ისინი გადაწყვეტილებით არიან აღსავსე, მიჰყვნენ ღვთისმოსაწონ ცხოვრების გზას
კონგრესმა „ღვთისმოსაწონი ცხოვრების გზა“ ბევრი რამ შემატა ღვთის მსახურების მსურველებს. ერთმა დელეგატმა კონგრესის შესახებ თქვა, რომ ეს იყო „დამოძღვრის, გამხნევებისა და ცოდნის მიღების შესანიშნავი პერიოდი“.
მეორემ კი აღნიშნა, რომ „ბევრი რამ იყო სასიხარულო, დასაფიქრებელი და გასათვალისწინებელი“. ახლა კი თვითონ პროგრამა განვიხილოთ.
იესო ქრისტე — გზა, ჭეშმარიტება და სიცოცხლე
ეს იყო კონგრესის პირველი დღის თემა (იოანე 14:6). პირველ მოხსენებაში აღნიშნული იყო კონგრესზე ჩვენი თავმოყრის მიზანი: გაგვეღრმავებინა ცოდნა ცხოვრების საუკეთესო გზის, ღვთისმოსაწონი ცხოვრების გზის, შესახებ. იეჰოვა ასწავლის თავის ხალხს, როგორ იარონ მისი გზებით და ამას ბიბლიის, ‘ერთგული და გონიერი მონისა’ და სულიწმიდის მეშვეობით აკეთებს (მათე 24:45–47; ლუკა 4:1; 2 ტიმოთე 3:16). რამხელა პატივია, თვით სამყაროს უზენაესისგან იყო დამოძღვრილი!
ძირითადი სიტყვა: „ქრისტეს მსხვერპლი — ხსნისთვის ღვთის მიერ არჩეული გზა“ დღის თემას შეესაბამებოდა. ღვთისმოსაწონი ცხოვრების გზაზე დგომისთვის მნიშვნელოვანია იეჰოვას განზრახვაში იესო ქრისტეს როლის აღიარება. მომხსენებელმა აღნიშნა: „იესო ქრისტეს გამომსყიდველური მსხვერპლის გარეშე ვერავინ — მიუხედავად მრწამსისა თუ საქმეებისა — ვერ მიიღებდა ღვთისგან მარადიულ სიცოცხლეს“. შემდეგ მან მოიყვანა იოანეს 3:16: „ისე შეიყვარა ღმერთმა წუთისოფელი, რომ მისცა თავისი მხოლოდშობილი ძე, რათა ყოველი მისი მორწმუნე არ დაიღუპოს, არამედ ჰქონდეს საუკუნო სიცოცხლე“. ქრისტეს გამომსყიდველური მსხვერპლისადმი რწმენის გამოსავლენად საჭიროა ჭეშმარიტების ზუსტი შემეცნების მიღება. ამაში აგრეთვე შედის ცხოვრების იეჰოვასთვის მიძღვნა, რის ნიშნადაც წყალში ვინათლებით, და იესო ქრისტეს მიერ დატოვებული მაგალითის მიხედვით ცხოვრება (1 პეტრე 2:21).
შუადღის პროგრამა დაიწყო მოხსენებით: „სიყვარული არასოდეს მთავრდება“. მოხსენებაში განხილული იყო 1-ლი კორინთელთა 13:4–8-ის თითოეული მუხლი, სადაც პავლე შთამბეჭდავად აღწერს სიყვარულს. მსმენელებს შეახსენეს, რომ თავდაუზოგავი სიყვარული ქრისტიანებისთვის დამახასიათებელი ერთ-ერთი თავისებურება იყო, ხოლო ღვთისა და მოყვასისადმი სიყვარული იეჰოვას მოსაწონი თაყვანისმცემლობის მნიშვნელოვანი თავისებურება.
