ითამარი

[შესაძლოა ნიშნავს: მამა (ან ძმა) პალმისა]

აარონის ვაჟების ჩამონათვალში მეოთხე (გმ. 6:23; რც. 26:60; 1მტ. 6:3); კარვის მოწყობილობის აღრიცხვის მეთვალყურეობის შემდეგ ითამარი მამასა და ძმებთან ერთად გამოსვლის 29-ე თავში აღწერილი ცერემონიალის მიხედვით დაინიშნა მღვდლად (გმ. 28:1; 38:21; 40:12—15). როცა მისი უფროსი ძმები, ნადაბი და აბიჰუ, მოგვიანებით „უკანონო ცეცხლის“ შეწირვის გამო დაიხოცნენ, ითამარსა და მის ძმას, ელეაზარს ეთქვა, რომ არ ეგლოვათ ისინი. ამის შემდეგ მღვდელმსახურების შესასრულებლად ითამარსა და ელეაზარს ღვთისგან უფრო მეტი მოვალეობა დაეკისრათ (ლვ. 10:1—20). ითამარი დაინიშნა გერშონელებისა და მერარელების ზედამხედველად, რომლებიც კარავში სხვადასხვა დავალებას ასრულებდნენ (რც. 3:2—4; 4:28, 33; 7:8).

ითამარის შთამომავლები მღვდლები იყვნენ. საულის, დავითისა და სოლომონის მმართველობის დროს მისი შთამომავლის, ელის საგვარეულოდან ზოგი დროებით მსახურობდა მღვდელმთავრად. როცა დავითმა ორგანიზება გაუწია ტაძარში მსახურებას, მღვდლების 24 დანაყოფიდან 8 ითამარის საგვარეულოდან იყო (1მტ. 24:1—6; 1სმ. 14:3; 22:9; იხ. მღვდელმთავარი). ბაბილონის გადასახლებიდან დაბრუნებულ ისრაელის საგვარეულოთა შორის ითამარის ვაჟებიც იყვნენ (ეზრ. 8:2).