ვინ არის იესო ქრისტე?

„თუმცა მრავალი ადამიანი არ არის ქრისტიანი, მათ სწამთ, რომ ის დიდებული და ბრძენი მასწავლებელი იყო. უდავოდ, ის იყო ერთ-ერთი ყველაზე გავლენიანი პიროვნება, რომელსაც ოდესმე უცხოვრია“, ნათქვამია „მსოფლიო ენციკლოპედიაში“ (The World Book Encyclopedia). ვინ არის „ის“? იესო ქრისტე — ქრისტიანობის ფუძემდებელი. იცით, ვინ არის ის? ახდენს ის თქვენს ცხოვრებაზე რაიმე გავლენას?

იესოს მსახურებასთან დაკავშირებული მოვლენები ჩაწერილია ბიბლიის ოთხ ისტორიულ ნაშრომში — სახარებებში. რამდენად ზუსტია მათში მოცემული ინფორმაცია? მათი გაანალიზების შემდეგ ცნობილმა ისტორიკოსმა უილ დიურანტმა დაწერა: „ერთი თაობის რამდენიმე უბრალო ადამიანს რომ გამოეგონა ასეთი ძლიერი და მიმზიდველი პიროვნება, ასე ამაღლებული ზნეობა და განეჭვრიტა ადამიანთა ასეთი აღმაფრთოვანებელი ძმობა, იქნებოდა სასწაული, სახარებებში აღწერილ სხვა ნებისმიერ სასწაულზე ბევრად უფრო დაუჯერებელი“.

მაგრამ აღმოსავლეთსა და სხვა მხარეებში მცხოვრები მილიონობით ადამიანისთვის იესო ქრისტე უცნობია. შესაძლოა მათ სწამთ კიდეც, რომ ის არსებობდა, მაგრამ არ ფიქრობენ იმაზე, რომ მას შეიძლება რაიმე აკავშირებდეს მათს ცხოვრებასთან. სხვები ყურადღების ღირსადაც არ თვლიან იესოს და უარყოფენ მას იმ საქმეების გამო, რაც მის მიმდევრებს აქვთ ჩადენილი. „მათ ატომური ბომბი ჩამოაგდეს ნაგასაკიში, — შეიძლება თქვას ვინმემ იაპონიაში — ქალაქში, სადაც იაპონიის სხვა ქალაქებთან შედარებით ყველაზე მეტი ქრისტიანი ცხოვრობს“.

ნუთუ პაციენტის ავადმყოფობას ექიმს დააბრალებდით, თუკი ავადმყოფმა ექიმის მიერ გამოწერილი რეცეპტი უგულებელყო? რასაკვირველია, არა. ქრისტიანული სამყაროს წარმომადგენლებმა კი დიდი ხანია უგულებელყვეს იესოს მითითებები, რომლებიც მათ ყოველდღიური პრობლემების დაძლევაში დაეხმარებოდა. რაკი ასეა, იმის მაგივრად, რომ უარყოთ იესო ეგრეთ წოდებული ქრისტიანების გამო, რომლებიც არ მისდევენ მის მითითებებს, ნუთუ უკეთესი არ იქნებოდა, თავად გაგეგოთ მის შესახებ ზოგი რამ? გადაფურცლეთ ბიბლია და ნახეთ, სინამდვილეში ვინ არის იესო და როგორ შეუძლია მას თქვენი ცხოვრების შეცვლაც.

სიყვარული — მისი მითითება

იესო ქრისტე იყო დიდებული მასწავლებელი, რომელიც დაახლოებით 2 000 წლის წინათ ცხოვრობდა პალესტინაში. მისი ბავშვობის შესახებ ძალიან ცოტა რამ არის ცნობილი (მათე 1 და 2 თავები; ლუკა 1 და 2 თავები). როდესაც იესო 30 წლის გახდა, მსახურება დაიწყო, „რომ ჭეშმარიტება დაემოწმებინა“ (იოანე 18:37; ლუკა 3:21—23). იესოს ცხოვრების შესახებ არსებული ოთხი ისტორიული ცნობა ყურადღებას ამახვილებს მის საჯარო მსახურებაზე, რომელიც დედამიწაზე მისი ყოფნის უკანასკნელ სამ-ნახევარ წელიწადს მოიცავს.

