‘მრავალ ადამიანთაგან მხოლოდ ერთ-ერთი, რომელთა ცხოვრებასაც შეეხეთ’
გასული 1996 წლის იანვარში კერელი ტვინის სიმსივნით იტანჯებოდა. ის ცხოვრების მეექვსე ათწლეულში იყო და ამ დრომდე ის ყოველთვის ბედნიერი და ჯანმრთელი ქალი იყო, რომელსაც ყველასთვის გამამხნევებელი სიტყვა მოეძებნებოდა. ახლა კი ექიმები მომაკვდინებელი სიმსივნის ზრდის შეჩერებას ცდილობდნენ. ასეთ მდგომარეობაში კერელმა მიიღო შემდეგი წერილი:
„ძვირფასო კერელ,
ძალიან დამამწუხრა თქვენი ჯანმრთელობის დასუსტებამ. საბედნიეროდ, ჩვენ ნამდვილი იმედი გვაქვს, რომლის შემეცნებასა და სიყვარულში ბიბლია გვეხმარება. ეს იეჰოვას სამეფოს იმედია, რომ მართოს დედამიწა, რათა შეგვეძლოს ცხოვრება სამოთხის პირობებში, პერიოდში, რომელსაც ყველა მოუთმენლად მოველით.
მსურს იცოდეთ, რომ თქვენმა სამქადაგებლო მსახურებამ მრავალი გადაარჩინა საუკუნო სიკვდილისგან. მე ამ ადამიანთაგან ერთ-ერთი ვარ. დარწმუნებული არ ვარ, თუ გახსოვთ ჩვენი პირველი შეხვედრა. მაშინ 20 წლის ვიყავი. გრძელი თმა მქონდა, ნარკოტიკებით ვვაჭრობდი და ხულიგნების კომპანიაში დავეხეტებოდი. ყველას იარაღი გვქონდა და საკუთარი თავის გარდა არავინ გვიყვარდა.
ერთ-ერთ იეჰოვას მოწმესთან ერთად ჩემს კარზე დააკაკუნეთ და შემომთავაზეთ ჟურნალები „საგუშაგო კოშკი“ და „გამოიღვიძეთ!“ ერთი ამერიკული დოლარის მოცემას შევეცადე და ჟურნალებზე უარი გითხარით. თქვენ შემატყობინეთ, რომ მოსვლის მიზანი მხოლოდ შესაწირავების აკრეფა არ იყო. აგრეთვე მითხარით, რომ ამ საქმიანობას ადამიანებისთვის ბიბლიის კითხვაში დასახმარებლად ასრულებდით. დარწმუნებით ვერ გეტყვით, თუ ავიღე ჟურნალები და წავიკითხე. მაგრამ ჩემს ცხოვრებაში თქვენ ჭეშმარიტების თესლი ჩათესეთ.
რამდენიმე წლის შემდეგ სხვა იეჰოვას მოწმე, გარი, დედაჩემის სახლში მოვიდა; ამ დროს მეც იქ ვიყავი. თქვენს მონახულებაზე ვუამბე, რომლის შემდეგაც წლები გავიდა. გარი დიდი ხნის განმავლობაში მასწავლიდა ბიბლიას, სანამ საბოლოოდ 1984 წელს არ მოვინათლე. დღეს ღვთის სამეფოს შესახებ ჭეშმარიტებას ჩემს შვილებს ვასწავლი.
დარწმუნებული ვარ, რომ მრავალ ადამიანთაგან მხოლოდ ერთ-ერთი ვარ, რომელთა ცხოვრებასაც თქვენ ერთგული მსახურების წლებში შეეხეთ. როგორც არ უნდა იყოს, სწორედ ასეთი სიყვარულით აღსავსე გულკეთილობით მოგვეცით საშუალება მე და ჩემს ოჯახს, შეგვეცნო დიდებული ღმერთი იეჰოვა და მისი ძე, ქრისტე იესო. მოუთმენლად ველი იმ დღეს, როცა შევძლებ თქვენს ნახვას ახალ ქვეყნიერებაში, როცა იეჰოვა მოსწმენდს ყველა ცრემლს ჩვენი თვალებიდან და სიკვდილი აღარ იქნება (გამოცხადება 21:4).
ხოლო მე და ჩემი ოჯახი მოხარულები ვართ, რომ შესაძლებლობა გვაქვს, გიცნობდეთ თქვენ და დამოწმებაში თქვენი მოღვაწეობის ნაწილი ვიყოთ. გმადლობთ.
ძმური სიყვარულით
პიტერი“.
ავადმყოფობის ექვსი თვის შემდეგ, 1996 წლის მარტში, კერელი გარდაიცვალა; გულმოდგინე მახარობლად 35 წლიანი ცხოვრების მანძილზე მან ჭეშმარიტების მრავალი თესლი ჩათესა. მან შეიცნო, რომ ადამიანმა არასოდეს იცის ნაყოფის გამოღების დრო, რომელიც თესლმა შეიძლება წლების შემდეგაც კი გამოიღოს (მათე 13:23).