იოკტანი

ებერის ვაჟი, ფელეგის ძმა და 13 ვაჟის მამა (დბ. 10:25—29; 1მტ. 1:19—23). როგორც ჩანს, იოკტანის შთამომავლების ზოგი სახელი დღემდე ეწოდება ბევრ ადგილს არაბეთის სამხრეთ და სამხრ.-დასავლეთ ნაწილში. როგორც ამბობენ, იოკტანი არაბეთის მკვიდრი ხალხის წინაპარია; მათთან ერთად არაბეთში დამკვიდრდნენ აბრაამის აგართან და კეტურასთან შეძენილი ვაჟებისგან წამოსული ტომები. ბიბლიიდან ვიგებთ, რომ იოკტანის შთამომავალთა საცხოვრებელი „მეშადან სეფარამდე“ იყო გადაჭიმული (დბ. 10:30), თუმცა უცნობია, ზუსტად რამხელა ტერიტორია ეკავათ.