ᲙᲔᲜᲥᲠᲔ

საქმეების 18:18-დან ვიგებთ, რომ პავლემ კენქრეში თმა მოკლედ შეიჭრა, რადგან აღთქმა ჰქონდა დადებული, რის შემდეგაც მან ეფესოსკენ გასცურა (ახ. წ. 52). მას თან ახლდა პრისკილა და აკვილა. დაახლოებით ოთხი წლის შემდეგ რომაელებისადმი მიწერილ წერილში პავლემ მოიხსენია „კენქრეს კრება“. შესაძლოა, მოციქულმა რომაელებს ეს წერილი გადასცა და ფებეს ხელით, რომელიც ქალაქ კენქრეში ცხოვრობდა (რმ. 16:1, 2).

კენქრე მდებარეობდა სარონიკოსის ყურესთან ახლოს ვიწრო ყელში, კორინთის აღმ.-ით 11 კმ-ში. კორინთთან იგი დაკავშირებული იყო სამხედრო დანიშნულების ციხე-სიმაგრეებით. კენქრეში (კორინთის პორტი) შედიოდნენ საბერძნეთის აღმოსავლეთი მხარეებიდან წამოსული გემები, ხოლო ლექეონში, რომელიც კორინთის ყელის საპირისპირო მხარეს მდებარეობდა, შედიოდნენ იტალიიდან და დასავლეთიდან წამოსული გემები. ამ ტერიტორიაზე, თანამედროვე სოფელ კექრიესთან ახლოს, შემორჩენილია ძველი შენობებისა და ჯებირების ნანგრევები.