ნაწილი 3
როგორ შეგვიძლია გავიგოთ, რომ ღმერთი არსებობს
1, 2. როგორი პრინციპი გვეხმარება დავადგინოთ, რომ ღმერთი არსებობს?
ერთ-ერთი შესაძლებლობა, რომ დავადგინოთ ღმერთის არსებობა, მდგომარეობს ურყევ პრინციპში: ყოველივე რაც შექმნილია, საჭიროებს შემოქმედს. რაც უფრო რთულია ნაკეთობა, მით უფრო დახელოვნებული უნდა იყოს ოსტატი.
2 მაგალითად, მიმოიხედე შენს სახლში. მაგიდები, სკამები, საწერი მაგიდები, საწოლები, ქვაბები, ტაფები, თეფშები და სხვა სამზარეულო ნივთები — ყოველივე ეს საჭიროებს ოსტატს და ამასვე მოითხოვს იატაკი, კედლები და ჭერი. მაგრამ, ამ საგნების დამზადება შედარებით იოლია. თუკი მარტივი საგნების დამზადებას ესაჭიროება ხელოსანი, ნუთუ ლოგიკური არ არის, რომ რთული საგნების შექმნას დასჭირდება უფრო გონიერი ოსტატი?
ჩვენი აღმაფრთოვანებელი სამყარო
3, 4. როგორ გვეხმარება სამყარო, გავიგოთ, რომ ღმერთი არსებობს?
3 საათს სჭირდება მესაათე. მაგრამ რა შეიძლება ითქვას ჩვენი, გაცილებით რთული, მზის სისტემის შესახებ, სადაც პლანეტები მზის გარშემო საუკუნეთა განმავლობაში წამის აბსოლუტური სიზუსტით მოძრაობენ? რა შეიძლება ითქვას აღმაფრთოვანებელი გალაქტიკის, ირმის ნახტომის შესახებ, რომელშიც ჩვენ ვცხოვრობთ და რომელიც ითვლის 100 მილიარდზე მეტ ვარსკვლავს? შეჩერებულხარ ოდესმე ღამით, რომ შეგეხედა ირმის ნახტომისთვის? ნუთუ არ მოუხდენია ამას შენზე ღრმა შთაბეჭდილება? აგრეთვე, დაფიქრდი წარმოუდგენლად უზარმაზარი სამყაროს შესახებ, რომელიც შეიცავს ირმის ნახტომის მსგავს მილიარდობით უთვალავ გალაქტიკას! გარდა ამისა, ციური სხეულები საუკუნეთა განმავლობაში იმდენად საიმედოდ მოძრაობენ, რომ ისინი შეადარეს ზუსტ საათს.
4 თუ შედარებით მარტივი საგანი, საათი, საჭიროებს მესაათის არსებობას, მაშინ გაცილებით რთული და აღმაფრთოვანებელი სამყარო უეჭველად მიგვანიშნებს კონსტრუქტორისა და შემოქმედის არსებობაზე. აი, რატომ გვიწვევს ბიბლია: „ზეცად აღაპყარით თვალნი და შეხედეთ“, შემდეგ სვამს კითხვას: „ვინ შექმნა ესენი?“ პასუხი გვამცნობს: „მან [ღმერთმა], ვისაც სათვალავით გამოჰყავს მათი მხედრობა; ვინც სახელდებით უხმობს მათ ყველას, არავინ დააკლდება ძალამოსილს და ყოვლადძლიერს“ (ესაია 40:26). ამრიგად, სამყარო არსებობს უხილავი, მმართველი, ინტელექტუალური ძალის — ღმერთის წყალობით.
უნიკალურად კონსტრუირებული დედამიწა
5-7. რომელი ფაქტები მიუთითებენ, რომ დედამიწას ჰყავდა კონსტრუქტორი?
