იედუთუნი

[შესაძლოა ნაწარმოებია ფუძიდან, რომელიც ნიშნავს ხოტბის შესხმას].

1. ლევიანი მუსიკოსი; იედუთუნს სავარაუდოდ ადრე ეთანს ეძახდნენ, რადგან იერუსალიმში კიდობნის მიტანამდე ეთანის სახელი სხვა ლევიანი მუსიკოსების, ჰემანისა და ასაფის გვერდით მოიხსენიება, მოგვიანებით კი ამავე სახელების გვერდით იედუთუნის სახელი გვხვდება (1მტ. 15:17, 19; 25:1). იედუთუნის წინაპრის ვინაობა უცნობია, ეთანისა კი — ცნობილი (1მტ. 6:44—47). ეთანის შთამომავლობაზე არაფერი წერია, მაშინ როცა იედუთუნის შთამომავლობა ნახსენებია (1მტ. 9:16). ეთანის [ნიშნავს გამძლეს; უწყვეტს] შეცვლა იედუთუნად [შესაძლოა ნაწარმოებია ფუძიდან, რომელიც ნიშნავს ხოტბის შესხმას] უდავოდ ამ კაცისთვის მინდობილ საქმეს უკავშირდება (1მტ. 16:41; იხ. ეთანი (I) №3).

იედუთუნმა და მისმა ოჯახის წევრებმა, რომლებიც ასევე მუსიკოსები იყვნენ, რამდენიმე ზეიმში მიიღეს მონაწილეობა, რომლის დროსაც იეჰოვას წინაშე სამადლობელი სადიდებელი აღავლინეს (1მტ. 25:3). ერთ-ერთი ასეთი ზეიმი შეთანხმების კიდობნის იერუსალიმში გადატანის დროს გაიმართა (1მტ. 16:1, 41, 42). იმ ოცდაოთხი დანაყოფიდან, რომლებიც დავითმა საწმინდარში მუსიკოსებად განაწესა, მე-2, მე-4, მე-8, მე-10, მე-12 და მე-14 წილი იედუთუნის ექვს ვაჟს ერგო. ყველა მათგანს მათი მამა ხელმძღვანელობდა (1მტ. 25:1, 3, 6, 7, 9, 11, 15, 17, 19, 21). მუსიკოსებს ხელმძღვანელობდნენ იედუთუნი, ასაფი და ჰემანი, რაც იმას მოწმობს, რომ ტაძრის მუსიკოსებად ლევიანთა სამივე ძირითადი შტოს (მერარელები, გერშონელები და კეჰათელები) წარმომადგენლები მსახურობდნენ (1მტ. 6:31—47). სოლომონის ტაძრის მიძღვნის დროს სამივე ჯგუფის წარმომადგენლები მუსიკის თანხლებით ხოტბას ასხამდნენ იეჰოვას (2მტ. 5:12, 13). იედუთუნის შთამომავლები ხიზკიას მეფობის პერიოდში და ბაბილონიდან სამშობლოში დაბრუნებულთა შორის იხსენიებიან (2მტ. 29:1, 12, 14, 15; ნემ. 11:17).

სახელი იედუთუნი სამი ფსალმუნის ეპიგრაფში გვხვდება (ფს. 39; 62; 77). სამივე ფსალმუნის ავტორებად სხვები გვევლინებიან და არა იედუთუნი. პირველი ორი ფსალმუნი დავითის შეთხზულია, მესამე — ასაფის. თუმცა სხვა ადგილას იედუთუნს „მეფის წინასწარმხილველი“ ეწოდება და ისიც არის ნათქვამი, რომ იგი ქნარის თანხლებით წინასწარმეტყველებდა (2მტ. 35:15; 1მტ. 25:1, 3). აქედან გამომდინარე, ზემოხსენებული ფსალმუნების ეპიგრაფებში, როგორც ჩანს, საშემსრულებლო მითითებები იგულისხმება, მაგალითად, შესრულების სტილი ან შესაძლოა თავად მუსიკალური საკრავი, რომელიც როგორღაც იედუთუნის სახელს უკავშირდება, ან სულაც იედუთუნის ან მისი ვაჟების მიერ იყო გამოგონილი, დახვეწილი და დამკვიდრებული.

2. ლევიანი, რომლის ვაჟი ან შთამომავალი, ობედ-ედომი კარიბჭის მცველად მსახურობდა იმ დროს, როცა დავითმა კიდობანი იერუსალიმში გადაიტანა (1მტ. 16:1, 37, 38).