ამას მოჰყვა სამნაწილიანი მოხსენებათა სერია, სათაურით: „მშობლებო, ღვთისმოსაწონ გზაზე დააყენეთ შვილები“. ღვთის სიტყვის კითხვისა და შესწავლის მაგალითის მიცემით მშობლები შვილებს იეჰოვას მსახურებაში დაეხმარებიან. ოჯახის მოთხოვნების შესაბამისი რეგულარული ოჯახური შესწავლით კი ჭეშმარიტებას ჩაუნერგავენ მათ. მნიშვნელოვანია ბავშვების კრების საქმიანობასა და სამქადაგებლო მსახურებაში ჩაბმაც. მიუხედავად იმისა, რომ ამ ბოროტ წუთისოფელში ღვთისმოშიში შვილების აღზრდა ადვილი არ არის, ასე მოქმედებას დიდი კურთხევები მოაქვს.
მოხსენებათა სერიის შემდეგ წარმოითქვა სიტყვა: „დაე იეჰოვამ საპატიო ჭურჭლად გამოგძერწოს“. როგორც მექოთნე აძლევს ფორმას თიხის ჭურჭელს, სწორედ ისე ახდენს იეჰოვა იმ პიროვნებათა ფორმირებას, რომლებსაც მისთვის მსახურება სურთ (რომაელთა 9:20, 21). ის ამას თავისი სიტყვისა და ორგანიზაციის მეშვეობით მოცემული რჩევების საშუალებით აკეთებს. თუ მზადყოფნის სულს გამოვავლენთ და ნებისმიერ შესაძლებლობას გამოვიყენებთ, თუ იეჰოვას საშუალებას მივცემთ, წარმართოს ჩვენი ნაბიჯები, ის ჩვენი უნარის ბოლომდე გამოყენებაში დაგვეხმარება.
პროგრამის შემდგომი საინტერესო პუნქტი იყო: „მისიონერული მსახურება“. დღეს მსოფლიოს 148 ქვეყანაში 2 390 ქრისტიანი მსახურობს მისიონერად. ისინი ერთგულებისა და თავგამოდების შესანიშნავ მაგალითს იძლევიან. მისიონერები დიდად აფასებენ უცხო ქვეყნებში მსახურებას. საერთაშორისო კონგრესებზე პროგრამის ამ ნაწილში მათ ილაპარაკეს მისიონერული ცხოვრების სირთულეებსა და სიხარულზე.
პირველი დღის ბოლო მოხსენება იყო: „არსებობს სიცოცხლე სიკვდილის შემდეგ?“. ეს კითხვა მილიონებისთვის თავსატეხს წარმოადგენს. საზოგადოების ნებისმიერი ფენის წარმომადგენლებს აინტერესებთ ეს საკითხი. სავარაუდო პასუხები არც თუ ისე მცირეა და ისე მრავალფეროვანია, როგორც ადამიანთა ტრადიციები და რელიგიები. მაგრამ ხალხისთვის ჭეშმარიტების ცოდნაა საჭირო.
ბოლოს მომხსენებელმა გამოაცხადა, რომ გამოიცა ფერადი, 32-გვერდიანი ბროშურა: „რა ხდება სიკვდილის შემდეგ?“ ბროშურაში ახსნილია, თუ საიდან იღებს საწყისს სწავლება სულის უკვდავების შესახებ და ნაჩვენებია, თუ როგორ დაიკავა მნიშვნელოვანი ადგილი ამან დღეს მსოფლიოს თითქმის ყველა რელიგიაში. ამ ბროშურაში ნათლად და გულშიჩამწვდომადაა ახსნილი, რას ამბობს ბიბლია სულის შესახებ, რატომ ვკვდებით და რა მოგვდის სიკვდილის დროს. მასში აგრეთვე ახსნილია, თუ რა იმედი არსებობს მიცვალებულებისა და ცოცხლებისთვის. რამხელა ბედნიერებას მოუტანს ეს პუბლიკაცია მსოფლიოს ნებისმიერ კუთხეში მცხოვრებ ჭეშმარიტების მაძიებლებს!
