სწორი რელიგიის შემეცნებას მოჰყვება პასუხისმგებლობა

„ნეტარ არიან ისინი, ვინც მოისმენს და დაიცავს ღმერთის სიტყვას“ (ლუკა 11:28).

1. როგორც კი იპოვიან სწორ რელიგიას, როგორი ადამიანები აგებენ მასზე თავიანთ ცხოვრებას?

სწორი რელიგიის მხოლოდ დადგენა საკმარისი არ არის. თუ გვიყვარს ის, რაც სწორი და ჭეშმარიტია, როგორც კი ვიპოვით, მასზე ავაგებთ ჩვენს ცხოვრებას. ჭეშმარიტი რელიგია არ არის უბრალოდ გონებრივი ფილოსოფია; ის ცხოვრების წესია (ფსალმუნი 118:105; ესაია 2:3; შეადარე საქმე 9:2).

2, 3. ა) როგორ განსაკუთრებულ მნიშვნელობას ანიჭებდა იესო ღმერთის ნების შესრულებას? ბ) რა პასუხისმგებლობა აკისრია ყოველს, ვინც იცნობს სწორ რელიგიას?

² იესო ქრისტე განსაკუთრებულ მნიშვნელობას ანიჭებდა იმის შესრულებას, რასაც ღმერთი თავის ნებად აცხადებდა. ქადაგების დასასრულს, რომელიც მთაზე ქადაგებად არის ცნობილი, იესომ ამცნო, რომ ვინც მას მიმართავდა, როგორც უფალს, ყველა არ მიაღწევდა სამეფოს (ვინც ქრისტიანად ყოფნაზე უფლებას გამოაცხადებდა); არამედ მხოლოდ ისინი, ვინც მისი მამის ნებას შეასრულებდა. სხვებზე კი თქვა, რომ ‘უსჯულოების მოქმედთა’ მსგავსად იქნებოდნენ უარყოფილნი. რატომ უსჯულოების? იმიტომ, რომ, როგორც ბიბლია გვაცნობებს, ღმერთის ნების შესრულების მხედველობიდან გამოტოვება არის ცოდვა, ყოველი ცოდვა კი უსჯულოებაა (მათე 7:21-23; 1 იოანე 3:4; შეადარე რომაელთა 10:2, 3). ადამიანი შეიძლება იცნობდეს სწორ რელიგიას, აქებდეს მათ, ვინც ასწავლის ამ რელიგიას და შესაძლოა დადებითად ლაპარაკობდეს მათ შესახებ, ვინც მის თანახმად ცხოვრობს, მაგრამ ადამიანი, ასევე, პასუხისმგებელია საკუთარ ცხოვრებაში გამოიყენოს ის (იაკობი 4:17). თუ მიიღებს ამ პასუხისმგებლობას, მიხვდება, რომ ცხოვრება შეივსება და იგრძნობს სიხარულს, რომელსაც სხვა საშუალებით ვერ მოიპოვებს.

³ წინა სტატიაში ჩვენ განვიხილეთ ჭეშმარიტი რელიგიის გამოსაცნობი ექვსი ნიშან-თვისება. ყოველი მათგანი არა მხოლოდ გვეხმარება, დავადგინოთ სწორი რელიგია, არამედ, ასევე, თითოეულ ჩვენგანს წარმოგვიდგენს მოთხოვნებსა და შესაძლებლობებს. როგორ?

როგორ ეხმაურები ღმერთის სიტყვას?

4. ა) იეჰოვას მოწმეებთან ურთიერთობის დაწყებისას, მათ მიერ ბიბლიის გამოყენებასთან დაკავშირებით რას ამჩნევენ მოკლე დროში ადამიანები? ბ) როგორ მოქმედებს იეჰოვას მსახურებზე კარგი სულიერი კვება?

