წერილების წერა

წერილებმა მილიონობით ადამიანის ცხოვრებაზე მოახდინა დადებითი გავლენა. ქრისტიანულ-ბერძნული წერილების დიდი ნაწილი წერილების სახით დაიწერა. ჩვენც ვწერთ წერილებს ახალი თანამორწმუნეების განსამტკიცებლად, მეგობრების მოსაკითხად, იმ ძმებისა და დების გასამხნევებლად, რომლებსაც სერიოზული პასუხისმგებლობები დაეკისრათ, მათ დასახმარებლად, ვინც პრობლემების წინაშე დგას, და კრების საქმიანობის შესახებ ინფორმაციის გადასაცემად (1 თეს. 1:1—7; 5:27; 2 პეტ. 3:1, 2).

გარდა ამისა, წერილების წერა ქადაგების ერთ-ერთი ეფექტური საშუალებაა. ზოგ უბანზე თავისუფლად ვერ ვქადაგებთ, რადგან სახლები დაცულია და მობინადრეებთან დაკავშირება ძნელია. ზოგი ხშირად არ არის სახლში, რის გამოც ვერ ვხვდებით კარდაკარ ქადაგებისას. ზოგი კი საკმაოდ შორს ცხოვრობს.

ავადმყოფობის, უამინდობის ან კომენდანტის საათის გამო დროდადრო შეიძლება სახლიდან ვერ გახვიდე. იქნებ წერილით გაგეგრძელებინა ქადაგება ნათესავთან ან ნაცნობთან, რომელთანაც ადრე გისაუბრია? თუ საცხოვრებელი ადგილი შეიცვალა ბიბლიის შემსწავლელმა, რომელსაც ასწავლიდი, შესაძლებელია, სწორედ შენგან მიღებულმა წერილმა შეუნარჩუნოს მას სულიერი საკითხებისადმი ინტერესი. აგრეთვე შეგეძლო ბიბლიური აზრები გაგეზიარებინა ახალდაქორწინებულთათვის ან მათთვის, ვისაც შვილი შეეძინა ან საყვარელი ადამიანი დაეღუპა.

წერილით ქადაგება

როდესაც წერილით უცნობ ადამიანს უქადაგებ, უპირველესად საკუთარი თავი წარუდგინე. შეგიძლია აუხსნა, რომ საკუთარი სურვილით მონაწილეობ მსოფლიო მასშტაბის საქმიანობაში. თუ საჭიროდ თვლი, აღნიშნე, რომ იეჰოვას მოწმე ხარ. ადრესატს აუხსენი, რატომ სწერ წერილს და რატომ არ ინახულებ პირადად. წერილი ისე დაწერე, თითქოს პირისპირ ესაუბრები. ამავე დროს, არ დაგავიწყდეს ბიბლიაში ჩაწერილი სიტყვები: „იყავით გველივით ფრთხილნი და მტრედივით უწყინარნი“ — სერიოზულად დაფიქრდი, რის თქმა ღირს საკუთარ თავზე (მათ. 10:16).

წერილში დაწერე ის, რასაც ადამიანს პირადად ეტყოდი. შეგიძლია ნიმუშად გამოიყენო რომელიმე შესავალი წიგნიდან „მსჯელობა წმინდა წერილების საფუძველზე“ ან „ჩვენი სამეფო მსახურების“ ბოლო ნომრებიდან. შეგიძლია წამოჭრა რაიმე საკითხი და სთხოვო, დაფიქრდეს მასზე. ზოგი მაუწყებელი წერილში აღნიშნავს, რომ ბიბლიურ კითხვებზე პასუხების გასაცემად ხალხს უსასყიდლოდ ვთავაზობთ ბიბლიის შესწავლას; შემდეგ რამდენიმე თავის სათაური მოჰყავთ ბიბლიის შესწავლისთვის განკუთვნილი რომელიმე პუბლიკაციიდან. საქადაგებლად განკუთვნილი წერილის ნიმუში 73-ე გვერდზეა მოცემული. ის წარმოდგენას შეგიქმნის იმაზე, თუ როგორ უნდა დაიწეროს ასეთი წერილი. კარგი იქნება, შეცვალო აზრები, რომ ხალხმა ერთი და იგივე შინაარსის წერილი რამდენიმეჯერ არ მიიღოს.

ზოგმა შეიძლება არ წაიკითხოს უცნობისგან მიღებული გრძელი წერილი. ამიტომ უფრო გონივრული იქნება მოკლე წერილის დაწერა. იმდენი არ დაწერო, რომ ადამიანს ჩაკითხვა დაეზაროს. კარგი იქნება, სამეფო დარბაზში მოსაწვევი ბარათიც ჩადო კონვერტში. შეგიძლია წერილთან ერთად გაგზავნო ტრაქტატი, ბროშურა, „საგუშაგო კოშკი“ ან „გამოიღვიძეთ!“ და აღნიშნო, რომ ნებისმიერ მსურველს აქვს მათი რეგულარულად მიღების შესაძლებლობა. აგრეთვე შეგიძლია ადამიანს მონახულება და პირისპირ საუბარი შესთავაზო.

