სასიხარულო მოვლენა — „გალაადის“ 104-ე კლასის გამოშვება
„ეს სასიხარულო დღეა და ყველა ვხარობთ“. ამ სიტყვებით გახსნა 1998 წლის 14 მარტს კერი ბარბერმა, იეჰოვას მოწმეთა ხელმძღვანელი საბჭოს წევრმა, „საგუშაგო კოშკის“ ბიბლიური სკოლა „გალაადის“ 104-ე კლასის გამოსაშვები ზეიმი. 4 945 დამსწრისგან შემდგარმა აუდიტორიამ ეს მოვლენა დაიწყო №208 სამეფო სიმღერით, სახელწოდებით „საზეიმო სიმღერა“.
სასარგებლო რჩევა სიხარულის შენარჩუნებასთან დაკავშირებით
პროგრამის შესავალ ნაწილში ბიბლიაზე დაფუძნებული ხუთი მოკლე მოხსენების სერიით შემოთავაზებულ იქნა რამდენიმე სასარგებლო რჩევა იმასთან დაკავშირებით, თუ როგორ შევინარჩუნოთ სიხარულით აღსავსე სული, რომელიც გამოსაშვებ დღეს სუფევდა.
პირველი მოხსენება სამწერლო განყოფილების წევრმა ჯოზეფ იმსმა წარმოადგინა. მან ისაუბრა თემაზე „მიბაძეთ ერთგულთა სულს“, რომელიც დაფუძნებული იყო ბიბლიურ ცნობაზე მეორე მეფეთა მე-15 და მე-17 თავებიდან, სადაც საუბარია დავითის ძის, აბესალომის, მიერ შეთქმულების მოწყობაზე — მას სურდა, აჯანყების საშუალებით ხელში ჩაეგდო მამამისისთვის ღვთის მიერ ბოძებული სამეფო. მაგრამ იქ იყვნენ ისეთებიც, რომლებმაც უერთგულეს იეჰოვას მიერ ცხებულ მეფე დავითს. რის სწავლა შეეძლოთ აქედან ახალ მისიონერებს? „სადაც არ უნდა დაგნიშნონ მისიონერებად, ერთგულებით ხელი შეუწყეთ თეოკრატიულად უფლებამოსილ პირებთან თანამშრომლობისა და მათი პატივისცემის სულს. დაეხმარეთ სხვებს იმავეს გაკეთებაში“, — დააბოლოვა ძმა იმსმა.
პროგრამაში შემდეგი დეივიდ სინკლერი იყო, რომელმაც ზოგადად მოხაზა მე-14 ფსალმუნში მოხსენიებული ათი მოთხოვნა ‘იეჰოვას კარავში’ დასადგურებისთვის. მისმა მოხსენებამ, სახელწოდებით „დაისადგურეთ თქვენს მისიონერულ კარავში“, კურსდამთავრებულები წაახალისა, ეს ფსალმუნი გამოიყენონ თავიანთ მისიონერულ დანიშნულებებში, სადაც დაისადგურებენ. ძმა სინკლერმა ხაზი გაუსვა, თუ რამდენად მნიშვნელოვანია ყოველთვის ღვთის ნორმებით ცხოვრება. შედეგი? ფსალმუნის 14:5 ამბობს: „ამის მოქმედი არასოდეს წაფორთხილდება“.