⁴ რადგან იეჰოვას მოწმეები ახალ დაინტერესებულ პირებთან ერთად ბიბლიას სწავლობენ, ამ უკანასკნელთაგან მრავალს შეეძლო გაერკვია, რომ რასაც ასწავლიან, დაფუძნებულია ბიბლიაზე. კითხვებზე პასუხის გაცემისას მოწმეებს არ გადააქვთ მათი ყურადღება ეკლესიურ მრწამსზე, ადამიანთა ტრადიციებზე ან გამოჩენილი ადამიანების შეხედულებებზე. ავტორიტეტი — თვით ღმერთის სიტყვაა. როცა მიდიან „სამეფო დარბაზში“, ისინი ხედავენ, რომ ბიბლია იქაც ძირითადი სახელმძღვანელოა. ჭეშმარიტების გულწრფელ მაძიებლებს არ სჭირდებათ ბევრი დრო, იმის მისახვედრად, რომ სიხარულის ძირითადი ფაქტორი, რომელსაც იეჰოვას მოწმეთა შორის ხედავენ, ღმერთის სიტყვიდან სულიერად კარგი კვების მტკიცებაა (ესაია 65:13, 14).

5. ა) რა მოთხოვნაა წარდგენილი მათთვის, ვინც აკვირდება იეჰოვას მოწმეებს? ბ) როგორ შეუძლიათ ასეთ ადამიანებს იყვნენ იეჰოვას მოწმეთა სიხარულის თანაზიარნი?

⁵ თუ შეიცანი ეს, როგორ ეხმაურები ამ ცნობას? თუ შეიგნე ამის მნიშვნელობა, მართლაც ვერ შეძლებ იყო მხოლოდ უმოქმედო დამკვირვებელი და არც ისურვებდი, ასეთი ყოფილიყავი. ბიბლია გვიჩვენებს, რომ „მხოლოდ მომსმენნი“ და არა „სიტყვის შემსრულებელნი“ ‘იტყუებენ თავს’ (იაკობი 1:22). ისინი თავს იტყუებენ, რადგან არა აქვთ შეგნებული შემდეგი: მიუხედავად იმისა, რასაც, შესაძლოა, ამბობენ, ღმერთის მიმართ მორჩილების მხედველობიდან გამოტოვება ცხადყოფს, რომ სინამდვილეში არ უყვართ ის. რწმენის გამოხატვა, რომელსაც საქმეები მხარს არ უჭერენ, მკვდარი რწმენაა (იაკობი 2:18–26; 1 იოანე 5:3). ამისგან განსხვავებით, იეჰოვას მიმართ სიყვარულით აღძრული პიროვნება არის „საქმის მქმნელი. კურთხეული [ბედნიერი, აქ] იქნება იგი თავის მოქმედებაში“. დიახ, იმის თანახმად, რაც ახსნა იესომ: „ნეტარ არიან [ბედნიერნი არიან, აქ] ისინი, ვინც მოისმენს და დაიცავს ღმერთის სიტყვას“ (იაკობი 1:25; ლუკა 11:28; იოანე 13:17).

6. რა შესაძლებლობების გამოყენებას შევეცდებით პირადად ჩვენ, თუ ნამდვილად ვაფასებთ ღმერთის სიტყვას?