მსახურებისას იესომ თავის მოწაფეებს მისცა გასაღები, რომელიც ცხოვრებაში მათ სხვადასხვა პრობლემებთან გამკლავებაში დაეხმარებოდა. რა იყო ეს გასაღები? ეს იყო სიყვარული. ისტორიაში ერთ-ერთი ყველაზე ცნობილი ქადაგებისას, რომელიც მთაზე ქადაგებად არის წოდებული, იესომ თავის მოწაფეებს ასწავლა, როგორ უნდა გამოევლინათ სიყვარული ადამიანებისადმი. მან თქვა: „ამიტომ, ყველაფერში, როგორც გინდათ, რომ მოგექცნენ ადამიანები, თქვენც ისევე მოექეცით მათ“ (მათე 7:12). ამ პრინციპს „ოქროს წესი“ ეწოდა. „ადამიანებში“, რომლებიც იესომ ამ შემთხვევაში მოიხსენია, მტრებიც კი იგულისხმებიან. იმავე ქადაგებაში მან თქვა: „გიყვარდეთ თქვენი მტრები, დალოცეთ თქვენი მაწყევრები, სიკეთე უყავით თქვენს მოძულეებს და ილოცეთ მათთვის, ვინც თქვენ გავიწროებთ და გდევნით“ (მათე 5:44). ნუთუ ასეთი სიყვარული არ გადაწყვეტდა დღეს არსებულ მრავალ პრობლემას? ინდოეთის გამოჩენილი ლიდერი, მოჰანდას განდიც, ასე ფიქრობდა. ის ამბობდა: „როდესაც [ჩვენ] შევთანხმდებით ქრისტეს მიერ მთაზე ქადაგებისას მოცემული სწავლებების საფუძველზე, მაშინ გადავწყვეტთ . . . მთელი მსოფლიოს პრობლემებს“. სიყვარულის შესახებ იესოს სწავლებებს, მათი გამოყენების შემთხვევაში, კაცობრიობის განკურნების ძალა შესწევს.

მის მოქმედებაში გამოხატული სიყვარული

იესო რასაც ასწავლიდა, იმას ახორციელებდა კიდეც. ის სხვების ინტერესებს საკუთარზე წინ აყენებდა და თავისი მოქმედებით სიყვარულს ამჟღავნებდა. ერთხელ იესო და მისი მოწაფეები მრავალ ადამიანს ისე მოემსახურნენ, რომ მათ ჭამისთვისაც არ გამოუყვიათ დრო. იესომ დაინახა, რომ მის მოწაფეებს ‘მცირედი მოსვენება’ სჭირდებოდათ, ამიტომაც ისინი უდაბურ ადგილას გაემართნენ. მაგრამ ხალხი უფრო ადრე მივიდა იქ და მათ მოსვლას ელოდა. როგორ მოიქცეოდი იესოს ადგილზე რომ ყოფილიყავი? იესოს „შეებრალა ისინი“ და „დაუწყო მათ მრავალი რამის სწავლება“ (მარკოზი 6:30—34). სიბრალულის ასეთმა ძლიერმა გრძნობამ აღძრა ის, რომ დახმარებოდა სხვებს.

იესოს მიერ სხვების სასარგებლოდ გაკეთებული საქმეები მხოლოდ სულიერი სწავლებით არ შემოიფარგლებოდა. ის პრაქტიკულადაც ეხმარებოდა მათ. მაგალითად, მან 5 000 კაცი დააპურა (თუ არ ჩავთვლით ქალებსა და ბავშვებს), რომლებიც მას მთელი დღის განმავლობაში გვიანობამდე უსმენდნენ. მოგვიანებით, სხვა 4 000 ადამიანი დააკმაყოფილა საკვებით. პირველ შემთხვევაში მან ხუთი პური და ორი თევზი, ხოლო შემდგომში, შვიდი პური და რამდენიმე პატარა თევზი გამოიყენა (მათე 14:14—21; 15:32—38; მარკოზი 6:35—44; 8:1—9). სასწაულებია? დიახ, იესო სასწაულთმოქმედი იყო.

