ცხოვრების საუკეთესო გზით გაერთიანებულნი
თუ მსოფლიოს მოსახლეობის ზრდა ჩვეული ტემპით გაგრძელდება მალე 6 მილიარდს მიაღწევს. თუმცა ყველა ისინი ერთი საერთო წინაპრიდან მოდიან, უმეტესობას, როგორც ჩანს, არ ესმის, რომ ერთი დიდი ოჯახის წევრია და ამ ოჯახს ბრძენი, მოსიყვარულე შემოქმედის წინაშე პასუხისმგებლობა აკისრია. ერებს, რასებსა და კულტურებს შორის ერთიანობის უქონლობა და განხეთქილებები ამ ოჯახის საცოდავ მდგომარეობაში ყოფნის პირქუშ დადასტურებას წარმოადგენს.
თანამედროვე მსოფლიო მდგომარეობის შემყურე ადამიანს გლობალური ერთიანობა შეიძლება მიუღწეველ მიზნად მოეჩვენოს. ერთ-ერთ წიგნში აღნიშნულია: „თანამედროვე მსოფლიო ვერავითარ ახალ აზრს ვერ გვთავაზობს უაღრესად მნიშვნელოვან კითხვაზე, თუ როგორ უნდა იცხოვროს ერთად ხალხმა“ (The Columbia History of the World).
მაგრამ მსოფლიოს მოსახლეობის გაერთიანებას სულაც არ სჭირდება რამე ახალი აზრი. ერთიანობისკენ მიმავალი ბილიკი ნაჩვენებია საღვთო წერილში. მასში ყურადღება გამახვილებულია დედამიწისა და მასზე არსებული სიცოცხლის ნებისმიერი ფორმის შემოქმედის თაყვანისმცემლობაზე. აზრების, მიზნებისა და ცხოვრების წესის ნამდვილი ერთიანობა უკვე არსებობს ღვთის ხალხს შორის. 233 ქვეყანაში ხუთ მილიონ-ნახევარზე მეტი მოწმე გაერთიანებულია იმ აზრით, რომ ღვთისმოსაწონი ცხოვრების გზა საუკეთესო გზაა. ფსალმუნმომღერლის მსგავსად, ისინი ლოცულობენ: „დამაყენე, უფალო, შენს გზაზე; ვივლი შენი ჭეშმარიტებისამებრ. წარმართე ჩემი გული შენი სახელის მოშიშებით“ (ფსალმუნი 85:11).
ესაიამ დიდი ხნის წინათ იწინასწარმეტყველა წმინდა თაყვანისმცემლობაში ხალხის ასეთი გაერთიანება. ის წერდა: „უკანასკნელ დღეებში იქნება, რომ უფლის სახლის მთა მთათა სათავეში დადგინდება, აღიმართება მწვერვალებზე მაღლა და ყოველი ერი მისკენ დაიწყებს დენას. დაიძრება უთვალავი ხალხი და იტყვის: მოდი, ავიდეთ უფლის მთაზე, იაკობის სახლში; გვასწავლოს თავისი გზები და მისი ბილიკებით ვიაროთ“ (ესაია 2:2, 3).
იეჰოვას მოწმეების ერთიანობა უნიკალურია. მთელ მსოფლიოში 87 000-ზე მეტ კრებაში ისინი ერთსა და იმავე სულიერ საზრდოს იღებენ (მათე 24:45–47). 1998 წლის მეორე ნახევარსა და 1999 წლის დასაწყისში იეჰოვას მოწმეებმა თავიანთი ერთიანობა სხვა სახითაც გამოავლინეს — ისინი მთელ მსოფლიოში შეიკრიბნენ სამდღიან კონგრესზე: „ღვთისმოსაწონი ცხოვრების გზა“. 13 ქვეყანაში თავი მოიყარა სხვადასხვა ქვეყნებიდან ჩამოსულმა საკმაოდ დიდმა დელეგაციებმა. ასეთი კონგრესები საერთაშორისო კონგრესები იყო, ხოლო სხვები — საოლქო. მაგრამ ყველა ამ კონგრესზე წარმოდგენილი იყო ერთი და იგივე სულიერად სასარგებლო საკითხები.
რა სასიამოვნო იყო ბედნიერ, კოხტად ჩაცმულ ადამიანთა ნაკადის ხილვა, რომლებიც დარბაზების ან სტადიონებისკენ მიედინებოდნენ, რათა იეჰოვასგან განსწავლულიყვნენ! მიჩიგანში (აშშ) ჩატარებული საერთაშორისო კონგრესის ერთ-ერთმა დელეგატმა გამოთქვა აზრი, რომელსაც მრავალი იზიარებდა. მან აღნიშნა: „რა სასიამოვნო იყო მსოფლიოს ყველა კუთხიდან — ჩეხეთის რესპუბლიკიდან თუ ბარბადოსიდან, ნიგერიიდან თუ ინგლისიდან, ჰოლანდიიდან თუ ეთიოპიიდან, კენიიდან თუ უნგრეთიდან და სხვა მრავალი ქვეყნიდან — ჩამოსული ძმების ხილვა, რომლებიც ერთმანეთს ეხვეოდნენ! შესანიშნავი იყო ძმების შეხმატკბილებულად ერთად ყოფნისა და სიხარულის ცრემლების დანახვა, რომელიც ერთმანეთისა და თავიანთი დიდებული ღმერთის, იეჰოვას, სიყვარულით იყო გამოწვეული“. მომდევნო სტატიაში განვიხილავთ კონგრესის პროგრამას, რომელიც მთელი დედამიწის ზურგზე მილიონებმა მოისმინეს.
[საავტორო უფლება 3 გვერდზე]
Mountain High Maps® Copyright © 1997 Digital Wisdom, Inc.