ნაწილი 4
ქრისტიანულმა სამყარომ უღალატა ღმერთსა და ბიბლიას
1, 2. რატომ არ სცემს პატივს ზოგიერთი ადამიანი ბიბლიას, მაგრამ რას ამბობს თავად ბიბლია?
1 მრავალ ქვეყანაში ხალხი თავს არიდებს ბიბლიას და არ ავლენს მისადმი პატივისცემას იმ ადამიანების ცუდი ქცევის გამო, ვინც აცხადებს, რომ მიჰყვება მას. განსაზღვრულ ქვეყნებში კი ბიბლიის შესახებ ამბობენ, რომ ის არის წიგნი, რომელიც მოუწოდებს ომისკენ, წარმოადგენს თეთრკანიანი ხალხის წიგნს და მხარს უჭერს კოლონიალიზმს. მაგრამ ეს მცდარი შეხედულებებია.
2 ახლო აღმოსავლეთში დაწერილი ბიბლია მხარს არ უჭერს კოლონიალურ ომებსა და გაუმაძღარ ექსპლუატაციას, რაც დიდი ხნის მანძილზე ქრისტიანობის სახელით მიმდინარეობდა. ამის საპირისპიროდ, ბიბლიის კითხვითა და ჭეშმარიტი ქრისტიანობის მოძღვრების შეცნობით, რომელსაც იესო ასწავლიდა, შენ დაინახავ, რომ ბიბლია სასტიკად კიცხავს ომებს, უზნეობასა და ადამიანების ექსპლუატაციას. ეს ხარბი ადამიანების ბრალია და არა ბიბლიის (1 კორინთელთა 13:1–6; იაკობი 4:1–3; 5:1–6; 1 იოანე 4:7, 8). ამიტომ, ნუ დაუშვებ, რომ ბიბლიის სასიკეთო რჩევების საპირისპიროდ მცხოვრები, ეგოისტი ადამიანების ცუდმა საქციელმა შეგაკავოს, რომ ისარგებლო ბიბლიის საგანძურიდან.
3. რას ცხადყოფენ ისტორიული ფაქტები ქრისტიანული სამყაროს შესახებ?
3 მათ შორის, ვინც ბიბლიის მიხედვით არ ცხოვრობს, არიან ქრისტიანული სამყაროს წარმომადგენელი ხალხი და ქვეყნები. „ქრისტიანული სამყარო“ განისაზღვრება, როგორც მსოფლიოს ის ნაწილი, სადაც ქრისტიანობის მიმდევრების რაოდენობა სჭარბობს. უმთავრესად, ეს არის დასავლური სამყარო თავისი საკლესიო სისტემებით, რომელიც ახალი წელთაღრიცხვით დაახლოებით მეოთხე საუკუნიდან გახდა ცნობილი. საუკუნეებია, რაც ქრისტიანულ სამყაროს აქვს ბიბლია და მისი სამღვდელოება პრეტენზიულად აცხადებს, რომ ასწავლის ბიბლიას და არის ღმერთის წარმომადგენელი. მაგრამ ასწავლიან თუ არა ქრისტიანული სამყაროს სამღვდელოება და მისიონერები ჭეშმარიტებას? უჩვენებს თუ არა, სინამდვილეში, მათი მოქმედება, რომ არიან ღმერთისა და ბიბლიის წარმომადგენლები? სინამდვილეში, ქრისტიანულია თუ არა ქრისტიანული სამყარო? — არა. იმ დროიდან, რაც მისმა რელიგიამ მეოთხე საუკუნეში გამოჩენილ მდგომარეობას მიაღწია, ქრისტიანულმა სამყარომ დაამტკიცა, რომ ღმერთისა და ბიბლიის მტერია. დიახ, ისტორიული ფაქტები ცხადყოფენ, რომ ქრისტიანულმა სამყარომ უღალატა ღმერთსა და ბიბლიას.
