როგორ შეუძლია იესოს თქვენი ცხოვრების შეცვლა?

იესო ქრისტე, რომელიც დაახლოებით 2 000 წლის წინათ პალესტინაში ცხოვრობდა, დიდებული მასწავლებელი იყო. მისი ბავშვობის შესახებ ძალიან ცოტა რამ არის ცნობილი. მსახურების შესახებ კი ვიცით, რომ მან დაახლოებით 30 წლის ასაკში დაიწყო ‘ჭეშმარიტების დამოწმება‘ (იოანე 18:37; ლუკა 3:21-23). იესოს ოთხმა მოწაფემ, რომლებმაც მისი ცხოვრება აღწერეს, ყურადღება მომდევნო სამ წელიწად-ნახევარზე გაამახვილეს.

მსახურებისას იესო ქრისტემ თავის მოწაფეებს მისცა მითითება, რომელსაც ქვეყნიერების მრავალი სნეულებისგან განკურნება შეეძლო. რა მითითება იყო ეს? იესომ თქვა: „ახალ მცნებას გაძლევთ თქვენ: გიყვარდეთ ერთმანეთი; როგორც მე შეგიყვარეთ თქვენ, თქვენც ისე გიყვარდეთ ერთმანეთი“ (იოანე 13:34). დიახ, კაცობრიობის მრავალი პრობლემის გადაჭრის საშუალება სიყვარულია. როდესაც იესოს ჰკითხეს, რომელი იყო ყველაზე დიდი მცნება, მან უპასუხა: „‘შეიყვარე უფალი ღმერთი შენი ყოვლითა გულითა შენითა და ყოვლითა სულითა შენითა და ყოვლითა გონებითა შენითა.’ ეს არის პირველი და დიდი მცნება. და მეორე ამის მსგავსი: ‘შეიყვარე მოყვასი შენი, ვითარცა თავი შენი’“ (მათე 22:37-40).

იესომ არა მარტო სიტყვით, არამედ საქმითაც გვიჩვენა, როგორ უნდა გვყვარებოდა ღმერთი და მოყვასი. განვიხილოთ ამის რამდენიმე მაგალითი და ვნახოთ, რისი სწავლა შეგვიძლია იესოსგან.

მისი სწავლება

ერთ-ერთი ყველაზე ცნობილი ქადაგებისას იესომ უთხრა თავის მიმდევრებს: „არავის არ შეუძლია ორ ბატონს ემსახუროს: ან ერთი უნდა სძულდეს და მეორე უყვარდეს; ანდა იმ ერთს შეეთვისოს და მეორე დაამციროს. ვერ შეძლებთ ღმერთსაც ემსახუროთ და მამონასაც“ (მათე 6:24). რამდენად პრაქტიკულია დღეს იესოს სწავლება ცხოვრებაში ღვთის პირველ ადგილზე დაყენების შესახებ, როდესაც ბევრისთვის ფული ჭრის ყველა პრობლემას? მართალია, ფული არსებობისთვის აუცილებელია (ეკლესიასტე 7:12). მაგრამ, თუ „მამონს“, ანუ „ვერცხლისმოყვარეობას“ ნებას დავრთავთ, იუფლოს ჩვენზე, ის დაგვიმორჩილებს და მთელ ჩვენს ცხოვრებაზე იბატონებს (1 ტიმოთე 6:9, 10). ბევრმა, ვინც ამ მახეში გაება, ოჯახი, ჯანმრთელობა და სიცოცხლეც კი დაკარგა.

მაგრამ, თუ ღმერთს მივცემთ უფლებას, ჩვენი უფალი იყოს, სიცოცხლის აზრს შევიძენთ. რადგან ღმერთია ყოველივეს შემოქმედი და სიცოცხლის წყარო, მხოლოდ ის იმსახურებს თაყვანისცემას (ფსალმუნი 35:10; გამოცხადება 4:11). ვინც გაეცნო ღვთის თვისებებს და შეიყვარა ის, აღძრულია, დაიცვას მისი მცნებები (ეკლესიასტე 12:13; 1 იოანე 5:3). ამას კი ჩვენთვის სიკეთე მოაქვს (ესაია 48:17).

