ᲔᲑᲔᲠᲘ

[ნაწარმოებია ფუძიდან, რომელიც ნიშნავს გადასვლას, გადაკვეთას; ან მეორე მხარეს]

გარდა იმისა, რომ ბიბლიაში ამ სახელით ხუთი კაცია მოხსენიებული, რიცხვების 24:24-ში ებერი ან ებრაელ ერზე მიუთითებს, ან ტერიტორიაზე. ბერძნულ სეპტუაგინტაში, სირიულ ფეშიტასა და ლათინურ ვულგატაში ამ მუხლში ებერის ნაცვლად ებრაელები წერია. თუმცა ამ შემთხვევაში ებერი შეიძლება მიუთითებდეს ევფრატის გაღმა მდებარე მიწაზე ან ხალხზე (იმავე მუხლში მოხსენიებულია ასურეთთან ერთად). მდინარის გაღმად ნათარგმნი ებრაული ფრაზა (ებრ. ‛ევერ ჰანნაჰარ) ზოგჯერ გამოყენებულია ევფრატის დასავლეთით არსებული ტერიტორიის აღსანიშნავად (ნემ. 2:7, 9; 3:7). 1 მეფეების 4:24-ში იგივე ებრაული ფრაზა ნათარგმნია როგორც „მდინარის გამოღმა“ ან „ევფრატის დასავლეთით“ (RS). ამ ფრაზის არამეული ეკვივალენტი გამოყენებულია სირიისა და პალესტინის ტერიტორიების აღსანიშნავად (ეზრ. 4:10, 11, 16, 17, 20; 5:3, 6; 6:6, 13).

1. აბრაამის წინაპარი. შელახის ვაჟი და ფელეგის, იოკტანისა და სხვების მამა. მისი ვაჟის, ფელეგის დროს, რომელიც ებერზე 191 წლით ადრე დაიღუპა, „დაიყო დედამიწა“. ეს შეიძლება მიუთითებდეს იმ დროზე, როცა იეჰოვამ ენები აურია ბაბილონისა და მისი გოდლის მშენებლებს, რომელთაც ნიმროდი ხელმძღვანელობდა (დბ. 10:25; 11:14—19, 26).

დაბადების 10:21 მოიხსენიებს „სემს, ებერის ყველა ვაჟის [„ყველა ებრაელის“, AT, Mo] წინაპარს (მისი უფროსი ძმა იაფეთი იყო)“. აშკარაა, ამ შემთხვევაში ებერი იმიტომ არის მოხსენიებული სემთან, რომ ბიბლია ებერის შთამომავლებზე დიდ ყურადღებას ამახვილებს, განსაკუთრებით აბრაამიდან მოყოლებული. თუმცა ეს მუხლი არ ამბობს, რომ სემის შთამომავლები მხოლოდ ებრაელები იყვნენ, რაც მომდევნო მუხლებიდანაც ჩანს. ებერის შთამომავლები იოკტანის ხაზით, როგორც ჩანს, არაბეთში დასახლდნენ, ხოლო ფელეგის ხაზით — შუამდინარეთში.

2. ბაშანში მცხოვრები გადელი, აბიხაილის შთამომავალი (1მტ. 5:11, 13, 14).

3. ბენიამინელი, ელფაალის ვაჟი (1მტ. 8:12).

4. ბენიამინელი თავკაცი, შაშაკის ერთ-ერთი ვაჟი (1მტ. 8:22—25, 28).

5. ლევიანი მღვდელი. ამოკის საგვარეულოს თავკაცი. როგორც ჩანს, ებერი იყო მღვდელმთავარი იოიაკიმის, გამგებელი ნეემიას და მღვდლისა და გადამწერის, ეზრას თანამედროვე (ნემ. 12:12, 20, 26).