იეჰოვა — წინასწარმეტყველების წარმომთქმელი და შემსრულებელი ღმერთი

1, 2. ა) რატომ თვლის ზოგიერთი, რომ მსოფლიო უმართავი ხდება? ბ) როგორ გვიხასიათებს იეჰოვას თორმეტი წინასწარმეტყველი?

ბევრის აზრით ცხოვრება უმართავი ხდება. ვინც ახალ ამბებს ადევნებს თვალყურს, იმ დასკვნამდე მიდის, რომ კაცობრიობა უფსკრულისკენ მიექანება. მსოფლიო პრობლემების მოგვარების ყოველგვარი მცდელობა, როგორც ჩანს, მხოლოდ აუარესებს მდგომარეობას. აღსანიშნავია, რომ ზოგიერთს იმ თორმეტი წინასწარმეტყველიდან, რომელთა წინასწარმეტყველებებსაც ჩვენ განვიხილავთ, მსგავს გარემოში უწევდა ცხოვრება. მიუხედავად ამისა, მათ დაგვაიმედეს თავიანთი ცნობით, რითაც შეგვიძლია თავადაც ვინუგეშოთ და სხვებიც ვანუგეშოთ (მიქა 3:1—3; აბაკუმი 1:1—4).

² ამ წინასწარმეტყველური წიგნების დედააზრი ასეთია: იეჰოვა, სამყაროს უზენაესი მმართველი, სრულად აკონტროლებს დედამიწაზე მიმდინარე მოვლენებს, და ის დიდად დაინტერესებულია ჩვენი კეთილდღეობით. თითოეულ ჩვენგანს შეუძლია დარწმუნებით თქვას: „ის პირადად ჩემი კეთილდღეობითაა დაინტერესებული“. ეს თორმეტი წინასწარმეტყველი სასიამოვნო და მიმზიდველ პიროვნებად წარმოგვიდგენს „ლაშქართა ღმერთ იეჰოვას“. ბიბლიაში წერია, რომ ღმერთი „ეხება მიწას და დნება იგი“, მაგრამ, იმავდროულად, ის არწმუნებს თავის ხალხს: „თქვენი შემხები ჩემი თვალის გუგის შემხებია“ (ზაქარია 2:8; ამოსი 4:13; 9:5). ნუთუ გულს არ გითბობთ ბიბლიის იმ მონაკვეთების კითხვა, რომლებიც გვარწმუნებს, რომ ღმერთი სიყვარულით მოქმედებს და გულმოწყალებასა და მიმტევებლობას ავლენს?! (ოსია 6:1—3; იოელი 2:12—14) ამ წინასწარმეტყველთა წიგნებში ღვთის ყველა თვისება არ არის განხილული; ამისთვის ბიბლიის სამოცდაექვსივე წიგნის გამოკვლევაა საჭირო. მიუხედავად ამისა, ეს თორმეტი წიგნი შესანიშნავად გვაცნობს ღვთის მიმზიდველ პიროვნებას და მის საქმეებს.

3. როგორ ცხადყოფს თორმეტი წინასწარმეტყველი, რომ იეჰოვა განზრახვების ღმერთია?

³ ამ წინასწარმეტყველთა წიგნები ნდობას განგვიმტკიცებს იეჰოვასადმი, რომელსაც მომავლის წინასწარმეტყველებაც შეუძლია და თავისი განზრახვის შესრულებაც. ეს წიგნები გვარწმუნებს, რომ ის ნამდვილ სამოთხედ აქცევს დედამიწას, რომელზეც ღვთის სამეფო იმმართველებს (მიქა 4:1—4). ამ წინასწარმეტყველთაგან ზოგიერთი აღწერს, თუ როგორ მოამზადა იეჰოვამ გზა მესიის მოსვლისთვის და იმ მსხვერპლისთვის, რომელიც კაცობრიობას ცოდვისა და სიკვდილისგან იხსნიდა (მალაქია 3:1; 4:5). რატომაა საჭირო ამის ცოდნა?

