ბაძავ თუ არა ჩვენს მიუკერძოებელ ღმერთს?

მიუკერძოებლობა — სად შეგვიძლია ვიპოვოთ ის? არსებობს პიროვნება, რომელიც აბსოლუტურად მიუკერძოებელია, რომელიც თავისუფალია ყოველგვარი წინასწარაკვიატებულობის, ფავორიტიზმისა და დისკრიმინაციისგან. ეს არის იეჰოვა ღმერთი, კაცობრიობის შემოქმედი. მაგრამ ადამიანების შესახებ მე-19 საუკუნის ინგლისელი მწერალი ჩარლზ ლემი გულახდილად წერდა: „მე, უბრალოდ რომ ვთქვათ, აღსავსე ვარ წინასწარაკვიატებულობით — წინასწარ შექმნილი სიმპათიებითა და ანტიპათიებით“.

რაც შეეხება ადამიანთა შორის ურთიერთობებში მიუკერძოებლობას, სამწუხაროდ, აქ შეინიშნება მიუკერძოებლობის ნაკლებობა. მრავალი საუკუნის წინათ ისრაელის ბრძენმა მეფე სოლომონმა აღნიშნა: „კაცი კაცზე მძლავრობდა თავისდა საზიანოდ“ (ეკლესიასტე 8:9). რასობრივი სიძულვილი, ნაციონალური კონფლიქტები და ოჯახებს შორის მესისხლეობა განუწყვეტლივ იზრდება. ამიტომ, განა რეალურია გვჯეროდეს, რომ ადამიანებს დამოუკიდებლად შეუძლიათ განავითარონ მიუკერძოებელი საზოგადოება?

შეგნებული ძალისხმევაა საჭირო, რათა კონტროლი გავუწიოთ ჩვენს ურთიერთობებს და მოვიცილოთ ყოველგვარი ღრმად ფესვებგადგმული წინასწარაკვიატებულობა (ეფესელთა 4:22–24). ჩვენდა უნებურად, შეიძლება, მიდრეკილება გვაქვს, გვქონდეს შეხედულებები, რომლებიც ჩამოყალიბდა ჩვენი სოციალური გარემოსა და იმ გარემოს გავლენით, რომელშიც აღვიზარდეთ და რომლებიც ფესვებგადგმულია ჩვენს ოჯახურ ატმოსფეროში, ასევე, რასობრივ და ეროვნულ შეხედულებებში. ეს თითქოს უწყინარი მიდრეკილებები ხშირად ღრმად არის ფესვებგადგმული და წარმოშობს თვალსაზრისს, რომელიც მიკერძოებამდე მიმყვანია. შოტლანდიელი იურისტი და რედაქტორი ლორდ ფრენსის ჯეფრი გულწრფელად აღიარებდა: „არაფერი რჩება ადამიანს გაუცნობიერებელი ისე დიდ ხანს, როგორც თავისი წინასწარაკვიატებულობის სიღრმე და ძალა“.

ლენაa არის ერთ-ერთი პიროვნება, რომელიც აღიარებს, რომ შეგნებული ძალისხმევაა საჭირო, რათა დასძლიო მიკერძოებისადმი მიდრეკილება. საკუთარ თავში წინასწარაკვიატებულობის გრძნობის ჩახშობის შესახებ ლენა ამბობს, რომ „დიდი ძალისხმევაა საჭირო, ვინაიდან აღზრდა ძალიან დიდ გავლენას ახდენს“. ლენას ესმის, რომ აუცილებელია გამუდმებული შეხსენებებიც.

ცნობები იეჰოვას მიუკერძოებლობის შესახებ

იეჰოვა მიუკერძოებლობის სრულყოფილი მაგალითია. ბიბლიის პირველსავე გვერდებზე ვკითხულობთ, თუ როგორ გამოავლინა ადამიანებისადმი თავისი მოპყრობით ღმერთმა მიუკერძოებლობა. ჩვენ ბევრი რამის შესწავლა შეგვიძლია ამ შესანიშნავი მაგალითებიდან და შეხსენებებიდან.