წერილის გაფორმება

დააკვირდი წერილის ნიმუშს. ყურადღება მიაქციე, რომ 1) წერილი აკურატულად არის დაწერილი; 2) ადრესატს კონვერტი რომ დაეკარგოს, შესაძლებლობა ექნება, წერილში წაიკითხოს გამგზავნის სახელი, გვარი და მისამართი; 3) წერილის მიზანი გარკვევით და მოკლედ არის ახსნილი პირველივე აბზაცში; 4) თითოეული მთავარი აზრი აბზაცით არის დაწყებული; 5) დანიშნულებიდან გამომდინარე, წერილი არც მეტისმეტად შინაურულია და არც ზედმეტად ოფიციალური.

ოფიციალურ წერილში, მაგალითად, თუ კრების მდივანი გზავნის ფილიალში, მითითებული უნდა იყოს კრების სახელწოდება, მდივნის სახელი და გვარი, საფოსტო მისამართი და დაწერის თარიღი. აგრეთვე აღნიშნული უნდა იყოს, რა ორგანიზაციის ან ვის სახელზეა დაწერილი. ამას უნდა მოჰყვეს მისალმება. ოფიციალური წერილი, ჩვეულებრივ, მთავრდება სიტყვით „პატივისცემით“, რომელსაც ხელმოწერა მოჰყვება. საკმარისი არ არის სახელისა და გვარის ჩაბეჭდვა. საჭიროა ხელმოწერა.

ნებისმიერ წერილში ყურადღება მიაქციე მართლწერას, გრამატიკას, პუნქტუაციას და, რაღა თქმა უნდა, აკურატულობას. ასეთ შემთხვევაში უფრო ავტორიტეტული იქნება შენი წერილი და მასში ჩაწერილი ინფორმაცია.

კონვერტზე ყოველთვის მიუთითე უკან დასაბრუნებელი მისამართი — უმჯობესია, შენი მისამართი. თუ ფიქრობ, რომ არაგონივრული იქნება წერილით ქადაგების დროს პირადი მისამართის გამოყენება, უხუცესებს ჰკითხე, მიზანშეწონილად თვლიან თუ არა, გამოიყენო სამეფო დარბაზის ან იმ უხუცესის მისამართი, რომელიც კრების სახელზე გამოგზავნილ წერილებს იღებს. წერილით ქადაგებისას არავითარ შემთხვევაში არ გამოიყენო ფილიალის მისამართი, რადგან ადრესატმა შეიძლება არასწორად დაასკვნას, რომ წერილი ფილიალიდან მიიღო. თუ კონვერტზე გამგზავნის მისამართი არ ეწერება და წერილთან ერთად ადრესატი ლიტერატურასაც მიიღებს, ალბათ, ის მაინც იმას იფიქრებს, რომ ლიტერატურა ფილიალიდან მიიღო.

მნიშვნელოვანია, საჭირო რაოდენობის საფოსტო მარკები დააკრა კონვერტს, განსაკუთრებით კი იმ შემთხვევაში, თუ მასში ლიტერატურასაც ჩადებ. თუ მარკები საკმარისი არ იქნება, ადრესატს შეიძლება თავად მოუწიოს ფულის გადახდა და ამის გამო სათანადოდ არ დააფასოს წერილში მოცემული ინფორმაცია. გაითვალისწინე, რომ ბევრ ქვეყანაში ჟურნალის ან ბროშურის გაგზავნის შემთხვევაში დამატებითი თანხაა გადასახდელი.

სათანადო ტონი

დაწერის შემდეგ გადაიკითხე წერილი და დაუკვირდი შინაარსს. როგორ აღიქმება? არის თუ არა დაწერილი მეგობრული ტონით და ტაქტიანად? სხვებთან ურთიერთობაში სიყვარული და სიკეთე უნდა გამოვავლინოთ (გალ. 5:22, 23). თუ წერილში არასასიამოვნო ტონს ან პესიმისტურ განწყობას შენიშნავ, შეცვალე ტექსტი.

წერილი იქაც მიაღწევს, სადაც პირადად ვერ შეძლებ მისვლას. თუნდაც ამიტომ არის ის ქადაგების ერთ-ერთი საუკეთესო საშუალება. წერილიდან გამოჩნდება, თუ როგორი პიროვნება ხარ და რა პრინციპებით ცხოვრობ, ამიტომაც ყურადღება მიაქციე, რას ამბობს, როგორ გამოიყურება და როგორ აღიქმება შენი ნაწერი. შენმა წერილმა შესაძლებელია სიცოცხლის გზაზე დააყენოს ან განამტკიცოს და გაამხნევოს ადამიანი.