დაუკვირდით, როგორ დადიხართ
კონგრესის მეორე დღისთვის ეს ნამდვილად რომ შესაფერისი თემა იყო (ეფესელთა 5:15, სსგ). დილის პროგრამაში ყურადღება გამახვილდა სამქადაგებლო საქმიანობასა და მოწაფეების მომზადებაზე. ყოველდღიური მუხლის განხილვის შემდეგ პროგრამა გაგრძელდა მოხსენებით: „დავეხმაროთ ხალხს, დაადგნენ ღვთისმოსაწონ გზას“. ამ საშური საქმის შესრულებისას მნიშვნელოვანია დადებითი განწყობილება და იმის შეგნება, რომ სხვებისთვის ჭეშმარიტების გაზიარება უპირატესობაცაა და ვალდებულებაც. ახ. წ. I საუკუნეში უმეტესობამ უარყო ღვთის სიტყვა. მაგრამ, წინააღმდეგობის მიუხედავად, იყვნენ ისეთებიც, ‘რომლებიც საუკუნო სიცოცხლისათვის იყვნენ განწესებული და ირწმუნეს’ (საქმეები 13:48, 50; 14:1–5). მსგავსი მდგომარეობაა დღესაც. მიუხედავად იმისა, რომ ბევრი არ ღებულობს ბიბლიურ ჭეშმარიტებას, ჩვენ განვაგრძობთ მათ ძებნას, ვინც დადებითად რეაგირებს (მათე 10:11–13).
მომდევნო მოხსენებაში ლაპარაკი იყო სირთულეებზე, რომლებიც სხვებისთვის სიცოცხლის მომტანი ცნობის მიწოდებასთანაა დაკავშირებული. დღეს იშვიათად თუ არის ვინმე სახლში, ამიტომ საჭიროა ყოველმხრივ დახელოვნებული და საზრიანები ვიყოთ, რათა სამეფოს შესახებ ცნობა რაც შეიძლება მეტს ვაუწყოთ. მრავალ ქვეყანაში კეთილი ცნობის მქადაგებლებმა შესანიშნავ შედეგებს მიაღწიეს ტელეფონით ქადაგებასა თუ საქმიან უბნებში ქადაგებაში, და ამგვარად ურთიერთობა დაამყარეს მათთან, ვისთანაც სხვაგვარად შეუძლებელი იყო დაკავშირება.
მოხსენებაში, სათაურით: „ვასწავლოთ მოწაფეებს ყოველივე, რაც ქრისტემ გვამცნო“ ყურადღება გამახვილდა მსახურების დახვეწის მნიშვნელოვნებაზე. მასწავლებლობის ხელოვნებას ვხვეწავთ მაშინ, როდესაც სხვებისგან ვსწავლობთ და მივყვებით შესანიშნავ რჩევებს, რომლებიც კრების შეხვედრებზე გვეძლევა. რაც უფრო ვხელოვნდებით, მით უფრო მეტ სიხარულსა და კმაყოფილებას გვანიჭებს სხვებისთვის ბიბლიური ჭეშმარიტების შესწავლაში დახმარების აღმოჩენა.
დილის პროგრამა დასრულდა მოხსენებით, სადაც ლაპარაკი იყო მიძღვნისა და მონათვლის მნიშვნელობაზე. მომხსენებლის მიერ მოყვანილ ერთ-ერთ საკითხში აღნიშნული იყო, რომ, თუ ბოლომდე მივენდობით ღმერთს და გულწრფელად ვეცდებით მისი ნების შესრულებას, ის გვაკურთხებს და განგვამტკიცებს. ბრძენმა მამაკაცმა დაწერა: „შეეცადე მის [ღვთის] შეცნობას ყოველ შენს გზაზე და ის გაგისწორებს სავალს“ (იგავნი 3:6). ნათლობა, რომელსაც თან ახლდა დიდი სიხარული, კონგრესის ძალზე საინტერესო ნაწილი იყო, რამაც ცხადყო, რომ მრავალმა დაიწყო ღვთისმოსაწონი ცხოვრების გზით სიარული.