მოსიყვარულე უზენაესი ღვთის ხელთაა ყველაფერი

4, 5. ა) ღვთის შესახებ რა მნიშვნელოვან ჭეშმარიტებას უსვამს ხაზს თორმეტი წინასწარმეტყველი? ბ) თქვენზე რა გავლენას ახდენს ის, რომ იეჰოვა ყოვლისშემძლე ღმერთია?

⁴ გაიხსენეთ, როგორ გახდა საკამათო ღვთის მმართველობის უფლება, რაზეც წინა თავში ვისაუბრეთ. ღვთის ძალაუფლებისადმი ურჩობითა და მისი სიმართლის ეჭვქვეშ დაყენებით ზეცაში ზოგიერთი ქმნილება ღვთის ურჩი გახდა და მას შემდეგ დედამიწაზეც აირ-დაირია ცხოვრება. აშკარაა, რომ იეჰოვას უზენაესობის აღიარება და მისი მორჩილება აუცილებელია, რათა სამყაროში სრული ჰარმონია იყოს და ადამიანთა შორის მშვიდობა მეფობდეს. ამიტომაც, იეჰოვამ სამართლიანად გადაწყვიტა, დაეცვა თავისი უზენაესობა. ჩვენ ვნახავთ, თუ როგორ გვეხმარება ეს თორმეტი წინასწარმეტყველური წიგნი ამ საკითხის უკეთ გაგებაში.

⁵ წინასწარმეტყველები, როგორც იეჰოვას მაცნეები, ბევრს საუბრობდნენ მის აღმატებულობაზე. მაგალითად, ღვთის სახელის განსადიდებლად და ყოვლისშემძლე ღვთის უზენაესობის ხაზგასასმელად ამოსი 21-ჯერ იმეორებს წოდებას „უზენაესი უფალი“, რაც მეტყველებს ჭეშმარიტი ღვთის უსაზღვრო დიდებულებაზე და იმაზე, რომ მის ხელთაა ყველაფერი (ამოსი 9:2—5; იხილეთ ჩარჩო „ყოვლისშემძლე ღმერთი იეჰოვა“). მხოლოდ იეჰოვას აქვს კანონიერი უფლება, იყოს სამყაროს უზენაესი მმართველი, უსიცოცხლო კერპები ვერასდროს შეედრებიან მას (მიქა 1:7; აბაკუმი 2:18—20; სოფონია 2:11). იეჰოვა ყოველივეს შემოქმედია და ამიტომაც მას, როგორც უზენაესს, სრული უფლება აქვს, იმმართველოს ყველასა და ყველაფერზე (ამოსი 4:13; 5:8, 9; 9:6). რით არის ეს თქვენთვის მნიშვნელოვანი?

6. ვის ეხება ღვთის განზრახვა?

⁶ თუ ოდესმე შეულახავთ თქვენი უფლებები და თუ გამოგიცდიათ უსამართლობა, თუ ოდესმე დაზარალებულხართ წინასწარშექმნილი უარყოფითი აზრის გამო, მართლაც განუგეშებთ იმის ცოდნა, რომ მოსიყვარულე უზენაესი ღმერთი ყველა ადამიანზე ზრუნავს. მიუხედავად იმისა, რომ იეჰოვას ძველ დროს განსაკუთრებული ურთიერთობა ჰქონდა ერთ ერთან, მან თქვა, რომ აკურთხებდა ყველა ერს და ყველა ენაზე მოლაპარაკე ხალხს. ისაა „მთელი დედამიწის ჭეშმარიტი უფალი“ (მიქა 4:13). ღვთის დაპირებისამებრ, „დიდებული იქნება“ მისი „სახელი ხალხებში“ (მალაქია 1:11). ჩვენი ზეციერი მამა განურჩევლად ყველას აცნობს თავს, და ადამიანებიც „ყველა ენის ხალხიდან“ სიხარულით ეხმაურებიან მის მოწვევას და მისი თაყვანისმცემლები ხდებიან (ზაქარია 8:23).