არაბიბლიური დოგმატები
4, 5. რომელ არაბიბლიურ დოგმატებს ასწავლიან ეკლესიები?
4 ქრისტიანული სამყაროს ძირითადი დოგმატები დაფუძნებულია არა ბიბლიაზე, არამედ ბერძნულ, ეგვიპტურ, ბაბილონურ და სხვა უძველეს მითებზე. ისეთი სწავლებები, როგორიცაა: ადამიანის სულის უკვდავება, მარადიული წამება ცეცხლოვან ჯოჯოხეთში, განსაწმენდელი და სამება (სამი პიროვნება ერთ ღვთაებაში) ბიბლიაში არ მოიპოვება.
5 მაგალითად, განიხილე სწავლება იმის შესახებ, რომ ცუდი ადამიანები მარადიულად დაიტანჯებიან ცეცხლოვან ჯოჯოხეთში. რას ფიქრობ ამ თვალსაზრისზე? მრავალ ადამიანში ეს ზიზღს იწვევს. ისინი უგუნურებად მიიჩნევენ იმას, რომ ღმერთი მარადიულად აწამებს ადამიანებს, აუტანელი ტკივილების მიყენებით. ასეთი სასტიკი თვალსაზრისი ბიბლიის ღმერთის პიროვნების საპირისპიროა, რადგან „ღმერთი სიყვარულია“ (1 იოანე 4:8). ბიბლია გასაგებად აცხადებს, რომ ასეთი სწავლება ‘ფიქრადაც არ მოსვლია’ ყოვლისშემძლე ღმერთს (იერემია 7:31; 19:5; 32:35).
6. როგორ უარყოფს ბიბლია სწავლებას სულის უკვდავებაზე?
6 დღეს მრავალი რელიგია, მათ შორის ქრისტიანული სამყაროს ეკლესიები, ასწავლის, რომ ადამიანებს აქვთ უკვდავი სული, რომელიც სიკვდილის შემდეგ მიდის ან ზეცაში, ან ჯოჯოხეთში. ეს არ წარმოადგენს ბიბლიურ სწავლებას. პირიქით, ბიბლია ნათლად ამბობს: „ცოცხალმა იცის, რომ მოკვდება; მკვდრებმა კი არაფერი იციან. . . რადგან არც საქმე, არც საფიქრალი, ცოდნა, ან სიბრძნე არ გაგყვება შავეთში [საფლავში], სადაც მიდიხარ“ (ეკლესიასტე 9:5, 10). და ფსალმუნმომღერალიც აცხადებს, რომ სიკვდილისას ადამიანი „უბრუნდება თავის მიწას; იმ დღეს გაქრება მისი ფიქრები“ (ფსალმუნი 145:4).
7. რა იყო სასჯელი ადამისა და ევასთვის ღმერთის კანონის დარღვევის გამო?
7 აგრეთვე გაიხსენე: როდესაც ადამმა და ევამ ღმერთის კანონი დაარღვიეს, სასჯელი უკვდავება არ იყო. ეს სასჯელი კი არა, ჯილდო იქნებოდა! პირიქით, მათ ეთქვა, რომ ‘მიწად მიიქცეოდნენ, რადგან მისგან იყვნენ აღებული’. ღმერთმა ხაზგასმით განუცხადა ადამს: „რადგან მტვერი ხარ და მტვრადვე მიიქცევი“ (დაბადება 3:19). მაშასადამე, სწავლება სულის უკვდავების შესახებ არ არის ბიბლიაში, არამედ ქრისტიანული სამყაროს მიერ არის გადმოღებული არაქრისტიანი ხალხებისგან, რომლებიც უკვე მანამდე ცხოვრობდნენ.
8. როგორ უარყოფს ბიბლია ქრისტიანული სამყაროს დოგმატს სამების შესახებ?