შესვენების შემდეგ პროგრამა დაიწყო მოხსენებით: „ვიმსახუროთ მარადიული სიცოცხლის იმედით“. ღვთის განზრახვა, ჰყავდეს მორჩილი ადამიანები, რომლებიც დედამიწაზე მარადიულად მისი მსახურები იქნებიან, შესრულდება. რა მართებულია, რომ ჩვენს აზროვნებას, გეგმებსა და იმედებს იეჰოვას მსახურებაზე ვაგებთ და გვესმის, რომ მარადიულობა გველის! ამიტომ, თუმცა უნდა გვახსოვდეს ‘ღვთის დღე’, მნიშვნელოვანია არ დაგვავიწყდეს, რომ ჩვენი მიზანი მარადიულად მსახურებაა (2 პეტრე 3:12). იმის არცოდნა, თუ როდის მოიყვანს სისრულეში იესო ღვთის შურისგებას, ყოველთვის სიფხიზლის შენარჩუნებისა და ყოველდღიურად იმის დამტკიცების შესაძლებლობას გვიქმნის, რომ იეჰოვას უანგაროდ ვემსახურებით.
მომდევნო ორ მოხსენებაში განხილული იყო ეფესელთა მიმართ პავლეს წერილის მეოთხე თავი. განხილულ საკითხთა შორის მოხსენიებული იყო, რომ გვაქვს „ძღვენი ადამიანების სახით“, გვყავს სულიერად მოწიფული მამაკაცები, რომლებიც სულიწმიდით არიან დანიშნული. ისინი ჩვენი სულიერი კეთილდღეობისთვის საჭირო რჩევითა და ხელმძღვანელობით უზრუნველგვყოფენ. პავლეს ღვთივსულიერი წერილი ქრისტიანებს ‘ახალ კაცად შემოსვისკენაც’ მოუწოდებს (ეფესელთა 4:8, 24). ღვთისმოსაწონ პიროვნებას ახასიათებს ისეთი თვისებები, როგორიცაა: მოწყალება, სახიერება, თავმდაბლობა, სიმშვიდე, სულგრძელობა და სიყვარული (კოლასელთა 3:12–14).
იმაზე ყურადღებით დაკვირვებაში, თუ როგორ დავდივართ, წუთისოფლისგან თავის შეურყვნელად დაცვაც შედის, რაც მომდევნო მოხსენების თემა იყო. გაწონასწორებულობაა საჭირო გართობის, კულტურულ-საგანმანათლებლო ღონისძიების არჩევისა და სიმდიდრის ძიებისას. თუ იაკობის 1:27-ში მოცემულ რჩევას გავითვალისწინებთ, სადაც წუთისოფლისგან თავის შეურყვნელად დაცვაზეა ლაპარაკი, შეუბილწავად ვიდგებით ღვთის წინაშე და სუფთა სინდისი გვექნება. აგრეთვე აზრიანად ვიცხოვრებთ, რასაც სიმშვიდე, სულიერი კეთილდღეობა და შესანიშნავი ურთიერთობა მოჰყვება.
შემდეგი იყო სამნაწილიანი მოხსენებათა სერია: „ახალგაზრდებო, მიჰყევით ღვთისმოსაწონ გზას“. ახალგაზრდები, რომლებმაც იციან, რომ ღმერთს უყვარს ისინი და აფასებს მათ მცდელობას, მიჰყვნენ წმინდა თაყვანისმცემლობას, უნდა გაიწაფონ, რათა ერთგულად ემსახურონ ღმერთს. გაწაფვა ბიბლიის ყოველდღიური კითხვითა და წაკითხულზე ფიქრით შეიძლება. ასე მოქმედება იეჰოვას გზების გაცნობაში დაგვეხმარება (ფსალმუნი 118:9–11). გაწაფვა მშობლებისგან, უხუცესებისგან და საზოგადოება „საგუშაგო კოშკის“ პუბლიკაციებიდან საღი რჩევების მიღებითაც შეიძლება. გაწაფვის ანუ გარჩევის უნარის მართებულად გამოყენების შედეგად ახალგაზრდები თავს იკავებენ სიმდიდრის მოყვარეობისგან, ბილწსიტყვაობისა და გადამეტებული გართობისგან, რაც ღვთისგან გაუცხოებული წუთისოფლისთვისაა დამახასიათებელი. ღვთისმოსაწონი ცხოვრების გზაზე სიარული ახალგაზრდებსა და ხანდაზმულებს ერთნაირ შესაძლებლობას აძლევს, მიაღწიონ ჭეშმარიტ წარმატებას.
