მათ ჰპოვეს მშვიდობა მშფოთვარე წუთისოფელში

ამ ჟურნალის გარეკანზე მოთავსებული სურათი ასახავს ბოსნიასა და ჰერცეგოვინაში გაჩაღებული ცხარე ბრძოლის სცენას. შესაძლებელია თუ არა, რომ მშვიდობა არსებობდეს ასეთ ადგილას? საოცარია, მაგრამ დიახ. იმ დროს, როდესაც ამ ტრაგიზმით აღსავსე ქვეყანაში მიწებისთვის იბრძვიან რომის კათოლიკური ეკლესიის წევრები, აღმოსავლეთის მართლმადიდებლები და მუსულმანთა გაერთიანებები, მრავალი ეძებს მშვიდობას და ზოგიერთმა ჰპოვა კიდეც.

დორემების ოჯახი სარაევოში ცხოვრობდა და ისინი იეჰოვას მოწმეებს წარმოადგენდნენ. სარაევოს მშფოთვარე მიწაზე ისინი ჩვეულებისამებრ მიდიოდნენ თავიანთ მეზობლებთან, რომ გაეზიარებინათ მათთვის ღვთის სამეფოს კეთილი ცნობა (მათე 24:14). რატომ? დორემების ოჯახმა იცოდა, რომ ეს სამეფო რეალურია და ეს სამეფო უკვე დამყარდა ზეცაში, მათ ასევე იცოდნენ რომ ის არის კაცობრიობის საუკეთესო და ერთადერთი იმედი მშვიდობისთვის. იეჰოვას მოწმეებს მტკიცედ სწამთ ის, რასაც პავლე მოციქულმა უწოდა „კეთილი ცნობა მშვიდობის შესახებ“ (ეფესელთა 2:17, აქ). ბაუზო და ჰენა დორემების დახმარებით მრავალმა ადამიანმა მოიპოვა მშვიდობა ბოსნიასა და ჰერცეგოვინაში.

ნამდვილი მშვიდობა დამყარდება

ძალიან ბევრის თქმა შეიძლება დორემების ოჯახის შესახებ. მაგრამ ჯერ ვისაუბროთ სხვა წყვილზე, რომელმაც ღვთის სამეფოსადმი მტკიცე რწმენა შეიძინა. მათი სახელებია არტური და არინა. ისინი შვილებთან ერთად ცხოვრობდნენ ყოფილი საბჭოთა კავშირის ერთ-ერთი რესპუბლიკის ტერიტორიაზე. როდესაც სამოქალაქო ომი დაიწყო, არტური ერთ-ერთ მხარეზე საბრძოლველად გაიწვიეს. ძალიან მალე მან საკუთარ თავს დაუსვა კითხვა: „რატომ ვებრძვი იმ ადამიანებს, რომლებიც ჩემი მეზობლები იყვნენ?“ მან დატოვა ქვეყანა და მრავალი წინააღმდეგობის მიუხედავად, თავის ოჯახთან ერთად ესტონეთში ჩავიდა.

როდესაც არტური ეწვია სანკტ-პეტერბურგს, იქ შეხვდა იეჰოვას მოწმეებს და ღვთის სამეფოს შესახებ მოსმენილმა ძალიან დიდი შთაბეჭდილება მოახდინა მასზე. იეჰოვას ნებაა, რომ ძალიან მალე ღვთის სამეფო იყოს კაცობრიობის ერთადერთი მმართველობა (დანიელი 2:44). მაშინ დედამიწაზე იქნება მშვიდობა, აღარ იქნება სამოქალაქო ომები და საერთაშორისო კონფლიქტები. ამ დროის შესახებ ესაიამ იწინასწარმეტყველა: „არავინ იბოროტებს და არავინ იბილწებს მთელ ჩემ წმიდა მთაზე, რადგან აივსება მიწა უფლის ცოდნით, როგორც ზღვა არის წყლებით დაფარული“ (ესაია 11:9).

ბიბლიის შესწავლისთვის დამხმარე ლიტერატურაში, რომელიც იეჰოვას მოწმეებმა უჩვენეს, არტურმა შეამჩნია სურათი, სადაც ასახული იყო მშვიდობიანი მომავალი დედამიწაზე და მან გამოთქვა აზრი, რომ ის ცხოვრობდა მსგავს ადგილას, სადაც ამჟამად სამოქალაქო ომის გამო ყველაფერი ნანგრევებადაა ქცეული. როდესაც არტური ოჯახთან ერთად დაბრუნდა ესტონეთში, იეჰოვას მოწმეების დახმარებით ბიბლიის შესწავლისას მათ უფრო მეტი გაიგეს ღვთის სამეფოს შესახებ.