8 ასევე, ქრისტიანული სამყაროს სამების დოგმატი ღმერთს წარმოსახავს რაღაც შეუცნობელ სამერთარსება ღმერთად. მაგრამ არც ეს დოგმატი მოიპოვება ბიბლიაში. მაგალითად, ესაიას 40:25-ში ღმერთი გასაგები ენით აცხადებს: „ვის შემადარებთ, რომ გავუტოლდე?“ პასუხი აშკარაა: მას ვერავინ გაუტოლდება. აგრეთვე, ფსალმუნის 82:19 მარტივად ამბობს: „შენი სახელია უფალი [იეჰოვა, „საღვთო წერილის ახალი ქვეყნიერების თარგმანი — სქოლიოებით“ (ინგლ.), აქ], მხოლოდ შენა ხარ უზენაესი მთელ ქვეყნიერებაზე“ (ასევე, იხილე ესაია 45:5; 46:9; იოანე 5:19; 6:38; 7:16).
9. რა შეგვიძლია ვთქვათ ბიბლიური მოძღვრებისა და ქრისტიანული სამყაროს საეკლესიო დოგმატების შესახებ?
9 ბიბლიის სწავლებები ღმერთისა და მისი განზრახვების შესახებ არის ნათელი, ადვილი გასაგები და გონივრული. ქრისტიანული სამყაროს საეკლესიო მოძღვრებები კი — არა. უფრო უარესიც, ეს მოძღვრებები ეწინააღმდეგება ბიბლიას.
უღმერთო საქმეები
10, 11. რით განსხვავდება ბიბლიური მოძღვრების მოთხოვნა იმისგან, რასაც აკეთებენ ქრისტიანული სამყაროს ეკლესიები?
10 ცრუ დოგმატების სწავლების გარდა, ქრისტიანულმა სამყარომ თავისი საქმეებითაც უღალატა ღმერთსა და ბიბლიას. რაც სამღვდელოებამ და ეკლესიებმა გააკეთეს გასულ საუკუნეებში და რის კეთებასაც კვლავ აგრძელებენ, ეწინააღმდეგება ბიბლიის ღმერთის მოთხოვნებსა და ქრისტიანობის დამაარსებლის, იესო ქრისტეს, სწავლებებსა და საქმეებს.
11 მაგალითად, იესო თავის მიმდევრებს ასწავლიდა, რომ არც ამ ქვეყნიერების პოლიტიკურ საქმეებში ჩარეულიყვნენ და არც ომებში მიეღოთ მონაწილეობა. ის, ასევე, ასწავლიდა მათ, ყოფილიყვნენ მშვიდობის მოყვარულები, კანონების შემსრულებლები, ჰქონოდათ მოყვასისადმი სიყვარული ყოველგვარი წინასწარაკვიატებული აზრების გარეშე და იმის ნაცვლად, რომ სხვების სიცოცხლე მოესპოთ, მზადყოფნით გაეწირათ საკუთარი სიცოცხლე (იოანე 15:13; საქმე 10:34, 35; 1 იოანე 4:20, 21).
12. რა თქვა იესომ იმის შესახებ, თუ როგორ ამოიცნობდნენ ჭეშმარიტ ქრისტიანებს?
12 სინამდვილეში, იესო ასწავლიდა, რომ სხვებისადმი სიყვარული იქნებოდა ნიშანი, რაც ჭეშმარიტ ქრისტიანებს განასხვავებდა ცრუ ქრისტიანებისგან, რომლებსაც ქრისტიანებად წოდების პრეტენზია ექნებოდათ. მათ, რომლებიც მისი მიმდევრები უნდა გამხდარიყვნენ, იესომ უთხრა: „ახალ მცნებას გაძლევთ თქვენ; რათა გიყვარდეთ ერთმანეთი, როგორც მე შეგიყვარეთ თქვენ, თქვენც ისე გიყვარდეთ ერთმანეთი. ჩემი მოწაფეები რომ ხართ, იმით გაიგებენ ყველანი, თუ სიყვარული გექნებათ ურთიერთს შორის“ (იოანე 13:34, 35; 15:12).