დღის ბოლო მოხსენება იყო: „შემოქმედი — რა ვიცით მასზე და მის გზებზე“. მას შემდეგ, რაც მომხსენებელმა აღნიშნა, რომ მილიარდობით ადამიანი არ იცნობს შემოქმედს, თქვა: „ცხოვრების ნამდვილი აზრი დაკავშირებულია შემოქმედის, ჩვენი ღვთის, შემეცნებასთან; მისი თვისებების შესწავლასა და მისი გზების თანახმად მოქმედებასთან. . . არსებობს ფაქტები სამყაროსა და ჩვენს შესახებ, რომელთა საშუალებითაც შეგვიძლია დავეხმაროთ ადამიანებს, იწამონ შემოქმედი და იპოვონ მასთან დაკავშირებული სიცოცხლის აზრი“. შემდეგ მომხსენებელმა მოიყვანა მტკიცებები, რომლებიც ბრძენი და მოსიყვარულე შემოქმედის არსებობაზე მიუთითებდა. მოხსენების კულმინაციური წერტილი იყო ახალი წიგნის „არსებობს მზრუნველი შემოქმედი?“ გამოცემის გამოცხადება.
„აჰა, გზა, იარეთ მასზე“
ეს იყო კონგრესის მესამე დღის თემა (ესაია 30:21). პროგრამა დამატყვევებელი სამნაწილიანი მოხსენებათა სერიით დაიწყო, რომელშიც ეზეკიელის ხილვაში ნანახ ტაძარზე იყო ყურადღება გამახვილებული. ამ ხილვას დღეს დიდი მნიშვნელობა აქვს ღვთის ხალხისთვის, რადგან ის ჩვენი დროის წმინდა თაყვანისმცემლობასთანაა დაკავშირებული. ხილვის გაგების გასაღები შემდეგია: იეჰოვას დიდი სულიერი ტაძარი არის ის, რაც იეჰოვამ გაითვალისწინა წმინდა თაყვანისმცემლობისთვის. ხილვის თავისებურებების განხილვამ, მსმენელები დააფიქრა ცხებულთა დარჩენილი ნაწილის წარმომადგენელი მოსიყვარულე ზედამხედველებისა და მთავრის კლასის მომავალი წევრების საქმიანობის მხარდაჭერაზე.
დილის პროგრამის დასასრულს წარმოდგენილი იყო კოსტიუმირებული ბიბლიური დრამა, სახელწოდებით: „ოჯახებო — ყოველდღე იკითხეთ ბიბლია!“. მასში ნაჩვენები იყო სამი ებრაელის რწმენა და გამბედაობა, რომლებმაც თაყვანი არ სცეს ბაბილონის მეფე ნაბუქოდონოსორის მიერ აღმართულ კერპს. დრამის მიზანი იყო, ეჩვენებინა, რომ ბიბლია მხოლოდ ძველი ისტორიის წიგნი კი არ არის, არამედ მისი რჩევა დღესაც სასარგებლოა ყველასთვის.
შუადღის პროგრამა დაიწყო საჯარო მოხსენებით: „მარადიულ სიცოცხლემდე მიმყვანი ერთადერთი გზა“. ადამიანთა ცოდვისა და სიკვდილის მონობაში მოქცევის ისტორიის მოკლედ მოხსენების შემდეგ მომხსენებელმა დამაფიქრებელი სიტყვები წარმოთქვა: «დღევანდელი კონგრესის პროგრამის თემა დაფუძნებულია ესაიას 30-ე თავის 21-ე მუხლზე, სადაც ვკითხულობთ: „თქვენს ყურებს მოესმება სიტყვა თქვენს უკან: აჰა, გზა, იარეთ მასზე, როცა მარჯვნივ ან მარცხნივ გადაუხვევთ“. როგორ სწვდება ჩვენს ყურს ეს ხმა? ღვთის სიტყვის, წმინდა ბიბლიის, მოსმენით. აგრეთვე დიდებული მასწავლებლის, იეჰოვა ღმერთის, ხელმძღვანელობის მიყოლით, რომელსაც ის თავისი სიტყვისა და დღევანდელი ქრისტიანული ორგანიზაციის საშუალებით გვიწევს. უდავოდ, ეს არის მარადიულ სიცოცხლემდე მიმყვანი ერთადერთი გზა».