⁶ ეს სიხარული გაღრმავდება ღმერთის ნების შემეცნებაში ზრდისა და შესწავლილი დამატებითი საკითხების გამოყენების მიხედვით. როგორ ძალისხმევას მოახმარ ღმერთის სიტყვის შესწავლას? ათიათასობით წერა-კითხვის უცოდინარი ადამიანი გულმოდგინედ მუშაობდა, რომ ესწავლა კითხვა და ამას, განსაკუთრებით იმისთვის აკეთებდა, რომ შესძლებოდა საღვთო წერილის წაკითხვა და სხვა ადამიანებისთვის მისი სწავლება. სხვები კი ყოველ დილით ადრე დგებიან, რომ ყოველ დღე წაიკითხონ ბიბლია და ბიბლიის შესწავლისთვის განკუთვნილი დამხმარე პუბლიკაციები, როგორიცაა, მაგალითად, „საგუშაგო კოშკი“. როდესაც პირადად თანმიმდევრულად კითხულობ ბიბლიას ან სხვა სასწავლო მასალაში მოყვანილ მუხლებს გადაათვალიერებ, განსაკუთრებული ყურადღება მიაქციე იეჰოვას კანონებსა და მცნებებს და შეეცადე აღმოაჩინო მრავალი პრინციპი, რომელიც ჩვენს სახელმძღვანელოდ არის მოცემული. დაფიქრდი იმაზე, რასაც გიჩვენებს ბიბლიის ყოველი მონაკვეთი ღმერთის, მისი განზრახვისა და კაცობრიობასთან ურთიერთობის შესახებ. გამოყავი ამისთვის დრო შენი გულის გარდასაქმნელად. დაფიქრდი, არის თუ არა საშუალებები, რომლებითაც უფრო სრულად გამოიყენებდი ბიბლიის რჩევას საკუთარ ცხოვრებაში (ფსალმუნი 1:1, 2; 18:8–12; 1 თესალონიკელთა 4:1).

სრულია კი იეჰოვასადმი შენი ერთგულება?

7. ა) როგორი გავლენა მოახდინა მოძღვრებამ სამების შესახებ ადამიანთა მცდელობებზე, ეთაყვანონ ღმერთს? ბ) რა შეიძლება მოხდეს, როცა პიროვნება იეჰოვას შესახებ ჭეშმარიტებას სწავლობს?

⁷ მილიონობით ადამიანმა იგრძნო შვება, როცა გაიგო, რომ ჭეშმარიტი ღმერთი არ არის სამება. მათ არასდროს აკმაყოფილებდა განმარტება, რომ „ეს საიდუმლოა“. როგორ შესძლებდნენ დაახლოებოდნენ ღმერთს, რომელიც მათთვის გაუგებარი იყო? ამ სწავლებიდან გამომდინარე, ისინი უგულებელყოფდნენ მამას (რომლის სახელი ეკლესიაში არასდროს გაეგოთ) და ეთაყვანებოდნენ იესოს, როგორც ღმერთს ან თაყვანს სცემდნენ მარიამს (რომელიც, როგორც ასწავლეს, „ღვთისმშობელი“ იყო). მაგრამ, მათი გულები აივსო სიამოვნებით, როცა იეჰოვას ერთ-ერთმა მოწმემ გადაშალა ბიბლია და უჩვენა ღმერთის პირადი სახელი, იეჰოვა (ფსალმუნი 82:19, აქ). ერთი ვენესუელი ქალი იმდენად იყო აღფრთოვანებული ღვთიური სახელის ნახვით, რომ, სრული ამ სიტყვის მნიშვნელობით, ჩაიხუტა ახალგაზრდა ქალი, მოწმე, რომელმაც გაუზიარა ეს ძვირფასი ჭეშმარიტება, შემდეგ კი დათანხმდა ბიბლიის საშინაო შესწავლაზე. როცა ასეთი ადამიანები იგებენ, რომ იესო ამბობდა თავის მამაზე, როგორც ‘ჩემს ღმერთზე და თქვენს ღმერთზე’ და რომ იესო თავის მამას მიმართავდა, როგორც „ერთადერთ ჭეშმარიტ ღმერთს“, მათ ესმით: რასაც ბიბლია ღმერთის შესახებ ასწავლის გაუგებარი არ არის (იოანე 17:3; 20:17). რაც უფრო ეცნობიან იეჰოვას თვისებებს, ისინი გრძნობენ მისკენ სწრაფვას, იწყებენ ლოცვას და სურთ ასიამოვნონ მას. რა მოჰყვება ამას შედეგად?

8. ა) რა გააკეთა მილიონობით ადამიანმა იეჰოვასადმი სიყვარულისა და დიდი სურვილიდან გამომდინარე, რომ ასიამოვნოს მას? ბ) რატომ არის ქრისტიანული ნათლობა არსებითად მნიშვნელოვანი?

