მაგალითად აიღეთ ღმერთის წინასწარმეტყველები
„ჩემო ძმებო, წინასწარმეტყველები, რომლებიც უფლის სახელით ლაპარაკობდნენ, თქვენთვის ტანჯვისა და სულგრძელობის [მოთმინების, აქ] მაგალითად აიღეთ“ (იაკობი 5:10).
1. რა ეხმარებათ იეჰოვას მსახურებს, სიხარულით აღსავსენი იყვნენ მაშინაც კი, როდესაც განიცდიან დევნას?
მიუხედავად იმისა, რომ უკანასკნელ დღეებში მთელ მსოფლიოში გამეფებულია სევდა ეჰოვას მსახურები სიხარულს აფრქვევენ. ისინი ხარობენ, რადგან იციან, რომ სიხარულს ანიჭებენ ღმერთს. იეჰოვას მოწმეები მტკიცედ არიან, როდესაც თავიანთი სამქადაგებლო სამსახურის დროს განიცდიან დევნასა და წინააღმდეგობას, ვინაიდან იციან, რომ სიმართლის გამო იტანჯებიან. იესო ქრისტემ უთხრა თავის მიმდევრებს: „ნეტარ ხართ თქვენ, როცა გაგლანძღავენ, გაგდევნიან და ყოველნაირად ბოროტს იტყვიან თქვენზე ჩემს გამო. გიხაროდეთ და მხიარულებდეთ, ვინაიდან დიდია თქვენი საზღაური ცაში; ასევე დევნიდნენ წინასწარმეტყველთ, რომლებიც თქვენზე ადრე იყვნენ“ (მათე 5:10–12). ფაქტია, როდესაც ღმერთის მსახურები რწმენის გამოცდის წინაშე იმყოფებიან, სიხარულით ხვდებიან მას (იაკობი 1:2, 3).
2. იაკობის 5:10-ის თანახმად, რა დაგვეხმარება, მოთმინების გამოვლენაში?
2 მოწაფე იაკობი წერდა: „ჩემო ძმებო, წინასწარმეტყველები, რომლებიც უფლის სახელით ლაპარაკობდნენ, თქვენთვის ტანჯვისა და სულგრძელობის [მოთმინების, აქ] მაგალითად აიღეთ“ (იაკობი 5:10). უ. ფ. არნდტისა და ფ. უ. გინგრიჩის მიერ ძველი ბერძნული სიტყვა — ნიმუში (ჰი·პოʹდეიგ·მა) — განიმარტება, როგორც ჯანსაღი აზროვნების „ მაგალითი, მოდელი, ნიმუში, როგორც რაღაცა, რომელიც იძლევა ან რომელმაც უნდა მოგცეს სტიმული, რომ მიბაძო“. როგორც ნაჩვენებია იოანეს 13:15-ში, „ეს არის უფრო მეტი, ვიდრე მაგალითი. ეს არის ნათელი პროტოტიპი“ („ახალი აღთქმის თეოლოგიური ლექსიკონი“ [ინგლ.]). ასე რომ, იეჰოვას დღევანდელ მსახურებს პატივისცემის გრძნობით შეუძლიათ მიბაძონ ერთგულ წინასწარმეტყველებს ‘ტანჯვასა’ და ‘მოთმინებაში’. კიდევ რას უნდა მივაქციოთ ყურადღება, როდესაც ვსწავლობთ მათ ცხოვრებას? და როგორ შეუძლია მათ მაგალითს, დაგვეხმაროს სამქადაგებლო სამსახურში?
ისინი იტანჯებოდნენ
3, 4. როგორ რეაგირებდა ამოსი ამაციას წინააღმდეგობაზე?