5 მეცნიერები, რაც უფრო მეტად იკვლევენ დედამიწას, მით უფრო მეტად რწმუნდებიან, რომ იგი უნიკალურად არის კონსტრუირებული ადამიანთა საცხოვრებლად. დედამიწა ზუსტად ისეთი მანძილით არის დაშორებული მზისგან, რამდენიც საჭიროა სითბოსა და სინათლის საკმარისი რაოდენობის მიღებისთვის. ერთი წლის განმავლობაში დედამიწა სრულ ბრუნვას აკეთებს მზის გარშემო, ზუსტად ისეთი დახრილობის კუთხით, რომ დედამიწის მრავალ ნაწილში არსებობს წელიწადის დროები. ასევე, დედამიწა ყოველ 24 საათში ახდენს სრულ ბრუნვას თავისი ღერძის გარშემო, რომ უზრუნველყოს სინათლისა და სიბნელის რეგულარული ცვლა. მისი ატმოსფერო შეიცავს აირების ისეთ მასებს, რაც აუცილებელია სუნთქვისთვის და ამავე დროს იცავს დედამიწას კოსმოსური რადიაციის მავნე ზემოქმედებისგან. აგრეთვე, დედამიწაზე არის სასიცოცხლოდ მნიშვნელოვანი ნიადაგი და წყალი, რომლებიც საჭიროა საკვებად ვარგისი მცენარეების ზრდისთვის.
6 ყველა ამ და სხვა, ერთობლივად მოქმედი ფაქტორების გარეშე ცხოვრება შეუძლებელი იქნებოდა. ნუთუ ეს ყველაფერი შემთხვევით გაჩნდა? ჟურნალი „ახალი ამბები მეცნიერებაში“ (ინგლ.), აღნიშნავს: „როგორც ჩანს, შეუძლებელია, რომ ასეთი განსაკუთრებული და ზუსტი პირობები შემთხვევით შექმნილიყო“. არა, ყოველივე ეს ვერ გაჩნდებოდა თავისთავად. ეს პირობები წინასწარ იყო ჩართული ბრწყინვალე კონსტრუქტორის მიზანდასახულ გეგმაში.
7 მშვენიერ სახლში რომ შესულიყავი და გენახა უხვი საკვები, ჰაერის კონდიციონირებისა და გათბობის შესანიშნავი სისტემები და კარგი წყალგაყვანილობა, რა დასკვნამდე მიხვიდოდი? რომ ყოველივე ეს თავისით გაჩნდა? არა, შენ უსათუოდ დაასკვნიდი, რომ გონიერმა ადამიანმა დაგეგმა და გააკეთა იგი დიდი მზრუნველობით. ასევე დედამიწაც დაგეგმილი და შექმნილი იყო დიდი მზრუნველობით, რომ დაეკმაყოფილებინა მობინადრეთა მოთხოვნილებები. ამავე დროს, დედამიწა გაცილებით რთულია და უფრო მეტად უზრუნველყოფილი, ვიდრე ნებისმიერი სახლი.
8. დედამიწასთან დაკავშირებით, კიდევ რა ფაქტები გვიჩვენებს, რომ ღმერთი სიყვარულით ზრუნავს ჩვენზე?
8 აგრეთვე, დაუფიქრდი ყოველივე იმას, რაც სიხარულს ანიჭებს ჩვენს ცხოვრებას. შეხედე სურნელოვანი, ლამაზი ყვავილების საოცარ მრავალფეროვნებას; მათი მშვენიერება და სასიამოვნო სურნელება სიხარულს მატებს ადამიანს. ასევე არსებობს სასიამოვნო საკვების ნაირგვარობა. ამასთანავე თვალწარმტაცი ტყეები, მთები, ტბები და სხვა ქმნილებები. რა შეიძლება ითქვას მზის მშვენიერ დაისზე, რომელიც უფრო მეტ სიხარულს მატებს ჩვენს ცხოვრებას? განა აღტაცებაში არ მოვყავართ ლეკვების, კნუტებისა და ცხოველთა სამყაროს სხვა პატარა წარმომადგენლების სიცელქესა და საყვარელ ხასიათს? მაშ ასე, ბუნება გვთავაზობს მრავალ სასიხარულო სიურპრიზს, რომელიც არ არის აუცილებელი სიცოცხლის შენარჩუნებისთვის. ეს მაგალითები გვიჩვენებს, რომ დედამიწა შექმნილი იყო ადამიანის მიმართ სიყვარულით აღსავსე მზრუნველობით, რომ მათ არა მხოლოდ ეარსებათ, არამედ დამტკბარიყვნენ სიცოცხლით.
