ეკლესიები აღიარებენ

„პაპი განსაცდელში აგდებს ეკლესიას“. „ინკვიზიცია და ანტისემიტიზმი — ეკლესია ემზადება Mea Culpa-სთვისa. „ Mea Culpa ჰოლოკაუსტთან დაკავშირებით“. „მეთოდისტები ბოდიშს უხდიან დასავლეთ შეერთებულ შტატებში მცხოვრებ ინდიელებს“.

წაგიკითხავთ ოდესმე საგაზეთო წერილის მსგავსი სათაური? როგორც ჩანს, ეკლესია სულ უფრო და უფრო აღიარებს დანაშაულს და ბოდიშს იხდის საუკუნეების განმავლობაში ჩადენილი დანაშაულისთვის. მასობრივი ინფორმაციის საშუალებები ხშირად აშუქებენ პაპის მორიგ Mea Culpa-ს.

როდესაც პაპი მიტევებას ითხოვს

1980—1996 წლებში იოანე-პავლე II-მ, სულ მცირე, 94-ჯერ „აღიარა ეკლესიების ისტორიული დანაშაული ან მიტევება ითხოვა“, — აღნიშნავს ვატიკანის კომენტატორი ლუიჯი აკატოლი თავის წიგნში „როდესაც პაპი მიტევებას ითხოვს“ (Quando il papa chiede perdono). აკატოლის ნათქვამის თანახმად, „კათოლიკურ ეკლესიაში მხოლოდ პაპს შეუძლია ამის სათანადოდ გაკეთება“. ეს კი კათოლიციზმის ისტორიის ფურცლებზე მრავალი ისეთი საპოლემიკო გვერდების არსებობითაა განპირობებული, როგორიცაა: ჯვაროსნული ლაშქრობები, ომები, დიქტატურის მხარდაჭერა, ეკლესიების დაყოფა, ანტისემიტიზმი, ინკვიზიციები, მაფია და რასიზმი. 1994 წელს კარდინალებისთვის გაგზავნილ მემორანდუმში (რომელსაც ზოგი პონტიფიკატის ყველაზე მნიშვნელოვან დოკუმენტად მიიჩნევს) იოანე-პავლე II-მ წამოაყენა წინადადება: „საყოველთაოდ ეღიარებინათ მეორე ათასწლეულში ჩადენილი ცოდვები“.

რამდენიმე პრელატმა მიბაძა პაპის მაგალითს. 1994 წლის დეკემბერში ერთ-ერთი იტალიური გაზეთი იუწყებოდა: „მრავალი ამერიკელი ეპისკოპოსი გამოვიდა ტელევიზიით და საჯაროდ ითხოვა მიტევება“. რისთვის? იმის გამო, რომ სათანადო შეფასება არ მისცეს მღვდლების პედოფილობას, რამაც მრავალ ახალგაზრდას ცხოვრება დაუმახინჯა (Il Giornale). ერთ-ერთი გაზეთის 1995 წლის იანვრის ნომერში ნათქვამი იყო „თანამედროვე კათოლიციზმის ისტორიაში უპრეცედენტო შემთხვევის შესახებ“, რომელიც ჰოლოკაუსტთან დაკავშირებით პაპა პიუს XII-ის დუმილს შეეხებოდა (La Repubblica). 1995 წლის იმავე გაზეთის იანვრის ნომერში ნათქვამი იყო, რომ გერმანულმა ეპარქიამ მიტევება ითხოვა იმ „მრავალი დანაშაულისთვის“, რომელიც კათოლიკებმა ნაცისტური ბოროტმოქმედებების მხარდაჭერით ჩაიდინეს. მრავალმა პროტესტანტულმა ეკლესიამაც გააკრიტიკა საკუთარი თავი.

რატომ?

ბიბლია მოგვიწოდებს, რომ დანაშაულის ჩადენის შემთხვევაში მიტევება ვითხოვოთ, ამიტომ მრავალი მიესალმება ეკლესიების თვითკრიტიკას (იაკობი 5:16). მაგრამ რატომ აკეთებენ ამას ეკლესიები? როგორი გავლენა უნდა იქონიოს ამან მათ შესახებ ჩვენს თვალსაზრისზე?

[სქოლიოები]