7. რას გვეუბნება იეჰოვაზე მისი სახელი?

⁷ ღვთის სახელი გვეუბნება, როგორია ღმერთი და რა განზრახვები აქვს (ფსალმუნები 9:10). მიქას დროს იეჰოვას სახელი შეურაცხყოფილი იყო მათ გამო, ვინც მისი სახელით დადიოდა, მაგრამ ურჩობდა. ღვთის შთაგონებით წინასწარმეტყველი განადიდებდა იეჰოვას სახელს და ამბობდა, რომ ბრძენს შეეშინდებოდა ღვთის სახელისა (მიქა 5:4; 6:9). რატომ? თქვენი მომავალი იმ სახელზეა დამოკიდებული, რომელიც ნიშნავს — აქცევინებს. წაიკითხეთ იოელის 2:26 და დაფიქრდით, რა ბედნიერებაა, ატარო ეს სახელი და მოუთხრო სხვებს იმ ერთადერთი ღვთის შესახებ, რომელსაც შეუძლია თავისი ქმნილებების სასარგებლოდ იქცეს იმად, რადაც საჭიროდ ჩათვლის! ღმერთს ნებისმიერი განზრახვის შესრულება შეუძლია, რასაც თორმეტი წინასწარმეტყველის მიერ წარმოთქმული მრავალი წინასწარმეტყველების შესრულებაც ადასტურებს.

8. რისკენ აღგვძრავს იეჰოვას სახელის ცოდნა?

⁸ იეჰოვას შეუძლია იმის გაკეთება, რასაც მოისურვებს. ამის ცოდნა დადებით გავლენას ახდენს მილიონობით ადამიანზე. სწორედ ამას გულისხმობდა იოელი, რომელიც ჩვენთვის კარგად ნაცნობ სიტყვებს წერდა, და რასაც ქრისტიანული წერილებიც ციტირებს: „ყოველი, ვინც იეჰოვას სახელს უხმობს, გადარჩება“ (იოელი 2:32; საქმეები 2:21; რომაელები 10:13). ვიზიარებთ ჩვენც მიქას სულისკვეთებას და ვივლით „იეჰოვას, ჩვენი ღვთის სახელით. . . მარადიულად, სამარადისოდ“? (მიქა 4:5) დევნის ან განსაცდელების დროს შეგვიძლია სრული ნდობით შევაფაროთ თავი იეჰოვას სახელს (სოფონია 3:9, 12; ნაუმი 1:7).

9. საიდან ჩანს, რომ მსოფლიო მმართველები ღვთის ხელთ არიან?

⁹ ამ წინასწარმეტყველური წიგნების კითხვისას განგიმტკიცდებათ იმის რწმენა, რომ იეჰოვას ხელთ არიან მსოფლიო მმართველებიცა და მსოფლიოს ბედ-იღბლის განმგებლებიც. მას შეუძლია თავისი ნებისამებრ ამოქმედოს ისინი (იგავები 21:1). გავიხსენოთ სპარსეთის მეფის, დარიოს დიდის შემთხვევა. ჭეშმარიტი თაყვანისმცემლობის მოწინააღმდეგეებმა მას დახმარებისთვის მიმართეს იერუსალიმში ტაძრის მშენებლობის შესაჩერებლად, მაგრამ ყველაფერი პირიქით მოხდა. ძვ. წ. დაახლოებით 520 წელს დარიოსმა მხარი დაუჭირა კიროსის ბრძანებას და ამით იუდეველებს მშენებლობაში დაეხმარა. როდესაც სხვა დაბრკოლებები შეიქმნა, ღმერთმა ასე მიმართა იუდეველ გამგებელ ზერუბაბელს: «„არც ჯარითა და არც ძლიერებით, არამედ ჩემი სულით“, — ამბობს ლაშქართა ღმერთი იეჰოვა. ვინა ხარ, დიდო მთაო? ვაკედ იქცევი ზერუბაბელის წინაშე» (ზაქარია 4:6, 7). ვერაფერი შეუშლის ხელს იეჰოვას ამ ბოროტი ქვეყნიერების განადგურებასა და თავის თაყვანისმცემელთა გასახარად დედამიწის სამოთხედ გადაქცევაში (ესაია 65:21—23).