9. ვინ შექმნა დედამიწა და რა მიზნით?
9 ამიტომ, გონივრული იქნებოდა დასკვნა: ვაღიაროთ ყოველივე ამის მომცემი, როგორც ამას აკეთებს ბიბლიის ერთ-ერთი მწერალი, რომელმაც იეჰოვა ღმერთის შესახებ თქვა: „შენი შექმნილია ცა და მიწა“. რა მიზნისთვის? ამის საპასუხოდ, ბიბლიის მწერალი აღწერს: „ის არის ღმერთი, რომელმაც მიწა გამოსახა და შექმნა; მან დაამყარა იგი, საუკაცრიელოდ არ შეუქმნია, დასასახლებლად გამოსახა“ (ესაია 37:16; 45:18).
საოცარი ცოცხალი უჯრედი
10, 11. რითაა გასაოცარი ცოცხალი უჯრედი?
10 რა შეიძლება ითქვას ცოცხალ ორგანიზმებზე? განა ისინი არ საჭიროებენ შემოქმედს? მაგალითისთვის, განვიხილოთ ცოცხალი უჯრედის ზოგიერთი საოცარი თავისებურება. თავის წიგნში „ევოლუცია: თეორია კრიზისში“ (ინგლ.) მოლეკულური ბიოლოგიის დარგის მეცნიერი, მაიკლ დენტონი აღნიშნავს: „დღესდღეობით არსებულ ცოცხალ ორგანიზმთა შორის ყველაზე მარტივი ბაქტერიების უჯრედებიც კი ურთულეს ობიექტებად ითვლებიან. თუმცა ბაქტერიები წარმოუდგენლად ნამცეცი ორგანიზმებია. . . თითოეული მათგანი არსებითად წარმოადგენს ნამდვილ მიკრომინიატურულ ფაბრიკას, რომელიც შეიცავს რთული მოლეკულური მექანიზმის სრულყოფილად კონსტრუირებულ ათასობით ნაწილს. . . იგი გაცილებით უფრო რთულია, ვიდრე ადამიანის მიერ დამზადებული ნებისმიერი მექანიზმი და მას საერთოდ არ გააჩნია ანალოგია არაცოცხალ მატერიაში“.
11 ცალკეული უჯრედის გენეტიკური კოდის შესახებ, ის აცხადებს: „დ ნ მ-ის (დეზოქსირიბონუკლეინის მჟავა) ინფორმაციის შენახვის უნარი, ბევრად აღემატება ნებისმიერი სხვა ცნობილი სისტემის უნარს; ის იმდენად ეფექტურია, რომ მთელი ინფორმაცია, რომელიც აუცილებელია ისეთი რთული ორგანიზმის სპეციფირებისთვის, როგორიცაა ადამიანი, იწონის გრამის რამდენიმე ათას მემილიონედზე ნაკლებს. . . ცოცხალი მოლეკულური მექანიზმის კონსტრუქცია, იმდენად რთული და მოხერხებულია, რომ მასთან შედარებით, ტექნიკის უკანასკნელი მიღწევები ტლანქი გვეჩვენება. ჩვენ ვგრძნობთ ჩვენს არარაობას“.
12. რა თქვა ერთ-ერთმა მეცნიერმა უჯრედის წარმოშობის შესახებ?