3 იეჰოვას წინასწარმეტყველები ხშირად იტანჯებოდნენ ბოროტი და ცუდი მოპყრობისაგან. მაგალითად, ძველი წელთაღრიცხვით მეცხრე საუკუნეში ხბოს კერპის თაყვანისმცემელი მღვდელი, ამაცია, ბოროტად შეეწინააღმდეგა წინასწარმეტყველ ამოსს. ამაციამ განაცხადა ტყუილი, ირწმუნებოდა, რომ რადგან ამოსი წინასწარმეტყველებდა მეფის მახვილით სიკვდილსა და ისრაელების გადასახლებას, აწყობდა იერობოამ II წინააღმდეგ შეთქმულებას. ამაციამ დამცინავად უთხრა ამოსს: „მისანო, გაიქეცი იუდას ქვეყანაში, იქ ჭამე პური და იქ იწინასწარმეტყველე. ბეთილში ნუღარ იწინასწარმეტყველებ, რადგან ის სამეფო საწმიდარია და სამეფო სახლი“. ამ სიტყვიერ იერიშს არ შეუშინდა ამოსი და უპასუხა: „მე არც წინასწარმეტყველი ვარ და არც წინასწარმეტყველის შვილი; მწყემსი ვარ მე და ლეღვის მომყვანი; წამომიყვანა უფალმა ფარიდან და მითხრა უფალმა, წადი, უწინასწარმეტყველე ჩემს ერს, ისრაელსო“ (ამოსი 7:10–15).
4 იეჰოვას სულმა განამტკიცა ამოსი, რომ გაბედულად ეწინასწარმეტყველა. წარმოიდგინე ამაციას რეაქცია, როდესაც ამოსმა უთხრა: „ახლა ისმინე უფლის სიტყვა. შენ ამბობ, არ იწინასწარმეტყველო ისრაელის წინააღმდეგ და არ იქადაგო ისაკის სახლის წინააღმდეგო. ამიტომ, ასე ამბობს უფალი: შენი ცოლი [იმრუშებს] ქალაქში და შენი ვაჟები და ასულები მახვილით დაეცემიან; შენი მიწა საბელით დანაწილდება, უწმიდურ მიწაზე მოკვდები შენ, ისრაელი კი ტყვედ წავა თავისი ქვეყნიდან“ (ამოსი 7:16, 17). ეს წინასწარმეტყველება აღსრულდა. რაოდენ გამაოგნებელი იქნებოდა განდგომილი ამაციასთვის ყოველივე ეს!
5. რა პარალელი შეიძლება გაევლოს იეჰოვას დღევანდელ მსახურებსა და წინასწარმეტყველ ამოსს შორის?
5 დღეს მსგავს სიტუაციაშია იეჰოვას ხალხი. ჩვენ ვითმენთ ბოროტებას, როგორც ღმერთის ცნობის მაუწყებლები, და განვიცდით ხალხისგან დაცინვას ჩვენი სამქადაგებლო საქმიანობის გამო. მართალია, არცერთ თეოლოგიურ სემინარიას არ მოუცია ჩვენთვის ქადაგების ნებართვა. მაგრამ, იეჰოვას წმიდა სული აღგვძრავს, ვიქადაგოთ სამეფოს შესახებ კეთილი ცნობა. ჩვენ არ ვცვლით და არც ვარბილებთ ღმერთის სიტყვას. პირიქით, ამოსის მსგავსად, მორჩილად ვქადაგებთ, იმისდა მიუხედავად, თუ როგორი რეაქცია ექნება მსმენელს (2 კორინთელთა 2:15–17).
ისინი ავლენდნენ მოთმინებას
6, 7. ა) რით გამოირჩეოდა ესაიას წინასწარმეტყველება, ანუ ქადაგება? ბ) როგორ მოქმედებენ დღეს იეჰოვას მსახურები ესაიას მსგავსად?
6 ღმერთის წინასწარმეტყველები გამოირჩეოდნენ მოთმინებით. მაგალითად, მოთმინებას ავლენდა ესაია, რომელიც ცხოვრობდა ძველი წელთაღრიცხვით მერვე საუკუნეში და იყო ღმერთის წინასწარმეტყველი. ღმერთმა უთხრა მას: „წადი და უთხარი მაგ ხალხს: სმენით მოისმენთ [კვლავ და კვლავ მოისმენთ, აქ], მაგრამ ვერ გაიგებთ; ხილვით იხილავთ [კვლავ და კვლავ იხილავთ, აქ], მაგრამ ვერ მიხვდებით. უგრძნობს გახდი მაგ ხალხის გულს, სასმენელთ დაუმძიმებ და სახედველთ აუხვევ, რომ თვალით ვერ ხედავდეს, ყურით ვერ ისმენდეს, გულით ვერ ხვდებოდეს, რომ არ მოიქცეს და არ განიკურნოს“ (ესაია 6:9, 10). ხალხი ნამდვილად ასე რეაგირებდა. მაგრამ იყო თუ არა ეს იმის მიზეზი, რომ ესაიას შეეწყვიტა წინასწარმეტყველება? არა. პირიქით, ის მოთმინებითა და გულმოდგინებით ქადაგებდა იმ გაფრთხილების შესახებ, რომელსაც ღმერთი მისი მეშვეობით ატყობინებდა ხალხს. ღმერთის სიტყვიდან ზემოხსენებული ციტატის შემადგენელი ნაწილი, ძველ ებრაულ ენაზე იგულისხმება, როგორც წინასწარმეტყველის ქადაგების „ხანგრძლივობა“, რომელსაც ხალხი მოუსმენდა „კვლავ და კვლავ“ („გეზენიუსის ძველებრაული გრამატიკა“ [ინგლ.])