10. კიდევ რა არის ღვთის ხელთ და რაზე მეტყველებს ეს?

¹⁰ იმაზეც დავფიქრდეთ, როგორ მართავს იეჰოვა ბუნების ძალებს, რითაც ნებისმიერ დროს შეუძლია თავისი მტრების განადგურება (ნაუმი 1:3—6). ზაქარიამ ხატოვანი ენით აღწერა, როგორ შეუძლია იეჰოვას თავისი ხალხის დაცვა: „იეჰოვა გამოჩნდება მათ ზემოთ და ელვასავით გამოვა მისი ისარი. უზენაესი უფალი იეჰოვა ჩაჰბერავს საყვირს და სამხრეთის გრიგალით ივლის“ (ზაქარია 9:14). განა დღეს ვერ შეძლებს ღმერთი, აჩვენოს, რამდენად მაღლა დგას უღვთო ერებზე?! პასუხი ცხადია! (ამოსი 1:3—5; 2:1—3)

დანაპირების ერთგული შემსრულებელი

11, 12. ა) რატომ ითვლებოდა ნინევე აუღებელ ქალაქად? ბ) რა ბედი ეწია ნინევეს ღვთის წინასწარმეტყველური სიტყვის თანახმად?

¹¹  ძვ. წ. IX საუკუნეში ახლო აღმოსავლეთში რომ გეცხოვრათ, რომელი უზარმაზარი ქალაქი იქნებოდა თქვენთვის კარგად ცნობილი? ცხადია, ნინევე. ეს იყო ასურეთის გამორჩეული ქალაქი, რომელიც მდინარე ტიგროსის აღმოსავლეთ სანაპიროზე, იერუსალიმიდან ჩრდილო-აღმოსავლეთით დაახლოებით 900 კილომეტრის დაშორებით მდებარეობდა. უეჭველად გეცოდინებოდათ ამ ქალაქის გრანდიოზული მასშტაბები — მისი გარშემოწერილობა 100 კილომეტრს აღწევდა! ნინევეს მნახველები ამბობდნენ, რომ ის თავისი მშვენებით — სამეფო სასახლეებით, ტაძრებით, განიერი ქუჩებით, ბაღებითა და შთამბეჭდავი ბიბლიოთეკით — ბაბილონს უტოლდებოდა. გარდა ამისა, მას მასიური, შეუღწეველი შიდა და გარე გალავანი ჰქონდა, და ამგვარად, სამხედრო თვალსაზრისითაც კარგად იყო დაცული.

¹² „აუღებელი ქალაქი!“ — მრავალი ასე დაახასიათებდა ნინევეს. მაგრამ მცირერიცხოვან იუდეველთაგან ზოგიერთი წინასწარმეტყველი დარწმუნებით აცხადებდა, რომ იეჰოვა გაანადგურებდა „სისხლისმღვრელ ქალაქს“. ღმერთმა დროებით დაინდო ქალაქი, რადგან ხალხი გამოეხმაურა იონას ცნობას, თუმცა მოგვიანებით ნინეველები კვლავ უკეთურ ცხოვრებას დაუბრუნდნენ. ნაუმმა იწინასწარმეტყველა: „ნინევე! . . მახვილი მოგსპობს. . . არ შემსუბუქდება შენი უბედურება“ (ნაუმი 3:1, 7, 15, 19; იონა 3:5—10). დაახლოებით იმავე დროს ღმერთმა სოფონიას პირით იწინასწარმეტყველა ნინევეს გაპარტახება (სოფონია 2:13). ნუთუ მართლა დაეცემოდა უძლეველი ნინევე, როგორც ეს იეჰოვას ჰქონდა ნაწინასწარმეტყველები? ამ კითხვას პასუხი ძვ. წ. დაახლოებით 632 წელს გაეცა, როცა ბაბილონელებმა, სკვითებმა და მიდიელებმა ნინევე ალყაში მოაქციეს. მტრის ურდო მოულოდნელად მიაწყდა მის გალავანს და გაარღვია (ნაუმი 2:6—8). ერთ დროს ძლიერი ქალაქი უეცრად ნანგრევების გროვად იქცა. ნინევე დღემდე ნაოხარ ადგილად რჩებაa. „მხიარული ქალაქი“ წინ ვერ აღუდგა ღვთის სიტყვის შესრულებას! (სოფონია 2:15)