შემდეგი იყო ჯონ ბარი, ხელმძღვანელი საბჭოს წევრი, რომელმაც ყურადღება გაამახვილა ქრისტიანულ შეხვედრებზე სიმღერის გამომაცოცხლებელ გავლენაზე. მაგრამ დღეს რომელ სასიხარულო სიმღერას მღერიან მთელ დედამიწაზე? ეს არის კეთილი ცნობა ღვთის მესიანური სამეფოს შესახებ. რა შედეგი მოაქვს ამ სიმღერის შესრულებას, ანუ სამეფოს შესახებ ქადაგებას? ამას მოკლედ გადმოსცემს №208 სიმღერის მეორე სტროფი: „სამეფოს ცნობის სწავლებით მოდის დღეს იეჰოვა ღმერთთან ბევრი. ისინიც ერთად მღერიან, ყველგან ჟღერს საზეიმო სიმღერები!“ დიახ, ყოველდღე დაახლოებით 1 000 ახალი მოწაფე ინათლება. ძმა ბარმა დაასრულა: „განა შესანიშნავი არაა იმაზე ფიქრი, ძმებო, რომ თქვენ იგზავნებით ტერიტორიებზე, რათა შეხვდეთ ადამიანებს, რომლებიც სადიდებელი სიმღერის მოსასმენად გელოდებიან?“
„უსმინეთ გამოცდილების ხმას“ — ეს იყო იმ მოხსენების სახელწოდება, რომელიც შემდეგ წარმოადგინა ჯეიმზ მანცმა, სამწერლო განყოფილების წევრმა. მან აღნიშნა, რომ ზოგი რამის სწავლა მხოლოდ პირადი გამოცდილებითაა შესაძლებელი (ებრაელთა 5:8). მიუხედავად ამისა, იგავნის 22:17 მოგვიწოდებს, ‘ყური დავუგდოთ და მოვუსმინოთ ბრძენკაცთა სიტყვებს’, ანუ იმათ სიტყვებს, ვინც გამოცდილია. კურსდამთავრებულებს ბევრი რამის სწავლა შეუძლიათ მათზე გამოცდილ პირთაგან. „მათ იციან, როგორ შეევაჭრონ ადგილობრივ მაღაზიის მესაკუთრეებს. მათ იციან, ქალაქის რომელ უბნებს უნდა მოერიდო, რომ რაიმე ხიფათში არ გაეხვიო ან ზნეობრივი შეურაცხყოფის მსხვერპლი არ გახდე. მათ იციან, რა აღიზიანებს იქაურ ხალხს. დიდი ხნის მისიონერებმა იციან, რა გჭირდებათ სიხარულისა და წარმატებისთვის თქვენს დანიშნულებაში“, — თქვა ძმა მანცმა.
თემაზე „დააფასეთ თქვენი თეოკრატიული დანიშნულება“ საუბრისას უოლას ლივერანსმა, სკოლა „გალაადის“ რეგისტრატორმა, ახსნა, რომ, მაშინ როცა ზოგმა მისიონერმა — მაგალითად: მოციქულმა პავლემ, ტიმოთემ და ბარნაბამ — დანიშნულება ღვთისგან მიიღო სულიწმიდის საშუალებით თუ ზებუნებრივი სახით, „გალაადში“ მომზადებული მისიონერები მსოფლიოს სხვადასხვა კუთხეში დანიშნულებებს ‘ერთგული და გონიერი მონისგან’ ღებულობენ (მათე 24:45–47). მისიონერთა დანიშნულებები მან შეადარა ადგილებს, რომლებიც გედეონმა მიდიანელებთან ბრძოლის წინ მიუჩინა თავის მეომრებს (მსაჯულნი 7:16–21). «დააფასეთ თქვენი თეოკრატიული მისიონერული დანიშნულება. როგორც გედეონის მეომრებიდან „ყველა თავ-თავის ადგილას იდგა“, თქვენც დანიშნულებას უყურეთ როგორც ადგილს, რომელზეც უნდა იდგეთ. გწამდეთ, რომ იეჰოვას შეუძლია ისევე გამოგიყენოთ, როგორც გედეონის სამასი მეომარი გამოიყენა», — თქვა ძმა ლივერანსმა.
ადამიანებისადმი ინტერესის გამოვლენას სიხარული მოაქვს
„საგუშაგო კოშკში“ ერთხელ ასეთი კომენტარი იყო: „ნაცვლად იმისა, რომ ჩვენი ინტერესები და ცხოვრება ავაგოთ წუთისოფლისეულ მატერიალურ საგნებსა და მოწყობილობებზე —იმაზე, რაც წარმავალია — რამდენად უკეთესი და ბრძნული იქნებოდა, ადამიანებისადმი გამოგვევლინა გულწრფელი ინტერესი და გვესწავლა ნამდვილი სიხარულის პოვნა სხვებისთვის რამის გაკეთებაში“. თანახმად ამისა, ძმა მარკ ნიუმარმა, სკოლა „გალაადის“ ერთ-ერთმა მასწავლებელმა, სტუდენტების ჯგუფთან ერთად განიხილა შემთხვევები მათი სამქადაგებლო მსახურებიდან და თქვა: „სხვების მიმართ ინტერესის გამოვლენა ისაა, რაც კარგ მისიონერებს გაგხდით“.