7 დღეს, მრავალი ადამიანი ზუსტად ისე რაეგირებს კეთილ ცნობაზე, როგორც ღმერთის იმ სიტყვებზე, რომელსაც ესაია ქადაგებდა. მაგრამ ერთგული წინასწარმეტყველის მსგავსად ჩვენ „კვლავ და კვლავ“ ვიმეორებთ სამეფოს შესახებ ცნობას. ამას ვაკეთებთ გულმოდგინებითა და შეუპოვარი მოთმინებით, რადგან ეს არის იეჰოვას ნება.
„ასეც მოიქცნენ“
8, 9. რა მხრივ არის იეჰოვას წინასწარმეტყველი მოსე შესანიშნავი მაგალითი?
8 წინასწარმეტყველი მოსე სამაგალითო იყო მოთმინებასა და მორჩილებაში. მან არჩია ტყვეობაში მყოფი ისრაელების გვერდით ყოფილიყო, მაგრამ ის მოთმინებით ელოდა მათი გათავისუფლების დროს. ის ორმოცი წელი ცხოვრობდა მიდიანში, ვიდრე ღმერთი მოუხმობდა, რომ გაძღოლოდა ისრაელ ხალხს და გაეყვანა ეგვიპტიდან, სადაც ისინი მონობაში იყვნენ. როდესაც მოსე და მისი ძმა, აარონი, იდგნენ ეგვიპტის მმართველის წინაშე, მათ მორჩილად თქვეს და შეასრულეს ის, რაც ღმერთმა უბრძანა. სინამდვილეში „ასეც მოიქცნენ“ (გამოსვლა 7:1–6; ებრაელთა 11:24–29).
9 უდაბნოში მოსემ მოთმინებით გაუძლო ისრაელებს სასტიკი 40 წლის განმავლობაში. ის მორჩილად ასრულებდა ღვთიურ მითითებებს ისრაელის კარვის მშენებლობასთან დაკავშირებით და ასევე, იმ ნივთების დამზადებაში, რაც ღმერთის თაყვანისცემაში გამოიყენებოდა. წინასწარმეტყველი ისე ზუსტად ასრულებდა ღმერთის მითითებებს, რომ ჩვენ ვკითხულობთ: „ყველაფერი გააკეთა მოსემ, რაც ნაბრძანები ჰქონდა მისთვის უფალს; ასე გააკეთა“ (გამოსვლა 40:16). იეჰოვას ორგანიზაციასთან გაერთიანებულად მსახურების დროს, დაე, მუდამ გვახსოვდეს მოსეს მორჩილება და გამოვიყენოთ პავლე მოციქულის რჩევა: „მოუსმინეთ თქვენს წინამძღოლებს“ (ებრაელთა 13:17).
მათ ჰქონდათ დადებითი განწყობილება
10, 11. ა) რა ცხადყოფს, რომ წინასწარმეტყველ ოსიას ჰქონდა დადებითი განწყობილება? ბ) როგორ შეგვიძლია შევინარჩუნოთ დადებითი განწყობილება, როდესაც მივმართავთ ჩვენს ტერიტორიაზე ადამიანებს?