13. რა ადასტურებს თორმეტი წინასწარმეტყველის წინასწარმეტყველებათა შესრულებას?

¹³ შესრულებულ წინასწარმეტყველებათა შორის ნინევეს დაცემა ერთადერთი როდია. აბა, დააკვირდით ახლო აღმოსავლეთის თანამედროვე რუკას. იპოვით სადმე ამონს, ასურეთს, ბაბილონს, ედომსა თუ მოაბს? საეჭვოა! მიუხედავად იმისა, რომ თავის დროზე ეს ერები დიდად სახელგანთქმულნი იყვნენ, თორმეტი წინასწარმეტყველის სიტყვებისამებრ მათ განადგურება არ ასცდათ (ამოსი 2:1—3; აბდია 1, 8; ნაუმი 3:18; სოფონია 2:8—11; ზაქარია 2:7—9). ეს ერები ერთიმეორის მიყოლებით აღიგავნენ მიწის პირისგან. იეჰოვამ თქვა, რომ ისინი განადგურდებოდნენ, და ასეც მოხდა! ისიც შესრულდა, რაც ამ წინასწარმეტყველებმა იუდეველთა დარჩენილი ნაწილის ბაბილონის ტყვეობიდან დაბრუნებაზე იწინასწარმეტყველეს.

14. რატომ უნდა ვითვალისწინებდეთ ცხოვრებაში იეჰოვას დაპირებებს?

¹⁴ რა გავლენას ახდენს თქვენზე ის ფაქტი, რომ იეჰოვას წინასწარმეტყველების გასაოცარი უნარი აქვს? ალბათ, უფრო მეტად რწმუნდებით იმაში, რომ იეჰოვა თავის ყველა დანაპირებს შეასრულებს. ის არის ღმერთი, „რომელმაც შეუძლებელია, იცრუოს“ (ტიტე 1:2). თავისი სიტყვის მეშვეობით ღმერთი ჩვენთვის საჭირო ცნობასაც გვაწვდის. თქვენ შეგიძლიათ, ცხოვრება იეჰოვას ნებისა და მისი უტყუარი წინასწარმეტყველური სიტყვის შესაბამისად წარმართოთ. თორმეტ წიგნში ჩაწერილი წინასწარმეტყველებები მხოლოდ წარსულში შესრულებული წინასწარმეტყველებებით არ ამოიწურება. მათგან მრავალი ან ჩვენს დროში სრულდება ან მალე შესრულდება. ეს თორმეტი წიგნი განგიმტკიცებთ იმის რწმენას, რომ აუცილებლად შესრულდება წინასწარმეტყველებები ჩვენს დროსა და მომავალზე. გულისყურით მოეკიდეთ მათ!

მზრუნველი მამა

15. როგორ დაგეხმარებათ პრობლემებთან ჭიდილში მიქას შემთხვევა?