13, 14. რა ცხადყოფს, რომ ქრისტიანული სამყაროს ეკლესიები არ არიან ღმერთის წარმომადგენლები?
13 მაგრამ ქრისტიანული სამყაროს სამღვდელოება საუკუნეების მანძილზე ერეოდა პოლიტიკაში და მხარს უჭერდა ერებს შორის ომებს. ქრისტიანული სამყაროს შიგნით მიმდინარე ომების დროს, ყოველი სამღვდელოება თავის ქვეყანას უჭერდა მხარს, ამის მაგალითია ამ საუკუნეში მომხდარი ორი მსოფლიო ომი. ამ კონფლიქტებში ყოველი მხარის სამღვდელოება ლოცულობდა გამარჯვებისთვის და რომელიმე რელიგიის წარმომადგენლები ერთი ქვეყნიდან კლავდნენ თავისივე რელიგიის წარმომადგენლებს სხვა ქვეყნიდან. მაგრამ როგორც ბიბლია ამბობს, ეს არა ღმერთის შვილთა, არამედ სატანის შვილთა საქმეებია (1 იოანე 3:10–12, 15). მაშასადამე, იმ დროს, როცა სამღვდელოება და მისი მიმდევრები ამტკიცებენ, რომ წარმოადგენენ ქრისტიანებს, ისინი ეწინააღმდეგებიან იესოს სწავლებებს, რომელმაც თავის მიმდევრებს უთხრა, ‘ჩაებრუნებინათ მახვილი’ (მათე 26:51, 52).
14 იმპერიალისტური ეპოქის დროს, საუკუნეების მანძილზე, ეკლესიები თანამშრომლობდნენ ქრისტიანული სამყაროს პოლიტიკურ ძალებთან, რომლებიც იპყრობდნენ, იმონებდნენ და ამცირებდნენ სხვა ხალხებს. ეს მრავალი საუკუნის მანძილზე ხდებოდა აფრიკაში. იგივე განიცადა ჩინეთმაც, როცა დასავლეთის ქვეყნები ძალადობით ინაწილებდნენ გავლენის სფეროებს, მაგალითად, „ოპიუმის“ ომებისა და იხეტუანთა აჯანყების დროს.
15. რომელი ბოროტი საქმეები იყო ჩადენილი ქრისტიანული სამყაროს მიერ?
15 ასევე, ისტორიაში შუა საუკუნეებად წოდებულ პერიოდში ქრისტიანული სამყაროს რელიგიები სათავეში უდგნენ დევნას, წამებას და იმ ადამიანების მკვლელობასაც კი, ვინც არ ეთანხმებოდა მათ. ინკვიზიციის პერიოდში, რომელიც რამდენიმე საუკუნე გრძელდებოდა, წესიერი და უდანაშაულო ხალხის წინააღმდეგ სანქციონირებდა და ტარდებოდა ისეთი ვერაგული მოქმედებები, როგორიცაა წამება და მოკვლა. დამნაშავეები კი იყვნენ სამღვდელოება და მისი მიმდევრები, თუმცა თავს ქრისტიანებად აცხადებდნენ. ისინი ბიბლიის მოსპობასაც კი ცდილობდნენ, რათა უბრალო ხალხს არ წაეკითხა.
არ არიან ქრისტიანები
16, 17. რატომ შეგვიძლია ვთქვათ, რომ ეკლესიები არ არიან ქრისტიანული?
16 არა, ქრისტიანული სამყაროს ქვეყნები და ეკლესიები არც იყვნენ და არც არიან ქრისტიანები. ისინი არ არიან ღმერთის მსახურები. ღმერთის ინსპირირებული სიტყვა მათ შესახებ აცხადებს: „ისინი ამბობენ, რომ იციან ღმერთი; საქმეებით კი უარყოფენ, ვინაიდან საძაგლები და ურჩნი არიან და გამოუდეგარნი ყოველი კეთილი საქმისათვის“ (ტიტე 1:16).