10 წინასწარმეტყველებს ესაჭიროებოდათ დადებითი განწყობილების შენარჩუნება, რადგან ისინი ქადაგებდნენ განაჩენის შესახებ ცნობას, ანუ წინასწარმეტყველებას, რომელშიც მჟღავნდებოდა ღმერთის სიყვარულით აღსავსე მზრუნველობა იმ ერთგული ადამიანების მიმართ, რომლებიც გაფანტული იყვნენ ისრაელში. სწორედ ამით გამოირჩეოდა ოსია, რომელიც თითქმის 59 წლის განმავლობაში იყო წინასწარმეტყველი. ის ინარჩუნებდა დადებით განწყობილებას, ქადაგებდა იეჰოვას ცნობას და თავისი წიგნი დაასრულა შემდეგი სიტყვებით: „ვინც ბრძენია, შეიგნოს ეს; ვინც გონიერია, იცოდეს ეს, რადგან სწორია უფლის გზები და მართალნი ადგანან მას, განდგომილნი კი ფორხილობენ მასზე“ (ოსია 14:10). რაკი იეჰოვა გვაძლევს ნებას რომ დავამოწმოთ, დაე, გვქონდეს დადებითი განწყობილება და გავაგრძელოთ იმ პიროვნებების ძებნა, რომლებიც ბრძნულად მიიღებენ ღმერთის მიერ ნაწყალობებ დაუმსახურებელ სიკეთეს.
11 ‘ღირსეულთა’ მოსაძებნად საჭიროა ყოველთვის გამოვამჟღავნოთ შეუპოვრობა და ოპტიმიზმი (მათე 10:11). მაგალითად, თუ ჩვენ დავკარგეთ გასაღები, ალბათ, მეხსიერებაში უნდა აღვიდგინოთ ის ადგილები, რომლებიც გასაღების დაკარგვამდე გამოვიარეთ. შესაძლოა, იმ შემთხვევაში ვიპოვოთ გასაღები, თუ თავიდან შევამოწმებთ ყველაფერს. ამის მსგავსად, დაე, ჩვენც, შეუპოვრად ვეძებოთ ცხვრისმაგვარი ადამიანები. რამდენად სასიხარულოა, როდესაც კეთილ ცნობას გამოეხმაურებიან ბევრჯერ დამუშავებულ ტერიტორიაზე! და რაოდენ სასიხარულოა, რომ ღმერთი აკურთხებს ჩვენს მსახურებას იმ ქვეყნებში, სადაც ჩვენი სამქადაგებლო მსახურება წარსულში აკრძალული იყო! (გალატელთა 6:10).
გამხნევების წყარო
12. იოველის რომელი წინასწარმეტყველება სრულდება მე-20 საუკუნეში და როგორ?
12 ჩვენს მსახურებაში იეჰოვას წინასწარმეტყველთა სიტყვები ძალზე გამამხნევებელია. მაგალითად, განვიხილოთ იოველის წინასწარმეტყველება. ის შეიცავს ინფორმაციას ძველი წელთაღრიცხვით მეცხრე საუკუნეში მცხოვრები განდგომილი ისრაელებისა და ასევე, სხვა ადამიანების განკითხვის შესახებ. მაგრამ, გარდა ამისა, იოველი შთაგონებული იყო დაეწერა: „ამის შემდეგ [მე, იეჰოვა, აქ] მოვაფენ ჩემს სულს ყოველ ხორციელზე და გაქადაგდებიან თქვენი ვაჟები და ასულები; თქვენი უხუცესები ნახავენ სიზმრებს და ჭაბუკები ხილვებს იხილავენ. თქვენს ყმებზეც და მხევლებზეც მოვაფენ იმ დღეს ჩემს სულს“ (იოველი 3:1, 2). ეს თავდაპირველად შესრულდა იესოს მიმდევრებზე ახალი წელთაღრიცხვით 33 წლის ორმოცდაათიანიდან. და ამ წინასწარმეტყველების რაოდენ დიდებული განხორციელებაა ახლა, მე-20 საუკუნეში! დღეს ჩვენ გვყავს მილიონობით „წინასწარმეტყველი“, ანუ იეჰოვას ცნობის მქადაგებელი — მათ შორის 600 000-ზე მეტი სრული დროით მსახური პიონერი.
13, 14. რა დაეხმარება ახალგაზრდა ქრისტიანებს, რომ სიხარული იგრძნონ საველე მსახურებაში?
