ბეერი

[1, 2: ბეერისგან ან ბეეროთისგან, ბეერისა ან ბეეროთისა].

1. ესავის ცოლ იეჰუდითის მამა; ხეთელი (დბ. 26:34).

2. ოსია წინასწარმეტყველის მამა (ოს. 1:1).

[3, 4: ჭა] — ებრაული სიტყვა ბეʼერ ძირითადად აღნიშნავს ხელოვნურ ჭას (ებრ. ʽაჲინ ნიშნავს წყაროს). ის ხშირად გეოგრაფიული სახელების შემადგენელი ნაწილია (შდრ. ბეერ-ელიმი; ბეერ-შება).

3. აღთქმული მიწისკენ მიმავალი ისრაელები არნონის გავლის შემდეგ ბეერში მივიდნენ (რც. 21:13—16). სავარაუდოდ, ტომების მთავრებმა თავიანთი კვერთხებით იქ ამოთხარეს ჭა და წყალმა ამოჩქეფა. ამ შემთხვევამ განაპირობა სიმღერის დაწერა (მუხლები 17, 18).

ვინაიდან ეს ჭა მთავრებმა ამოთხარეს, ზოგს მიაჩნია, რომ ის იგივე ბეერ-ელიმია (ნიშნავს: ჭა დიდი ხეებისა) (ეს. 15:8). ბეერის ადგილმდებარეობა უცნობია, თუმცა ვარაუდობენ, რომ ის უადი-თამადის ხევში იყო არნონის ჩრდილოეთით, მკვდარი ზღვის აღმოსავლეთით დაახლ. 56 კმ-ში. წყლის მოსაპოვებლად იქ პატარა ორმოს ამოთხრაც კი საკმარისია.

4. აბიმელექის ღალატში მხილების შემდეგ ამ ადგილას გაიქცა გედეონის (იერუბაალი) ვაჟი იოთამი (მსჯ. 9:3—5, 21). ზოგი სავარაუდო ადგილად მიიჩნევს ალ-ბირას, რომელიც ბეთ-შანის ჩრდ-ით 12 კმ-ში მთა თაბორის სამხრ.-აღმ-ით მდებარეობს. ზოგი მას ბეეროთთან აიგივებს (იხ. ბეეროთი). ვინაიდან უცნობია, რა მიმართულებით გაიქცა იოთამი მთა გერიზიმიდან, ბეერის ზუსტი ადგილმდებარეობის დადგენა შეუძლებელია.