მოცემული მასალის გამოყენება

ბიბლია ქრისტიანულ კრებას ადამიანის სხეულს ადარებს. სხეულის თითოეული ნაწილი აუცილებელია, მაგრამ „ყველა ნაწილს ერთი დანიშნულება არა აქვს“. ამის გათვალისწინებით, სიხარულით უნდა ვასრულებდეთ ნებისმიერ დავალებას, რომელსაც ძმები გვანდობენ. საამისოდ კი საჭიროა, მთელი პასუხისმგებლობითა და სერიოზულობით მოვეკიდოთ თითოეულ დავალებას და არასოდეს გავაუფასუროთ მოცემული თემის მნიშვნელობა იმ მიზეზით, რომ ჩვენი აზრით უფრო საინტერესო საკითხებიც არსებობს (რომ. 12:4—8). „ერთგულ და გონიერ მონას“ დავალებული აქვს, „დროულად“ მოგვამარაგოს სულიერი საზრდოთი (მათ. 24:45). ამისათვის მადლიერებას გამოვხატავთ, როდესაც გამოსვლას მოცემული მითითებების თანახმად ვამზადებთ. მთლიანობაში კი ეს კრების შეთანხმებულ მოქმედებას უწყობს ხელს.

რა ჩავრთოთ დავალებაში. როდესაც თეოკრატიული მსახურების სკოლაში კონკრეტულ თემას გაძლევენ, ეცადე, რომ მხოლოდ ამ თემაზე ილაპარაკო. საჭირო მასალა, რომელზეც თემა უნდა ააგო, უმეტეს შემთხვევაში, მითითებულია; ხოლო თუ ასე არ არის, შეგიძლია თავად შეარჩიო მასალა. როგორც უნდა იყოს, დავალება ისე მოამზადე, რომ მხოლოდ მოცემულ თემაზე ისაუბრო. როდესაც თემაში დამატებითი აზრების ჩართვა გინდა, მსმენელებიც გაითვალისწინე.

კარგად შეისწავლე მითითებული მასალა, გააანალიზე მასში მოცემული ბიბლიური მუხლები. იფიქრე, როგორ შეიძლება ამ ინფორმაციის ეფექტურად გადაცემა, რათა მსმენელმა მაქსიმალური სარგებლობა მიიღოს. შემდეგ ამ მასალიდან შეარჩიე ორი ან სამი საინტერესო აზრი, რომლებიც შენი თემის მთავარი აზრები გახდება. მოცემული მასალიდან ის ბიბლიური მუხლებიც შეარჩიე, რომლებსაც გამოსვლისას წაიკითხავ და განიხილავ.

მოცემული მასალიდან რა მოცულობის მასალა უნდა ჩართო გამოსვლაში? იმდენი, რამდენიც მიზნის მისაღწევად დაგჭირდება. რაც შეიძლება მეტი ინფორმაციის გადაცემას არ შესწირო სწავლების ეფექტური მეთოდების გამოყენება. გარკვეული აზრები შენი თემის მიზანს თუ არ შეესაბამება, ნუ გამოიყენებ მათ. მხოლოდ ის აზრები გამოიყენე, რომლებიც დასახული მიზნის მიღწევაში დაგეხმარება. მოცემული მასალიდან მსმენელისთვის ყველაზე მეტად სასარგებლო ინფორმაცია შეარჩიე. ამ გაკვეთილზე მუშაობის მიზანი მასალის მოცულობის განსაზღვრა კი არ არის, არამედ ის, რომ შენი გამოსვლა, ძირითადად, მოცემულ მასალაზე ააგო.

ეცადე, რომ გამოსვლა მოცემული მასალის მოკლე მიმოხილვა არ გამოგივიდეს. ახსენი გარკვეული აზრები, ზოგი დეტალი უფრო დაწვრილებით განიხილე და, თუ შესაძლებელია, მოიყვანე მაგალითი, როგორ შეიძლება ცხოვრებაში მათი გამოყენება. დამატებითი აზრები მოცემული მასალიდან აღებული მთავარი აზრების განსავითარებლად უნდა გამოიყენო და არა ამ აზრების შესაცვლელად.

ძმებს, რომლებიც შეესაბამებიან მოთხოვნებს, შეიძლება დროდადრო სამსახურებრივ შეხვედრაზე მიეცეთ დავალებები. მათ კარგად ესმით, რომ მოცემული მასალა ეფექტურად უნდა გამოიყენონ და ის არ უნდა შეცვალონ. ეს იმ ძმებსაც კარგად ესმით, რომლებიც გამოდიან საჯარო მოხსენებით, რისთვისაც მოხსენების გეგმას იყენებენ. მართალია, საჯარო მოხსენების გეგმა გარკვეულ თავისუფლებას აძლევს მომხსენებელს, მაგრამ მასში განსაზღვრულია მთავარი აზრები, ამ აზრების მხარდამჭერი არგუმენტები და ბიბლიური მუხლები, რომლებზეც თემა უნდა აიგოს. თუ დახელოვნდები მოცემული მასალის გამოყენებაში, ეს მოგამზადებს სხვა საპასუხისმგებლო მოხსენებებისთვის.

ამ გაკვეთილზე მუშაობა ბიბლიის შესწავლების ეფექტურად ჩატარებაშიც დაგეხმარება. თანდათანობით ისწავლი, როგორ შემოიფარგლო კონკრეტული დღისთვის შესასწავლი მასალით, რათა თემიდან არ გადაუხვიო. ზოგიერთი საკითხი შეიძლება საინტერესო იყოს, მაგრამ მათი ღრმად განხილვა სულაც არ იყოს აუცილებელი მოცემული მასალის გასაგებად. თუმცა, თუ კარგად ჩასწვდი ამ გაკვეთილის სულს, უკიდურესობაში არ გადავარდები და საჭიროების შემთხვევაში შემსწავლელს დამატებითაც აუხსნი განსახილველ საკითხს.