ᲔᲛᲐᲣᲡᲘ

სოფელი, რომლისკენ მიმავალ გზაზეც შეხვდნენ კლეოპა და ერთი მოწაფე ხორცშესხმულ იესოს აღდგომის შემდეგ. მოწაფეები ემაუსში ისე ჩავიდნენ, რომ ვერ მიხვდნენ, ვინ იყო მათი თანამგზავრი. მათ იესო მაშინღა იცნეს, როცა მასთან ერთად სუფრას მიუსხდნენ. იესოს გაუჩინარების შემდეგ ეს ორი მოწაფე იმავე საღამოს იერუსალიმში დაბრუნდა (ლკ. 24:13–33). ლუკა ამბობს, რომ სოფელი ემაუსი იერუსალიმიდან 60 სტადიონით (11 კმ.) იყო დაშორებული.

დღეს დაზუსტებით იმის თქმა, თუ სად მდებარეობდა ემაუსი, რთულია. მკვლევრები სულ მცირე ექვს სავარაუდო ქალაქს ასახელებენ. ამ ქალაქებს შორის ყველაზე ცნობილია იმვასი, რომელიც თელ-ავივ-იაფოსკენ მიმავალ გზაზე მდებარეობს. თუმცა იმვასი თელ-ავივ-იაფოდან დას.-ჩრდ.-დას.-ით. დაახლოებით 175 სტადიონით (32 კმ) არის დაშორებული, რაც თითქმის სამჯერ აღემატება ლუკას მიერ მოხსენიებულ მანძილს. მეორე სავარაუდო ქალაქია კალუნია (მევასერეთ-ციონი), რომელიც მდებარეობს თელ-ავივ-იაფოსკენ მიმავალ მთავარ გზაზე. ზოგის მოსაზრებით, კალუნია შეესაბამება იოსებ ფლავიუსის მიერ მოხსენიებულ ამაუსს, რომელიც იერუსალიმიდან დაახლოებით 35 სტადიონით (6,5 კმ) არის დაშორებული, რაც ლუკას მიერ მოხსენიებულ მანძილზე გაცილებით მცირეა. სხვები სოფელ ემაუსს აიგივებენ დღევანდელ ელ-კუბეიბასთან, რომელიც მდებარეობს რომაულ გზაზე, მაშინ როცა სხვა სავარაუდო ქალაქები მდებარეობს მის სამხრეთით მიმავალი გზის გაყოლებაზე. ამ ადგილებში აღმოჩენილი ნივთები სწორედ იმ პერიოდით თარიღდება, როდესაც ბერძნული წერილები დაიწერა. ელ-კუბეიბა იერუსალიმიდან ჩრდ.-დას.-ით დაახლოებით 60 სტადიონით (11 კმ.) არის დაშორებული, რის გამოც შეიძლება ვივარაუდოთ, რომ ამ ტერიტორიაზე მდებარეობდა ბიბლიაში მოხსენიებული სოფელი ემაუსი. თუმცა დღესდღეობით ამის გადაჭრით თქმა შეუძლებელია.