მთაზე ქადაგებისას იესო აგრეთვე ასწავლიდა თავის მოწაფეებს, როგორ უნდა ჰყვარებოდათ სხვები. მან უთხრა მათ: „როგორც გინდათ, რომ მოგექცნენ ადამიანები, თქვენც ისევე მოექეცით მათ“ (მათე 7:12). სიტყვაში „ადამიანები“ იესო მტრებსაც გულისხმობდა. იმავე ქადაგებისას მან თქვა: „გიყვარდეთ თქვენი მტრები . . . და ილოცეთ მათთვის, ვინც თქვენ გავიწროებთ და გდევნით“ (მათე 5:43, 44). მოაგვარებდა ასეთი სიყვარული დღეს არსებულ მრავალ პრობლემას? ინდუს ლიდერს, მოჰანდას განდის ამაში ეჭვი არ ეპარებოდა. მან თქვა: „როდესაც [ჩვენ] ქრისტეს მიერ მთაზე ქადაგებისას მოცემული სწავლებების საფუძველზე შევთანხმდებით, მთელი მსოფლიოს . . . პრობლემებს გადავწყვეტთ“. სიყვარულთან დაკავშირებით იესოს სწავლების ცხოვრებაში გამოყენებას კაცობრიობის მრავალი „სნეულებისგან“ განკურნება შეუძლია.

მისი საქმეები

იესო არა მარტო სიტყვით ასწავლიდა სიყვარულს, არამედ საქმითაც. მაგალითად, ის სხვის ინტერესებს თავისაზე მნიშვნელოვნად მიიჩნევდა. ერთხელ თავის მოწაფეებთან ერთად ხალხის დახმარებით იმდენად დაკავებული იყო, რომ ჭამის დროც არ ჰქონდათ. იესომ დაინახა, რომ მოწაფეებს დასვენება სჭირდებოდათ და ისინი განცალკევებულ ადგილას წაიყვანა. მაგრამ იქ მისვლისას უამრავი ხალხი შენიშნა, რომლებიც მათ ელოდებოდნენ. როგორ მოიქცეოდით, დაღლილი რომ ყოფილიყავით, და დაგენახათ, რომ ხალხი თქვენგან მუშაობას მოელის? იესოს „შეებრალა ისინი“ და „დაუწყო მათ მრავალი რამის სწავლება“ (მარკოზი 6:34). სხვებზე ზრუნვა ყოველთვის აღძრავდა იესოს, დახმარებოდა მათ.

იესო არა მარტო ასწავლიდა, არამედ ყველაფერს აკეთებდა ხალხისთვის. ერთხელ მან გამოკვება 5 000-ზე მეტი კაცი, რომლებიც მას გვიანობამდე უსმენდნენ. მალე, ამ შემთხვევის შემდეგ, მან ხალხის კიდევ ერთი დიდი ჯგუფი — ამჯერად 4 000-ზე მეტი ადამიანი — დააპურა, რომლებიც სამი დღის განმავლობაში იყვნენ მასთან ერთად და საჭმელად აღარაფერი ჰქონდათ. პირველ შემთხვევაში იესომ ხუთი პური და ორი თევზი გამოიყენა, მეორეში კი — შვიდი პური და რამდენიმე პატარა თევზი (მათე 14:14-22; 15:32-38). სასწაულია? დიახ, ის ახდენდა სასწაულებს.

იესო ავადმყოფებსაც კურნავდა. მან ბრმა, კოჭლი, რამდენიმე კეთროვანი და ყრუ განკურნა. წარმოიდგინეთ, მკვდარიც კი აღადგინა (ლუკა 7:22; იოანე 11:30-45). ერთხელ ერთი კეთროვანი შეევედრა: „თუ გსურს, შეგიძლია ჩემი განწმედა“. როგორ მოიქცა იესო? მას «შეეცოდა იგი, გაიწოდა ხელი, შეახო მას და უთხრა: „მსურს, განიწმიდე!“ » (მარკოზი 1:40, 41). ასეთი სასწაულებით იესო გაჭირვებულებისადმი სიყვარულს ამჟღავნებდა.

ხომ არ გიჭირთ იესოს სასწაულების დაჯერება? დიახ, ზოგი ვერ იჯერებს. გაიხსენეთ, რომ იესო სახალხოდ აკეთებდა ამას. მისი მოწინააღმდეგეებიც კი, რომლებიც ყოველთვის ცდილობდნენ, რაიმეში დაედანაშაულათ ის, ვერ უარყოფდნენ, რომ მას სასწაულების მოხდენა შეეძლო (იოანე 9:1-34). გარდა ამისა, იესოს სასწაულებს გარკვეული მიზანი ჰქონდა. ისინი ხალხს ეხმარებოდა, დაენახათ, რომ იესო ღვთის მიერ იყო გამოგზავნილი (იოანე 6:14).

