ობედ-ედომი

1. გათელი კაცი, ვის სახლშიც სამ თვეს ესვენა შეთანხმების კიდობანი. მანამდე კიდობანი ამოყირავებას გადაურჩა და უზა სიცოცხლეს გამოესალმა. ვიდრე კიდობანი ობედ-ედომის სახლში იყო, იეჰოვა მას და მის სახლეულობას კურთხევას არ აკლებდა. აქედან გამომდინარე, დავითმა ჩათვალა, რომ იეჰოვამ მოიწონა წმინდა სკივრის იერუსალიმში გადატანა (2სმ. 6:10—12; 1მტ. 13:13, 14; 15:25).

ობედ-ედომი „გათელი“ იყო. გათელებს, როგორც წესი გათის ფილისტიმელებს უწოდებდნენ. მაგრამ „გათელი“ შეიძლება გათ-რიმონელიც ყოფილიყო. გათ-რიმონი კეჰათელი ლევიანებისთვის გამოყოფილი ქალაქი იყო დანში (იეს. 21:20, 23, 24). ვინაიდან ობედ-ედომს კიდობანი ჰქონდა მინდობილი, ის ლევიანი უნდა ყოფილიყო, შესაბამისად, გათ-რიმონის ქალაქიდან, და არა ფილისტიმის ქალაქ გათიდან.

ობედ-ედომის სახელი რამდენჯერმე მოიხსენიება ლევიან მუსიკოსთა და დავითის დროს მცხოვრებ კარიბჭის მცველთა შორის. ამ სახელით სულ ცოტა ორი კაცია ცნობილი (1მტ. 15:21, 24; 16:38), თუმცა შეუძლებელია იმის დადგენა სხვა მუხლებში რომელიმე მათგანზეა საუბარი, თუ ამავე სახელით წოდებულ მათ თანამედროვეებზე. აქედან გამომდინარე, გათელი ობედ-ედომი შეიძლება იყოს №2 ან №3.

2. მუსიკოსი და კარიბჭის მცველი; იერუსალიმში კიდობნის გადატანის მონაწილე (1მტ. 15:18, 21). სავარაუდოდ, ეს ის მუსიკოსი იყო, რომელმაც განაგრძო იერუსალიმში კიდობნის კარვის წინ მსახურება (1მტ. 16:4, 5, 37, 38ა). შესაძლოა იგივე ობედ-ედომი №1.

3. კარიბჭის მცველი, რომელიც აგრეთვე მონაწილეობდა იერუსალიმში კიდობნის გადატანაში (1მტ. 15:24). არ არის გამორიცხული, რომ ის იედუთუნის ვაჟიც ყოფილიყო (1მტ. 16:38ბ). შესაძლოა იგივე ობედ-ედომი №1 ან №4.

4. ერთ-ერთი კორახელი კარიბჭის მცველთა მუდმივ დანაყოფში, რომელიც 62 ნათესავთან ერთად იერუსალიმის საწმინდრის სამხრეთ მხარეს იცავდა (1მტ. 26:1, 4—8, 13, 15; იხ. №3).

5. მეფე ამაციას დროს იეჰოვას სახლის ოქრო-ვერცხლისა თუ სხვა ძვირფასეულობის გამგე. როცა ისრაელის მეფე იეჰოაშმა იერუსალიმი დაიპყრო (დაახლ. ძვ. წ. 858—844), მთელი ძვირფასეულობა სამარიაში წაიღო და შესაძლოა ობედ-ედომიც თან გაიყოლა (2მტ. 25:23, 24).