მშვიდობა მშფოთვარე გარემოცვაში

ფსალმუნის 36:37-ში ნათქვამია: „დაიცავი უმანკოება და ნახე სისწორე, რადგან მომავალი ეკუთვნის მშვიდობიან კაცს“. სინამდვილეში ღვთის თვალში უდანაშაულო და სამართლიანი ადამიანის მშვიდობა მხოლოდ მომავლით არ შემოიფარგლება. ასეთი ადამიანი დღესაც ტკბება ამ მშვიდობით. როგორ შეიძლება ეს ასე იყოს? განვიხილოთ ერთ-ერთი მამაკაცის, სახელად პოლის, ცხოვრება.

მიუხედავად იმისა, რომ პოლი მეზობელი ქვეყნიდან იყო, ცხოვრობდა ეთიოპიაში, სამხრეთ-დასავლეთით მდებარე ლტოლვილთა შორეულ ბანაკში. თავის სამშობლოში ის შეხვდა ერთ-ერთ იეჰოვას მოწმეს, რომელიც მუშაობდა ნავთობის კომპანიაში და მან პოლს მისცა ბიბლიის შესწავლისთვის დამხმარე წიგნი: „მარადიულ სიცოცხლემდე მიმყვანი ჭეშმარიტება“ (ინგლ.)a. პოლს მეტად აღარ მოუწია იეჰოვას მოწმეებთან შეხვედრა, მაგრამ მან ეს წიგნი გულდასმით შეისწავლა. მის სამშობლოში გამძვინვარებული სამოქალაქო ომის გამო, მას ეთიოპიის ლტოლვილთა ბანაკში მოუწია ცხოვრება და იქ სხვებსაც ესაუბრებოდა შესწავლილის შესახებ. შედეგად პატარა ჯგუფმა მიიღო ჭეშმარიტება. იმის საფუძველზე, რაც ისწავლეს, ისინი სხვებთანაც ქადაგებდნენ ბანაკში.

პოლმა მისწერა საგუშაგო კოშკის საზოგადოების მთავარ განყოფილებას და სთხოვა დახმარება. ერთ-ერთმა თანაშემწემ, რომელიც ადის-აბებიდან გაიგზავნა, ნახა რომ 35 პიროვნება ელოდა მას და მზად იყო ღვთის სამეფოს შესახებ უფრო მეტი ცოდნის მისაღებად. რეგულარული დახმარების აღმოსაჩენად მიღებულ იქნა შეთანხმება.

რატომ შეიძლება ითქვას, რომ პოლის მსგავსი ადამიანები მშვიდობით ტკბებიან? მათი ცხოვრება არ არის ადვილი, მაგრამ მათ სწამთ ღმერთის. როდესაც ეს მშფოთვარე წუთისოფელი მათ ზიანს აყენებს, მიმართავენ ბიბლიის რჩევას: „არაფერზე იზრუნოთ, მხოლოდ ლოცვასა და ვედრებაში მადლიერებით აუწყეთ თქვენი სურვილი ღმერთს“. შედეგად მათ აქვთ სიხარული, რაც იშვიათია დღეს. მათ შეეფერება პავლე მოციქულის სიტყვები, რომლებიც ფილიპელთა კრებას მისწერა: „და ღვთის მშვიდობა, რომელიც ყოველგვარ გონებას აღემატება, დაიფარავს თქვენს გულებს და თქვენს ფიქრებს ქრისტე იესოში“. ნამდვილად, ისინი ახლო ურთიერთობას გრძნობენ იეჰოვასთან, ‘მშვიდობის ღმერთთან’ (ფილიპელთა 4:6, 7, 9).

ახლანდელი მშვიდობა

ღვთის სამეფოს ტახტზე ასულ მეფეს წარმოადგენს იესო ქრისტე, რომელსაც ბიბლიაში „მშვიდობის მთავარი“ ეწოდება (ესაია 9:5). მის შესახებ უძველესმა წინასწარმეტყველმა თქვა: „მშვიდობას გამოუცხადებს უფალი ხალხებს და დამყარდება მისი ხელმწიფება ზღვიდან ზღვამდე და მდინარიდან ქვეყნის ბოლომდე“ (ზაქარია 9:10). ღვთის მიერ შთაგონებულმა სიტყვებმა, თუნდაც ზემოხსენებულმა, დიდი ზეგავლენა მოახდინა ჰოსეის ცხოვრებაზე.

ჰოსეი ერთ დროს ციხეში იჯდა. ის იყო ტერორისტი და იმ დროს დააკავეს, როდესაც პოლიციის ყაზარმების აფეთქებას ამზადებდა. ის ფიქრობდა, რომ მხოლოდ ძალადობით შეიძლებოდა მთავრობის იძულება, გაეუმჯობესებინა ქვეყნის მდგომარეობა. მისი ციხეში ყოფნის დროს, მისმა ცოლმა იეჰოვას მოწმეებთან დაიწყო ბიბლიის შესწავლა.