13 სამეფოს მქადაგებელთა უმეტესობა არის ახალგაზრდობა. მათთვის ყოველთვის იოლი არ არის, ისაუბრონ ასაკოვან ადამიანებთან ბიბლიის შესახებ. ზოგჯერ ახალგაზრდა ადამიანებს ეუბნებიან: „ტყუილუბრალოდ კარგავ დროს ქადაგებით“ და „ჯობდა სხვა რამ გეკეთებინა“. იეჰოვას ახალგაზრდა მოწმეებს შეუძლიათ ტაქტიანად გამოთქვან წუხილი იმის შესახებ, რომ ზოგიერთ პიროვნებას ასეთი თვალსაზრისი აქვს. კეთილი ცნობის ერთ-ერთ ახალგაზრდა მქადაგებელს მიაჩნია, რომ ასაკოვან ადამიანებთან საუბრისას კარგია დაუმატო შემდეგი სიტყვები: „მე ვფიქრობ, რომ ნამდვილად სასარგებლოა თქვენთან საუბარი, მე სიამოვნებით ვსაუბრობ თქვენთან“. რა თქმა უნდა, კეთილი ცნობის ქადაგება არ არის დროის ფუჭად დაკარგვა. უამრავი ადამიანის სიცოცხლე საფრთხეშია. იოველის მეშვეობით იეჰოვამ თქვა: „ყველა, ვინც კი ახსენებს მაშინ უფლის [იეჰოვას, აქ] სახელს, გადარჩება“ (იოველი 3:5).
14 ბავშვები, რომლებიც დაჰყვებიან თავიანთ მშობლებს სამეფოს შესახებ სამქადაგებლო მსახურებაში, სიხარულით ღებულობენ მშობლებისგან დახმარებას, რომ დაისახონ პირადი მიზნები. ისინი თანდათან აღწევენ წარმატებებს საღვთო წერილებიდან ადგილების ამოკითხვით, მოგვიანებით კი განმარტავენ ბიბლიაზე დაფუძნებულ იმედს და დაინტერესებულ პირებს სთავაზობენ სათანადო ლიტერატურას. რადგანაც ისინი ხედავენ თავიანთ წარმატებებს და იეჰოვას კურთხევას, სამეფოს ახალგაზრდა მქადაგებლები კეთილი ცნობის ქადაგებით დიდ სიამოვნებას გრძნობენ (ფსალმუნი 109:3; 148:12, 13).
გულმოდგინება და მოთმინების გამომჟღავნება
15. როგორ დაგვეხმარება ეზეკიელის მაგალითი, რომ განვაახლოთ ჩვენი გულმოდგინება სამეფოს შესახებ სამქადაგებლო მსახურებაში?
15 ღმერთის წინასწარმეტყველები სამაგალითონი იყვნენ როგორც გულმოდგინების, ასევე მოთმინების გამომჟღავნებაში — ამ თვისებების გამომჟღავნება გვესაჭიროება დღეს ჩვენს მსახურებაში. როდესაც ღმერთის სიტყვიდან პირველად გავიგეთ ჭეშმარიტება, ჩვენც გულმოდგინებით ავენთეთ, რამაც აღგვძრა გაბედული ლაპარაკისკენ. მაგრამ, შესაძლოა, მას შემდეგ წლებმა ჩაიარეს და ჩვენ არაერთხელ დავამუშავეთ ჩვენი სამქადაგებლო ტერიტორია. შესაძლოა, ცოტამ თუ მიიღო სამეფოს ცნობა. შესუსტდა თუ არა ამის გამო ჩვენი გულმოდგინება? თუ ასეა, განვიხილოთ ეზეკიელ წინასწარმეტყველის მაგალითი, რომლის სახელი ნიშნავს „ღმერთი განამტკიცებს“. თუმცა ძველი დროის ისრაელში ეზეკიელს უწევდა ისეთ ხალხთან ურთიერთობა, რომლებიც საკმაოდ გულცივები იყვნენ, მაგრამ ღმერთმა განამტკიცა ეზეკიელი და, სიმბოლურად რომ ვთქვათ, მისი შუბლი კაჟზე მტკიცე გახადა. ამგვარად, ეზეკიელს ჰქონდა უნარი, რომ ძალიან, ძალიან ბევრი წლების განმავლობაში ემსახურა მიუხედავად იმისა, უსმენდა თუ არა ხალხი. მისი მაგალითი გვიჩვენებს, რომ ჩვენც შეგვიძლია იმავეს გაკეთება და ეს მაგალითი გვეხმარება, განვაახლოთ გულმოდგინება სამქადაგებლო მსახურებაში (ეზეკიელი 3:8, 9; 2 ტიმოთე 4:5).