12 დენტონი უმატებს: „უჯრედთა ცნობილი ტიპებიდან, თვით უმარტივესი უჯრედიც კი იმდენად რთულია, რომ შეუძლებელია დავუჯეროთ იმ თეორიას, რომელიც ამტკიცებს ასეთი ობიექტის შემთხვევით წარმოშობას, რომელიმე არამდგრადი, უკიდურესად დაუჯერებელი მოვლენის წყალობით“. აუცილებელი იყო კონსტრუქტორი და შემოქმედი.
ჩვენი საოცარი გონება
13, 14. რატომ არის ტვინი უფრო საოცარი, ვიდრე ცოცხალი უჯრედი?
13 შემდეგ ეს მეცნიერი ამბობს: „თუ ვილაპარაკებთ სირთულეზე, ცალკეული უჯრედი უმნიშვნელოა ისეთ სისტემასთან შედარებით, როგორიცაა ძუძუმწოვართა ტვინი. ადამიანის ტვინი დაახლოებით ათობით მილიარდი ნეირონისგან შედგება. თითოეული ნეირონისგან გამოდის ათობით ათასებიდან ასობით ათასებამდე შემაერთებელი ბოჭკო, რომელთა საშუალებითაც ტვინში არსებულ ნეირონთა შორის ხდება კავშირის დამყარება. საერთო ჯამში ადამიანის ტვინში არსებულ კავშირთა რიცხვი ათას ტრილიონს აღწევს“.
14 დენტონი განაგრძობს: „ტვინში არსებული კავშირების მხოლოდ მესამედი ნაწილი რომ ყოფილიყო განსაკუთრებულად ორგანიზებული, ის კვლავაც იქნებოდა სისტემა, რომელიც დედამიწის მთელ საკომუნიკაციო სისტემასთან შედარებით, გარკვეული კავშირების გაცილებით უფრო მეტ რიცხვს შეიცავს“. შემდეგ ის კითხულობს: „შეეძლო კი სრულიად შემთხვევით პროცესს, ასეთი რთული სისტემის შედგენა?“ ნათელია, რომ ამ კითხვაზე პასუხი უარყოფითი იქნება. ტვინს უნდა ჰყოლოდა მზრუნველი კონსტრუქტორი და შემოქმედი.
15. რა აზრს გამოთქვამენ სხვა ადამიანები ტვინის შესახებ?
15 ადამიანის ტვინთან შედარებით, თვით ყველაზე რთული კომპიუტერებიც კი პრიმიტიულად გამოიყურება. მეცნიერმა და მწერალმა, მორტონ ხანტმა თქვა: „ჩვენს აქტიურ მეხსიერებაში ინახება მილიარდობით უფრო მეტი ინფორმაცია, ვიდრე თანამედროვე დიდ კვლევით კომპიუტერში“. ამიტომ, ნეიროქირურგმა დ-რ რობერტ ჯ. უაიტმა დაასკვნა: „მე არ შემიძლია არ ვაღიარო უმაღლესი ინტელექტის არსებობა, რომელიც არის მიზანდასახული აგებულებისა და ტვინსა და გონებას შორის არაჩვეულებრივი ურთიერთკავშირის განვითარების — ფენომენის ავტორი, რომელიც სრულიად მიუწვდომელია ადამიანისთვის. . . მე იძულებული ვარ მწამდეს, რომ ყოველივე ამას აქვს გონივრული საწყისი, რომ ყოველივე ეს ვიღაცამ მოიყვანა მოქმედებაში“. და ის აგრეთვე უნდა იყოს ძალზე მზრუნველი.
სისხლის მიმოქცევის უნიკალური სისტემა
16-18. ა) რა მხრივ არის სისხლის მიმოქცევის სისტემა უნიკალური? ბ) რა დასკვნამდე უნდა მივიდეთ?
