ებედ-მელექი

[მსახური მეფისა]

ეთიოპი საჭურისი, რომელიც მეფე ციდკიას სახლში მსახურობდა. მან თავისი საქციელით ცხადყო, რომ სრულად უჭერდა მხარს იეჰოვას წინასწარმეტყველ იერემიას. როცა იუდას მთავრებმა ცრუ ბრალდება წაუყენეს იერემიას, თითქოს მეამბოხე იყო, ციდკიამ წინასწარმეტყველი მათ გადასცა. მთავრებმა იერემია წაიყვანეს და მცველების ეზოში მალქიას ჭაში ჩააგდეს, რომ შიმშილით მომკვდარიყო (იერ. 38:4—6). მიუხედავად იმისა, რომ უმეტესობას სძულდა იერემია და მისი ცნობა, ებედ-მელექმა თავი საფრთხეში ჩაიგდო და მთელი ხალხის თვალწინ გაბედულად მივიდა ბენიამინის კარიბჭესთან მჯდომ მეფესთან და უშუამდგომლა იერემიას. ციდკიამ შეისმინა მისი თხოვნა. მეფის მითითებით ებედ-მელექმა 30 კაცი წაიყვანა ჭასთან და თოკებით ძონძები და ძველმანები ჩაუშვა იერემიასთან, რომ იღლიებში ამოედო და ჭიდან ისე ამოეყვანათ (იერ. 38:7—13). როგორც ჩანს, ციდკიამ იმიტომ კი არ ბრძანა 30 კაცის წაყვანა, რომ ამდენი კაცი იყო საჭირო იერემიას ამოსაყვანად, არამედ იმიტომ, რომ მის დახსნაში ხელი არ შეეშალათ მთავრებსა და მღვდლებს. ღვთის წინასწარმეტყველისადმი გაკეთებული სიკეთისთვის იეჰოვამ იერემიას მეშვეობით დაარწმუნა ებედ-მელექი, რომ ბაბილონელთა ალყის დროს არ დაიღუპებოდა და თავს დააღწევდა მათ (იერ. 39:15—18; იხ. საჭურისი).