მეტყველებისა და სწავლების უნარის განვითარების პროგრამა
ეს პროგრამა დაეხმარება ყველას — ახალგაზრდებსა და ხანდაზმულებს, მამაკაცებსა და ქალებს — უკეთ გამოხატონ აზრები და ღვთის სიტყვის უკეთესი მასწავლებლები გახდნენ.
ყველას, ვინც თეოკრატიული მსახურების სკოლაშია ჩაწერილი, სკოლის ზედამხედველი დავალებებს მისცემს. მომდევნო სამ გვერდზე შენი პირადი ბლანკია დაბეჭდილი. რიცხვები შემდეგი თავიდან დაწყებული გაკვეთილების ნომრებს შეესაბამება. მითითებულ გაკვეთილში ახსნილია, როგორ უნდა დაეუფლო მეტყველებისა და სწავლების ამა თუ იმ მხარეს და რატომ უნდა გაამახვილო ყურადღება მასზე. გარდა ამისა, ახსნილია, თუ როგორ შეგიძლია მოცემული რჩევების გამოყენება.
ფერებით აღნიშნულია ის, თუ რომელი გაკვეთილი ეხება: 1) მსმენელის წინაშე კითხვას, 2) ინსცენირებას, რომელშიც ორი ან მეტი გამომსვლელი მონაწილეობს ან 3) მოხსენების წარმოთქმას. სკოლის ზედამხედველი მიგითითებს, რომელ გაკვეთილზე იმუშაო. უმჯობესია თითოეულ გაკვეთილზე ცალ-ცალკე მუშაობა. კარგი იქნება, თუ გაკვეთილის ბოლოს მოცემულ სავარჯიშო(ებ)საც გააკეთებ. თუ შენი გამოსვლიდან გამოჩნდება, რომ უკვე დაამუშავე გაკვეთილი და გამოიყენე მასში მოცემული რჩევები, ძმა, რომელიც გამომსვლელებს რჩევებს აძლევს, სხვა გაკვეთილს დაგავალებს.
თუ ინსცენირება გაქვს მოსამზადებელი, მაშინ პირობითი სიტუაციაც დაგჭირდება. 82-ე გვერდზე მოცემულია პირობითი სიტუაციების სია, მაგრამ აუცილებელი არ არის, ამ სიით შემოიფარგლო. ძმამ, რომელიც რჩევებს მოგცემს, შეიძლება თავად შეგირჩიოს პირობითი სიტუაცია იმისათვის, რომ გამოცდილება შეიძინო, ან შეიძლება შენ თვითონ შეგარჩევინოს.
სასურველ შედეგს უფრო მალე მიაღწევ, თუ დავალების მომზადების გარდა დამოუკიდებლად წაიკითხავ ამ წიგნს და სავარჯიშოებსაც გააკეთებ. შეგიძლია კვირაში ერთი რომელიმე გაკვეთილი დაამუშაო.
გაუმჯობესება ყოველთვის საჭიროა იმისდა მიუხედავად, თუ როდის ჩაეწერე თეოკრატიული მსახურების სკოლაში და რამდენი ხანია, რაც სამქადაგებლო მსახურებაში მონაწილეობ. ამიტომაც შეეცადე, საუკეთესოდ გამოიყენო თეოკრატიული მსახურების სკოლის დახმარება.