სასწაულების მოხდენისას იესო არ ცდილობდა თავის გამოჩენას. ის განადიდებდა ღმერთს, რომელიც მისი ძალის წყაროს წარმოადგენდა. ერთხელ, როდესაც კაპერნაუმში ხალხით გადაჭედილ სახლში ქადაგებდა, ერთ დავრდომილ კაცს სურდა, მისთვის განკურნება ეთხოვა, მაგრამ შიგნით ვერაფრით შეაღწია; ამიტომ მისმა მეგობრებმა საკაცით სახურავიდან ჩაუშვეს. იესომ დაინახა მათი რწმენა და განკურნა დავრდომილი. ამის დანახვაზე ხალხი „ადიდებდა ღმერთს“ და ამბობდა: „არასოდეს გვინახავს მსგავსი რამ“ (მარკოზი 2:1-4, 11, 12). თავისი სასწაულებით იესო ღმერთს, იეჰოვას ადიდებდა და გაჭირვებულებს ეხმარებოდა.

მაგრამ, ავადმყოფების სასწაულებრივი განკურნება იესოს მსახურების მთავარი მიზანი არ ყოფილა. მოციქულმა, რომელმაც იესოს ცხოვრება აღწერა, თქვა: „ეს კი დაიწერა, რათა ირწმუნოთ, რომ იესო არის ქრისტე, ძე ღვთისა, და რათა მორწმუნეებს გქონდეთ სიცოცხლე მისი სახელით“ (იოანე 20:31). დიახ, იესო იმისათვის მოვიდა დედამიწაზე, რომ მორწმუნეებს სიცოცხლე ჰქონოდათ.

მისი მსხვერპლი

„იესო დედამიწაზე მოვიდა?“ — შეიძლება იკითხოთ. — „საიდან მოვიდა?“ იესომ თქვა: „ზეციდან ჩემი ნების აღსასრულებლად კი არ ჩამოვედი, არამედ მისი ნებისა, ვინც მე მომავლინა“ (იოანე 6:38). ის დედამიწაზე მოსვლამდეც ღვთის მხოლოდშობილი ძე იყო. მაშ, რა ჰქონდა მიზნად მის წარმომგზავნელს? „ისე შეიყვარა ღმერთმა წუთისოფელი, რომ მისცა თავისი მხოლოდშობილი ძე, —თქვა იოანემ, ერთ-ერთი სახარების მწერალმა, — რათა ყოველი მისი მორწმუნე არ დაიღუპოს, არამედ ჰქონდეს საუკუნო სიცოცხლე“ (იოანე 3:16). როგორ იყო ასეთი რამ შესაძლებელი?

ბიბლიიდან ჩანს, როგორ გახდა სიკვდილი კაცობრიობისთვის გარდაუვალი რამ. პირველმა წყვილმა ღმერთისგან მიიღო მარადიული სიცოცხლე, მაგრამ ისინი აუჯანყდნენ შემოქმედს (დაბადება 3:1-19). ამ მოქმედების, პირველი ცოდვის, შედეგად ადამისა და ევას შთამომავლობას არასასურველ მემკვიდრეობად გადაეცა სიკვდილი (რომაელთა 5:12). იმისათვის, რომ კაცობრიობას ნამდვილი სიცოცხლე დაბრუნებოდა, ცოდვა და სიკვდილი ჩამოცილებული უნდა ყოფილიყო.

არცერთ მეცნიერს არანაირი გენური ინჟინერიით არ შეუძლია სიკვდილის აღმოფხვრა. ადამიანის შემოქმედს კი შესწევს ძალა მორჩილ ხალხს სრულყოფილება დაუბრუნოს მარადიულად საცხოვრებლად. ბიბლიაში ამ საშუალებას გამოსყიდვა ეწოდება. პირველმა წყვილმა თავიანთი თავი და შთამომავლობა ცოდვისა და სიკვდილის მონობისთვის გაყიდა. მათ ღვთის მორჩილებაში მყოფი სრულყოფილი ადამიანების ცხოვრება ღვთისგან დამოუკიდებლობაზე გაცვალეს, რათა თვითონ გადაეწყვიტათ, რა იყო სწორი და რა არა. ჩვენი პირველი მშობლების მიერ დაკარგულის დასაბრუნებლად სრულყოფილი ადამიანის სიცოცხლის ტოლფასი საფასური უნდა გადახდილიყო. ადამიანებს კი, რომლებმაც მემკვიდრეობით არასრულყოფილება მიიღეს, არ შეეძლოთ ამ საფასურის გადახდა (ფსალმუნი 48:8).