იეჰოვამ მიუკერძოებლობა გამოავლინა საქმეების ისე წარმართვით, რომ იუდეველმა მოციქულმა პეტრემ ახალი წელთაღრიცხვით 36 წელს კეთილი ცნობა უქადაგა კორნელიოსსა და სხვა წარმართებს. იმ დროს პეტრემ თქვა: „ღმერთი მიკერძოებული არ არის, არამედ ყოველ ხალხში მისი მოშიში და სიმართლის მოქმედი სათნოა მისთვის“ (საქმეები 10:34, 35).

იეჰოვამ კაცობრიობისადმი ყველა თავის მოქმედებაში თანმიმდევრულად გამოავლინა თავისი მიუკერძოებლობა. იესო ქრისტემ თავისი მამის შესახებ თქვა: „[მას] თავისი მზე ამოჰყავს ბოროტთა და კეთილთა თავზე და წვიმას უგზავნის მართლებსა და უსამართლოებს“ (მათე 5:45). პეტრეს მიერ იეჰოვა ღმერთის, როგორც მიუკერძოებლის, შემდგომი განდიდებისას, მან განაცხადა: „[ის] სულგრძელია თქვენდამი და არ სურს, რომ ვინმე დაიღუპოს, არამედ რომ ყველა მივიდეს მოსანანიებლად“ (2 პეტრე 3:9).

ნოეს დღეებში, როცა „იმატა ადამიანთა უკეთურებამ ამქვეყნად, [ისე] რომ უკეთური იყო მუდამჟამს მათი ყოველი გულისთქმა“, იეჰოვამ ბრძანა კაცობრიობის განადგურება (დაბადება 6:5-7, 11, 12). მაგრამ ღვთის მითითებით ნოე ყველა თავისი თანამედროვის თვალწინ აშენებდა კიდობანს. იმ დროის განმავლობაში, როცა ნოე და მისი ვაჟები კიდობანს აშენებდნენ, ნოე იყო ‘სიმართლის მქადაგებელიც’ (2 პეტრე 2:5). მიუხედავად იმისა, რომ იცოდა იმ მოდგმის ბოროტი გულის მიდრეკილებები, იეჰოვამ მიუკერძოებლად გაუგზავნა მათ ნათელი ცნობა. მშენებლობითა და ქადაგებით, რომელსაც ნოე ეწეოდა, ღმერთი მიმართავდა მათ გონებასა და გულებს. მათ ჰქონდათ გამოხმაურების ყოველგვარი შესაძლებლობა, მაგრამ, ნაცვლად ამისა, ისინი „არას დაგიდევდნენ, ვიდრე არ მოვიდა წარღვნა და წალეკა ყველანი“ (მათე 24:39, სსგ).

იეჰოვას მიუკერძოებლობის რა შესანიშნავი მაგალითია! ამ კრიტიკულ უკანასკნელ დღეებში, იეჰოვას მსახურებს ეს აღძრავს, იმავე მიუკერძოებლობით იქადაგონ კეთილი ცნობა სამეფოს შესახებ. გარდა ამისა, ისინი არ მალავენ ცნობას იეჰოვას შურისგების დღის შესახებ. ყოველგვარი მიკერძოების გარეშე, ყველას თვალწინ, ყველას მოსასმენად აცხადებენ იეჰოვას ცნობას (ესაია 61:1, 2).

