თავი 28

როგორ ვებრძოლო ჰომოსექსუალურ მიდრეკილებას?

„როცა მოზარდი ვიყავი, ბიჭებისკენ მქონდა ლტოლვა. გულის სიღრმეში ვხვდებოდი, რომ ეს ნორმალური არ იყო“ (ოლეფი).

„მე და ჩემმა დაქალმა ერთი-ორჯერ ვიკოცნავეთ. თან ბიჭებიც მომწონდა და ვფიქრობდი, ბისექსუალი ხომ არა ვარ-მეთქი“ (სარა).

დღეს ჰომოსექსუალიზმზე უკვე დაუფარავად ლაპარაკობენ. თუ რამდენიმე ათწლეულის წინ ეს ბევრისთვის მიუღებელი იყო, დღეს შეიძლება კრიტიკა არ აგცდეს, ჰომოსექსუალიზმის საწინააღმდეგოდ თუ იტყვი რამეს. 16 წლის ემი ამბობს: „ერთ გოგოს ჩემი აზრი ვუთხარი ჰომოსექსუალიზმზე. მან კი ეს უსამართლობად ჩათვალა და მითხრა, რომ მე რასისტიც ვიქნებოდი“.

დღეს, როცა ყველაფერი მისაღები გახდა, მრავალი ახალგაზრდა არც ჰომოსექსუალურ ურთიერთობებზე ამბობს უარს. „ჩემს სკოლაში ბევრი გოგო ამბობს, რომ ლესბოსელი ან ბისექსუალია“, — ამბობს 15 წლის ბეკი. 18 წლის კრისტას სკოლაშიც იგივე მდგომარეობაა: „ორმა კლასელმა პირდაპირ შემომთავაზა ურთიერთობა. ერთმა მომწერა, არ გინდა, მოსინჯო გოგოსთან ურთიერთობაო“.

როცა ჰომოსექსუალიზმის პროპაგანდას ყოველ ნაბიჯზე ხვდები, შეიძლება გაგიჩნდეს კიდეც ასეთი კითხვები: „მართლა ასე ცუდია ჰომოსექსუალიზმი? როგორ მოვიქცე, თუ ჩემშიც ვატყობ ასეთ მიდრეკილებას? ნიშნავს ეს იმას, რომ მეც ჰომოსექსუალისტი ვარ?“

ღვთის თვალსაზრისი

დღეს მრავალი ადამიანი, მათ შორის ზოგიერთი სასულიერო პირი, შემწყნარებლურად ეკიდება ჰომოსექსუალიზმს. მაგრამ ბიბლიიდან ჩანს, რომ ღმერთს ამ საკითხზე სულ სხვა თვალსაზრისი აქვს. იეჰოვა ღმერთმა ქალი და მამაკაცი შექმნა; როგორც ქალს, ისე კაცს სქესობრივი მოთხოვნილება მხოლოდ ცოლქმრულ ურთიერთობაში უნდა დაეკმაყოფილებინა (დაბადება 1:27, 28; 2:24). აქედან გამომდინარე, გასაგებია, თუ რატომ გმობს ბიბლია ჰომოსექსუალიზმს (რომაელები 1:26, 27).

ზოგი ფიქრობს, რომ ბიბლიის ნორმები მოძველებულია. რატომ მიდიან ისინი ასეთ აზრამდე? იმიტომ ხომ არა, რომ ბიბლია მათ შეხედულებებს უპირისპირდება? მრავალი ბიბლიას მხოლოდ იმიტომ აკრიტიკებს, რომ მისი სწავლებები განსხვავდება იმისგან, რისი დაჯერებაც თავად სურთ. ბიბლიის ნორმები არ არის მოძველებული და უნდა ვეცადოთ, რომ ასეთმა აზროვნებამ არ მოგვატყუოს.

როგორ უნდა მოიქცე, თუ შენივე სქესის ადამიანი გიზიდავს? ნიშნავს ეს აუცილებლად იმას, რომ ჰომოსექსუალისტი ხარ? არა. გახსოვდეს, რომ იმ ასაკში ხარ, როცა შენში „ახალგაზრდული ვნებები“ მოზღვავებულია (1 კორინთელები 7:36). თუ ზოგჯერ შენივე სქესის ადამიანი მოგწონს, მაშინვე ნუ დაასკვნი, რომ ჰომოსექსუალისტი ხარ. როგორც წესი, დროთა განმავლობაში ასეთი მიდრეკილებები ქრება. მანამდე კი რა უნდა გააკეთო, არასწორ სურვილებს რომ არ აჰყვე?