⁸ ბოლო ათი წლის განმავლობაში ექვსი კონტინენტისა და მრავალი კუნძულის მცხოვრებთაგან, 2 528 524 ადამიანმა მიუძღვნა იეჰოვას თავისი ცხოვრება და ეს მიძღვნა წყალში მონათვლით აღნიშნა. ხარ თუ არა შენ ერთ-ერთი მათგანი, ან ემზადები კი ახლა მოსანათლად? ყოველი ჭეშმარიტი ქრისტიანის ცხოვრებაში ნათლობა მნიშვნელოვანი ეტაპია. იესომ დაავალა თავის მიმდევრებს მოემოწაფათ ადამიანები ყველა ხალხებიდან და მოენათლათ ისინი (მათე 28:19, 20). აგრეთვე, საყურადღებოა, რომ იესოს ნათლობის შემდეგ, დაუყოვნებლივ, თვით იეჰოვამ ზეციდან თქვა: „შენ ხარ ჩემი საყვარელი ძე, შენშია ჩემი სათნოება“ (ლუკა 3:21, 22).

9. რა მოითხოვება ჩვენი მხრიდან, რომ იეჰოვასთან კარგი ურთიერთობა შევინარჩუნოთ?

⁹ იეჰოვასთან კარგი ურთიერთობა მეტად დასაფასებელი რამ არის. თუ მისადმი მიძღვნითა და ნათლობით დაამყარე ასეთი ურთიერთობა, მოერიდე ყოველივეს, რაც ამას ზიანს მოუტანდა. ნება არ დართო ცხოვრების მღელვარებასა და მატერიალურ საკითხებზე საზრუნავს, ეს ურთიერთობა მეორე ადგილზე გადაიტანოს (1 ტიმოთე 6:8–12). ნამდვილად, იცხოვრე იგავნის 3:6-ში მოცემულ რჩევასთან შეთანხმებულად: „შეეცადე [იეჰოვას] შეცნობას ყოველ შენს გზაზე და ის გაგისწორებს სავალს“.

რამდენად ღრმა შთაბეჭდილებას ახდენს შენზე ქრისტეს სიყვარული?

10. რატომ არ არის იეჰოვასადმი თაყვანისცემა იესოს უგულებელყოფის მიზეზი?

¹⁰ რასაკვირველია, იეჰოვასადმი, როგორც ერთადერთი ჭეშმარიტი ღმერთისადმი გამოვლენილი სათანადო მადლიერება არ აძლევს პიროვნებას იესო ქრისტეს უგულებელყოფის საფუძველს. ამის საპირისპიროდ, გამოცხადების 19:10-ში ნათქვამია: „იესოს მოწმობა წინასწარმეტყველობის სულია“. ინსპირირებული წინასწარმეტყველებები, „დაბადებიდან“ „გამოცხადებამდე“, გვაწვდიან იეჰოვას განზრახვაში იესო ქრისტეს ფუნქციასთან დაკავშირებულ წვრილმანებს. იმის მიხედვით, რაც უფრო ეცნობა ამ წვრილმანებს, პიროვნებას წარმოუდგება მომხიბლავი სურათი, რომელიც თავისუფალია ქრისტიანული სამყაროს ცრუ მოძღვრებებიდან გამომდინარე დამახინჯებული და გაუგებარი წარმოდგენებისგან.

11. როგორი გავლენა მოახდინა პოლონეთში მცხოვრებ ქალზე იმის შესწავლამ, რასაც ბიბლია ნამდვილად ასწავლის ღმერთის ძის შესახებ?