იეჰოვას აღთქმებმა პატრიარქ აბრაამის, ისაკისა და იაკობის მიმართ ცხადი გახადა, რომ ის არის მიუკერძოებელი ღმერთი. მათი განსაკუთრებული ოჯახური ხაზიდან უნდა მოსულიყო დანიშნული პიროვნება, რომლის მეშვეობითაც ‘იკურთხებოდა მთელი ქვეყნის ხალხი’ (დაბადება 22:18; 26:4; 28:14). ქრისტე იესომ დაამტკიცა, რომ თვითონ იყო ეს დანიშნული პიროვნება. იესოს სიკვდილითა და აღდგომით იეჰოვამ უზრუნველყო ხსნის გზა ყველა მორჩილი ადამიანისთვის. დიახ, ქრისტეს გამომსყიდველური მსხვერპლიდან სარგებლობა შეუძლია ყველას, ყოველგვარი მიკერძოების გარეშე.

მოსეს დროს, ცელაფხადის ქალიშვილებთან დაკავშირებით, იეჰოვას მიუკერძოებლობამ ყველაზე საინტერესო სახით იჩინა თავი. ეს ხუთი ქალი იდგა დილემის წინაშე, აღთქმულ ქვეყანაში მამის მემკვიდრეობის საკითხთან დაკავშირებით. ამის მიზეზი კი იყო შემდეგი: ისრაელში ჩვეულების თანახმად, მამული მემკვიდრეობით მხოლოდ ვაჟებზე გადადიოდა. მაგრამ ცელაფხადი ისე მოკვდა, რომ არ დარჩენია ვაჟი, რომელიც მემკვიდრეობას მიიღებდა. ამიტომ ცელაფხადის ხუთმა ქალიშვილმა თავისი თხოვნა მიუკერძოებლად განსჯის მიზნით მოსეს წარუდგინა: „რატომ უნდა გაქრეს მამაჩვენის სახელი მისი საგვარეულოდან იმის გამო, რომ ვაჟი არ ჰყავს? მოგვეცით ჩვენ სამკვიდრო მამაჩვენის ძმებს შორის“. იეჰოვამ მოისმინა მათი მუდარა და მოსე დაარიგა: „თუ ვინმე მოკვდა და ვაჟი არ დარჩა, მისი სამკვიდრო მის ასულზე გადაიტანეთ“ (რიცხვნი 27:1–11).

რა სიყვარულით აღსავსე მიუკერძოებლობის მაგალითია! იმის უზრუნველსაყოფად, რომ ქალიშვილების გათხოვების დროს ერთი შტოს მემკვიდრეობა სხვაზე არ გადასულიყო, მათ მოეთხოვებოდათ მხოლოდ „მამისეული შტოს საგვარეულოებში“ გათხოვილიყვნენ (რიცხვნი 36:5-12).

იეჰოვას მიუკერძოებლობა კიდევ ნათლად ჩანს მსაჯული და წინასწარმეტყველი სამუელის დროს. იეჰოვამ სამუელი აღჭურვა უფლებით, მეფედ ეცხო ახალი პიროვნება იუდას ტომიდან, ბეთლემელი იესეს ოჯახიდან. მაგრამ იესეს რვა ვაჟი ჰყავდა. ვინ იქნებოდა ცხებული მეფედ? ელიაბის აღნაგობამ სამუელზე დიდი შთაბეჭდილება მოახდინა. მაგრამ იეჰოვაზე გავლენას არ ახდენს გარეგნობა. მან სამუელს უთხრა: „ნუ უყურებ მის გარეგნობას და ტანის სიმაღლეს. . . ისე არ არის, როგორც კაცი ხედავს. რადგან კაცი მხოლოდ იმას ხედავს, რაც თვალში ხვდება, ხოლო უფალი გულს ხედავს“. ამორჩეული იყო იესეს უმცროსი ვაჟი დავითი (პირველი მეფეთა 16:1, 6–13).

