებენ სიბრძნეს და მათ სიკვდილისგან იცავენ. ამერიკის შეერთებულ შტატებში დაახლოებით 20 მილიონი ადამიანი უყურებს საკვირაო სატელევიზიო გადაცემას, რომელიც აშუქებს, თუ როგორ ერევა ანგელოზი ადამიანის ცხოვრებაში. ერთ-ერთ წიგნის მაღაზიაში 400-ზე მეტი დასახელების წიგნი იყიდება ანგელოზების შესახებ.

ბოლო დროს გამოიცა წიგნი, რომელშიც მოთხრობილია შემთხვევები იმის შესახებ, თუ როგორ გადაარჩინეს მფარველმა ანგელოზებმა ჯარისკაცები ბრძოლის დროს. ავტომობილის ბამპერზე გაკრული წარწერები იუწყება, რომ მძღოლებს მფარველი ანგელოზები იცავენ. ასოციაციები, კონფერენციები და სემინარები ხელს უწყობს ანგელოზების შესწავლას და ხალხს მათთან კავშირის დამყარებაში ეხმარება.

აილინ ფრიმენი იმ სამი წიგნის ავტორი და ჟურნალის რედაქტორია, რომლებშიც მხოლოდ ანგელოზების შესახებაა საუბარი. ის აცხადებს: „მე მჯერა, რომ დედამიწაზე იმდენი მფარველი ანგელოზია, რამდენიც ზეცაშია. ამ არსებების მოვალეობაში ზეცაში მხოლოდ ღვთისთვის ხოტბის შესხმა კი არ შედის, არამედ დედამიწაზე ადამიანებსა და სხვა ცოცხალ არსებებზე ზრუნვაც. მფარველი ანგელოზი თითოეულ ჩვენგანს ჩასახვის მომენტიდან ჰყავს დანიშნული; ის თვალყურს გვადევნებს საშოში განვითარების პერიოდში, დაბადების დროს, ამ ქვეყნიერებაში ცხოვრების მანძილზე, სანამ ამ სამყაროდან ზეციურ დიდებაში არ გადაგვიყვანს“. ეს კარგად აღწერს მფარველ ანგელოზებზე გავრცელებულ შეხედულებას.

ამ დაძაბულ და რთულ დროს მანუგეშებელია იმის დაჯერება, რომ გვყავს მფარველი ანგელოზი, რომელსაც ჩვენი დაცვა ევალება. რას ამბობს ღვთის სიტყვა, ბიბლია, ამის შესახებ? უნდა ვეცადოთ ანგელოზებთან კავშირის დამყარებას? ზრუნავენ ისინი ჩვენს ზნეობრივ ნორმებსა და რელიგიურ მრწამსზე? რა დახმარებას უნდა ველოდოთ მათგან? ამ კითხვებზე პასუხები განხილული იქნება მომდევნო სტატიაში.