იესომ აგრეთვე მრავალი ავადმყოფი განკურნა. მათ შორის იყო ბევრი ბრმა, კოჭლი, კეთროვანი და ყრუ. უფრო მეტიც, მან მკვდარიც კი აღადგინა! (ლუკა 7:22; იოანე 11:30—45). ერთხელ, კეთროვანი შეევედრა მას: „თუ გსურს, შეგიძლია ჩემი განწმედა“. რა უპასუხა იესომ? მან «გაიწოდა ხელი, შეახო მას და უთხრა: „მსურს, განიწმიდე!“» (მარკოზი 1:40, 41). იესო ადამიანებისთვის დახმარების გაწევის ძლიერი სურვილით იყო აღძრული. ასეთი სასწაულებით ის გასაჭირში მყოფთა მიმართ თავის სიყვარულს ავლენდა.

ძნელი დასაჯერებელია? იესომ ხომ სასწაულების უმეტესობა ხალხის წინაშე მოახდინა. მისი მოწინააღმდეგენიც კი, რომლებიც ყოველთვის ცდილობდნენ, ბრალდების მიზნით რამეში გამოეჭირათ, ვერ უარყოფდნენ იმ ფაქტს, რომ იესო სასწაულებს ახდენდა (იოანე 9:1—34). გარდა ამისა, მის სასწაულებს ის გარკვეული მიზანიც ჰქონდა, რომ ხალხს იესოში ღვთის მიერ გამოგზავნილი პიროვნება ამოეცნო (იოანე 6:14).

იესოს სწავლებასა და მის ცხოვრებაზე თვალის გადავლებაც კი მისადმი სიყვარულს გვინერგავს და ჩვენში იმ სურვილს აღძრავს, რომ მივბაძოთ მის სიყვარულს. მაგრამ იესო მხოლოდ ამ მხრივ როდი ახდენს თქვენს ცხოვრებაზე გავლენას. ის არ იყო მარტო დიდებული მასწავლებელი, რომელიც სიყვარულს ასწავლიდა. მან აჩვენა, რომ ის იყო ღვთის მხოლოდშობილი ძე, რომელიც ადრეც — ადამიანად გაჩენამდე — არსებობდა (იოანე 1:14; 3:16; 8:58; 17:5; 1 იოანე 4:9). იესოს ახლანდელი მდგომარეობა მას თქვენთვის გაცილებით მნიშვნელოვან პიროვნებად ხდის. ბიბლიიდან ჩანს, რომ იესო აღდგა და ახლა ღვთის სამეფოს ტახტზე ზის, როგორც მეფე (გამოცხადება 11:15). იესომ თქვა: „ესაა საუკუნო სიცოცხლე, რომ გიცნობდნენ შენ, ერთადერთ ჭეშმარიტ ღმერთს, და მას ვინც მოავლინე — იესო ქრისტეს“ (იოანე 17:3; 20:31). სინამდვილეში, იესო ქრისტეს შესახებ შემეცნების მიღება შეიძლება ნიშნავდეს უსასრულო სიცოცხლეს სამოთხეში! როგორ? ნუთუ კარგი არ იქნებოდა, იესოს შესახებ მეტი გესწავლათ და გეხილათ, როგორ დაგეხმარებოდათ მის მიბაძვაში ‘ქრისტეს სიყვარული, რომლითაც მოცულნი ვართ’? (2კორინთელთა 5:14). იეჰოვას მოწმეები სიამოვნებით დაგეხმარებოდნენ ამაში (იოანე 13:34, 35).

ბიბლიური ციტატები აღებულია წიგნიდან „ახალი აღთქმა და ფსალმუნები“, ზ. კიკნაძისა და მ. სონღულაშვილის თარგმანი (კს).