მაჰერ-შალალ-ხაშ-ბაზი

[იჩქარე, ნადავლო! ის გასაძარცვად მივარდა; ან ის გასაძარცვად გაექანა ნადავლისკენ]

სახელი, რომელიც იეჰოვას მითითებით დაარქვეს ესაიას მეორე ვაჟს.

იეჰოვამ უბრძანა ესაიას, ეს წინასწარმეტყველური სიტყვები დიდ ფილაზე დაეწერა და ორი ერთგული მოწმის მიერ დაემოწმებინა. შემდეგ უთხრა წინასწარმეტყველს, რომ ეს სახელი დაერქმია თავისი ახალშობილი ვაჟისთვის და განაცხადა, რომ სანამ ბავშვი იტყოდა „დედას“ და „მამას“, ასურეთის მეფე დაამარცხებდა იუდას მტრებს — დამასკოსა და სამარიას (ეს. 8:1—4). წინასწარმეტყველება, რომელიც ესაიას მეორე ვაჟის სახელის მნიშვნელობა იყო, დანიშნულ დროს შესრულდა. ფეკახის მმართველობის დროს ასურეთის მეფე ტიგლათფილესერ III შეიჭრა ისრაელში, დაიპყრო ბევრი ქალაქი, გაძარცვა ქვეყანა და მისი მოსახლეობიდან ბევრი ტყვედ წაიყვანა. ამის შემდეგ მალევე ფეკახი მოკლეს (2მფ. 15:29, 30). ასურეთის მეფემ აგრეთვე დაიპყრო სირიის დედაქალაქი დამასკო, გადაასახლა მისი მოსახლეობა და მოკლა სირიის მეფე რეცინი (2მფ. 16:9). ასე დაასრულა თავისი არსებობა იუდას წინააღმდეგ შეთქმულმა ორმა მეფემ. მოგვიანებით, ძვ. წ. 740 წელს ასურეთმა დაიპყრო სამარია და გადაასახლა განდგომილი ისრაელები როგორც ამ ქალაქიდან, ისე ისრაელის ჩრდილოეთი სამეფოს დანარჩენი ტერიტორიებიდან (2მფ. 17:1—6). ამგვარად, ბიჭი, რომელიც ესაიას შეეძინა თავისი ცოლისგან (რომელსაც ის „წინასწარმეტყველ ქალს“ უწოდებდა), ისრაელში ნამდვილ და საიმედო ნიშნად და სასწაულად იქცა იეჰოვასგან (ეს. 8:3, 18).