სიხარულის გასაღები უცხოენოვან ტერიტორიაზე
რა წარმოადგენს მისიონერულ საქმეში წარმატებისა და სიხარულის გასაღებს? ჩარლზ ვუდიმ, სამსახურებრივი განყოფილების წევრმა, და ჰაროლდ ჯეკსონმა, ყოფილმა მისიონერმა ლათინურ ამერიკაში და სასწავლო კომიტეტის თანაშემწემ, ინტერვიუ აიღეს სხვადასხვა ფილიალის კომიტეტების წევრებისგან, რომლებიც ესწრებოდნენ ფილიალის პერსონალისთვის განკუთვნილი სკოლის მეცხრე კლასს. აი, ზოგი რამ იქიდან, რაც მათ ურჩიეს:
ალბერტ მიუსონდამ (ზამბია) შენიშნა: „როცა მისიონერი საკუთარ თავზე იღებს ინიციატივას, რომ მივიდეს და მიესალმოს ძმებს, ეს ძალიან კარგ სულს წარმოქმნის, რადგან ძმები მისიონერს დაუახლოვდებიან, მისიონერი კი — ძმებს“.
როლანდო მორალესმა (გვატემალა) აღნიშნა, რომ, როცა კეთილგანწყობილი ადამიანები ახალ მისიონერებს რამე დასალევს სთავაზობენ, მათ შეუძლიათ თავაზიანად და ტაქტიანად უპასუხონ: „ამ ქვეყანაში ახალი ვარ. სიამოვნებით დავლევდი, მაგრამ გამომუშავებული არა მაქვს იმუნიტეტი, რომელიც თქვენ გაქვთ. იმედი მაქვს, როდისმე შევძლებ დალევას, რასაც სიხარულით გავაკეთებ“. რა სარგებლობა მოაქვს ასეთ პასუხს? „ხალხს არ ეწყინება და მისიონერებიც თავაზიანობას გამოავლენენ“.
რა დაეხმარება მისიონერებს, განაგრძონ თავიანთი დავალებების შესრულება? ძმა პოლ კრიუდასმა, „გალაადის“ 79-ე კლასის კურსდამთავრებულმა, რომელიც ბოლო 12 წლის განმავლობაში ლიბერიაში მსახურობს, ასეთი რამ შენიშნა: «გასაგებია, რომ მშობლებს ენატრებათ შვილები. მაგრამ ზოგჯერ მისიონერი ცდილობს შეეჩვიოს ქვეყანას, გარემოს, კულტურას, ხალხს. შეიძლება ფიქრობდეს მისიონერული დანიშნულების მიტოვებას. და თუ ის სახლიდან წერილს ღებულობს სიტყვებით: „ძალიან მოგვენატრე; არ ვიცით, უშენოდ რას ვიზამთ“, ეს შეიძლება ბოლო ბიძგი იყოს იმისთვის, რომ აიკრას გუდა-ნაბადი და სახლში დაბრუნდეს. ნათესავებისთვის, რომლებიც დღეს აქ არიან, ძალიან მნიშვნელოვანია ამის დამახსოვრება».