ილოცე. დავითივით სთხოვე იეჰოვას: „გამომიკვლიე, ღმერთო, და შეიცანი ჩემი გული. შემამოწმე და გაიგე ჩემი მშფოთვარე ფიქრები; ნახე, ისეთი რამ ხომ არ არის ჩემში, რაც სატკივარს გამოიწვევდა, და წამიძეხი მარადიულობის გზაზე“ (ფსალმუნი 139:23, 24). იეჰოვას შეუძლია მოგცეს სიმშვიდე, რომელიც „ნებისმიერ აზრს აღემატება“. ეს ‘დაიცავს შენს გულსა და გონებას’ და მოგცემს „ძალა[ს], რომელიც ჩვეულებრივს აღემატება“, რათა არასწორი სურვილების მსხვერპლი არ გახდე (ფილიპელები 4:6, 7; 2 კორინთელები 4:7).

იფიქრე იმაზე, რაც სწორია (ფილიპელები 4:8). ყოველდღიურად იკითხე ბიბლია. ეს სასიკეთოდ იმოქმედებს შენს გულსა და გონებაზე (ებრაელები 4:12). ახალგაზრდა ჯეისონი ამბობს: „ბიბლიამ, განსაკუთრებით კი 1 კორინთელების 6:9, 10-სა და ეფესოელების 5:3-ში ჩაწერილმა სიტყვებმა, ძალიან იმოქმედა ჩემზე. ამ მუხლებს ვკითხულობ ყოველთვის, როცა არასწორი სურვილები მიჩნდება“.

მოერიდე პორნოგრაფიას და ჰომოსექსუალიზმის მხარდამჭერ პროპაგანდას (კოლოსელები 3:5). მოერიდე ყველაფერს, რაც შენში არასწორ სურვილებს აღძრავს — მათ შორის პორნოგრაფიის, ზოგიერთი ტელეგადაცემისა და ფილმის ყურებას და თუნდაც ისეთი ჟურნალების თვალიერებას, სადაც ნახევრად შიშველი მოდელების ან კულტურისტების ფოტოებია დაბეჭდილი. თუ ცუდი ფიქრები მოგივა, გონება სხვა რამეზე გადაიტანე. ერთი ბიჭი ამბობს: „როცა ჰომოსექსუალური სურვილები მიჩნდება, ჩემს საყვარელ ბიბლიურ მუხლზე ვიწყებ ფიქრს“.

ზოგი ფიქრობს, რომ ამ მიდრეკილებასთან ბრძოლას აზრი არა აქვს და უნდა შეეგუო შენს სექსუალურ ორიენტაციას — იმას, რომ ასეთი ხარ. მაგრამ ბიბლია სრულიად საპირისპიროს ამბობს. მაგალითად, ბიბლიიდან ვიგებთ, რომ პირველ საუკუნეში ზოგი ჰომოსექსუალისტი შეიცვალა და ქრისტიანი გახდა (1 კორინთელები 6:9—11). შენც შეგიძლია ამ ბრძოლაში გამარჯვება.

რა უნდა გააკეთო, თუ ასეთი სურვილებისგან ვერაფრით თავისუფლდები? ფარ-ხმალს ნუ დაყრი! იეჰოვა ჰომოსექსუალურ კავშირს გმობს. ადამიანს, რომელიც ებრძვის ჰომოსექსუალურ სურვილებს, რეალური მიზანი აქვს, რადგან მას შეუძლია, არ აჰყვეს ასეთ სურვილებს.

მაგალითისთვის: ადამიანი შეიძლება იყოს ფიცხი (იგავები 29:22). ადრე თუ ადვილად გამოდიოდა მდგომარეობიდან, ბიბლიის შესწავლის შემდეგ ის ხედავს, რომ აუცილებელია თავშეკავების გამომუშავება. ნიშნავს ეს იმას, რომ ასეთი ადამიანი აღარასოდეს გაბრაზდება? არა. თუმცა ის ითვალისწინებს ბიბლიის თვალსაზრისს და ცდილობს ემოციების გაკონტროლებას.

იმავეს თქმა შეიძლება მასზე, ვისაც თავისივე სქესის ადამიანები იზიდავდა და შემდეგ გაიგო, თუ რას ამბობს ბიბლია ჰომოსექსუალიზმზე. დროდადრო არასწორმა სურვილებმა შეიძლება თავი შეახსენოს, მაგრამ იეჰოვას თვალსაზრისზე ფიქრი მას ძალებს მისცემს არასწორი სურვილების დასაძლევად.