¹¹ ღმერთის ძის შესახებ ჭეშმარიტების შეთვისებას ღრმა შთაბეჭდილების მოხდენა შეუძლია ადამიანზე. ზუსტად ეს დაემართა პოლონეთში მცხოვრებ ქალს, დანიუტას. რვა წლის განმავლობაში იეჰოვას მოწმეებთან ურთიერთობისას, მას სიამოვნებდა ის, რასაც ასწავლიდნენ, მაგრამ ჭეშმარიტ თაყვანისცემას ცხოვრებაში არ ამკვიდრებდა. შემდეგ მან მიიღო წიგნის ეგზემპლარი სათაურით „ოდესმე მცხოვრებთაგან ყველაზე დიდებული ადამიანი“, რომელიც იესოს ცხოვრებას ადვილად გასაგები ენით გადმოსცემსa. გვიან საღამოს, მან გადაშალა წიგნი, იმ განზრახვით, რომ მხოლოდ ერთი თავი წაეკითხა. მაგრამ გათენებისას, გადადო წიგნი, როცა მისი წაკითხვა დაასრულა. თვალები ცრემლებით აევსო. „იეჰოვა, მომიტევე“ — შეევედრა მან. წაკითხულიდან გამომდინარე, მან, ვიდრე ოდესმე უწინ, უფრო თვალნათლივ დაინახა იეჰოვასა და მისი ძის მიერ გამოვლენილი სიყვარული. ის მიხვდა, რომ რვა წლის განმავლობაში ის უმადურად ზურგს აქცევდა იმ დახმარებას, რომელსაც მოთმინებით უწევდა ღმერთი. იესო ქრისტეს მიმართ რწმენის საფუძველზე, იეჰოვასადმი თავის მიძღვნის სიმბოლოდ, 1993 წელს ის მოინათლა.

12. როგორ მოქმედებს ჩვენს ცხოვრებაზე ზუსტი შემეცნება იესო ქრისტეს შესახებ?

¹² ‘ჩვენი უფლის იესო ქრისტეს [ზუსტ] შემეცნებასთან’ დაკავშირებულია ქრისტიანის საქმიანობა და შედეგიანობა (2 პეტრე 1:8). რა ზომით მიიღებ მონაწილეობას ასეთ საქმიანობაში სხვებთან სამეფოს შესახებ ცნობის გაზიარების დროს? ყოველი ადამიანის შესაძლებლობები მრავალ გარემოებაზეა დამოკიდებული (მათე 13:18–23). ზოგიერთი გარემოება არ შეგვიძლია შევცვალოთ; სხვა — შეგვიძლია. რა აღგვძრავს, დავადგინოთ და შევცვალოთ, რაც შესაძლებელია? მოციქულმა პავლემ დაწერა: „ქრისტეს სიყვარულით ვართ მოცულნი“; სხვა სიტყვებით რომ ვთქვათ, სიყვარული, რომელიც იესომ ჩვენს სასარგებლოდ თავისი სიცოცხლის დადებით გამოავლინა, იმდენად ღირსშესანიშნავია, რომ იმის მიხედვით, რაც უფრო გაიზრდება ამის მიმართ ჩვენი მადლიერება, მით უფრო დიდ გავლენას მოახდენს ჩვენს გულებზე. ამის შედეგად, ჩვენ გვესმის, რომ მეტად შეუფერებელი იქნებოდა, გამოვკიდებოდით ეგოისტურ მიზნებს და, უმთავრესად, საკუთარი თავის დასაკმაყოფილებლად გვეცხოვრა. ნაცვლად ამისა, ჩვენ ისე ვაწესრიგებთ საქმეებს, რომ პირველ ადგილზე იყოს მსახურება, რომლის შესრულებასაც თავის მოწაფეებს ქრისტე ასწავლიდა (2 კორინთელთა 5:14, 15).

ქვეყნიერებისგან განცალკევება — რა ზომით?

13. რატომ არ უნდა გვსურდეს მივიღოთ მონაწილეობა რელიგიებში, რომლებიც თავს ქვეყნიერების ნაწილად ხდიან?

