გედერი

[ქვის კედელი]

ქალაქი ქანაანში; მისი მეფე ერთ-ერთი იყო იესო ნავეს ძის მიერ დამარცხებულ 31 მეფეთაგან (იეს. 12:13). იესო ნავეს ძის 12:7, 8- დან ჩანს, რომ გედერი იორდანის დას. მხარეს მდებარეობდა. ამასთანავე, აღსანიშნავია, რომ გედერი დებირის შემდეგ მოიხსენიება, რაც იმის ვარაუდის საფუძველს იძლევა, რომ ის შეფელაში მდებარეობდა. შესაძლოა გედერი 1 მატიანის 2:51-ში მოხსენიებული ბეთ-გადერი იყოს, თუმცა მისი ზუსტი ადგილმდებარეობა უცნობია. დავითის მეფობის დროს მის ზეთისხილის კორომებსა და სიკომოროს ხეებზე (შეფელაში) ერთი გედერელი კაცი, ბაალ-ხანანი, ზრუნავდა. მიიჩნევენ, რომ ის წარმოშობით გედერიდან ან გედერადან იყო (1მტ. 27:28).