¹⁵ იეჰოვა სანდო ღმერთია. ამას მხოლოდ ის როდი ადასტურებს, რომ, რაც ღმერთმა ცალკეულ ერებსა და მთელ მსოფლიოს უწინასწარმეტყველა, უსათუოდ შესრულდება. იეჰოვას წინასწარმეტყველებები და მათი შესრულება პირადად თქვენც გეხებათ. როგორ? დროდადრო, პრობლემებთან ჭიდილში, ხვდებით, რომ მხოლოდ მომსმენი ყური კი არ გჭირდებათ, არამედ ის, ვისაც მიენდობით და ვინც დაგეხმარებათ. ძვ. წ. VIII საუკუნეში მიქა, როგორც ჩანს, მარტოობას გრძნობდა, რადგან გარს ამაყი იუდეველები ეხვია. ერთი შეხედვით ისღა იყო ერთგული ადამიანი დედამიწაზე. საკუთარი ოჯახის წევრებსაც ვეღარ ენდობოდა, ყველგან სისხლისმღვრელ, მზაკვარ და გახრწნილ ადამიანებს ხვდებოდა. მიუხედავად ამისა, ღვთის დანაპირებმა მიქა დაარწმუნა, რომ, სხვებს რაც უნდა ეკეთებინათ, ღმერთი მაინც იზრუნებდა თავის ერთგულ ხალხზე. ამით თქვენც შეგიძლიათ ინუგეშოთ, მით უმეტეს, თუ თქვენ გარშემო მყოფი ადამიანები პატივს არ მიაგებენ ღმერთს და ამის გამო თქვენ, როგორც იეჰოვას თაყვანისმცემელი, მარტოობას გრძნობთ (მიქა 7:2—9).

16. რა გვარწმუნებს იმაში, რომ ღმერთი არ შეიწყნარებს გახრწნილებასა და ჩაგვრას და იხსნის მართლებს?

¹⁶ მდიდარ და გავლენიან ისრაელებსა და იუდეველებს შორის სიხარბესა და უსამართლობას მოეკიდებინა ფეხი, რასაც დღესაც ხშირად ვხვდებით. იმ დროს უკანონოდ იმონებდნენ ხალხს — ზედმეტ გადასახადებს აკისრებდნენ და მიწებს ართმევდნენ. ღარიბებს არაფრად აგდებდნენ და სასტიკადაც კი ეპყრობოდნენ (ამოსი 2:6; 5:11, 12; მიქა 2:1, 2; 3:9—12; აბაკუმი 1:4). თავისი მაცნეების მეშვეობით ღმერთმა ცხადყო, რომ არ შეიწყნარებდა გახრწნილებასა და ჩაგვრას, და დასჯიდა გამოუსწორებელ ბოროტმოქმედებს (აბაკუმი 2:3, 6—16). წინასწარმეტყველებაში ნათქვამია, რომ ღმერთი „საქმეებს მოაგვარებს. . . ძლიერი ერებისთვის“, ხოლო ყველა მისი მსახური „თავისი ვაზისა და ლეღვის ძირში იჯდება და არავინ დააფრთხობს მათ“ (მიქა 4:3, 4). რამხელა შვება იქნება! ღმერთმა ბევრი რამ იწინასწარმეტყველა და შეასრულა კიდეც. დარწმუნებული იყავით, რომ ეს დანაპირებიც შესრულდება!

17, 18. ა) რატომ აიმედებს ღმერთი თავის ხალხს? ბ) რა თვალსაზრისი უნდა გვქონდეს, როდესაც იეჰოვა გვსჯის?