¹³ არ არის რთული, წარმოიდგინო რეპუტაცია, რომელიც ქრისტიანულმა სამყარომ და სხვა რელიგიებმა საკუთარ თავს შეუქმნეს, რადგან სურთ ქვეყნიერების ნაწილად ყოფნა. ეკლესიების ფულადი სახსრები რევოლუციური მოღვაწეობის დაფინანსებას ხმარდებოდა. მღვდლები პარტიზანული მებრძოლები ხდებოდნენ. დღითი-დღე გაზეთების სტატიები გვატყობინებს რელიგიური ფრაქციების შესახებ, რომლებიც დედამიწის სხვადასხვა ნაწილებში ერთმანეთს ებრძვიან. მათი ხელები სავსეა სისხლით (ესაია 1:15). და ყველგან მსოფლიოში სამღვდელოება აგრძელებს მცდელობას, მოხერხებულად მართოს პოლიტიკური მოვლენები. ჭეშმარიტი თაყვანისმცემლები ამაში არ მონაწილეობენ (იაკობი 4:1–4).

14. ა) რას უნდა მოვერიდოთ პირადად, თუ ვირჩევთ ქვეყნიერებისგან განცალკევებით ყოფნას? ბ) რას შეუძლია დაგვეხმაროს, მოვერიდოთ ქვეყნიური პოზიციებისა და ჩვეულებების მახეებში გაბმას?

¹⁴ მაგრამ ქვეყნიერებისგან გამოყოფა ამაზე მეტს ნიშნავს. ქვეყნიერებას ახასიათებს სიყვარული ფულისა და იმის მიმართ, რაც შეიძლება იყიდო ფულით, სწრაფვა პირადი გამოჩენისა და სიამოვნებისკენ, ამასთანავე ისეთი საკითხები, როგორიცაა სხვებისადმი ჭეშმარიტი მზრუნველობის ნაკლებობა, ცრუ და უწმაწური მეტყველება, ხელისუფლებათა წინააღმდეგ აჯანყება და თავდაჭერილობის უქონლობა (2 ტიმოთე 3:2–5; 1 იოანე 2:15, 16). ჩვენი არასრულყოფილების გამო, გარკვეულ შემთხვევებში, ჩვენ, შესაძლოა, ვირეკლავთ ამ თვისებებიდან ზოგიერთს. რას შეუძლია დაგვეხმაროს ბრძოლაში, მოვერიდოთ ასეთ მახეებს? საჭიროა გვახსოვდეს, ვინ დგას ყოველივე ამის უკან. „მთელი ქვეყნიერება ბოროტებაში [ბოროტის ძალაუფლებაში, აქ] წევს“ (1 იოანე 5:19). უმნიშვნელოა, რამდენად მომხიბვლელად შეიძლება მოგეჩვენოს გარკვეული მოქმედება, არც იმას აქვს მნიშვნელობა, თუ რამდენი ადამიანი ცხოვრობს ასე, მაგრამ, როცა ყოველივე ამის უკან ჩვენ ვხედავთ იეჰოვას მთავარ მოწინააღმდეგეს, სატანა-ეშმაკს, ჩვენ ვხვდებით, რამდენად საძაგელია, სინამდვილეში, ასეთი ცხოვრება (ფსალმუნი 96:10).

რამდენად შორს ვრცელდება შენი სიყვარული?

15. როგორ დაგეხმარა უანგარო სიყვარული, რომელსაც თვალყურს ადევნებდი, ჭეშმარიტი რელიგიის დადგენაში?

¹⁵ როცა პირველად დაიწყე ურთიერთობის დამყარება იეჰოვას მოწმეებთან, სიყვარულმა, რომელსაც ერთმანეთში ამჟღავნებენ, უეჭველად, მიიპყრო შენი ყურადღება, რადგან ის განსხვავდება ქვეყნიერების სულისგან. იეჰოვასადმი წმინდა თაყვანისმცემლობაში განსაკუთრებული მნიშვნელობა უანგარო სიყვარულს ენიჭება და ეს განასხვავებს მას თაყვანისმცემლობის ყველა სხვა ფორმებისგან. შესაძლოა, ზუსტად ამ ფაქტმა დაგარწმუნა, რომ იეჰოვას მოწმეები ნამდვილად ჭეშმარიტი რელიგიის მიხედვით ცხოვრობენ. თვით იესო ქრისტემ თქვა: „ჩემი მოწაფეები რომ ხართ, იმით გაიგებენ ყველანი, თუ სიყვარული გექნებათ ურთიერთს შორის“ (იოანე 13:35).

