სამეფოს მაუწყებლები იტყობინებიან

დემონური ზეგავლენისგან გათავისუფლება

სპირიტიზმი დიდი ხანია ბატონობს მილიონობით ადამიანის ცხოვრებაზე. მაგრამ გათავისუფლება შესაძლებელია! აი, რა მოხდა ძველ ქალაქ ეფესოში. ბიბლიური ცნობის თანახმად, „მრავალმა მათგანმა, ვინც ეწეოდა ჯადოსნობას, მოაგროვა წიგნები და დაწვა. . . ასე ძლიერად იზრდებოდა და ძალას იკრებდა უფლის სიტყვა“ (საქმეები 19:19, 20).

ქრისტიანული კრება დღესაც იზრდება. ეფესოში მომხდარის მსგავსად, მათ შორის, ვინც მორწმუნეები ხდებიან, არიან ისეთები, ვინც ადრე დემონიზმს ეწეოდნენ. ეს ჩანს ზიმბაბვეში მომხდარი შემდეგი შემთხვევიდან.

ბებია მთუფა კარგად იყო ცნობილი თავისი სპირიტული შესაძლებლობებით. ხალხური მედიცინით სამკურნალოდ ხალხი მასთან ისეთი შორი მანძილიდან მიდიოდა, როგორიცაა: ზამბია, ბოტსვანა და სამხრეთ აფრიკა. ბებია მთუფა ასწავლიდა კიდეც სხვებს, როგორ გამხდარიყვნენ „ნ’ანგები“, ანუ ექიმბაშები. ზოგჯერ კი ის შელოცვებს წარმოთქვამდა.

ერთ კვირა დილას ბებია მთუფას მიაკითხეს იეჰოვას მოწმეებმა, რომლებიც კარდაკარ მსახურებას ეწეოდნენ. მას უზომო სიხარული მოუტანა სამართლიან ახალ ქვეყნიერებასთან დაკავშირებული ბიბლიური დანაპირების მათთან ერთად განხილვამ — ქვეყნიერებისა, რომელიც თავისუფალი იქნებოდა ყოველგვარი ბოროტი ზეგავლენისგან. მან გამოართვა წიგნი „შენ შეგიძლია მარადიული ცხოვრება სამოთხეში დედამიწაზე“a და ბიბლიის საშინაო შესწავლაზე დათანხმდა. სულ მხოლოდ სამი შესწავლის შემდეგ მან შეხვედრებზე დასწრება დაიწყო.

ბიბლიის შესწავლის საშუალებით ბებია მთუფამ გაიგო, რომ მისი განსაკუთრებული შესაძლებლობები მოდიოდა ბოროტი სულიერი ქმნილებებისგან, რომლებიც იეჰოვას უზენაეს ხელისუფლებას აუჯანყდნენ (2 პეტრე 2:4; იუდა 6). მან აგრეთვე გაიგო, რომ ეს დემონები ავსილნი არიან გადაწყვეტილებით — შეძლებისდაგვარად ყველა აამხედრონ იეჰოვასა და წმინდა თაყვანისმცემლობის წინააღმდეგ. რამდენადაც მისი სარჩო ამ ბოროტი სულიერი ქმნილებების გამოძახებაზე იყო დამოკიდებული, რას გააკეთებდა ის?

ბებია მთუფამ გამოთქვა ძლიერი სურვილი — ჩამოეცილებინა ყველა თავისი ამულეტი და სპირიტული ნივთი. ამაში შედიოდა მისი სპეციალური თავსაბურავი და „ხარის მოლაპარაკე რქები“, რომლებსაც თავის „ნ’ანგა“ მკურნალობაში იყენებდა. ბებია მთუფას თითოეული ასეთი საგნის ჩამოცილება სურდა, რომ შეძლებოდა ერთადერთი ჭეშმარიტი და ცოცხალი ღვთისთვის, იეჰოვასთვის, ემსახურა.

მაგრამ ზოგი ნათესავი შეეწინააღმდეგა მას, რადგან ის ფინანსურად ეხმარებოდა მათ. ისინი შეეხვეწნენ, მათთვის გადაეცა ნივთები და თავისი ზებუნებრივი ძალები, რომ კვლავ შეძლებოდათ მოგების ნახვა. ბებია მთუფამ უარი უთხრა.

იეჰოვას მოწმეთა ადგილობრივი კრების დახმარებით მან სპირიტული აღჭურვილობით სამი დიდი ჩანთა გაავსო და ყველაფერი დაწვა. როცა მისი დემონური თაყვანისცემის იარაღები ცეცხლის ალში გაეხვია, ბებია მთუფამ წამოიძახა: „შეხედეთ! ის რქა — იგი თავის თავს ვერ შველის“.

დროთა განმავლობაში ბებია მთუფამ სიხარულით მიუძღვნა თავი იეჰოვას და ამის სიმბოლოდ წყალში მოინათლა. რით ირჩენს ის ახლა თავს? ბოსტნეულის გაყიდვით. დიახ, ღვთის სიტყვის ძალით პიროვნებას შეუძლია დემონური ზეგავლენისგან გათავისუფლება. ბებია მთუფა ამბობს: „არასოდეს მიგრძვნია ასეთი თავისუფლება“.

[სქოლიოები]