ინტერვიუების შემდეგ თეოდორ იარაჩმა, ხელმძღვანელი საბჭოს წევრმა, პროგრამის ბოლო მოხსენება წარმოთქვა. მისი თემა იყო „ცხოვრებაში პირველ ადგილზე დააყენეთ სამეფო“. როგორ შეუძლიათ მისიონერებს მთელი ყურადღება თავიანთ საქმიანობაზე გადაიტანონ და არა სხვა რამეზე? მან წაახალისა ისინი, ჰქონდეთ განრიგი ბიბლიის პირადი შესწავლისთვის, რაც დაეხმარება ცხოვრებაში პირველ ადგილზე დააყენონ სამეფო. და, აი, შემდეგი დროული შეხსენება: „ზოგმა მისიონერმა მიუშვა პირადი შესწავლა იმის გამო, რომ ისინი გაიტაცა ელექტრონულმა მოწყობილობამ, E-mail-მა და კომპიუტერმა. ჩვენ საღად უნდა ვაზროვნებდეთ, რომ გაწონასწორებულები ვიყოთ ნებისმიერი რამის გამოყენებაში და მეტისმეტი დრო არ დავხარჯოთ იმაზე, რასაც შეუძლია ხელი შეგვიშალოს ღვთის სიტყვის პირად შესწავლაში“.
ძმა იარაჩის მოხსენებას მოჰყვა დიპლომების დარიგება და კლასის მიერ მადლიერების ნიშნად დაწერილი წერილის წაკითხვა. კლასის წარმომადგენელმა ყველას გრძნობა შემდეგნაირად გამოთქვა: „ჩვენ დავინახეთ იმ სიყვარულის საგრძნობი მტკიცება, რომელიც, იესოს სიტყვების თანახმად, დამახასიათებელი იქნებოდა მისი მოწაფეებისთვის, და ეს გვარწმუნებს, რომ, სადაც არ უნდა ვიყოთ, გულთბილი, მოსიყვარულე, დედის მსგავსი ორგანიზაცია მხარს გვიჭერს. ასეთი მხარდაჭერით მზად ვართ, დედამიწის კიდეებამდე წავიდეთ“. ამ გულისამაჩუყებელი დასკვნით დასრულდა „გალაადის“ 104-ე კლასის გამოსაშვები დღე.
[ჩარჩო 24 გვერდზე]
კლასის სტატისტიკური მონაცემები
წარმოდგენილი ქვეყნების რაოდენობა: 9
დანიშნულების ქვეყნების რაოდენობა: 16
სტუდენტების რაოდენობა: 48
დაქორწინებული წყვილების რაოდენობა: 24
საშუალო ასაკი: 33
ჭეშმარიტებაში გატარებული წლების საშუალო რაოდენობა: 16
სრული დროით მსახურებაში გატარებული წლების საშუალო რაოდენობა: 12
[სურათი 25 გვერდზე]
„საგუშაგო კოშკის“ ბიბლიური სკოლა „გალაადის“ 104-ე გამოსაშვები კლასი.
1) მ. რომერო, ჯ. ჰოუვართი, დ. ბლეკბერნ-კეინი, ე. ჰოუენგესერი, შ. უესტი, ს. თომი. 2) უ. კოლონი, ჯ. გლენსი, ი. კონო, პ. დრიუსი, ს. ტამი, ტ. კონო. 3) დ. ტამი, ზ. ზეხმაისტერი, ს. გერდელი, ჯ. ელუელი, პ. დენეკი, ჰ. ტიბოდო. 4) ე. ტეილორი, ლ. ჰილდრედი, მ. სანჩესი, კ. ანდერსონი, ტ. ბაკნორი, ე. ჰოუენგესერი. 5) დ. ჰოუვართი, შ. უორდი, პ. ჰინჩი, ი. მაკდონალდი, ტ. სანჩესი, ო. თომი. 6) ტ. დრიუსი, ი. ტიბოდო, დ. ელუელი, უ. დენეკი, დ. ბლეკბერნ-კეინი, ვ. უორდი. 7) მ. ანდერსონი, რ. ზეხმაისტერი, რ. მაკდონალდი, რ. ბაკნორი, ს. გლენსი, გ. გერდელი. 8) დ. რომერო, რ. ჰინჩი, ს. ჰილდრედი, ჯ. ტეილორი, ა. კოლონი, უ. უესტი.
[სურათი 26 გვერდზე]
ძმები, რომლებიც მონაწილეობდნენ 104-ე კლასის განსწავლაში: (მარცხნიდან) უ. ლივერანსი, ი. გლასი, კ. ადამსი, მ. ნიუმარი.