16. რა შესაძლებლობები შეიძლება ჰქონდეს თითოეულ ჩვენთაგანს, რომ გავფართოვდეთ სიყვარულში?

¹⁶ როგორც ქრისტეს ერთ-ერთ მოწაფეს, გახასიათებს თუ არა ეს თვისება? არსებობს კი საშუალებები, რომლებითაც შეგიძლია გაფართოვდე სიყვარულის გამოვლენაში? ეჭვგარეშეა, თითოეულ ჩვენთაგანს შეუძლია ამის გაკეთება. ეს შეიცავს უფრო მეტს, ვიდრე მხოლოდ „სამეფო დარბაზში“ სხვებისადმი გულითად დამოკიდებულებას. და თუ სიყვარულს მხოლოდ მათ მიმართ გამოვავლენდით, ვისაც ვუყვარვართ, რა განსხვავება იქნებოდა ჩვენსა და ქვეყნიერებას შორის? „უპირველეს ყოვლისა კი გექნეთ გულითადი სიყვარული ერთმანეთისადმი“ — მოგვიწოდებს ბიბლია (1 პეტრე 4:8). ვის მიმართ შეგვეძლო გამოგვევლინა მეტი სიყვარული? იქნებ ქრისტიანი ძმის ან დის მიმართ, რომლის წარმოშობა განსხვავდება ჩვენი წარმოშობისგან და რომელიც გვაღიზიანებს გარკვეული ქცევით? იქნებ ეს არის პიროვნება, რომელსაც ავადმყოფობის ან წლოვანების შედეგად არა აქვს საშუალება, რეგულარულად დაესწროს კრებებს? იქნებ ჩვენი ცხოვრების თანამგზავრია? ან, შესაძლოა, ხანში შესული მშობლები? ზოგიერთები საკმაოდ კარგად ავლენდნენ სულის ნაყოფებს, მათ შორის სიყვარულსაც, მაგრამ ძალიან რთულ მდგომარეობაში ჩავარდნისას, როგორიც შეიძლება ოჯახის მძიმედ დასახიჩრებული წევრის თითქმის განუწყვეტელი მოვლა იყოს, იგრძნეს, თითქოს კვლავ უწევთ ამ ნაყოფების შესწავლა. მაშინაც კი, როცა ასეთ ვითარებებს ვაწყდებით, რასაკვირველია, ჩვენი სიყვარული არა მხოლოდ შინაურების მიმართ უნდა ვლინდებოდეს.

დამოწმება სამეფოს შესახებ — რამდენად მნიშვნელოვანია შენთვის?

17. თუ პირადად ვისარგებლეთ იეჰოვას მოწმეთა მონახულებებით, რის გაკეთებისკენ უნდა ვიყოთ აღძრულნი?

¹⁷ მნიშვნელოვანი საშუალება, რომლითაც მოყვასისადმი ვავლენთ სიყვარულს, არის დამოწმება ღმერთის სამეფოს შესახებ. ადამიანთა მხოლოდ ერთი ჯგუფი ასრულებს მსახურებას, რომელიც იესომ იწინასწარმეტყველა (მარკოზი 13:10). ესენი იეჰოვას მოწმეები არიან. სამქადაგებლო საქმიანობამ პირადად ჩვენც მოგვიტანა სარგებლობა. ახლა ის წარმოადგენს ჩვენს უპირატესობას, რომ დავეხმაროთ სხვებს. თუ ვიზიარებთ ღმერთის თვალსაზრისს ამ საკითხზე, ეს მსახურება ჩვენს ცხოვრებაში მნიშვნელოვან ადგილს დაიკავებს.

18. როგორ შეიძლება წიგნის, „იეჰოვას მოწმეები — ღმერთის სამეფოს მაუწყებლები“-ს წაკითხვამ მოახდინოს გავლენა სამეფოს შესახებ დამოწმებაში ჩვენს მონაწილეობაზე?