16 განვიხილოთ სისხლის მიმოქცევის უნიკალური სისტემა, რომლის საშუალებითაც ორგანიზმი მარაგდება საკვები ნივთიერებებითა და ჟანგბადით, ამავე დროს ეს სისტემა იცავს ორგანიზმს ინფექციისგან. სისხლის წითელ უჯრედებთან დაკავშირებით, რომლებიც შეადგენენ ამ სისტემის ძირითად ნაწილს, წიგნი „ადამიანის ორგანიზმის ანბანი“ (ინგლ.) აღნიშნავს: „სისხლის ერთი წვეთი შეიცავს 250 მილიონზე მეტ სისხლის ცალკეულ უჯრედს. . . სავსებით შესაძლებელია, რომ ორგანიზმი შეიცავს ასეთი უჯრედების 25 ტრილიონს, რაც საკმარისია ჩოგბურთის ოთხი კორტის დასაფარავად. . . სისხლში მუდმივი ცვლილებები მიმდინარეობს, ყოველ წამში სამი მილიონი ახალი უჯრედი წარმოიქმნება“.
17 სისხლის მიმოქცევის უნიკალური სისტემის სხვა ნაწილის — სისხლის თეთრი უჯრედების შესახებ იმავე წიგნში ნათქვამია: „მაშინ, როდესაც არსებობს წითელი უჯრედების მხოლოდ ერთი სახეობა, სისხლის თეთრი უჯრედები მრავალსახოვანია და თითოეულ ტიპს ორგანიზმის დაცვის სხვადასხვაგვარი უნარი შესწევს. მაგალითად, ერთი ტიპი სპობს მკვდარ უჯრედებს, ხოლო სხვა ტიპები ვირუსის საწინააღმდეგო ანტისხეულებს წარმოქმნიან. მაშასადამე, ზოგიერთები უვნებელყოფენ უცხო ნივთიერებებს, ზოგიერთნი კი, სიტყვა სიტყვით რომ ვთქვათ, შთანთქავენ და ინელებენ ბაქტერიებს“.
18 რაოდენ საოცარი და მაღალორგანიზებული სისტემაა! უეჭველია, იმას, რაც წარმოადგენს დამცველს და რაც ასე კარგად არის შედგენილი, უნდა ჰყავდეს ძალიან გონიერი და მზრუნველი ორგანიზატორი — ღმერთი.
სხვა სასწაულები
19. რას გვიჩვენებს თვალის შედარება ადამიანის მიერ დამზადებულ აპარატებთან?
19 ადამიანის სხეულში არის სხვა მრავალი სასწაულიც. ერთ-ერთ მათგანს წარმოადგენს თვალი, რომელიც იმდენად შესანიშნავად არის კონსტრუირებული, რომ ვერცერთი კამერა ვერ შეედრება მას. ასტრონომმა, რობერტ იასტროვმა, თქვა: „თვალი, როგორც ჩანს, კონსტრუირებული იყო; ტელესკოპის ვერცერთი ოსტატი ვერ გააკეთებდა ამას უკეთესად“. ასევე, „პოპულარული ფოტოსურათის“ (ინგლ.) გამოცემაშიც ნათქვამია: „ადამიანის თვალები, კინოფილმთან შედარებით, წვრილმანთა გაცილებით მეტ დიაპაზონს იჭერენ. ისინი ხედავენ სამ განზომილებაში, არაჩვეულებრივად ფართო კუთხით, დაუმახინჯებლად, უწყვეტი მოძრაობის დროს. . . ადამიანის თვალის კამერასთან შედარება არასამართლიანი ანალოგიაა. უფრო, ადამიანის თვალი შეიძლება შევადაროთ, არაჩვეულებრივად რთულ სუპერკომპიუტერს ხელოვნური ინტელექტით, საინფორმაციო-გადამამუშავებელი უნარით, სიჩქარეებითა და მუშაობის მეთოდებით, რომელიც დიდად აღემატება ადამიანის მიერ დამზადებულ ნებისმიერ აპარატს, კომპიუტერსა თუ კამერას“.