¹⁷ იეჰოვა იმიტომ როდი ასრულებს თავის დანაპირებს, რომ წინასწარმეტყველების უნარით შთაბეჭდილება მოახდინოს ადამიანებზე. ის პრინციპებზე აგებული სიყვარულით მოქმედებს, რადგან „ღმერთი სიყვარულია“ (1 იოანე 4:8). გავიხსენოთ ძვ. წ. VIII საუკუნეში მცხოვრები ოსიას შემთხვევა. როგორც ოსიას ცოლი, გომერი, ღალატობდა მას, ასევე ღალატობდნენ ისრაელები იეჰოვას. მათი კერპთაყვანისმცემლობა მრუშობის ტოლფასი იყო; ისინი იეჰოვასაც სცემდნენ თაყვანს და ბაალსაც. გარდა ამისა, ბიბლიის სიტყვებით რომ ვთქვათ, სულიერი გაგებით გარყვნილებას სჩადიოდნენ ასურეთთან და ეგვიპტესთან. რას მოიმოქმედებდა იეჰოვა? ოსიას უნდა დაებრუნებინა თავისი მოღალატე ცოლი. იეჰოვაც სიყვარულით ცდილობდა თავისი ხალხის დაბრუნებას. „ვიზიდავდი მათ ადამიანის თოკებით, სიყვარულის თასმებით. . . ფრთხილად მიმქონდა თითოეულთან საჭმელი“ (ოსია 2:5; 11:4). ამის პასუხად მათ რომ გულწრფელად მოენანიებინათ, ღმერთი აპატიებდა და მათთან ურთიერთობასაც აღადგენდა (ოსია 1:3, 4; 2:16, 23; 6:1—3; 14:4). ნუთუ გულს არ გითბობთ იეჰოვას ასეთი სიყვარული?! დაფიქრდით: თუ იეჰოვამ წარსულში გამოავლინა ასეთი სიყვარული, განა დღეს ეჭვი უნდა შეგვეპაროს მის სათუთ, ერთგულ, მტკიცე და მარადიულ სიყვარულში?! (ოსია 11:8)

¹⁸ თორმეტი წინასწარმეტყველური წიგნი იმის დანახვაშიც დაგეხმარებათ, რომ ღვთის სიყვარული მის თაყვანისმცემელთა გამოსწორებას ემსახურება. იეჰოვა არწმუნებდა თავის შემცოდველ ხალხს, რომ „ბოლომდე არ მოსპობდა“ მათ (ამოსი 9:8). როცა საჭირო იყო, ღმერთი სჯიდა მათ, მაგრამ როგორი შვება იქნებოდა დასჯილთათვის იმის ცოდნა, რომ სასჯელი დროებითი იყო! მალაქიას 1:6-ში იეჰოვა მოსიყვარულე მამას არის შედარებული. ყველამ კარგად ვიცით, რომ მამამ საყვარელი შვილი გამოსასწორებლად შეიძლება დასაჯოს კიდეც (ნაუმი 1:3; ებრაელები 12:6). ჩვენი ზეციერი მამა მოსიყვარულე და რისხვაში ნელია. მალაქიას 3:10, 16 გვარწმუნებს, რომ ის უხვად აჯილდოებს თავის მსახურებს.

19. რას უნდა დაუკვირდეთ?

¹⁹ მალაქია ასეთი თბილი სიტყვებით იწყებს თავის წიგნს: „მე მიყვარხართ, — ამბობს იეჰოვა“ (მალაქია 1:2). დაფიქრდით ისრაელისთვის ნათქვამ ღვთის ამ სიტყვებზე და დაუკვირდით: ხელს ხომ არ გიშლით თქვენი საქციელი ღვთის სიყვარულის შეგრძნებაში? ღვთის სიყვარულის რომელ მხარეებს უნდა გაეცნოთ, რომ უფრო მეტად შეიგრძნოთ ეს? რაც უფრო მეტს გაიგებთ ღვთის ამ სათუთ გრძნობაზე, მით უფრო მეტად დარწმუნდებით მის მარადიულ სიყვარულში.

მიმტევებლობა გადარჩენის გზაა

20. რა გაგებით არის ღვთის მიმტევებლობა გადარჩენის გზა?