გათავისუფლების შემდეგ ჰოსეიმაც შეისწავლა ბიბლია და ახლა მასზეც შეიძლება ითქვას ფსალმუნის 84:9-ში ჩაწერილი სიტყვები: „მე კი მოვისმენ, თუ რას იტყვის უფალი ღმერთი; რადგან მშვიდობას იტყვის თავის ხალხზე და თავის წმიდანებზე [ერთგულებზე, აქ]“. ამასთანავე, ეს მუხლი შეიცავს გაფრთხილებას, რომ ‘აღარ იყვნენ თავდაჯერებულნი (აქ)’, მაგრამ ის, ვინც ეძებს იეჰოვას მშვიდობას, არასოდეს გაბედავს, იმოქმედოს დამოუკიდებლად ან შეეწინააღმდეგოს იეჰოვას ნებას.

დღეს ჰოსეი და მისი მეუღლე ქრისტიანი მსახურები არიან. ისინი ადამიანთა ყურადღებას მიმართავენ იეჰოვას სამეფოსკენ, რომელიც იმ პრობლემებს გადაწყვეტს, რომელთა გადაჭრასაც ჰოსეის ოჯახი თვითნაკეთი ბომბებით ცდილობდა. ისინი მზად არიან, მიენდონ ბიბლიას, რომელიც ამბობს: „უფალიც გვიბოძებს სიკეთეს“ (ფსალმუნი 84:13). ჰოსეი ახლახანს ესტუმრა იმ ყაზარმებს, რომლის განადგურებასაც აპირებდა. რატომ ესტუმრა? იმ მიზნით, რომ ესაუბრა ოჯახებთან ღვთის სამეფოს შესახებ.

მშვიდობიანი ხალხი

ფსალმუნის 36:10, 11-ში ბიბლია ამბობს: „კიდევ ცოტა და აღარ იქნება ბოროტი, დაუკვირდები მის ადგილს და აღარ იქნება იგი. ხოლო თავმდაბალნი დაიმკვიდრებენ ქვეყნიერებას და დაამდებიან დიდი მშვიდობით“. რაოდენ დიდებული იმედია!

ყურადღება მიაქციე, რომ მხოლოდ ‘თავმდაბლებს’ ექნებათ იეჰოვას მშვიდობა. მათ, ვინც ეძებს მშვიდობას, შესაძლოა, მოუწიოთ სწავლა, რომ იყვნენ მშვიდობიანნი. ასე შეემთხვა ქითსაც, რომელიც ახალ ზელანდიაში ცხოვრობდა. ქითი, როგორც აღწერდნენ, იყო „ძლიერი აღნაგობის, მტკიცე ხასიათის, აგრესიული და კამათის მოყვარული“. ის იყო ბანდის წევრი და ცხოვრობდა ისეთ სახლში, რომელიც ნამდვილი ციხე-სიმაგრე იყო, ბინაში რომ არავინ შეჭროდა, ბაღებს დარაჯობდა სამი დამცველი ძაღლი. მისი ცოლი, ექვსი შვილის დედა, მასთან განქორწინებული იყო.

როდესაც ქითი შეხვდა იეჰოვას მოწმეებს, კეთილმა ცნობამ მასზე ღრმა შთაბეჭდილება მოახდინა. ძალიან მალე მან და მისმა ბავშვებმა დაიწყეს იეჰოვას მოწმეების შეხვედრებზე დასწრება. მან შეიჭრა საკმაოდ გრძელი თმები და თავის ყოფილ ამხანაგებთან დაიწყო ღვთის სამეფოს შესახებ საუბარი. მათგან ზოგიერთმა ბიბლიის შესწავლა დაიწყო.

მილიონობით გულმართალი ადამიანის მსგავსად, ქითმა დაიწყო პეტრე მოციქულის სიტყვების ცხოვრებაში გამოყენება: „ვისაც სიცოცხლე უყვარს და კეთილი დღეების ხილვა. . . ერიდოს ბოროტს, სიკეთე აკეთოს, ეძიებდეს მშვიდობას და მისკენ ისწრაფვოდეს“ (1 პეტრე 3:10, 11). ქითის ყოფილმა ცოლმა გადაწყვიტა, რომ კვლავ დაუბრუნდეს მას და ქითი ‘მშვიდობის ძებნასა და მისკენ სწრაფვას’ სწავლობს.