ასე რომ, ამ საკითხში იეჰოვა ღმერთი ჩაერია. მან თავისი მხოლოდშობილი ძის სრულყოფილი სიცოცხლე ქალწულის საშვილოსნოში გადაიტანა; ამ ქალწულმა შვა იესო. ათწლეულების წინათ შეიძლება არც კი გერწმუნათ, რომ ქალწულმა ბავშვი გააჩინა. მაგრამ დღეს მეცნიერებს შეუძლიათ ძუძუმწოვრების უსქესო გამრავლება და ერთი ცხოველიდან მეორეში გენების გადანერგვა. მაშ ვინ გახდის საკამათოს იმას, რომ ღმერთს ჩვეულებრივი გზით ჩასახვისთვის გვერდის აქცევა შეეძლო?

სრულყოფილი ადამიანის დაბადებით ცოდვისა და სიკვდილისგან კაცობრიობის გამოსყიდვისთვის საჭირო ფასის გადახდა ხელმისაწვდომი გახდა. დედამიწაზე დაბადებული იესო „ექიმი“ უნდა გამხდარიყო, რომ კაცობრიობისთვის ის „წამალი“ მიეცა, რომელიც სნეულებებისგან განკურნავდა. ეს მან იმით გააკეთა, რომ სრულყოფილი, უცოდველი სიცოცხლე გასწირა. იესო არა მარტო ხედავდა ცოდვილი კაცობრიობის ტანჯვას, არამედ თავადაც გამოსცადა ადამიანის შეზღუდული ფიზიკური შესაძლებლობები. ამან ის უფრო თანამგრძნობ „ექიმად“ აქცია (ებრაელთა 4:15). დედამიწაზე ცხოვრებისას ადამიანების სასწაულებრივი განკურნებებით მან აჩვენა, რომ ავადმყოფის განკურნების სურვილიც აქვს და ძალაც (მათე 4:23).

დედამიწაზე სამ-ნახევარ წლიანი მსახურების ბოლოს იესო მოწინააღმდეგეებმა მოკლეს. მან აჩვენა, რომ სრულყოფილ ადამიანს, დიდი გამოცდების მიუხედავად, შეუძლია შემოქმედის მორჩილი იყოს (1 პეტრე 2:22). მისი, როგორც სრულყოფილი ადამიანის, მსხვერპლად შეწირული სიცოცხლე იქცა ფასად, რომლითაც კაცობრიობის ცოდვისა და სიკვდილისგან გამოსყიდვა შესაძლებელი გახდა. იესო ქრისტემ თქვა: „იმაზე დიდი სიყვარული არ არსებობს, როცა ვინმე თავის სულს სწირავს თავისი მეგობრისათვის“ (იოანე 15:13). სიკვდილის მესამე დღეს იესო მკვდრეთით აღდგა სულიერი სიცოცხლისთვის; რამდენიმე კვირის შემდეგ კი ზეცას დაუბრუნდა და იეჰოვა ღმერთს გამოსასყიდი ფასი წარუდგინა (1 კორინთელთა 15:3, 4; ებრაელთა 9:11-14). ამგვარად, იესოს შეეძლო ამ მსხვერპლის ფასი თავისი მიმდევრების სასარგებლოდ გამოეყენებინა.

თქვენც გსურთ, ისარგებლოთ ამ საშუალებით და განიკურნოთ სულიერი, ემოციური და ფიზიკური დაავადებებისგან? ეს იესო ქრისტესადმი რწმენას მოითხოვს. განა ცუდი იქნებოდა, თვითონ მისულიყავით ამ „ექიმთან“? რაც იესო ქრისტესა და ერთგული ადამიანების გადარჩენაში მისი როლის შესახებ მეტის გაგებით შეგიძლიათ; იეჰოვას მოწმეები სიხარულით დაგეხმარებიან.

[სურათი 5 გვერდზე]

იესოს ავადმყოფის განკურნების სურვილიც აქვს და ძალაც.

[სურათი 7 გვერდზე]

როგორ მოქმედებს იესოს სიკვდილი თქვენზე?