რატომ უნდა ვიყოთ მადლიერნი?
ხერხემლის ოპერაციამ ჰარლი იძულებული გახადა, მანქანათმშენებლობა ოფისში მუშაობაზე გაეცვალა. შეკითხვაზე, თუ რას გრძნობდა ამ ცვლილებასთან დაკავშირებით, ჰარლმა უპასუხა: „ზოგჯერ მენატრება მანქანის მექანიზმებთან მუშაობა, მაგრამ, თუ გულწრფელად ვიტყვი, ახლანდელი სამუშაო უფრო მეტ ბედნიერებას მანიჭებს“.
კმაყოფილების ამ გრძნობის მიზეზს ჰარლი შემდეგნაირად ხსნის: „ამაში დიდ როლს იმ ხალხის განწყობილება ასრულებს, ვისთანაც ვმუშაობ. ჩემი ადრინდელი სამუშაო ადგილისგან განსხვავებით, აქაური ხელმძღვანელი და თანამშრომლები მადლიერები არიან ჩემ მიერ გაკეთებული საქმით და ისინი ყოველთვის მზად არიან მოწონების სიტყვების გამოსათქმელად. სწორედ ეს არის დიდი სხვაობის მიზეზი“. იმის გრძნობამ, რომ გამოსადეგი და საჭირო იყო, ჰარლი ბედნიერ მუშაკად აქცია.
დამსახურებული მოწონების ან მადლიერების სიტყვები ნამდვილად გულში ჩამწვდომია. მეორე მხრივ, უმადურობა შეიძლება ისეთი დამსუსხველი იყოს, როგორც შექსპირი აღნიშნავდა: „დაუბერე, დაუბერე, ზამთრის ქარო. შენგან თავი ნაკლებ უნდა დავიფაროთ, კაცს არ გავხარ, არ ხარ მისებრ უმადური, არც კბილები გაგაჩნია მისებრ ბასრი“. სამწუხაროდ, ცხოვრებაში მრავლის მიმართ გამოუვლენიათ მსგავსი უმადურობა.
უმადურობისგან თავდაცვა
დღევანდელ მსოფლიოში იშვიათად თუ მოისმენ გულწრფელი მადლიერების სიტყვებს. მაგალითად, ერთმა მწერალმა ასეთი კითხვა დასვა: „თუ პატარძალმა 200 მოსაწვევის გასაგზავნად გამონახა დრო, რატომ ვერ გამონახა დრო, რომ 163 საქორწილო საჩუქრის მომტანისთვის მადლიერების გამომხატველი პატარა ბარათები გაეგზავნა?“ ხშირად ხალხს „მადლობის“ თქმაც კი ავიწყდება. მადლიერებას უფრო და უფრო ცვლის საკუთარი მეს პირველ ადგილზე დაყენება. ეს მდგომარეობა უკანასკნელი დღეებისთვის დამახასიათებელი ერთ-ერთი ნიშანია. მოციქული პავლე იძლეოდა გაფრთხილებას: «ეს კი იცოდე, რომ უკანასკნელ დღეებში საზარელი ჟამი დადგება, ვინაიდან ადამიანები იქნებიან თავმოყვარენი [„უკიდურესად ეგოისტები“, ფილიპსის თარგმანი]. . . უმადურნი» (2 ტიმოთე 3:1, 2).
ზოგჯერ მადლიერებას პირფერობა ცვლის. მადლიერების სიტყვები გულიდან, ყოველგვარი პირადი გამორჩენის ძიების გარეშე, უნდა მოდიოდეს. ხოლო პირფერობა, ჩვეულებრივ, გულწრფელობას მოკლებული და გაზვიადებულია, რომელიც შესაძლოა დაწინაურების ან გარკვეული პირადი გამორჩენის ფარულ აღძვრაზეა დაფუძნებული (იუდა 16). გარდა იმისა, რომ ეს ადამიანის მოტყუებაა, შემპარავ სიტყვებს ამპარტავანი და ქედმაღალი პიროვნებები იყენებენ. თუ ისურვებდა ვინმე მლიქვნელური პირფერობის მსხვერპლი გამხდარიყო? წრფელი გულიდან გამომდინარე მადლიერება კი ნამდვილად სიხარულის მომნიჭებელია.
მადლიერების გამოხატვა, თვით მისი გამომხატველისთვისაც სასარგებლოა. მადლიერი გულიდან გამომდინარე სითბო თვით წარმომთქმელის ბედნიერებასა და სიმშვიდეს უწყობს ხელს (შეადარე იგავნი 15:13, 15). და, ვინაიდან მადლიერება დადებითი თვისებაა, ის ისეთი უარყოფითი ემოციებისგან გვიცავს, როგორიცაა: რისხვა, შური და გულისწყრომა.
„იყავით მადლიერნი“
ბიბლია მადლიერების სულის განვითარებისკენ მოგვიწოდებს. პავლე წერდა: „მადლიერნი იყავით ყველაფრისათვის, ვინაიდან ეს არის თქვენს მიმართ ღვთის ნება ქრისტე იესოში“ (1 თესალონიკელთა 5:18). ის კოლასელებს ურჩევდა: „ბატონობდეს თქვენს გულებში ღვთის მშვიდობა. . . და იყავით მადლიერნი“ (კოლასელთა 3:15). მრავალი ფსალმუნი შეიცავს მადლიერების გამომხატველ გამოთქმებს, რაც იმაზე მიუთითებს, რომ გულითადი მადლიერება ღვთისმოსაწონი თვისებაა (ფსალმუნი 68:31; 49:14). ნათელია, რომ იეჰოვა ღმერთს სიამოვნებს, როდესაც ყოველდღიურ ცხოვრებაში მადლიერებას ვავლენთ.
მაგრამ რა ფაქტორები გვიძნელებს ამ უმადურ წუთისოფელში მადლიერების სულის განვითარებას? როგორ შეგვიძლია მადლიერების ყოველდღიურ ცხოვრებაში გამოვლენა? ეს საკითხები განხილული იქნება მომდევნო სტატიაში.