არ დანებდე!

თუ ამ პრობლემას ებრძვი, შეიძლება შენთვის უცხო არ იყოს ერთი ახალგაზრდის გრძნობები: „ვცდილობ სხვა რამეზე გადავიტანო ყურადღება. იეჰოვას ვთხოვ დახმარებას. ბიბლიას ვკითხულობ. ვუსმენ მოხსენებებს ამ თემაზე. მეტი რაღა გავაკეთო“.

გასაგებია, რომ ეს ბრძოლა ადვილი ასატანი არ არის და არც სასწაულთმოქმედი წამალი არსებობს. და მაინც, ვისაც სურს, ღმერთს ასიამოვნოს, მისი ზნეობრივი ნორმებით უნდა იცხოვროს და მოერიდოს უზნეობას, თუნდაც ძალიან, ძალიან რთული იყოს ამის გაკეთება. ყოველთვის გახსოვდეს, რომ ღმერთს ესმის, რა ხდება შენს გულში. ის თანაგრძნობით ეკიდება თავის მსახურებსa (1 იოანე 3:19, 20). ღვთის მცნებების დაცვას მისი კურთხევები მოჰყვება. „დიდია ჯილდო მათი დაცვისათვის“, — ნათქვამია ბიბლიაში (ფსალმუნი 19:11). ამაზე უკეთეს არჩევანს ვერ გააკეთებ.

ასე რომ, მიენდე ღმერთს და ებრძოლე არასწორ სურვილებს (გალატელები 6:9). ‘შეიზიზღე ბოროტება და სიკეთეს მიეკარი’ (რომაელები 12:9). შენი ძალისხმევა უშედეგოდ არ ჩაივლის და დროთა განმავლობაში, ალბათ, გაგიქრება ასეთი სურვილები. და რაც მთავარია, თუ ყოველმხრივ მოერიდები ჰომოსექსუალიზმს, გექნება ახალ ქვეყნიერებაში მარადიული ცხოვრების შესაძლებლობა.

[სქოლიო]

საკვანძო ბიბლიური მუხლი

„შემამოწმე და გაიგე ჩემი მშფოთვარე ფიქრები; ნახე, ისეთი რამ ხომ არ არის ჩემში, რაც სატკივარს გამოიწვევდა“ (ფსალმუნი 139:23, 24).

რჩევა

შეისწავლე იესოს ცხოვრება იმის უკეთ დასანახად, თუ როგორი უნდა იყოს ნამდვილი მამაკაცი (1 პეტრე 2:21). მას ვაჟკაცური თვისებებიც ჰქონდა და რბილი ხასიათიც.

იცოდი, რომ . . . ?

შეიძლება სურვილები ყოველთვის ვერ აკონტროლო, მაგრამ საქციელის გაკონტროლება შეგიძლია. შენზეა დამოკიდებული, აჰყვები თუ არა არასწორ სურვილებს.

რა უნდა გავაკეთო

თუ ვინმე მკითხავს, რატომ არ იწონებს ბიბლია ჰომოსექსუალიზმს, ვეტყვი ․․․․․

თუ ვინმე იტყვის, რომ ბიბლიური ნორმები მოძველებულია, მე ვეტყვი, რომ ․․․․․

რა ვკითხო მშობლებს ამ საკითხზე? ․․․․․

როგორ ფიქრობ?

● რატომ არ იწონებს ღმერთი ჰომოსექსუალიზმს?

● რა პრაქტიკული ნაბიჯები შეგიძლია გადადგა იმისათვის, რომ ყოველმხრივ მოერიდო ჰომოსექსუალიზმს?

● თუ ჰომოსექსუალიზმზე ღვთის თვალსაზრისს იზიარებ, ნიშნავს ეს იმას, რომ ჰომოფობიას ავლენ (ჰომოსექსუალისტების მიმართ სიძულვილი)?

[ჩანართი 236 გვერდზე]

„ქვეყნიერების დამახინჯებული აზროვნება გავლენას ახდენდა ჩემზე და ვეღარ გამეგო, რა ორიენტაციის ვიყავი. დღეს ვერიდები ყველას და ყველაფერს, ვისაც და რასაც ჰომოსექსუალიზმთან აქვს კავშირი“ (ანა).

[სურათი 233 გვერდზე]

ყველა ახალგაზრდამ უნდა გააკეთოს არჩევანი ქვეყნიურ და ბიბლიურ ნორმებს შორის.