ᲐᲑᲔᲓᲜᲔᲒᲝ

[შესაძლოა ნიშნავს ნებოს (ბაბილონელთა ღვთაება) მსახურს]

სახელი, რომელიც დაარქვეს ნაბუქოდონოსორის მიერ ტყვეობაში წაყვანილ (ძვ. წ. 617) ერთ-ერთ ახალგაზრდას, სახელად აზარიას. იგი იუდეველთა სამეფო შთამომავალი ან მაღალი სოციალური წრის წარმომადგენელი იყო (დნ. 1:3, 4, 7).

ზოგიერთი მეცნიერის აზრით, ბაბილონელებმა აზარიას ისეთი სახელი დაარქვეს, რომელიც ღვთაება ნებოს სახეცვლილი ვარიანტისგან (ნეგო) შედგებოდა, რათა არ გაენაწყენებინათ იუდეველი ყმაწვილი (იხ. ᲜᲔᲑᲝ №4). სახელი აზარიას მნიშვნელობაა „იეჰოვა დაეხმარა“. როგორც ჩანს, ებრაელი ტყვეები ერთმანეთს კვლავაც ებრაული სახელებით მიმართავდნენ (დნ. 2:17). აზარია დანიელთან, ხანანიასა და მიშაელთან ერთად ბაბილონში სამი წლის მანძილზე წარჩინებით სწავლობდა და წარჩინებითვე ჩააბარა გამოცდა თავად ნაბუქოდონოსორს; მანამდე კი უარი განაცხადა მეფის მიერ გამოყოფილ საჭმელ-სასმელზე, რითაც ცხადყო, რომ მტკიცედ იდგა თავის რელიგიურ შეხედულებებზე (დნ. 1:4, 5, 8—20). მოგვიანებით, დანიელის თხოვნით, მეფემ აზარია და მისი ორი მეგობარი ბაბილონის სამთავროს გამგებლებად დააყენა (დნ. 2:49).

გარკვეული ხნის შემდეგ მეფემ ოქროს ქანდაკება აღმართა, რომლისთვისაც მუსიკის ხმაზე ყველას თაყვანი უნდა ეცა, მაგრამ აბედნეგომ (აზარია) და მისმა ორმა მეგობარმა არ მოიყარეს მუხლი კერპის წინ. ამის შესახებ ზოგიერთმა ქალდეველმა მეფეს ამცნო (დნ. 3:5, 8, 12). განრისხებულმა მეფემ აბედნეგოს და მის მეგობრებს ახსნა-განმარტება მოსთხოვა, მაგრამ მათ უარი განაცხადეს საკუთარი მრწამსისა და სინდისის წინააღმდეგ წასვლაზე, რის გამოც მეფემ გავარვარებულ ღუმელში ჩაყარა, სადაც ღვთის ანგელოზმა სასწაულებრივად დაიცვა ეს სამი ებრაელი. მომხდარით შეშინებულმა მეფემ გაათავისუფლა ისინი და მთელმა სამეფო კარმა დაინახა, რომ ცეცხლს ამ სამი კაცისთვის ვერაფერი ევნო. ამის შემდეგ მათ კვლავ დაიბრუნეს მეფის კეთილგანწყობა (დნ. 3:15—30; იხ. ᲛᲔᲨᲐᲥᲘ; ᲨᲐᲓᲠᲐᲥᲘ).