16. მიქას რომელი თვისება უნდა განვავითაროთ ჩვენში?
16 თავისი მოთმინებით საყურადღებოა მიქა, რომელიც წინასწარმეტყველებდა ძველი წელთაღრიცხვით მერვე საუკუნეში. ის წერდა: „მე კი უფალს შევცქერი, ვესავ ჩემი ხსნის ღმერთს; შემიწყნარებს ჩემი ღმერთი“ (მიქა 7:7). მიქას გაბედულება ფესვგადგმული იყო მტკიცე რწმენაში. ესაია წინასწარმეტყველის მსგავსად, მიქამ იცოდა, რომ იეჰოვამ რაც განიზრახა, აუცილებლად შეასრულებს. ეს ჩვენთვისაც ცნობილია (ესაია 55:11). დაე, განვავითაროთ ჩვენში მოთმინება იეჰოვას აღთქმების განხორციელების მიმართ. და დაე, ვიქადაგოთ კეთილი ცნობა გულმოდგინებით, თვით ისეთ ადგილებშიც, სადაც ადამიანები მცირე ინტერესს ამჟღავნებენ სამეფოს შესახებ ცნობის მიმართ (ტიტე 2:14; იაკობი 5:7–10).
მოთმინების გამომჟღავნება დღეს
17, 18. ძველი და თანამედროვე დროის რომელ მაგალითებს შეუძლია დაგვეხმაროს, რომ განვავითაროთ მოთმინება?
17 იეჰოვას ზოგიერთი წინასწარმეტყველი თავისი დანიშნულების შესაბამისად წლების განმავლობაში მოთმინებით ამჟღავნებდა შეუპოვრობას, მაგრამ მათ ვერ იხილეს თავიანთი წინასწარმეტყველების შესრულება. მათ ხშირად სასტიკად ეპყრობოდნენ, მაგრამ მაინც მოთმინებით ამჟღავნებდნენ შეუპოვრობას და მათი მაგალითი დაგვეხმარება, შევიგნოთ, რომ შეგვიძლია განვახორციელოთ ჩვენი მსახურება. ჩვენთვის, ასევე, სასარგებლოა ერთგული ცხებულების მაგალითი, რომლებიც მე-20 საუკუნის დასაწყისში ცხოვრობდნენ. მიუხედავად იმისა, რომ მათი ზეციური იმედი არ განხორციელდა ისე სწრაფად, როგორც მოელოდნენ, მათ არ დაუშვეს, რომ მოჩვენებითი დაბრკოლების გამო იმედგაცრუებას ებატონა მათზე და ღმერთის მიერ გაცხადებული ნების შესრულების დროს შეესუსტებინათ გულმოდგინება.
18 მრავალი წლის განმავლობაში ქრისტიანები რეგულარულად ავრცელებდნენ „საგუშაგო კოშკსა“ და „გამოიღვიძეთ!“-ს (ადრე ეწოდებოდა „ოქროს ხანა“, მოგვიანებით „ნუგეში“). ისინი გულმოდგინებით ავრცელებდნენ ამ ფასეულ ჟურნალებს ქუჩებსა და სახლებში, რასაც დღეს ვუწოდებთ დანიშნულების ადგილზე ჟურნალების მიტანას. ერთ-ერთი ასაკოვანი და, რომელმაც დაასრულა თავისი მიწიერი ცხოვრება, უკვე მოენატრათ ქუჩაში მოსიარულეთ, რომლებიც ხედავდნენ მას ქუჩაში მოქადაგეს. რაოდენ დიდებული დამოწმების მაგალითი მოგვცა მან თავისი ერთგული მსახურებით მრავალი წლის განმავლობაში, ამას ცხადყოფს იმ ადამიანების გამოხმაურება, რომლებიც რეგულარულად აკვირდებოდნენ მის საჯარო მსახურებას! როგორც სამეფოს მქადაგებელი, რეგულარულად ავრცელებ თუ არა შენს მსახურებაში ჟურნალებს: „საგუშაგო კოშკი“ და „გამოიღვიძეთ!“?
19. რა გამხნევებას გვთავაზობს ებრაელთა 6:10–12-ში ჩაწერილი სიტყვები?