²⁰ ამ წინასწარმეტყველური წიგნების კითხვისას შეამჩნევთ, რომ ზოგჯერ იეჰოვა უბედურებასაც წინასწარმეტყველებდა, ხშირ შემთხვევაში იმიტომ, რომ მის ხალხს მოენანიებინა. სწორედ ამიტომ გაანადგურებინა მტრის ურდოებს სამარია ძვ. წ. 740 წელს და იერუსალიმი — ძვ. წ. 607 წელს. ღვთის წინასწარმეტყველება შესრულდა, თუმცა მოგვიანებით მან მომნანიებელი ხალხი სამშობლოში დააბრუნა. ეს წიგნები გვიჩვენებს, რომ იეჰოვა მთელი სულგრძელობით პატიობს და იღებს მათ, ვინც ტოვებს ცოდვილ გზას და მას უბრუნდება (აბაკუმი 3:13; სოფონია 2:2, 3). მიქამ დაწერა: „შენსავით რომელი ღმერთი პატიობს დანაშაულს და გვერდს უვლის ცოდვას, რომელიც მისი მემკვიდრეობის დარჩენილ ნაწილს ჩაუდენია? მარადიულად არ იქნები განრისხებული, რადგან სიკეთე გახარებს“ (მიქა 7:18; იოელი 2:13; ზაქარია 1:4). ამ სიტყვების ჭეშმარიტებას შესრულებული წინასწარმეტყველება ამტკიცებს.

21. ა) რა იწინასწარმეტყველა თორმეტმა წინასწარმეტყველმა მესიაზე? ბ) მესიის შესახებ რომელი წინასწარმეტყველებებია განსაკუთრებით საინტერესო თქვენთვის?

²¹ კანონიერი საფუძველი რომ შეექმნა ერთხელ და სამუდამოდ პატიებისთვის, იეჰოვამ იწინასწარმეტყველა მესიის მოსვლა, რომელიც თავის ადამიანურ სიცოცხლეს „შესაბამის გამოსასყიდად“ გაიღებდა ცოდვილი კაცობრიობისთვის (1 ტიმოთე 2:6). ამოსი იმ სასიკეთო ცვლილებებზე წინასწარმეტყველებდა, რასაც მესია, დავითის ძე, მოახდენდა (ამოსი 9:11, 12; საქმეები 15:15—19). მიქამ იწინასწარმეტყველა, თუ სად დაიბადებოდა იესო, რომელიც სიცოცხლეს მიანიჭებდა ყველას, ვინც რწმენას გამოავლენდა მისი მსხვერპლისადმი (მიქა 5:2). ზაქარია საუბრობდა „ყლორტზე“ ანუ იესოზე, რომელიც დაჯდებოდა თავის ტახტზე და იმმართველებდა (ზაქარია 3:8; 6:12, 13; ლუკა 1:32, 33). ამ წინასწარმეტყველებების ღრმა გამოკვლევა უთუოდ განგიმტკიცებთ რწმენას (იხილეთ ჩარჩო „ძირითადი წინასწარმეტყველებები მესიაზე“).

22. როგორ განგიმტკიცათ იეჰოვასადმი რწმენა თორმეტ წინასწარმეტყველურ წიგნში ჩაწერილმა სიტყვებმა?

²² ეს თორმეტი წინასწარმეტყველური წიგნი დაგვარწმუნებს, რომ ღმერთი საბოლოოდ გაიმარჯვებს. იეჰოვა იბრძოლებს ჩვენთვის და ჭეშმარიტ სამართლიანობას დაამყარებს. ღვთის სიტყვა მარადიულია. ღმერთს ახსოვს თავის ხალხთან დადებული შეთანხმებები, ზრუნავს თავის მსახურებზე და იხსნის მათ მჩაგვრელთა ხელიდან (მიქა 7:8—10; სოფონია 2:6, 7). იეჰოვა არ იცვლება (მალაქია 3:6). გვამხნევებს ის, რომ ვერავითარი წინააღმდეგობა ვერ შეუშლის ხელს ღმერთს თავისი განზრახვის შესრულებაში. რაკი ღმერთი ამბობს, რომ მოვა სასამართლოს დღე, ის ნამდვილად მოვა. ამიტომ, იფხიზლეთ და ელოდეთ იეჰოვას დღეს! „იეჰოვა იმეფებს მთელ დედამიწაზე. იმ დღეს ერთი იქნება იეჰოვა და ერთი იქნება მისი სახელი“ (ზაქარია 14:9). ამას ღმერთი წინასწარმეტყველებს და შეასრულებს კიდეც თავის სიტყვას.