ვისწავლოთ იეჰოვას მიუკერძოებლობიდან

ქრისტიანი უხუცესები კარგად იქცევიან, როცა ბაძავენ იეჰოვას და ყურადღებას აქცევენ თანამორწმუნეების სულიერ თვისებებს. ადვილია, საკუთარი საზომით განვსაჯოთ პიროვნება და პირად გრძნობებს ნება დავრთოთ, დაჩრდილონ ჩვენი საღი აზროვნება. ერთი უხუცესი გვიყვება: „ვცდილობ, იეჰოვას მოსაწონად მოვექცე ადამიანებს და არა საკუთარი წინასწარშექმნილი აზრის საფუძველზე“. რა სასარგებლო იქნებოდა იეჰოვას ყველა მსახურისთვის, თავის კრიტერიუმად ღვთის სიტყვა გამოეყენებინა!

ზემოთ მოყვანილი ბიბლიური მაგალითები დაგვეხმარება, დავძლიოთ დიდი ხნის განმავლობაში ნატარები რასობრივი თუ ნაციონალისტური წინასწარაკვიატებულობის გრძნობები. იეჰოვას მიუკერძოებლობისადმი მიბაძვით კრებას წინასწარაკვიატებულობის, დისკრიმინაციისა და ფავორიტიზმისაგან დავიცავთ.

მოციქული პეტრესთვის ნათელი გახდა, რომ „ღმერთი მიკერძოებული არ არის“ (საქმეები 10:34). ფავორიტიზმი მიუკერძოებლობის მტერია და ბღალავს სიყვარულისა და ერთიანობის პრინციპებს. იესო მიმართავდა ღარიბ, დაძაბუნებულ, უბრალო ხალხს და მათ ტვირთს უმსუბუქებდა (მათე 11:28–30). იესო ძალიან განსხვავდებოდა იუდეველთა რელიგიური ბელადებისგან, რომლებიც ხალხზე უფლობდნენ და მათ კანონების მძიმე ტვირთს ჰკიდებდნენ (ლუკა 11:45, 46). ამის გაკეთება და მდიდრებისა და განთქმული პიროვნებებისადმი განსაკუთრებული კეთილგანწყობილების გამოვლენა არ შეესაბამება ქრისტეს მოძღვრებას (იაკობი 2:1–4, 9).

დღეს ქრისტიანი უხუცესები ემორჩილებიან ქრისტეს ხელმძღვანელობას და იეჰოვასადმი მიძღვნილი ყველა ადამიანის მიმართ მიუკერძოებლობას ავლენენ. როცა ისინი ‘მწყემსავენ ღვთის სამწყსოს, რომელიც მათ შორისაა’, თავს იკავებენ ფავორიტიზმის გამოვლენისგან ეკონომიური მდგომარეობის, პიროვნული თვისებების ან ნათესაური კავშირების გამო (1 პეტრე 5:2). მიუკერძოებელი ღვთის მიბაძვითა და ფავორიტიზმის წინააღმდეგ მისი გაფრთხილების მიყოლით ქრისტიანი უხუცესები ხელს უწყობენ კრებაში მიუკერძოებლობის სულს.

იეჰოვას მოწმეთა ქრისტიანული კრება ინტერნაციონალური საძმოა. ეს იმის ცოცხალი მაგალითია, რომ იესო ქრისტეს ხელმძღვანელობით ნამდვილად შეიძლება არსებობდეს წინასწარაკვიატებულობისგან თავისუფალი, მიუკერძოებელი საზოგადოება. მოწმეები ‘შეიმოსნენ ახალ კაცად, რომელიც შექმნილია ღვთისამებრ, სიმართლითა და ჭეშმარიტების სიწმიდით’ (ეფესელთა 4:24). დიახ, ისინი სწავლობენ მიუკერძოებელი ღვთის, იეჰოვას, სრულყოფილი მაგალითიდან და აქვთ ყოველგვარი მიკერძოებისგან თავისუფალ, ახალ ქვეყნიერებაში მარადიულად ცხოვრების პერსპექტივა (2 პეტრე 3:13).

[სქოლიოები]

[სურათი 31 გვერდზე]

პეტრე მოციქულისთვის ნათელი გახდა, რომ ღმერთი მიკერძოებული არ არის.