17 იესომ თქვა, რომ ცრუ რელიგიის ამოცნობა შესაძლებელი იქნებოდა მის მიერ გამოღებული ნაყოფით. მან თქვა: „მოერიდეთ ცრუწინასწარმეტყველებს, რომლებიც ცხვრის სამოსით მოდიან თქვენთან, შინაგანად კი მტაცებელი მგლები არიან. მათი ნაყოფით იცნობთ მათ. . . ყოველი კარგი ხე ნაყოფსაც კარგს იძლევა, ხოლო ცუდი ხე ნაყოფსაც ცუდს იძლევა. არ შეუძლია კარგ ხეს ცუდი ნაყოფის გამოღება და არც ცუდ ხეს კარგი ნაყოფის გამოღება. ყოველ ხეს, რომელსაც კარგი ნაყოფი არ მოაქვს, ჭრიან და ცეცხლში აგდებენ. ასე, მათი ნაყოფით იცნობთ მათ [ცრუწინასწარმეტყველებს]“ (მათე 7:15–20).
18. რა შედეგი მოჰყვა ქრისტიანული სამყაროს სწავლებებსა და საქმეებს?
18 მაშასადამე, იმის მიხედვით, რასაც ასწავლიან და აკეთებენ, ქრისტიანული სამყაროს რელიგიებმა ცხადყვეს: იმის მტკიცება, რომ სწამთ ბიბლიის, არიან ღვთისმოშიშები და ქრისტიანები, სიცრუეა. მათ უღალატეს ღმერთსა და ბიბლიას. ყოველივე ამით საკუთარი თავი შეაძულეს მილიონობით ადამიანს და აიძულეს უარეყოთ უზენაესისადმი რწმენა.
19. ნიშნავს თუ არა ქრისტიანული სამყაროს მარცხი ღმერთისა და ბიბლიის მარცხს?
19 მაგრამ ქრისტიანული სამყაროს სამღვდელოებისა და ეკლესიების, ასევე, სხვა არაქრისტიანული რელიგიების მარცხი არ ნიშნავს ბიბლიის მარცხს. ეს, ასევე, არ ნიშნავს იმას, რომ ღმერთი დამარცხდა. პირიქით, ბიბლია გვამცნობს უზენაესის შესახებ, რომელიც არსებობს და ზრუნავს ჩვენზე და ჩვენს მომავალზე. ბიბლია გვიჩვენებს, თუ როგორ დააჯილდოებს ღმერთი გულწრფელ ადამიანებს, რომლებსაც სურთ იმის გაკეთება, რაც მართალია, რომლებსაც სურთ იხილონ დედამიწა, რომელზეც გაბატონებული იქნება სამართლიანობა და მშვიდობა. ის, ასევე, გვიჩვენებს, თუ რატომ დაუშვა ღმერთმა ბოროტება და ტანჯვა-წამება და როგორ გაათავისუფლებს დედამიწას მათგან, ვინც ავიწროებს მოყვასს და ასევე მათგანაც, ვინც აცხადებს, რომ ემსახურება ღმერთს, მაგრამ საქმით არ ასრულებს.
[სურათები 17 გვერდზე]
დანტეს „ჯოჯოხეთი“.
ქრისტიანული სამყაროს სამება.
[საავტორო უფლება]
Doré’s illustration of Barrators — Giampolo for Dante’s Divine Comedy
ინდუიზმის სამება.
[საავტორო უფლება]
Courtesy of The British Museum
ეგვიპტური სამება.
[საავტორო უფლება]
Museo Egizio, Turin
[სურათები 18 გვერდზე]
იესოს სწავლებების საპირისპიროდ, მოწინააღმდეგე ქვეყნების სამღვდელოება მხარს უჭერდა ომებს.
[საავტორო უფლება]
U.S. Army photo