დორი

ქალაქი პალესტინაში, რომელმაც კავშირი შეკრა ხაცორის ქანაანელ მეფე იაბინთან, რათა ერთობლივად გაელაშქრათ იესო ნავეს ძის წინააღმდეგ (იეს. 11:1, 2). ამ ბრძოლაში მათ მარცხი განიცადეს (იეს. 11:12; 12:23). დორი და მისი მიმდებარე ქალაქები აშერის ტერიტორიაზე მდებარეობდა, თუმცა ისინი მენაშეს ტომს გადაეცა, რომელთაც ვერ შეძლეს იქ დარჩენილი მოსახლეობის განდევნა (იეს. 17:11—13; 1მტ. 7:29). დორი, რომელსაც სოლომონის ერთ-ერთი სიძე ზედამხედველობდა, ყოველწლიურად ერთი თვის მანძილზე საკვებს აწვდიდა მეფის სახლეულობას (1მფ. 4:11).

მიიჩნევენ, რომ ქალაქი დორი დღევანდელი ხირბეთ-ელ-ბურჯია (თელ-დორი), რომელიც მდებარეობს კესარეის ჩრდ.-ით 13 კმ-ში, ხმელთაშუა ზღვის გასწვრივ გადაჭიმულ გრძელ და ვიწრო დაბლობზე. თუმცა მისი ადგილმდებარეობა დავის საგანი გახდა, რადგან ბიბლიაში არაერთხელ არის გამოყენებული ფრაზა: „დორის მთებზე [ნაწარმოებია ებრ. სიტყვიდან ნაფაჰ]“ (იეს. 11:2). ზოგი მეცნიერის აზრით, ეს ებრაული სიტყვა ციცაბო კლდეებზე უნდა მიანიშნებდეს, რომლებიც ამ მხარეში თითქმის მთელ სანაპიროს გასდევს; ამგვარად ისინი ამ ებრაულ სიტყვას უკავშირებენ არაბულ სიტყვას ნაფნაფ, რაც „ციცაბო კლდეს, კბოდეს“ ნიშნავს. ზოგი კი ფიქრობს, რომ ნაფაჰ მთაგორიან ქანობზე უნდა მიანიშნებდეს, რომელიც დორიდან 3 კმ-ში იწყება და ქარმელის მთას უერთდება.