¹⁸ წიგნში „იეჰოვას მოწმეები — ღმერთის სამეფოს მაუწყებლები“ ამაღელვებლად აღწერილია, თუ როგორ ტარდებოდა სამეფოს შესახებ კეთილი ცნობის ქადაგება, ამ ბოლო დღეების განმავლობაში დედამიწის უმეტეს შორეულ ნაწილში. თუ ეს პუბლიკაცია ხელმისაწვდომია შენს ენაზე, არ გამოტოვო შესაძლებლობა, რომ წაიკითხო ის. და კითხვის დროს, მიაქციე ყურადღება ყველა იმ საშუალებას, რომლითაც სარგებლობდნენ ცალკეული ქრისტიანები, რომ ეხარებინათ ცნობა სამეფოს შესახებ. არიან კი ისეთი ადამიანები, რომელთა მაგალითსაც მიბაძავდი? თითოეული ჩვენთაგანისთვის მრავალი შესანიშნავი შესაძლებლობა არსებობს. დაე, იეჰოვასადმი სიყვარულმა აღგვძრას, კარგად გამოვიყენოთ ისინი.

19. რა სარგებლობა მოაქვს ჩვენთვის საკუთარ თავზე პასუხისმგებლობის აღებას, რომელიც სწორი რელიგიის შემეცნებას მოჰყვება?

¹⁹ ამრიგად, როცა იეჰოვას ნების შესასრულებლად საკუთარ ძალებს ვიყენებთ, ჩვენ ვპოულობთ პასუხს კითხვაზე: „რა არის სიცოცხლის აზრი?“ (გამოცხადება 4:11). ჩვენ აღარ დავდივართ ხელის ცეცებითა და სიცარიელის შეგრძნებით. არც ერთ საქმიანობას, რომელსაც შეგიძლია თავი შესწირო, არ მოაქვს ისეთი კმაყოფილება, როგორც იეჰოვა ღმერთის მიმართ მთელი გულით მსახურებას. და რამდენად დიდებული მომავალი მოაქვს ამას! მარადიული დამაკმაყოფილებელი ცხოვრება ღმერთის ახალ ქვეყნიერებაში, სადაც შევძლებთ სრულად გამოვიყენოთ ჩვენი შესაძლებლობები სიყვარულით აღსავსე განზრახვასთან თანხმობაში, რომლისთვისაც ღმერთმა შექმნა კაცობრიობა.

[სქოლიოები]

როგორ უპასუხებდი?

□ რატომ არის არსებითად მნიშვნელოვანი, რომ რელიგია აღიარებდეს ბიბლიას, როგორც ღმერთის სიტყვას და პატივს სცემდეს იეჰოვას, როგორც ჭეშმარიტ ღმერთს?

□ რას ასწავლის ჭეშმარიტი რელიგია იესოს როლზე, როგორც გამომსყიდველზე?

□ რატომ უნდა ცდილობდნენ ქრისტიანები, იყვნენ ქვეყნიერებისგან განცალკევებით და ცხოვრებაში გამოიყენონ უანგარო სიყვარული?

□ რა ადგილს იკავებს სამეფოს შესახებ დამოწმება სწორ რელიგიაში?

[სურათები მე-16 გვერდზე]

ნათლობა — ჭეშმარიტ თაყვანისცემაზე პასუხისმგებლობის მიღების არსებითად მნიშვნელოვანი ნაბიჯია. ყოველთვიურად, მთელ მსოფლიოში, დაახლოებით 25 000 ადამიანი დგამს ამ ნაბიჯს.

რუსეთი.

სენეგალი.

პაპუა ახალი გვინეა.

აშშ.

[სურათები მე-17 გვერდზე]

ბიბლიური კეთილი ცნობის სხვებთან გაზიარება ჭეშმარიტი თაყვანისცემის ნაწილია.

აშშ.

აშშ.

ბრაზილია.

ჰონკონგი.