19 განვიხილოთ, ასევე, იმ ერთგული ძმების მოთმინების მაგალითი, რომლებიც მსახურობენ იეჰოვას მოწმეთა ხელმძღვანელი კორპორაციის წევრებად. ზოგიერთი მათგანი ახლა არის ოთხმოცი ან ოთხმოცდაათი წლის ასაკში, მაგრამ ისინი კვლავ არიან სამეფოს მქადაგებლები და გულმოდგინედ ზრუნავენ თავიანთი დანიშნულების შესასრულებლად (ებრაელთა 13:7). რა შეიძლება ითქვას იმ ასაკოვანი ადამიანების შესახებ, რომელთაც ზეციური იმედი აქვთ ან მათ შესახებ, რომლებიც ‘სხვა ცხვრებს’ მიეკუთვნებიან და დროთა განმავლობაში ხანდაზმულები ხდებიან? (იოანე 10:16). მათ შეუძლიათ დარწმუნებული იყვნენ, რომ ღმერთი არ არის უსამართლო და არ დაივიწყებს მათ სამსახურსა და სიყვარულს, რომელიც გამოამჟღავნეს მისი სახელის მიმართ. დაე, ახალგაზრდა თანამორწმუნეებთან ერთად, ასაკოვანმა მოწმეებმაც გამოამჟღავნონ შეუპოვრობა იმით, რომ გააკეთებენ ყველაფერს, რაც შეუძლიათ, გამოავლენენ რწმენასა და მოთმინებას ღმერთისადმი მსახურების დროს (ებრაელთა 6:10–12). და შემდეგ ისინი ან გადაიტანენ ‘დიდ ჭირს’, ან აღდგომის მეშვეობით, ძველი დროის წინასწარმეტყველების მსგავსად, მიიღებენ დიდებულ ჯილდოს — მარადიულ სიცოცხლეს (მათე 24:21).
20. ა) რა ისწავლე წინასწარმეტყველთა მაგალითებიდან? ბ) როგორ დაგვეხმარება წინასწარმეტყველთა მიერ გამოვლენილი მსგავსი მოთმინება?
20 რაოდენ დიდებული მაგალითი დაგვიტოვეს ღმერთის წინასწარმეტყველებმა! რადგან მათ გადაიტანეს ტანჯვა, გამოამჟღავნეს მოთმინება და სხვა ღვთიური თვისებები, მათ ჰქონდათ უპირატესობა ესაუბრათ იეჰოვას სახელით. როგორც იეჰოვას დღევანდელმა მოწმეებმა, დაე, მივბაძოთ მათ და ვიყოთ მტკიცენი ისევე, როგორც წინასწარმეტყველი აბაკუმი, რომელმაც თქვა: „ჩემს სადარაჯოზე დავდგები და გავალ კოშკზე, დავაყურადებ, რომ ვნახო, რას მეტყვის [ღმერთი]“ (აბაკუმი 2:1). დაე, ჩვენც გამოვავლინოთ მსგავსი მოთმინება და სიხარულით გავაგრძელოთ საჯაროდ ჩვენი დიდებული შემოქმედის, იეჰოვა ღმერთის სახელის შესახებ ქადაგება! (ნეემია 8:10; რომაელთა 10:10).
გაიგე თუ არა ეს საკითხები?
□ როგორი გამამხნევებელი მაგალითი დაგვიტოვა ამოსმა?
□ რა მხრივ იყო მოსე წინასწარმეტყველი სანიმუშო?
□ როგორ შეუძლიათ იეჰოვას დღევანდელ მოწმეებს იმოქმედონ ამოსისა და ესაიას მსგავსად?
□ რა შეუძლია ისწავლონ ქრისტიანმა მსახურებმა ოსიასა და იოველის მოქმედებისგან?
□ რა შეიძლება იყოს ჩვენთვის სასარგებლო ეზეკიელისა და მიქას მაგალითებიდან?
[სურათი 24-ე გვერდზე]
ამაციას გააფთრებული წინააღმდეგობის მიუხედავად, იეჰოვას სულმა განამტკიცა ამოსი, რომ გაბედულად ეწინასწარმეტყველა.
[სურათი 26-ე გვერდზე]
ერთგულმა ცხებულებმა დაგვიტოვეს შესანიშნავი მაგალითი იეჰოვასადმი მსახურების დროს მოთმინების გამომჟღავნებით.