ხობაბი

[შესაძლოა ნიშნავს საყვარელს]

მოსეს ცოლისძმა; მიდიანელი რეუელის (ითრო) ვაჟი კენიელთა ტომიდან (რც. 10:29; გმ. 3:1; მსჯ. 1:16); როცა ისრაელი სინას მთიდან აღთქმული მიწისკენ უნდა დაძრულიყო, მოსემ სთხოვა ხობაბს, მათთან ერთად წასულიყო და მათთვის „თვალი“ ანუ მეგზური ყოფილიყო, რადგან კარგად იცოდა ის ტერიტორია. ხობაბმა თავიდან უარი თქვა. მაგრამ, როგორც ჩანს, შემდეგ მაინც გაჰყვა ისრაელებს, რაც იქიდან ჩანს, რომ მისი შთამომავლები, კენიელები იუდას უდაბნოში, არადის სამხრეთით სახლობდნენ. ბიბლიიდან ვიგებთ, რომ საულისა და დავითის დროს ისინი ჯერ კიდევ იქ ცხოვრობდნენ (რც. 10:29—32; მსჯ. 1:16; 1სმ. 15:6; 27:10; 30:26, 29).

მსაჯულების 4:11-ის მასორეტულ ტექსტში ნათქვამია, რომ ხობაბი მოსეს სიმამრი იყო (აქ, ბსგ, Yg, Ro, Da, JP, Mo, AT). შესაძლოა, სახელი „ხობაბი“ მოსეს სიმამრსაც ერქვა და ცოლისძმასაც. ეს რომ გამორიცხული არ არის, იქიდან ჩანს, რომ მოსეს სიმამრს ერთზე მეტი სახელი ჰქონდა (შდრ. გმ. 2:16—22; 3:1).

მეორე მხრივ, თუ ხობაბი მხოლოდ რეუელის ვაჟს ანუ მოსეს ცოლისძმას ერქვა, მაშინ ხობაბის მოსეს სიმამრად მოხსენიება იმას ნიშნავს, რომ მას მამამისის, რეუელის წარმომადგენლად მიიჩნევდნენ, რომელიც იმ დროისთვის უკვე ცოცხალი აღარ იყო (იხ. ითრო; კენიელი).