20. კიდევ რა საოცრებები ახასიათებს ადამიანის ორგანიზმს?
20 ასევე იფიქრე იმის შესახებ, თუ ჩვენი შეგნებული ძალისხმევის გარეშე, როგორ შეთანხმებულად ურთიერთქმედებენ სხეულის სხვადასხვა რთული ორგანოები. მაგალითად, ჩვენ ვღებულობთ მრავალფეროვან საკვებსა და სასმელს, ორგანიზმი კი გარდაქმნის მათ და გამოიმუშავებს ენერგიას. აბა სცადე, ამ პროდუქტების მოთავსება ავტომობილის ბენზინის ავზში და ნახე რა შორს წავა! შემდეგ — დაბადების საოცრება, იბადება ბავშვი — რომელიც არის მშობლების ასლი — სულ რაღაც ცხრა თვეში. ხოლო რა შეიძლება ითქვას ბავშვის უნარზე, რომელსაც რამდენიმე წლის ასაკში შეუძლია აითვისოს რთული სასაუბრო ენა?
21. რას ამბობენ გონიერი ადამიანები ორგანიზმის აგებულების საოცრებათა განხილვის დროს?
21 დიახ, ადამიანის ორგანიზმში, მრავალი საოცარი, რთული მექანიზმი იწვევს ჩვენს აღფრთოვანებას. არცერთ ინჟინერს არ შესწევს უნარი გაიმეოროს ისინი. შეიძლება კი ყოველივე ეს ბრმა შემთხვევის წყალობით წარმოქმნილიყო? ნათელია, რომ არა. პირიქით, როცა განიხილავენ ადამიანის ორგანიზმის ამ საოცარ თვისებებს, გონიერი ადამიანები ფსალმუნმომღერლის მსგავსად, ამბობენ: „გადიდებ, რადგან საოცრებით ვარ შენივთული; საკვირველია საქმენი შენნი“ (ფსალმუნი 138:14).
უზენაესი მშენებელი
22, 23. ა) რატომ უნდა ვაღიაროთ შემოქმედის არსებობა? ბ) რას ამბობს სამართლიანად ბიბლია ღმერთის შესახებ?
22 ბიბლია ამტკიცებს: „ყოველ სახლს ვინმე აშენებს, ხოლო ყოველივეს ამშენებელი ღმერთია“ (ებრაელთა 3:4). თუ ნებისმიერ, უბრალო სახლს უნდა ჰყავდეს მშენებელი, მაშინ, გაცილებით უფრო რთულ სამყაროსაც, დედამიწაზე არსებული სიცოცხლის უდიდესი მრავალფეროვნებებით, უნდა ჰყავდეს შემოქმედი. და რადგანაც ჩვენ ვაღიარებთ იმ ადამიანთა არსებობას, რომლებმაც გამოიგონეს ისეთი აპარატები, როგორიცაა თვითმფრინავი, ტელევიზორი და კომპიუტერი, ნუთუ ასევე არ უნდა ვაღიაროთ არსებობა იმისა, ვინც მისცა ადამიანს ტვინი, ყოველივე ამის შესაქმნელად?
23 ბიბლია უწოდებს მას: ‘ღმერთს, უფალს, ცათა შემოქმედს და მათ გარდამთხმელს, მიწის გადამშლელს მისი ნაყოფებითურთ, სუნთქვის მიმნიჭებელს მის მცხოვრებთათვის’ (ესაია 42:11). ბიბლია ასევე სამართლიანად აცხადებს: „შენ ღირსი ხარ, უფალო და ღმერთო ჩვენო, რომ მიიღო დიდება, პატივი და ძალა, ვინაიდან შენ შექმენი ყოველივე და შენი ნებით იყვნენ და იქმნენ“ (გამოცხადება 4:11).