იეჰოვას მშვიდობამ მრავალი ადამიანის სიცოცხლე იხსნა; მათ შორის არის ყოფილი ათლეტი, რომელიც ყოფილ საბჭოთა კავშირში ცხოვრობდა. მან ოლიმპიადაზე მედალი მოიპოვა, მაგრამ ცხოვრებაზე გული გაუტყდა და დაიწყო ნარკოტიკებისა და სპირტიანი სასმელების გამოყენება. მოვლენებით აღსავსე 19 წლის შემდეგ, რომლის განმავლობაშიც სამი წლით იჯდა ციმბირის შრომა-გასწორების კოლონიაში, უბილეთოდ გაემგზავრა გემით კანადაში და ორჯერ ნარკოტიკების გამოყენების გამო სიკვდილის პირას იყო, ის შეევედრა ღმერთს, რომ სიცოცხლის ჭეშმარიტი აზრი ეპოვა. რუსულად მოლაპარაკე მოწმესთან ბიბლიის შესწავლა დაეხმარა მას ეპოვა კითხვებზე პასუხი. დღეს ამ მამაკაცმა, სხვა მილიონობით ადამიანთან ერთად იპოვა მშვიდობა, როგორც ღმერთთან, ასევე საკუთარ პიროვნებაშიც.

აღდგომის იმედი

და ბოლოს, კვლავ დავუბრუნდეთ ბაუზო და ჰენა დორემებს სარაევოში. ამ წყვილს ჰყავდა ხუთი წლის გოგონა, მაგდალენა. გასული წლის ივლისში, როდესაც სამივე კვლავ სამქადაგებლო საქმიანობაში მონაწილეობის მისაღებად სახლიდან გადიოდა, აფეთქებულმა ნაღმმა იმსხვერპლა. რა შეიძლება ითქვას იმ მშვიდობაზე, რომლის შესახებაც ისინი სხვებთან ქადაგებდნენ? ნუთუ აფეთქებული ნაღმი, რომელმაც მათი სიცოცხლე იმსხვერპლა, ცხადყოფს, რომ მათი იმედი არარეალური იყო?

რა თქმა უნდა, არა! ამ წუთისოფელში მრავალი ტრაგედია ხდება. ადამიანები ბომბების ან ნაღმების მსხვერპლი ხდებიან. სხვების სიცოცხლეს კი ავადმყოფობები ან უბედური შემთხვევები იწირავს. მრავალი სიბერის გამო იღუპება. ისინი, რომლებიც ღვთის მშვიდობით ტკბებიან, არ არიან გამონაკლისები, მაგრამ ასეთი შემთხვევების არსებობა არ ტოვებს მათ იმედის გარეშე.

იესომ თავის მეგობარ მართას აღუთქვა: „მე ვარ აღდგომა და სიცოცხლე, ჩემი მორწმუნე, კიდეც რომ მოკვდეს, იცოცხლებს“ (იოანე 11:25). დორემებსაც, როგორც იეჰოვას ყველა მოწმეს, სწამდათ ეს. დორემებს სწამდათ, რომ თუ მოკვდებოდნენ, მომავალში აღდგენილი იქნებოდნენ მშვიდობიან დედამიწაზე. იეჰოვა ღმერთი „მოსწმედს ყველა ცრემლს მათი თვალებიდან და აღარ იქნება სიკვდილი. გლოვა, გოდება და ტკივილიც აღარ იქნება, რადგან წინანდელნი გარდახდნენ“ (გამოცხადება 21:4).

ზუსტად სიკვდილის წინ, იესომ თავის მიმდევრებს უთხრა: „ჩემს მშვიდობას გაძლევთ. . . ნუ შეკრთება თქვენი გული“ (იოანე 14:27). ჩვენ ვხარობთ დორემების ოჯახის გამო, რომელსაც ჰქონდა ეს მშვიდობა და რომელიც ამ მშვიდობით, უეჭველად, უფრო მეტად დატკბება აღდგომისას. ჩვენ ბედნიერები ვართ მათ გამო, რომლებიც იეჰოვას, მშვიდობის ღმერთს, სცემენ თაყვანს. ასეთებს აქვთ სულის სიმშვიდე. ისინი ტკბებიან ღმერთთან მშვიდობით. ისინი სხვებთანაც ამყარებენ მშვიდობას. და მათ მტკიცედ სწამთ მშვიდობიანი მომავლის. დიახ, მათ ჰპოვეს მშვიდობა, მიუხედავად იმისა, რომ ცხოვრობენ მშფოთვარე წუთისოფელში. ნამდვილად, ყველა, ვინც სულითა და ჭეშმარიტებით სცემს თაყვანს ღმერთს, ტკბება მშვიდობით. შენც გეპოვოს ასეთი მშვიდობა.

[სქოლიოები]