შემდეგ მოკლედ იქნა განხილული „საგუშაგო კოშკის“ იმ კვირას შესასწავლი სტატია, რასაც მოჰყვა ბოლო მოხსენება: „განუწყვეტლივ იარეთ იეჰოვას გზაზე“. მასში განხილული იყო კონგრესის პროგრამის ძირითადი საკითხები. შემდეგ მომხსენებელმა წარმოადგინა რეზოლუცია, რომელიც ღვთისმოსაწონი ცხოვრების გზაზე სიარულის გაგრძელების შესახებ გადაწყვეტილების მიღებას გამოხატავდა.
რეზოლუცია შემდეგი სულის შემძვრელი სიტყვებით დასრულდა: „დარწმუნებული ვართ, რომ ბიბლიური პრინციპების, რჩევებისა და შეგონებების თანახმად მოქმედება საუკეთესო ცხოვრებას მოგვიტანს დღეს და მშვენიერ საძირკველს ჩაუყრის მომავალს, რათა მივაღწიოთ ჭეშმარიტ სიცოცხლეს. რაც ყველაზე მთავარია, ამ რეზოლუციას იმიტომ ვიღებთ, რომ გვიყვარს იეჰოვა ღმერთი მთელი გულით, სულით, გონებითა და ძალით!“. ყველა დამსწრემ ამაზე თავისი თანხმობა ხმამაღლა „დიახ“-ის წარმოთქმით დაადასტურა!
[ჩარჩო⁄სურათი 8 გვერდზე]
არსებობს მზრუნველი შემოქმედი?
ახალი წიგნი, რომელიც ამ სათაურს ატარებს, დამაჯერებელ მტკიცებებს წარმოგვიდგენს შემოქმედის, იეჰოვას, არსებობის შესახებ და გვაცნობს მის თვისებებს. ის ძირითადად განკუთვნილია მათთვის, ვისაც კარგი საერო განათლება აქვს მიღებული, მაგრამ არ სწამს ღმერთი. ეს 192-გვერდიანი წიგნი განამტკიცებს მათ რწმენასაც, ვისაც სწამს ღმერთი და მათ ღვთის თვისებებისა და მისი გზების გამო მადლიერების გრძნობას უღრმავებს.
წიგნი „არსებობს მზრუნველი შემოქმედი?“ მკითხველს თავს არ ახვევს ღვთისადმი რწმენას. მასში მოთხრობილია, თუ როგორ ადასტურებს ახალი მეცნიერული აღმოჩენები და კონცეფციები შემოქმედის არსებობას. წიგნში განხილულია შემდეგი საკითხები: „რა შემატებს თქვენს ცხოვრებას აზრს?“, „როგორ გაჩნდა სამყარო — აზრთა სხვაობა“, „რამდენად უნიკალურია ადამიანი!“ და სხვა. წიგნში ისიცაა განხილული, თუ რატომ შეგვიძლია დარწმუნებული ვიყოთ, რომ ბიბლია ღვთის მიერაა შთაგონებული. მასში მოცემულია ბიბლიის ზოგადი მიმოხილვა, სადაც ნაჩვენებია შემოქმედის თვისებები და გზები. წიგნში არა მარტო იმაზეა საუბარი, თუ რატომ უშვებს ღმერთი ამდენ ტანჯვა-წამებას, არამედ ახსნილია, თუ როგორ მოისპობა ის სამუდამოდ.
[სურათები 7 გვერდზე]
მრავალი მოინათლა.
[სურათები 7 გვერდზე]
ა. დ. შრედერი, იეჰოვას მოწმეთა ხელმძღვანელი საბჭოს წევრი, აცხადებს ახალი ბროშურის გამოცემას.
[სურათები 8, 9 გვერდებზე]
აღმაფრთოვანებელი დრამა, რომელიც მაყურებელს ბიბლიის ყოველდღიური კითხვისკენ მოუწოდებს.