24. როგორ შეგვიძლია გავიგოთ, რომ ღმერთი არსებობს?
24 დიახ, ჩვენ შეგვიძლია გავიგოთ, ღმერთის არსებობის შესახებ, იმის მეშვეობით, რაც მან შექმნა. „ვინაიდან მისი უხილავი, მისი მარადიული ძალა და ღვთაება ქვეყნიერების დასაბამიდან ქმნილებათა განხილვით დაინახება“ (რომაელთა 1:20).
25, 26. რატომ არ არის რაიმეს ბოროტად გამოყენება, მტკიცება იმისა, რომ მას არ ჰყავდა შემოქმედი?
25 თუ რაღაცით ბოროტად სარგებლობენ, ეს იმას არ ნიშნავს, რომ მას არ ჰყავდა შემოქმედი. თვითმფრინავი შეიძლება გამოყენებული იქნეს მშვიდობიანი მიზნებისათვის, როგორც საჰაერო ლაინერი. მაგრამ, იგივე თვითმფრინავით შეიძლება ისარგებლონ, როგორც ბომბდამშენით. თუ მას იყენებენ, როგორც მკვლელობის იარაღს, ეს იმას არ ნიშნავს, რომ მას არ ჰყავდა კონსტრუქტორი.
26 ასევე, თუ ადამიანები ხშირად ცუდად იქცევიან, ეს სულაც არ მიუთითებს, რომ მათ არ ჰყავდათ შემოქმედი, ან რომ ღმერთი არ არსებობს. მაშასადამე, ბიბლია ჭეშმარიტად აღნიშნავს: „თქვე უკუღმართებო! თუ შერაცხილა თიხა მექოთნის სწორად? თუ უთქვამს შექმნილს შემქმნელისთვის, არ შეგიქმნივარო? თუ უთქვამს ნასახს დამსახველისთვის, გაგება არ გაქვსო?“ (ესაია 29:16).
27. რატომ შეგვიძლია მოველოდეთ, რომ ღმერთი გვიპასუხებს ტანჯვა-წამების შესახებ არსებულ კითხვებზე?
27 ქმნილებათა საოცრად რთულ აგებულებაში შემოქმედმა გამოავლინა თავისი სიბრძნე. მან გვიჩვენა, რომ ნამდვილად ზრუნავს ჩვენზე, რადგან შექმნა დედამიწა, რომ მასზე გვეცხოვრა, შექმნა ჩვენი სხეული, გონება და უამრავი სასიამოვნო რამ ჩვენს გასახარად. უსათუოდ, ის გამოავლენს ასეთსავე სიბრძნესა და ზრუნვას იმით, რომ შეგვატყობინებს პასუხს შემდეგ კითხვებზე: რატომ დაუშვა ღმერთმა ტანჯვა-წამება? რა ზომებს მიიღებს ამასთან დაკავშირებით?
[სურათი 5 გვერდზე]
დამცველი ატმოსფეროთი გარშემორტყმული დედამიწა არის უნიკალური სახლი, რომელიც კონსტრუირებულია ჩვენთვის, მზრუნველი ღმერთის მიერ.
[სურათი 6 გვერდზე]
დედამიწა შექმნილი იყო სიყვარულით აღსავსე მზრუნველობით, რომ სრულყოფილად გაგვეხარა სიცოცხლით.
[სურათი 7 გვერდზე]
‘ტვინი შეიცავს ურთიერთკავშირების გაცილებით უფრო მეტ რიცხვს, ვიდრე დედამიწის მთელი საკომუნიკაციო სისტემა’ (მეცნიერი მოლეკულური ბიოლოგიის დარგში).
[სურათი 8 გვერდზე]
„თვალი, როგორც ჩანს, კონსტრუირებული იყო; ტელესკოპის ვერცერთი ოსტატი ვერ გააკეთებდა ამას უკეთესად“ (ასტრონომი).